[1] Поди бӧра пондам тіянкӧт тӧдсасьны? Колӧны разь миянлӧ ӧтамӧднымсянь ошкан-тӧдсӧтан гижӧттэз, кыдз керсьӧ отирлӧн?
[2] Миян гижӧтыс ─ тійӧ, гижӧмась миян сьӧлӧммезын. Тіянӧс быд мортыс вермӧ тӧдны, жыв гижӧтсӧ лыддьӧтӧ.
[3] Тійӧ асьныт мыччалат, тійӧ ─ Кристослӧн гижӧт. Сэтшӧм гижӧтнас лоит миян висьтасьӧмсянь. Абу гижӧмась чернилоӧн, а ловья Еныс Лолӧн. Абу гижӧмась из пӧввез вылын, а морт сьӧлӧммезын.
[4] Сідз вермам висьтавны, мийӧ эд бура надейтчам Еныс вылӧ, а надейтчӧмным ─ Кристоссянь.
[5] Мийӧ огӧ вермӧ висьтавны, эта пӧ быдӧс миянсянь. Мийӧ асьным нем огӧ вермӧ. Миян вермӧмным Енсянь.
[6] Сія сетӧ миянлӧ вын да кужӧм нуӧтны Виль Йитӧтлісь уджсӧ. Мийӧ огӧ керӧ гижӧм Туйдӧтлісь уджсӧ, Лолыслісь керам. Гижӧм Туйдӧтыс вайӧтӧ кулӧмӧдз, а Лолыс ловзьӧтӧ.
[7] Туйдӧтыс вӧлі гижӧм из пӧввез вылын. Сійӧ Туйдӧтсӧ Моисейыслӧ сетӧм Еныс. Сы югьялӧмсянь Моисейыслӧн чужӧмыс сідз пондӧм югьявны, нельки Израиль отирыс абу вермӧмась видзӧтны сы вылӧ. А сія югьялӧмыс эд чулалӧ. Кулӧмӧдз вайӧтан Туйдӧтыслісь уджсӧ керӧмыс вӧлӧм кӧ сэтшӧм югьялана,
[8] сэк абу я югьяланажык Лолыслӧ кысъявны?
[9] Туйдӧтыс мортсӧ судитӧ. Сія Туйдӧтлӧ кысъялӧмыс вӧлӧм югьялана. Мымдаӧн сэк югьяланажык сія кысъялӧмыс, кӧда керӧ мортсӧ Ен сьӧрті веськыта олісьӧн!
[10] Кӧда одзжык вӧлі сэтшӧм бура югьялана, буржыка югьяланаыс локтӧмсянь сія абу ни югьялана. Мӧдыс эд сійӧ вермӧ.
[11] Чулаланаыс кӧ сідз югьяліс, сэк мымдаись буржыка югьялӧ пырсяыс!
[12] Пырсясӧ мийӧ надейтчӧмӧн видзчисям, сійӧн керам сетӧм уджсӧ повтӧг.
[13] Мийӧ огӧ керӧ Моисейыс моз. Сія тай вевттьывлӧм ассис чужӧмсӧ, Израиль отирыслӧ абу мыччалӧм югьялӧмыслісь чулалӧмсӧ.
[14] Израиль отирлӧн вежӧрныс пӧдана. Сія жӧ вевттисяныс ӧнӧдз куйлӧ ны вылын Важ Йитӧтлісь Гижӧтсӧ лыддьӧтӧмныс коста. Сійӧ вевттьӧссӧ чӧвтӧ дзир Кристосыс.
[15] Моисейыслісь Туйдӧтсӧ лыддьӧттӧн вевттисяныс ӧнӧдз вевттьӧ нылісь вежӧрнысӧ.
[16] Дӧсвидзисьыс дынӧ локтӧм бӧрын эта вевттисяныс усьӧ.
[17] Дӧсвидзисьыс ─ Лов. Кытӧн Дӧсвидзисьлӧн Лолыс, сэтчин мездӧтчӧм.
[18] Осьта чужӧмӧн мийӧ видзӧтам Дӧсвидзисьыс вылӧ. Сылісь югьялӧмсӧ мийӧ адззам кыдз видзӧтчанісь. Сысянь мийӧ лунісь лунӧ вежсям, пондам югьявны Сы моз. Сэтшӧммезӧн миянӧс керӧ Дӧсвидзисьлӧн Лолыс.