[1] Мийӧ Еныскӧт ӧтвыв уджаліссез. Сійӧн кеймисям тіян одзын: Енлісь бурсетӧмсӧ босьтӧ сьӧлӧманыт, медбы сія эз вӧв тіянлӧ весись сетӧм.
[2] Еныс тай висьталӧм: ─ Бур кадӧ Ме кылі тэнӧ, мездан лунас отсалі тэныт. Ӧні эд сія бур кадыс. Ӧні эд мездан луныс.
[3] Мийӧ некинӧс немӧн огӧ падмӧтӧ, медбы миян удж йылісь нем вӧлі висьтавны умӧльсӧ.
[4] Мийӧ асьнымӧс быд кадӧ видзам Енлӧн кысъяліссезӧн. Мыла быртӧг видзсям сьӧкыт кадӧ, кӧр миян вылӧ локтӧ умӧльыс. Кужам видзсьыны и дзескӧтлӧммез коста.
[5] Миянӧс вартлӧны, вашӧтлӧны да пуксьӧтӧны. Мийӧ садь быртӧдз уджаламӧ, узьтӧг оламӧ, кӧслуналамӧ.
[6] Оламӧ мийӧ сӧстӧма, бур мывкыдӧн, лӧгавтӧг. Мийӧ бура отсасям, кывзісям Вежа Ловсӧ, сьӧлӧмсянь радейтам.
[7] Висьтасям быльсӧ, быдӧс керам Ен вынӧн. Миян тышкасянным ─ Ен сьӧрті веськыта олӧмным.
[8] Миян йылісь ӧтіккез баитӧны бура, мӧдіккез видӧны. Мукӧдыс вӧвлытӧмсӧ миян йылісь висьтавлӧны, а кӧда и ошкӧны. Миянӧс пуктӧны бӧбӧтчиссезӧ, но мийӧ огӧ бӧбӧтӧ.
[9] Мийӧ тӧдтӧмӧсь, миянӧс тай тӧдӧны. Миянӧс шуӧны кулӧммезӧн, мийӧ тай ловьяӧсь. Миянӧс кулӧмӧдз вайӧтӧны, мийӧ тай огӧ кулӧ.
[10] Миянлӧ шогсӧ вайӧны, мийӧ тай пыр гажаӧсь. Миян нем абу, а миян сетӧмсянь унаӧн тай буржыка пондӧны овны. Миян нем абу, а быдӧс тай миян киын.
[11] Коринфын оліссез, тіянлӧ мийӧ быдӧс висьталім, миян сьӧлӧммезным осьтаӧсь тіянлӧ.
[12] Тіянӧс мийӧ босьтім асланым сьӧлӧммезӧ, а тіян сьӧлӧммезныт пӧданаӧсь.
[13] Челядьлӧ моз баита: кӧть вештісьӧм могись осьтӧ миянлӧ сьӧлӧммезнытӧ.
[14] Кристоссӧ тӧдтӧммескӧт ӧтік сийӧсӧ эд пырӧ. Мый ӧтласаыс Ен сьӧрті веськыта олӧмыслӧн да умӧльсӧ керӧмыслӧн? Мый ӧтласаыс югытыслӧн да пемытыслӧн?
[15] Кытшӧм баитчӧм Кристос да Велиар коласын? Вермасӧ я ӧтмоза овны Кристослӧ веритіссес да кӧдна Сылӧ озӧ веритӧ?
[16] Мый ӧтласаыс Ен керкулӧн ас керӧм еныскӧт? Тійӧ эд ловья Енлӧн оланін. Ачыс Еныс сідз висьталӧм: ─ Пыра ны пытшкӧ, понда ветлӧтны ныкӧт. Ме лоа нылӧ Енӧн, нія лоасӧ Менам отирӧн.
[17] Дӧсвидзисьыс шуӧ и сідз: ─ Сійӧн петӧ ны коласісь, янсӧтчӧ! Сэрпӧсьыс бердӧ эд павкӧтчӧ и Ме босьта тіянӧс челядьӧн.
[18] Ме лоа тіянлӧ Айӧн. Тійӧ лоатӧ Меным зоннэзӧн да ныввезӧн. Сідз шуӧ Дӧсвидзись, Дӧсвермись Ен.