[1] Мийӧ тӧдамӧ, кӧр эта му вылісь миян гортным ─ вывтырным разьсяс, миян эм енӧжас Еныссянь оланін. Сія керкуыс абу киӧн керӧм, сія пырся.
[2] Сійӧн мийӧ и ышлолаламӧ, пырамӧ бы енӧжись оланінаным, пасьталамӧ ни бы вильсӧ.
[3] Кӧр пасьтасямӧ, сэк огӧ ни кольччӧ пасьтӧмӧсь.
[4] Эта вывтыр-керкуын овтӧн мийӧ сьӧкытсяняс ышлолалам. Мийӧ огӧ бы кольӧ вывтырнымӧс, но куланасӧ вежамӧ бы пырсяыс вылӧ, медбы оланыс вевттис куланасӧ.
[5] Эта понда Еныс и аркмӧтіс миянӧс да сетіс Ассис Ловсӧ, Кӧда миянлӧ висьталӧ: Сія кӧсйӧмсӧ керас.
[6] Сійӧн мийӧ видзсям повтӧг. Асьным эд тӧдамӧ: кытчӧдз олам вывтыраным, мийӧ огӧ олӧ Дӧсвидзисьыс дынын.
[7] Мийӧ огӧ олӧ сійӧн, мый адззам. Олам веритӧмнаным.
[8] Мийӧ огӧ полӧ. Асьным юраным видзам, миянлӧ буржык петны вывтырсиным да пырны Дӧсвидзись дынӧ.
[9] Сійӧн, олам я Сы дынын, огӧ на олӧ я, тӧждісьӧмӧн вынсьӧтчам, медбы пыр вӧлім Сылӧ туяна отирӧн.
[10] Миянлӧ быдӧннымлӧ ковсяс локны Кристослӧн суд вылӧ. Быдӧнным босьтамӧ му вылас оліканым керӧм понда: ӧтіккез ─ бурсӧ керӧм понда, мӧдіккез ─ умӧльсӧ керӧм понда.
[11] Дӧсвидзисись полӧмсӧ мийӧ тӧдамӧ. Сійӧн и мӧдіккезӧс сэтчӧ велӧтам. Еныс эд миянӧс бура тӧдӧ. Юраным тай видзам: сідз и тіян сьӧлӧммезныт миянӧс бура тӧдӧны.
[12] Мийӧ асьнымӧс огӧ пондӧ вились ошкыны тіян одзын. Но тійӧ вермат миянӧс ошкыны ошшасиссеслӧ, медбы тіян вӧлі мый висьтавны нылӧ. Нія эд озӧ ошшасьӧ пытшкисьнаныс, а ошшасьӧны сійӧн, мый тыдалӧ.
[13] Кинкӧ поди шуас, вежӧрнымӧс пӧ ӧштім. Ӧштім кӧ, то Еныс понда, бур вежӧраӧсь кӧ, то тіян понда.
[14] Кристослӧн радейтӧмыс эд веськӧтлӧ миянӧн. Мийӧ юраным видзам: ӧтік Морт куліс кӧ быдӧс отир понда, то быдӧнныс кулісӧ.
[15] Быдӧнныс понда куліс Кристосыс, медбы оліссес эзӧ ни олӧ ас пондасиныс, а олісӧ Кристосыс понда. Сія эд ны понда куліс да ловзис.
[16] Сійӧн ӧнісянь морт вежӧр сьӧрті некинӧс огӧ ни видзӧтӧ. Кристоссӧ мийӧ кӧркӧ видзӧтім кӧ сідз, ӧні огӧ ни сідз керӧ.
[17] Сідзкӧ, кин ӧтлаасис Кристоскӧт, сія вились аркмӧтӧм. Важыс муніс, ӧні быдӧс виль.
[18] Эта быдӧс Енсянь. Сія бурасис миянкӧт Кристос Исусыс пыр. Миянлӧ сетіс удж ─ вайӧтны отирсӧ Ен дынӧ, медбы Сыкӧт бурасисӧ.
[19] Еныс Кристос Исусыс пыр бурасис му вылын оліссескӧт. Ны вылӧ умӧль керӧммезнысӧ оз ни вайӧт. А миянлӧ тшӧктіс висьтасьны бурасьӧм йылісь Кыв.
[20] Сідзкӧ, мийӧ ыстӧмӧсь Кристос нимсянь. Миян пыр Ачыс Еныс баитӧ тіянкӧт. Кристос нимӧн корамӧ: бурасьӧ Еныскӧт.
[21] Кристосыслӧн эз вӧв ӧтік умӧль керӧм. Миянлісь умӧль керӧммесӧ Еныс пуктіс Сы вылӧ, медбы Сыкӧт ӧтлаасьӧмсянь мийӧ лоим Ен одзын веськыта оліссезӧн.