[1] Невна терпитыштіт бы тійӧ менчим вежӧртӧг баитӧмӧс! Да тійӧ и терпитат менӧ.
[2] Ме тӧждіся эд тіян понда Еныс тӧждісьӧмӧн. Ме кораси тіянӧс ӧтік жӧниклӧ ─ Кристослӧ. Тіянӧс колӧ сувтӧтны Сы одзӧ кыдз сӧстӧм нылӧс.
[3] Кыйыс тай аслас ылӧтлӧмӧн Евасӧ бӧбӧтӧм. Ме пола, медбы сідз жӧ эз тшык тіян мывкыдныт. Кристосыскӧт тійӧ олат осьта сьӧлӧмӧн. Сія оланісь мӧдӧрӧ эдӧ ылалӧ.
[4] Тіян дынӧ локтӧны юӧртны мӧдік Исус йылісь, кӧдӧ мийӧ эгӧ юӧртӧ. Сетӧны мӧдік лов, кӧда тіян эз на вӧв. Висьтасьӧны мӧдік бур юӧр, кӧда тіянлӧ эз вӧв юӧртӧм. Сэтшӧммесӧ тійӧ бура терпитат.
[5] Ме тай юрам видза: ме ог умӧльжыка кер уджӧс этна «ыджыт» апостоллэз сьӧрті.
[6] Ась ме ог куж бура баитны, а тӧда да вежӧрта унажык. Тійӧ эд асьныт тӧдат миянӧс быд ладорсянь.
[7] Тіянӧс лэбтӧм понда ме ачымӧс лэдзи. Еныслісь Бур Юӧрсӧ тіянлӧ висьтасьӧм понда ме сьӧм эг босьтлы. Умӧльӧ я ме кери?
[8] Позьӧ висьтавны, ме мӧдік вичкуэз кушті. Нія меным сетлывлісӧ сьӧмсӧ тіян дынын уджӧс керны. Тіян дынын овтӧн мукӧдпыр и медколанаыс эз вӧв, но ме тіянлісь эг корлы.
[9] Македонияись локтісӧ воннэзӧ да отсалісӧ меным. Да и быдӧсын ме видзӧті, медбы тіянлӧ месянь эз вӧв сьӧкыт. Ме и одзлань ог понды тіянлісь босьтны.
[10] Кристосыслӧн быльыс ме пытшкын. Сійӧн ме бӧбӧттӧг висьтала: менчим этадз ошшасьӧмӧс Акаия мусис некин оз вермы висьтавны, абу пӧ сідз.
[11] Мыля ме сідз кера? Поди, ог радейт тіянӧс? Радейта эд, Еныс тӧдӧ. Но кыдз ме ӧні кера, сідз и одзлань понда керны.
[12] Сідз кера, медбы ошшасиссес эзӧ вермӧ висьтавны, нія пӧ керӧны Еныслісь уджсӧ миян моз жӧ.
[13] Сэтшӧммес тай асьнысӧ пуктӧны Кристослӧн апостоллэзӧ, а нія бӧбӧтчись апостоллэз, ылӧтлісь уджаліссез.
[14] Мый сэтӧн сэтшӧмыс: ачыс сотанаыс эд вермӧ мыччавны асьсӧ югытлӧн ангелӧн.
[15] Сійӧн эта абу ыджыт удж, кульыслӧн ангеллэс пӧртчӧны кӧ Енлӧн уджаліссезӧ. Нылӧ эд медбӧрын лоас сетӧм асланыс удж сьӧрті.
[16] Сэтчӧ содта: эдӧ пуктӧ менӧ мывкыдтӧм мортӧ. А лыддят кӧ сэтшӧмӧн, то кывзӧ менӧ мывкыдтӧмӧс моз. Лэдзӧ менӧ невна ошшасьыштны.
[17] Менам ошшасьӧмӧ абу Дӧсвидзисьсянь. Этадз повтӧг баитӧмӧ жыв учӧт мывкыдалӧн.
[18] Му выліссес эд уна ошшасьӧны, сідзкӧ и ме ошшасьышта.
[19] Тійӧ мывкыда отир, кокнита терпитат мывкыдтӧммесӧ.
[20] Кин ыждалӧ тіян вылын, тіянлісь сёйӧ, мырддьӧ, асьсӧ тіян одзын вылына лэбтӧ, чужӧмбаннэзнытӧ шовкйӧ, тійӧ тай нійӧ терпитат.
[21] Висьталӧмӧсянь ачым гӧрдӧта: сідз керны вынным эз тырмы. Кин пондас мыйӧнкӧ ошшасьны кӧ, висьтала вежӧрттӧм морт моз, лысьта и ме ошшасьыштны.
[22] Нія иудейез? И ме иудей. Израиль отир? Сідз и ме. Нія Авраам увтырись? И ме.
[23] Нія Кристослӧн уджаліссез? Мывкыдтӧг баита, ме унажык кери. Ме унажык уджалі. Менӧ унаись вартлісӧ, Кристосыс понда унажыкись пукалі, унаись вӧлі куландорын.
[24] Иудейес менӧ куимдас ӧкмыс сӧтӧмӧн вартлісӧ витісь.
[25] Куимись вартлісӧ беддезӧн, ӧтпыр иззэзӧн шупкалісӧ, куимись лӧсявлі саридзас корабль вӧйӧм коста, ой и лун вӧлі саридз ваас.
[26] Уна вӧлі туйезын. Мекӧт пыр вермис мыйкӧ умӧль лоны: юэз вылын, каррезын, кушмуын да саридз вылын. Ме вылӧ вермисӧ уськӧтчыны да быдӧс мырддьыны. Меным вермисӧ умӧльсӧ керны аслам увтырись отир, мӧдік отир, да и воннэз, кӧдна сідз дзир шусьӧны.
[27] Уджын вӧлі садь быртӧдз, унаись узьлытӧг, ютӧг, сёйтӧг, унаись кӧслуналі, олі кӧдзытын, пасьтӧг.
[28] Сэтчӧ эшӧ и ме дынӧ быд лун ӧксьывлісӧ уна отир. Сэтӧн и быдлунся тӧждісьӧм вичкуэз понда.
[29] Эг я ме вӧв ныкӧт, кин вынтӧмсявліс? Кытшӧм ылалӧм морт понда менам сьӧлӧмӧ эз доймы?
[30] Меным ковсяс кӧ ошшасьны, понда ошшасьны сійӧн, мыйын ме вынтӧм.
[31] Еныс, миян Дӧсвидзись Исуслӧн Айыс, тӧдӧ: ме ог бӧбӧтчы. Сылӧ пырся-пыр ошкӧм!
[32] Дамаскас Арета ӧксулӧн сувтӧтӧм юралісьыс видзӧтіс карсӧ, медбы менӧ кутны. Но менӧ лэдзисӧ карсис ён из йӧр саяс ӧшынӧт ыджыт кудын. Сійӧн ме эг сюр сы киӧ.