[1] Heu-lòi, Â-ha̍p-sùi-lû-vòng ke fat-khién ko-thet, chhiu chhin sṳ̂-ngiam Fà-sṳ̍t-ti, chúng-he yu sióng-tó kì fán-khong min-lin lâu su chhú-fa̍t ke sṳ.
[2] Vòng chhîn-sin ke ku-mun tui vòng kien-ngi kóng: “Ngióng-pân m̀ chhìm-têu heu-sâng yu chiâng ke thùng-ńg lòi nè?
[3] Chhiáng vòng chhai chhiòn-koet tak-sén chṳ́-phai kôn-yèn, ham kì-têu chiông só-yû chiâng ke se-moi-é tai-to sú-tû Sû-sân ke heu-kiûng lòi, kâu-pûn chúng-kón kiûng-ńg ke thai-kam Hî-kâi, kiûng-kip kì-têu fa-chông-phín.
[4] Yî-heu, vòng cho-tet sién chhin ha̍p-yi ke se-moi-é, li̍p-cho vòng-heu, lòi-thoi Fà-sṳ̍t-ti.” Vòng fôn-hí liá kien-ngi, chhiu cheu án-ngiòng hi cho.
[5] Chhai Sû-sân, yû yit-ke Yù-thai-ngìn ôn-to Ma̍t-tí-kói. Kì su̍k Phien-ngâ-mén kî-chhu̍k, he Kî-sṳ lâu Sṳ-mî ke heu-thoi, Ngài-ngí ke lai-é.
[6] Tông Pâ-pí-lùn-vòng Nì-pu-kap-nì-sat tui Yâ-lu-sat-lâng chiông Yù-thai-vòng Yâ-kô-nì-ngâ chok-chéu ke sṳ̀, ya chok-chéu yit-khiùn ngìn, Ma̍t-tí-kói ke chú-siên ya chhai tông-chûng.
[7] Ma̍t-tí-kói yû yit-ke suk-pak ló-moi ôn-to Yî-sṳ̂-thiap, Hî-pak-lòi miàng ôn-to Ha̍p-thai-sâ; kì he yit-ke chhin-chiâng ke se-moi-é, yu yû chṳ̂n-hó ke sṳ̂n-chhòi. Kiâ yà-ôi sí-heu, Ma̍t-tí-kói sû-yông kì cho chhṳ-kâ ke moi-é, chiông kì thu-thai.
[8] Vòng ke sîn min-lin pân-pu yî-heu, chhin-tô tông-chiâng ke se-moi-é pûn-ngìn tai-to sú-tû Sû-sân lòi; Yî-sṳ̂-thiap ya pûn-ngìn tai-ngi̍p vòng-kiûng, kâu-pûn kón heu-kiûng ke thai-kam Hî-kâi.
[9] Hî-kâi tông-siak Yî-sṳ̂-thiap, khoán-thai kì thi̍t-phe̍t hó, ngiàm-sṳ̀ kiûng-kip kì fa-chông-phín lâu thi̍t-phe̍t ke sṳ̍t-vu̍t, yu tui vòng-kiûng sién-chhut chhit-ke kiûng-ńg lòi fu̍k-sṳ kì, yu pûn kì heu-kiûng chui-hó ke fòng-kiên.
[10] Yî-sṳ̂-thiap thâng-chhiùng Ma̍t-tí-kói ke chṳ́-sṳ, mò chiông chhṳ-kâ ke chúng-chhu̍k lâu chhîn-chhit kóng pûn ngìn tî.
[11] Ma̍t-tí-kói tak-ngit chhai heu-kiûng ke thìn-yen chhièn hàng-lòi hàng-hi, oi tî Yî-sṳ̂-thiap ke chhìn-hìn, sṳ-chhìn voi yû má-ke fat-chán.
[12] Cheu kûi-thin, ke-têu se-moi-é oi kîn-ko yit-ngièn ke mî-yùng pó-yông chang cho-tet kien vòng: Chhièn liuk-chak ngie̍t yung mu̍t-yo̍k yù, heu liuk-chak ngie̍t yung hiông-kâu lâu fa-chông-phín mî-yùng. Kîn-ko liá-thon sṳ̀-kiên yî-heu, tak-ke se-moi-é chhiu voi lùn-liù pûn-ngìn tai-hi kien Â-ha̍p-sùi-lû-vòng.
[13] Se-moi-é tui heu-kiûng ngi̍p-hi vòng-kiûng ke sṳ̀, cho-tet cheu chhṳ-kâ ke yi-sṳ tá-pan, kì só sî-yeu ke, chhiòn-phu pûn kì.
[14] Kì oi chhai vòng-kiûng hiet yit am-pû, thi-ngi chêu-sṳ̀n chhiu pûn-ngìn tai-to nang-ngoi yit-ke heu-kiûng hi, kâu-pûn kón pîn-fî ke thai-kam Sâ-kap cheu-ku; na m̀-he vòng thi̍t-phe̍t chung-yi kì, chṳ́-miàng ham kì, kì chhiu mò kî-fi chai chón-to vòng ke-vi hi.
[15] Yî-sṳ̂-thiap kien vòng ke ngit-khì to lé. Kì he Â-pí-hâi ke moi-é, Ma̍t-tí-kói ke suk-pak ló-moi, heu-lòi cho Ma̍t-tí-kói ke yông-ńg. Khon-ko Yî-sṳ̂-thiap ke ngìn chhiòn-phu kám-kok kì tông tet-ngìn-siak. Lùn-to kì kien vòng ke sṳ̀-kiên, chhù-liáu cheu chúng-kón nui-kiûng ke thai-kam Hî-kâi só kien-ngi ke tá-pan yî-ngoi, mò thi̍t-phe̍t yêu-khiù má-ke.
[16] Â-ha̍p-sùi-lû cho vòng ke thi-chhit ngièn sṳ̍p-ngie̍t, chhiu-he Thì-phe̍t-ngie̍t, Yî-sṳ̂-thiap pûn-ngìn tai-ngi̍p vòng-kiûng.
[17] Vòng chung-yi Yî-sṳ̂-thiap yàng-ko khì-thâ só-yû ke fu-ńg; kì pí khì-thâ ke thùng-ńg tet-tó vòng kha-tô ke thung-siak. Tui án-ngiòng, vòng chiông vòng-heu ke miên-liù tai chhai kì ke thèu-nà táng, li̍p kì cho vòng-heu, lòi-thoi Fà-sṳ̍t-ti.
[18] Chiap-tén, vòng vi Yî-sṳ̂-thiap phan thai yèn-si̍t, yêu-chhiáng só-yû ke kui-chhu̍k lâu hàng-chṳn kôn-yèn chhièn-lòi chhâm-kâ. Ke-ngit, kì siên-pu chhiòn-koet tak-sén hiû-ká, yu tông-khói sung-chhut tông-tô lî-vu̍t.
[19] Vòng thi-ngi pái seu-si̍p thùng-ńg ke sṳ̀, Ma̍t-tí-kói yí-kîn chhai vòng-kiûng tet-tó yit-ke chṳt-vi.
[20] Yî-sṳ̂-thiap thâng Ma̍t-tí-kói ke fûn-fu, tui-thèu to-mî mò chiông chhṳ-kâ ke chúng-chhu̍k lâu chhîn-chhit kóng pûn ngìn tî. Yî-sṳ̂-thiap thâng-chhiùng Ma̍t-tí-kói, chhiu-chhiong Ma̍t-tí-kói yông-yuk kì ke sṳ̀ yit-yong.
[21] Ma̍t-tí-kói chhai vòng-kiûng cho-kôn ke khì-kiên, yû lióng-ke khon-sú kiûng-mùn ke thai-kam — Phit-tham lâu Thì-lie̍t fî-sòng nâu Â-ha̍p-sùi-lû-vòng, sióng-oi am-sat kì.
[22] Ma̍t-tí-kói fat-hien liá yîm-mèu, chhiu lâu vòng-heu Yî-sṳ̂-thiap kóng. Yî-sṳ̂-thiap chhiu yung Ma̍t-tí-kói ke miàng-ngi lâu vòng kóng.
[23] Liá-khien sṳ kîn-ko thiàu-chhà he sṳ-sṳ̍t; liá lióng-ke ngìn chhiu pûn-ngìn tiau-sí chhai káu-hìn-ka táng. Vòng min-lin chiông liá-khien sṳ ki-liu̍k chhai kôn-fông ke li̍t-sṳ́ tî-poi.