[1] Ke am-pû, vòng soi m̀-lo̍k kau, chhiu min-lin ngìn chiông kôn-fông ke li̍t-sṳ́ nâ-lòi thu̍k pûn kì thâng.
[2] Kì-têu thu̍k ke ki-liu̍k yû yit-thon án-ngiòng kóng: “Lióng-ke chóng-mùn ke thai-kam Phit-tham lâu Thì-lie̍t, kie-mèu am-sat Â-ha̍p-sùi-lû-vòng, Ma̍t-tí-kói chiông liá-sṳ fat-kok po-ko.”
[3] Vòng mun: “Ngài-têu yû vi liá-sṳ pûn Ma̍t-tí-kói má-ke chûn-yùng ya-he thi-vi mò?” Vòng ke phu̍k-ngìn en-kóng: “Má-ke tû mò.”
[4] Vòng mun: “Yû má-ngìn chhai kiûng-thìn tú?” Liá-sṳ̀, Ha̍p-man tú-hó ngi̍p-to kiûng-thìn ngoi, oi khiù vòng chiông Ma̍t-tí-kói tiau chhai kì só yi-phi ke káu-hìn-ka táng.
[5] Phu̍k-ngìn chhiu en-kóng: “Ha̍p-man chhai liá-vi, oi kien vòng.” Vòng kóng: “Tai kì ngi̍p-lòi!”
[6] Ha̍p-man ngi̍p-lòi. Vòng tui kì kóng: “Yû yit-ke ngìn, ngài tông sióng-oi su kì chûn-yùng; ngài oi ngióng-pân cho nè?” Ha̍p-man sîm-tú sióng: “Vòng sióng-oi su kì chûn-yùng ke ngìn hàn-yû má-ngìn nè? Tông-yèn he ngài â!”
[7] Só-yî, Ha̍p-man hiong vòng kien-ngi: “Vòng oi án-ngiòng chióng-sóng kì sióng-oi su kì chûn-yùng ke ngìn:
[8] Ham ngìn tai yit-sṳ̂n vòng chok-ko ke vòng-phàu lòi, hàn oi khiên yit-chak vòng khì-ko ke mâ-é lòi, thèu oi tai-tén vòng-mâ ke miên-liù,
[9] yèn-heu min-lin vòng chui chûn-kui ke thai-sṳ̀n lâu liá-ke ngìn chok vòng-phàu, fù kì sông mâ, pin vi kì khiên mâ chhai sàng-tú ke kóng-chhòng yù-hàng. Kì-têu yù-hàng ke sṳ̀, liá thai-sṳ̀n oi chhai kì thèu-chhièn hêm-kóng: ‘Khon â, vòng án-ngiòng chióng-sóng kì sióng-oi su kì chûn-yùng ke ngìn!’ ”
[10] Vòng tui Ha̍p-man kóng: “Kón-kín chiông vòng-phàu lâu mâ-é chún-phi hó-se, cheu ngì ke kien-ngi, chiông chûn-yùng su-pûn ke chhô chhai vòng-kiûng mùn-héu ke Yù-thai-ngìn Ma̍t-tí-kói, yit-yong ya cho-m̀-tet séu!”
[11] Só-yî, Ha̍p-man chiông vòng-phàu lâu mâ-é chún-phi hó-se. Kì lâu Ma̍t-tí-kói chok vòng-phàu, fù kì sông mâ, pin vi kì khiên mâ chhai sàng-tú ke kóng-chhòng yù-hàng, chhai thèu-chhièn kín-hàng kín hiong mìn-chung hêm: “Khon â, vòng án-ngiòng chióng-sóng kì sióng-oi su kì chûn-yùng ke ngìn!”
[12] Yù-hàng kiet-suk, Ma̍t-tí-kói chón-to vòng-kiûng mùn-héu, chúng-he Ha̍p-man sîm-kôn kân-khú to khià-thèu m̀-hí, kiak-kiak chón vuk-hâ hi.
[13] Kì chiông só-yû ke sṳ kóng pûn pû-ngiòng Se-li-sṳ̂ lâu só-yû ke phèn-yû thâng. Kiâ pû-ngiòng lâu ke-têu chhûng-mìn ke phèn-yû kóng: “Ngì yí-kîn nai-m̀-hò Ma̍t-tí-kói lé. Chhiu-son kì he Yù-thai-ngìn, ngì ya mò phan-fap tui-fu kì; chhai kì mien-chhièn, ngì yit-thin voi vang-to tap-tap.”
[14] Kì-têu kóng-tén fa ke sṳ̀, vòng-kiûng ke thai-kam lòi-to, chhûi Ha̍p-man kón-kín hi chhâm-kâ Yî-sṳ̂-thiap ke yèn-si̍t.