[1] Ma̍t-tí-kói tî liá-têu sṳ yî-heu, fî-sòng thung-sîm, chhá-lie̍t sâm, von-tén mà-sâm, chiông fôi ve chhai thèu-nà táng, chhai sàng-chûng hàng-lòi hàng-hi, khôi-sâng thai-kieu.
[2] Kì lòi-to vòng-kiûng ke mùn-héu, mò ngi̍p-hi, yîn-vi cheu kûi-thin chok mà-sâm ke ngìn cho-m̀-tet ngi̍p vòng-kiûng.
[3] Vòng ke thûng-ko mò-lun chhòn-to nai-sén, ke-vi ke Yù-thai-ngìn chhiu chhin pî-sông. Kì-têu kim-sṳ̍t, khôi-sâng thai-kieu; chhin-tô ngìn chok-tén mà-sâm, soi chhai fó-fôi tú.
[4] Fu̍k-sṳ Yî-sṳ̂-thiap vòng-heu ke kiûng-ńg lâu thai-kam lòi chiông Ma̍t-tí-kói cho ke sṳ lâu kì kóng, kì fî-sòng yù-sèu, chhiu sung-têu sâm pûn Ma̍t-tí-kói, hî-mong kì chiông mà-sâm thot hâ-lòi, chúng-he Ma̍t-tí-kói m̀-hén chiap-su.
[5] Yî-sṳ̂-thiap chhiu ham vòng phai-lòi fu̍k-sṳ kì ke thai-kam Ha̍p-thâ-kiet lòi, oi kì to Ma̍t-tí-kói ke-vi hi chhà-khon fat-sên má-ke sṳ, he ngióng-pân fat-sên ke.
[6] Ha̍p-thâ-kiet to vòng-kiûng mùn-héu ke kóng-chhòng hi kien Ma̍t-tí-kói.
[7] Ma̍t-tí-kói chiông só fat-sên ke sṳ chhiòn-phu lâu kì kóng, yu kóng, Ha̍p-man pó-chṳn na-he chiông Yù-thai-ngìn me̍t-thet, kì chhiu voi kiên chhin-tô chhièn lòi chen-kâ koet-khu ke sû-ngi̍p.
[8] Ma̍t-tí-kói yu kâu-pûn kì yit-fun chhai Sû-sân kûng-pu ke thûng-ko, táng-kô yû sêu-me̍t Yù-thai-ngìn ke min-lin. Ma̍t-tí-kói chhiáng kì chiông liá-fun thûng-ko kâu-pûn Yî-sṳ̂-thiap, hiong Yî-sṳ̂-thiap sot-mìn chhìn-hìn, ham kì ngi̍p-hi hiong vòng khién-khiù, vi chhṳ-kâ ke thùng-pâu khiù-chhìn kiu-miang.
[9] Ha̍p-thâ-kiet chón-hi, chiông Ma̍t-tí-kói ke fa lâu Yî-sṳ̂-thiap kóng.
[10] Yî-sṳ̂-thiap yu phai kì chhòn-fa pûn Ma̍t-tí-kói kóng:
[11] “Mò-fûn nàm-ńg, mò-lun he má-ngìn, mò tet-tó vòng ke seu-kien chhiu chhṳ-kâ ngi̍p-hi kien vòng ke, yit-thin voi phan sí-hìn. Liá he fap-li̍t, chhiòn-koet sông-hâ, mò-lun he vòng ke ku-mun ya-he tak-sén ke ngìn-mìn chhiòn-phu tî. Chṳ́-yû yit-ke chhìn-hìn li-ngoi; na-he vòng hiong mò tet-tó seu-kien ke ngìn chhûn-chhut kîm-chhóng, ke-ngìn chhiu m̀-sṳ́ sí. Chúng-he vòng yí-kîn yû yit-chak ngie̍t mò seu-kien ngài lé.”
[12] Ma̍t-tí-kói chiap-tó Yî-sṳ̂-thiap ke sêu-sit yî-heu,
[13] chhiu thok-ngìn chón-hi, kín-ko Yî-sṳ̂-thiap kóng: “Ngì m̀-hó láu-tó ngì chhai vòng-kiûng tú chhiu voi pí khì-thâ ke Yù-thai-ngìn kha ôn-chhiòn.
[14] Ngì chhai án-ngiòng ke sṳ̀-chiet tiâm-tiâm m̀ kóng-fa, Yù-thai-ngìn yit-thin voi tui phe̍t-vi tet-tó chṳ́n-kiu, chúng-he ngì lâu ngì ke kâ-chhu̍k voi me̍t-mòng. Má-ngìn tî, ngì yû-hó cho vòng-heu kám m̀-he vi-tó liá-ke sṳ̀-kî!”
[15] Yî-sṳ̂-thiap thok-ngìn lâu Ma̍t-tí-kói kóng:
[16] “Ngì hi seu-si̍p Sû-sân-sàng só-yû ke Yù-thai-ngìn, vi ngài kim-sṳ̍t khì-tó, sâm-ngit sâm-ya m̀-sṳ̍t m̀-lîm; ngài lâu ngài ke kiûng-ńg ya oi án-ngiòng. Yèn-heu, ngài chang hi kien vòng; sûi-yèn liá he vì-fap ke, ngài hàn-he oi hi. Na-he sí, sí chhiu son lé.”
[17] Ma̍t-tí-kói lì-khôi yî-heu, chhiu cheu Yî-sṳ̂-thiap yêu-khiù kì ke fa hi cho.