[1] Chhai Yî-sṳ̂-thiap kim-sṳ̍t ke thi-sâm ngit, kì chok vòng-heu ke lî-fu̍k ngi̍p vòng-kiûng, khî chhai vòng-kiûng ke nui-yen, mien-hiong vòng ke thai-thien. Vòng chhô chhai pó-chho táng, mien-hiong thien-mùn.
[2] Vòng khon-tó vòng-heu Yî-sṳ̂-thiap khî chhai ngoi-poi, chhiu mân-sîm fôn-hí, chhûn-chhut kîm-chhóng. Yî-sṳ̂-thiap chhiu hiong-chhièn hi miâ chhóng-thèu.
[3] Vòng mun kì: “Vòng-heu Yî-sṳ̂-thiap â, yû má-ke sṳ he-mò? Ngì oi khiù má-ke, ngài chhiòn-phu voi pûn ngì. Chhiu-he ngài vòng-koet ke yit-pan, ngài ya hén su-pûn ngì.”
[4] Yî-sṳ̂-thiap en-kóng: “Koet-vòng na fôn-hí, chhiu chhiáng vòng lâu Ha̍p-man kîm-am-pû lòi chhâm-kâ ngài thi̍t-phe̍t chún-phi ke yèn-si̍t.”
[5] Vòng fûn-fu ngìn ham Ha̍p-man kiak-kiak lòi, khiung-ha hi chhâm-kâ Yî-sṳ̂-thiap ke yèn-si̍t. Só-yî vòng lâu Ha̍p-man khiung-ha hi.
[6] Lîm-chiú ke sṳ̀, vòng yu mun Yî-sṳ̂-thiap: “Ngì oi khiù má-ke, ngài chhiòn-phu voi pûn ngì. Chhiu-he vòng-koet ke yit-pan, ngài ya hén su-pûn ngì.”
[7] Yî-sṳ̂-thiap kóng:
[8] “Na-he ngài tet-tó koet-vòng ke oi-siak, chún ngài yêu-khiù, chhiáng vòng lâu Ha̍p-man thiên-kông-ngit chai-lòi chhâm-kâ ngài thi̍t-phe̍t chún-phi ke yèn-si̍t. Ke-sṳ̀, ngài chang lâu vòng kóng ngài yû má-ke chhiáng-khiù.”
[9] Ha̍p-man sîm-chhìn tông khoai-lo̍k, fôn-thèu hí-mien lì-khôi yèn-si̍t. Chúng-he kì kîn-ko vòng-kiûng mùn-héu ke sṳ̀, khon-tó Ma̍t-tí-kói chhô chhai ke-vi m̀ khî hí-lòi, chhiòn mò yit-si̍t-é chûn-kin, chhiu at Ma̍t-tí-kói to fó tông-chho̍k.
[10] Chúng-he Ha̍p-man hàn-he ngiûn-tén chhṳ-kâ ke nu-hi, chón-to vuk-hâ, yèn-heu chhiáng phèn-yû to kiâ vuk-hâ, ya ham kiâ pû-ngiòng Se-li-sṳ̂ chhut-lòi.
[11] Ha̍p-man hiong kì-têu tién chhṳ-kâ ke hó-ngiak lâu chhin-tô ke chṳ́-ńg, yu kóng vòng ngióng-pân thì-sṳ̂n khon-chhûng kì, sṳ́ kì chhêu-ko só-yû ke thai-sṳ̀n lâu kôn-yèn.
[12] Ha̍p-man yu kóng: “M̀ tân-chhiang án-ngiòng, vòng-heu Yî-sṳ̂-thiap hàn thi̍t-phe̍t vi vòng lâu ngài yit-sà chún-phi yèn-si̍t, yu chhiáng ngài lâu vòng thiên-kông-ngit chai hi nè!
[13] Chúng-he, tak-pái ngài khon-tó ke-chak Yù-thai-ngìn Ma̍t-tí-kói chhô chhai vòng-kiûng mùn-héu, ngài chhiu kám-kok liá só-yû ke yùng-fà fu-kui tui ngài chhiòn mò má-ke yi-sṳ.”
[14] Kì ke pû-ngiòng Se-li-sṳ̂ lâu só-yû ke phèn-yû hiong kì kien-ngi kóng: “Ngì cho-tet tap yit-chho ngi-sṳ̍p-ngi kûng-chhak kô ke káu-hìn-ka! Thiên-kông chêu-sṳ̀n, ngì yêu-khiù vòng chiông Ma̍t-tí-kói tiau chhai táng-kô. Án-ngiòng ngì chhiu voi khoai-khoai lo̍k-lo̍k lâu vòng khiung-ha hi chhô-chok lé.” Ha̍p-man ngin-vì liá he tông-hó ke chú-yi, chhiu ham-ngìn tap káu-hìn-ka.