[1] Liá-têu sṳ yî-heu, Â-ha̍p-sùi-lû-vòng thì-sṳ̂n Â-kap-ngìn Ha̍p-mí-thai-thâ ke lai-é Ha̍p-man cho chái-siong.
[2] Vòng min-lin só-yû vòng-kiûng ke sú-ví, ham kì-têu oi hiong Ha̍p-man khúi-pai, péu-sṳ chûn-kin. Kì-têu chhiòn-phu chûn-chhiùng vòng ke min-lin, chṳ́-yû Ma̍t-tí-kói m̀-hén khúi-pai.
[3] Vòng-kiûng chûng khì-thâ ke kôn-yèn mun Ma̍t-tí-kói, ngióng m̀ fu̍k-chhiùng vòng ke min-lin.
[4] Kì-têu ngit-ngit khien kì, chúng-he kì hàn-he m̀-thâng. Heu-lòi, kì sṳ̂-ha hiong kì-têu kóng: “Ngài he Yù-thai-ngìn, cho-m̀-tet hiong Ha̍p-man khúi-pai.” Só-yî kì-têu hi lâu Ha̍p-man kóng, khon kì ngiûn tet-hâ Ma̍t-tí-kói ke hàng-vì mò.
[5] Ha̍p-man tî Ma̍t-tí-kói m̀-hén hiong kì khúi-pai, chhiu thai-fat phì-hi.
[6] Tông kì yu tî Ma̍t-tí-kói he Yù-thai-ngìn, chhiu kiet-thin m̀ tân-chhiang chhù-thet Ma̍t-tí-kói yit-sà; kì kie-va̍k hó-se, oi me̍t-thet Â-ha̍p-sùi-lû-vòng koet-nui só-yû ke Yù-thai-ngìn, chhiu-he Ma̍t-tí-kói ke pún-chhu̍k ngìn.
[7] Â-ha̍p-sùi-lû-vòng thúng-chhṳ ke thi sṳ̍p-ngi ngièn châng-ngie̍t, chhiu-he Nì-san-ngie̍t, Ha̍p-man min-lin ngìn chhai kì mien-chhièn chhû-chhiâm (yu ham-cho chhû phû-ngí), chhû-chhut ke chhiâm chṳ́-mìn sṳ̍p-ngi ngie̍t (Â-tha̍t-ngie̍t) sṳ̍p-sâm ngit, chin-hàng kì ke kie-va̍k.
[8] Ha̍p-man lâu Â-ha̍p-sùi-lû-vòng kóng: “Yû yit-ke mìn-chhu̍k fûn-san he̍t chhai vòng-koet tak-sén. Kì-têu yû chhṳ-kâ ke fûng-siu̍k si̍p-koan, lâu só-yû khì-thâ ke mìn-chhu̍k mò khiung-yong; m̀ tân-chhiang án-ngiòng, kì-têu ya m̀ chûn-sú vòng ke fap-li̍t. Liù án-ngiòng ke ngìn tui koet-vòng mò hó-chhu.
[9] Na-he koet-vòng khon-cho hó, chhiáng ha min-lin sêu-me̍t kì-têu. Ngài pó-chṳn yû khó-nèn tet-tó sâm-sṳ̍p si-van kûng-kîn ke ngiùn-è, lòi chen-kâ koet-khu ke sû-ngi̍p.”
[10] Só-yî, vòng pok-hâ kì sú-chṳ́ tai-tén ke yin-é kâu-pûn Yù-thai-ngìn ke tui-thi̍t — Â-kap-ngìn Ha̍p-mí-thai-thâ ke lai-é Ha̍p-man.
[11] Vòng tui kì kóng: “Liá-têu ngìn lâu kì-têu ke ngiùn-è chhiòn-phu kâu-pûn ngì; ngì oi ngióng-pân cho chhiu ngióng-pân cho!”
[12] Châng-ngie̍t sṳ̍p-sâm, Ha̍p-man chhiu ham vòng ke sû-ki lòi, oi kì-têu fat-chhut thûng-ko, yung ke-sṳ̀ vòng koet-nui tak-sén tak-chhu̍k ke vùn-sṳ siá hâ-lòi, pûn só-yû ke sén-chóng, chúng-tuk, lâu kok-chhu̍k ke chhu̍k-chóng. Liá thûng-ko he fung Â-ha̍p-sùi-lû-vòng ke miàng siá ke, tun-tén vòng sú-chṳ́ só-tai ke yin-é.
[13] Sung-sin ke ngìn chiông thûng-ko sung-to vòng-koet ke tak-sén hi, han-thin thai-kâ oi chhai sṳ̍p-ngi ngie̍t (Â-tha̍t-ngie̍t) sṳ̍p-sâm liá yit-ngit chiông só-yû ke Yù-thai-ngìn, mò-lun nàm-ńg ló-yu, chhiòn-phu chhṳ̀-thet, me̍t chhiang-chhiang, pin oi mu̍t-sû kì-têu ke chhòi-vu̍t.
[14] Thûng-ko sung-to tak-sén, oi pûn mìn-chung tî, hó chhai ke-ngit to-lòi ke sṳ̀, tak-ke ngìn chhiòn-phu chún-phi hó.
[15] Cheu vòng ke min-lin, sung-sin ke ngìn kón-kín chhut-fat, ya chiông liá thûng-ko chhai sú-tû Sû-sân kûng-pu. Sû-sân-sàng ke ngìn chhiòn-phu chho̍k-kiâng lon thet-hi, chúng-he vòng lâu Ha̍p-man chhô hâ-lòi lîm-chiú.