[1] Vòng lâu Ha̍p-man yu hi chhâm-kâ vòng-heu Yî-sṳ̂-thiap thi-ngi pái ke yèn-si̍t.
[2] Lîm-chiú ke sṳ̀, vòng yu-mun Yî-sṳ̂-thiap: “Vòng-heu Yî-sṳ̂-thiap â, liá-ha lâu ngài kóng, ngì oi khiù má-ke, ngài chhiòn-phu voi pûn ngì. Chhiu-he vòng-koet ke yit-pan, ngài ya hén pûn ngì.”
[3] Vòng-heu Yî-sṳ̂-thiap en-kóng: “Ngài na tet-tó koet-vòng ke oi-siak, vòng na-he fôn-hí, chhiáng tap-yin ngài yit-ke yêu-khiù. Ngài khiù ngì ngièu ngài ke sin-miang, ya ngièu ngài thùng-pâu ke sin-miang.
[4] Ngài lâu ngài ke thùng-pâu chhiòn-phu pûn-ngìn chhut-mai lé. Na-he ngài-têu chṳ́-yû pûn-ngìn mai hi-cho nù-chhòi, ngài yit-thin voi tiâm-tiâm, chhie̍t-tui m̀-voi khôi-choi vi liá-sṳ káu-chhau koet-vòng; chúng-he, ngài-têu voi pûn-ngìn sêu me̍t-thet, voi su-tó chhie̍t-chúng ke châi-fo lé!”
[5] Â-ha̍p-sùi-lû-vòng mun vòng-heu Yî-sṳ̂-thiap: “Má-ngìn kám cho liá-chúng sṳ? Liá-ke ngìn chhai nai-vi?”
[6] Yî-sṳ̂-thiap en-kóng: “Pet-hoi ngài-têu ke thi̍t-ngìn chhiu-he liá-ke fái-ngìn Ha̍p-man!” Ha̍p-man chhai vòng lâu vòng-heu mien-chhièn ngiàm-sṳ̀ kiâng-to pi̍t-pi̍t-chhat.
[7] Vòng khién-to khî hí-lòi, lì-khôi chiú-si̍t to ngoi-poi ke fâ-yèn hi. Ha̍p-man khon-chhut vòng kiet-sîm oi vi liá-sṳ hìn-fa̍t kì, chhiu liù hâ-lòi khiù vòng-heu Yî-sṳ̂-thiap kiu kì ke miang.
[8] Vòng tui fâ-yèn chón-to chiú-si̍t ke só-chhai, khon-tó Ha̍p-man phu̍k chhai Yî-sṳ̂-thiap chhô ke mìn-yí táng. Vòng khon-tó liá-ke chhìn-hìn, chhiu thai fat-khién kóng: “Liá-ke ngìn hàn kám chhai vòng-kiûng tú, chhai ngài ke mien-chhièn vú-yu̍k vòng-heu mâ!” Vòng yit kóng-chhut liá-fa, thai-kam ngiàm-sṳ̀ chiông Ha̍p-man ke mien êm hí-lòi.
[9] Khì-chûng yû yit-ke thai-kam ôn-to Ha̍p-pô-nâ, hàng-chhièn kóng: “Ha̍p-man yû chhai kiâ vuk-hâ tap-hó yit-chho ngi-sṳ̍p-ngi kûng-chhak kô ke káu-hìn-ka, chún-phi oi nâ-lòi tiau-sí kiu-ko vòng sin-miang ke Ma̍t-tí-kói!” Vòng ha-lin: “Chiông Ha̍p-man tiau chhai ke táng-kô!”
[10] Só-yî, Ha̍p-man pûn-ngìn tiau chhai kì oi tiau-sí Ma̍t-tí-kói ke káu-hìn-ka táng; án-ngiòng vòng ke nu-hi chang sêu-thet.