[1] Донаэзӧ, сымда бурсӧ Еныс кӧсйӧм миянлӧ сетны! Сідзкӧ, дзимлялам быдӧс, мый сэрпӧсьтӧ вывтырнымӧс да ловнымӧс. Пондам овны Енсис полӧмӧн, медбы миян оланным быдсӧн вӧлі вежа.
[2] Осьтӧ миянлӧ сьӧлӧммезнытӧ. Мийӧ некинлісь сьӧлӧмсӧ эгӧ дзугыльтӧ, некинлӧ эгӧ керӧ умӧльсӧ, некинсянь эгӧ кошшӧ мыйкӧ босьтны.
[3] Ог баит осудитны тіянӧс. Ме эд одзжык висьтавлі ни: тійӧ миян сьӧлӧммезын. Оламӧ, куламӧ я, тійӧ пыр миянкӧт.
[4] Ме надейтча тіян вылӧ да ошшася тіянӧн. Ёна тӧждісьӧмным коста тійӧ менӧ вынсьӧтіт, и ме ӧддьӧн гажми.
[5] Кӧр мийӧ локтім Македонияас, мийӧ немымда эгӧ вермӧ шоччисьны. Миянӧс быд ладорсянь дзескӧтлісӧ: ӧтӧрись отирыс уськӧтчывлісӧ, а пытшканым вӧлі полӧм.
[6] Но Еныс тӧждісиссесӧ бурӧтӧ. Сія миянӧс бурӧтіс Титыс локтӧмӧн.
[7] Эта гажным абу дзир сы локтӧмсянь, но и сысянь, мыйсянь сія гажмӧм тіян дынын. Титыс висьтасис ме понда тіян тӧждісьӧм да горзӧм йылісь, сьӧлӧммезныт сотчӧм йылісь. Сысянь ме ӧддьӧнжык гажми.
[8] Менам гижӧтӧ вайис тіянлӧ сьӧлӧм шог, сійӧн ме тіян понда тӧжді. Ӧні ог ни тӧжды. Ме эд адзза, тіян шогныт эз вӧв дыр кежӧ.
[9] Ӧні ме гажӧтча, но менам гажӧ не тӧждісьӧмнытсянь. Тіянӧс гажтӧмыс кутіс умӧльсӧ керӧмныт кузя, сійӧн гажми. Тійӧ эд пондіт тӧждыны Еныс понда. Сідзкӧ, миянсянь тіянлӧ эз лок умӧльыс.
[10] Еныс понда кӧ мортыс тӧждісьӧ, сія дугдӧ керны умӧльсӧ да мезмӧ. А мезмӧм йылісь жалейтны оз ков! Му вылісьыс понда кӧ мортыс тӧждісьӧ, сія тӧждісьӧмыс вайӧтӧ кулӧмӧдз.
[11] Тіянӧс гажтӧмыс кутіс Еныс понда. Видзӧтӧ, мый сія аркмӧтіс тіянын: тійӧ вынсьӧтчит асьнытӧ дорйыны, умӧльсӧ керисьыс вылӧ быдӧнныт лӧгасит. Тійӧ повзит, пондіт тӧждыны, видзчисит пантасьны миянкӧт да быдӧсын мыччаліт: тійӧ ─ сӧстӧмӧсь.
[12] Сія гижӧмӧ эз вӧв умӧльсӧ керись кузя да сы кузя, кӧдалӧ умӧльсӧ керисӧ. Ме гижи, медбы вежӧртіт, кыдз мийӧ тіян понда Еныс одзын тӧждісям.
[13] Миян сьӧлӧм выланым лоис долыт, тійӧ дугдіт тӧждыны да. Мийӧ буржыка гажмим Титыс гажсянь. Сылӧн оз ни вись сьӧлӧмыс тіян понда.
[14] Ме Титыс одзын ошки тіянӧс и меным сы понда эз ковсьы гӧрдӧтны. Мийӧ эд тіян одзын эгӧ висьталӧ ӧтік бӧбӧтана кыв. Сідз и Титыслӧ миян ошшасьӧмным эз вӧв бӧбӧтчӧм.
[15] Сія тӧдвылас видзӧ быдӧннытлісь кывзісьӧмнытӧ. Сійӧ панталікӧ тійӧ ёна тӧждісьӧмныт да полӧмныт. Сійӧн сьӧлӧмыс сійӧ ёнжыка кыскӧ тіян дынӧ.
[16] Сідзкӧ, менам сьӧлӧм вылам гаж, ме эд быдӧсын верма тіян вылӧ надейтчыны.