[1] Ke-ngit, Â-ha̍p-sùi-lû-vòng chiông Yù-thai-ngìn ke thi̍t-ngìn Ha̍p-man só-yû ke chhòi-sán chhiòn-phu kâu-pûn vòng-heu Yî-sṳ̂-thiap. Ma̍t-tí-kói pûn-ngìn chhòn-to vòng ke mien-chhièn, yîn-vi Yî-sṳ̂-thiap lâu vòng kóng, Ma̍t-tí-kói he kì ke chhîn-chhit.
[2] Vòng chiông sú-chṳ́ tai-tén ke yin-é pok hâ-lòi, chhiu-he kì tui Ha̍p-man ke-vi nâ chón-lòi ke, kâu-pûn Ma̍t-tí-kói. Yî-sṳ̂-thiap ya phai Ma̍t-tí-kói kón-lî Ha̍p-man ke chhòi-sán.
[3] Heu-lòi, Yî-sṳ̂-thiap yu phu̍k-lo̍k chhai vòng kiok-chhièn, kín kieu kín khiù vòng chú-chṳ́ Â-kap-ngìn Ha̍p-man oi sêu-me̍t Yù-thai-ngìn ke yîm-mèu.
[4] Vòng hiong Yî-sṳ̂-thiap chhûn-chhut kîm-chhóng, Yî-sṳ̂-thiap chhiu khî hí-lòi, kóng:
[5] “Ngài na tet-tó koet-vòng ke oi-siak, vòng na-hén, ngin-vì ngài ke yêu-khiù thó-tong, chhiáng ha yit-thiàu min-lin, chha̍t-sêu Â-kap-ngìn Ha̍p-mí-thai-thâ ke lai-é Ha̍p-man fat-chhut ke min-lin, chhiu-he oi sêu-me̍t koet-nui tak-sén só-yû Yù-thai-ngìn ke min-lin.
[6] Ngài ngióng phan-tet khon-tén ngài ke thùng-pâu su châi-nan nè? Ngài ngióng phan-tet khon-tén ngài ke chhîn-su̍k pûn-ngìn sêu-me̍t nè?”
[7] Â-ha̍p-sùi-lû-vòng tui vòng-heu Yî-sṳ̂-thiap lâu Yù-thai-ngìn Ma̍t-tí-kói kóng: “Ngì khon! Yîn-vi Ha̍p-man yîm-mèu oi hoi-sí Yù-thai-ngìn, ngài yí-kîn tiau-sí kì, yu chiông kì ke chhòi-sán kâu-pûn Yî-sṳ̂-thiap.
[8] Ngài chún ngì-têu cheu ngì-têu ke yi-sṳ fat thûng-ko pûn Yù-thai-ngìn; ngì-têu ya cho-tet yung ngài ke miàng-ngi fat-chhut, yu tun vòng-yin. Yîn-vi yung vòng ke miàng-ngi fat-chhut ke thûng-ko, táng-kô yû vòng ke yin-é, he cho-m̀-tet chha̍t-sêu ke.”
[9] Só-yî, chhai sâm-ngie̍t, chhiu-he Sî-vân-ngie̍t ngi-sṳ̍p sâm-ngit, Ma̍t-tí-kói seu-lòi vòng ke sû-ki, ham kì-têu fat thûng-ko pûn Yù-thai-ngìn, hàn-yû tui Yin-thu to Kú-sṳ̍t chúng-khiung yit-pak ngi-sṳ̍p chhit-sén ke sén-chóng, chúng-tuk lâu hàng-chṳn kôn-yèn. Liá thûng-ko he yung tak-sén tak-chhu̍k ke vùn-sṳ lâu Yù-thai-ngìn ke ngî-vùn siá ke.
[10] Ma̍t-tí-kói yung Â-ha̍p-sùi-lû-vòng ke miàng-ngi, tun vòng-yin, pân-pu liá-fun thûng-ko, yu min-lin sung-sin ke ngìn khì vòng-kiûng chui-kiak ke mâ sung-hi tak só-chhai.
[11] Liá min-lin kóng: Vòng chún tak sàng-sṳ ke Yù-thai-ngìn chû-chṳt hí-lòi pó-fu chhṳ-kâ. Kì-têu cho-tet chhù-thet ke-têu oi kûng-tá Yù-thai-ngìn ke yit-chhiet tui-thi̍t, lièn ke-têu ngìn ke pû-ngiòng chṳ́-ńg ya cho-tet sêu-me̍t, yu cho-tet chhióng-chéu ke-têu ngìn só-yû ke chhòi-vu̍t.
[12] Liá min-lin oi chhòn-to chhiòn-koet tak-sén, chhai sṳ̍p-ngi ngie̍t, chhiu-he Â-tha̍t-ngie̍t sṳ̍p-sâm, ngièn-lòi kiet-thin chhù-thet Yù-thai-ngìn ke-ngit khôi-sṳ́ yû-háu.
[13] Liá min-lin oi chhiong pân-pu fap-li̍t khiung-yong kûng-pu chhut-hi, sṳ́ tak-sén tak-chhu̍k ke ngìn chhiòn-phu tî. Án-ngiòng, Yù-thai-ngìn cho-tet chún-phi hó-se, chhai ke-ngit hiong kì-têu ke thi̍t-ngìn po-sù.
[14] Só-yî, sung-sin ke ngìn fung vòng ke min-lin, khì vòng-kiûng chui-hó ke mâ, yung chui-kiak ke suk-thu hi-chhòn min-lin; liá min-lin ya chhòn-phien sú-tû Sû-sân-sàng.
[15] Ma̍t-tí-kói chok-tén làm-set pha̍k-set ke chhèu-fu̍k, phî-tén chṳ́-set yu mà-sâ ke ngoi-phàu, tai-tén kîm ke miên-liù lì-khôi vòng-kiûng; Sû-sân-sàng chhiòn-sàng fôn-hí na-thiên.
[16] Tui Yù-thai-ngìn lòi-kóng, liá sṳ̍t-chhai he fôn-hí, khoai-lo̍k, chûn-kui, kông-yùng ke sṳ.
[17] Vòng ke min-lin chhòn-to tak-sén tak-sàng, Yù-thai-ngìn chhiu fôn-hí khoai-lo̍k, phan chok-si̍t, chhiong ko-chiet án-ngiòng lòi khin-chuk. Chhin-tô ke ngìn yîn-vi kiâng Yù-thai-ngìn chhiu ngi̍p Yù-thai-si̍t.