[1] Тіян дынӧ локта куимӧтпыр ни. «Морткӧт бӧрйисьӧны вӧлись сэк, сы керӧм йылісь висьталасӧ кӧ кык, куим я морт».
[2] Мӧдпырись вовлӧмӧ коста ме тіянӧс ӧлі. Ӧні ме абу тіянкӧт, но жыв ме тіян дынын, бӧра ӧла. Сылӧ, кин одззамоз керӧ умӧльсӧ да и мӧдіккеслӧ висьтала: кӧр локта, тіянлӧ дӧнзяс.
[3] Тійӧ адззылат бы, Кристосыс я баитӧ ме пыр. Тіян дынын Сія абу вынтӧм. Ассис вынсӧ Сія мыччалӧ тіян коласын.
[4] Кристосыс вӧлі дорӧм крест бердӧ вынтӧм, но Еныс вынӧн Сія ловья. Мийӧ, Кристоскӧт ӧтлаасьӧммес, асьным вынтӧмӧсь, но Сыкӧт Еныс вынӧн пондам овны, медбы кысъявны тіянлӧ.
[5] Тӧдмалӧ-видзӧтӧ асьнытӧ, веритат я тійӧ. Одӧ разь тійӧ асьнытӧ тӧдӧ? Кристос Исусыс эд тіян пытшкын. Буди тійӧ абу сэтшӧмӧсь, кытшӧммезӧн колӧ лоны.
[6] Мый шуны миян йылісь? Ме чайта, тійӧ казялат: мийӧ сэтшӧмӧсь, кытшӧммезӧн миянлӧ и колӧ лоны.
[7] Енлӧ кеймисям, медбы тійӧ нем умӧльсӧ эдӧ керӧ. Огӧ сы понда, медбы мыччавны асьнымӧс сетшӧммезӧн, кытшӧммезӧн миянлӧ колӧ лоны. Кеймисям, медбы тійӧ керитӧ бурсӧ, кӧть мийӧ и огӧ лоӧ сэтшӧммезӧн, кытшӧммезӧн миянлӧ колӧ лоны.
[8] Енлӧн быльлӧ паныт сувтны мийӧ вынтӧмӧсь, а вынаӧсь быльсӧ дорйыны.
[9] Мийӧ гажмам, тійӧ кӧ вынаӧсь, а мийӧ вынтӧмӧсь. Эта понда эд и кеймам, медбы тійӧ быд ладорсянь лоит бурӧсь.
[10] Ме сійӧн и гижа тіянлӧ локтытӧдззам, медбы эз ков тіянкӧт чорыта баитны, кӧр локта. Менӧ эд Дӧсвидзисьыс сувтӧтіс Ассис уджсӧ керны. Эз сувтӧт разьны, сувтӧтіс вынсьӧтны-лэбтыны.
[11] Воннэзӧ, медбӧрын висьтала: пыр лоӧ гажаӧсь, вежсьӧ бурланьӧ, ӧтамӧднытӧ бурӧтӧ, ӧтамӧдныткӧт лӧсялӧ, олӧ лӧня. Сэк лӧньсӧ да радейтӧмсӧ сетісь Еныс оз коль тіянӧс.
[12] Окыштӧ ӧтамӧднытӧ вежа окалӧмӧн. Тіянлӧ юӧр ыстӧны Кристослӧн быдӧс вежа отирыс.
[13] Миян Дӧсвидзись Кристос Исуслӧн бурсетӧмыс да Ен Айнымлӧн радейтӧмыс ась лоасӧ тіянкӧт быдӧнныткӧт! Ась Вежа Лолыс ӧтлаӧтӧ тіянӧс! Аминь.