[1] ᑭ ᐊᔨᑭᐣ ᒫᑲ, ᐃᐢᐱ ᒋᓴᐢ ᑳ ᐳᓂ ᐊᔨᑌᐧᐟ ᑲᐦᑭᔭᐤ ᐅᐦᐃ ᐃᑌᐧᐃᐧᓇ, ᐅᒥᓯ ᑭ ᐃᑌᐤ ᐅ ᑭᐢᑭᓄᐦᐊᒪᐋᐧᑲᓇ.
[2] ᑭ ᑭᐢᑫᔨᑌᓈᐋᐧᐤ ᑭ ᐳᓂ ᓂᓱ ᑭᓯᑳᑭ ᐁᑯᐢᐱ ᑭᑕ ᒪᔭᐢᑯᑕᑐᐃᐧᐦᑯᑐᓈᓂᐃᐧᐠ, ᐃᔨᓂᐃᐧᑯᓯᓵᐣ ᒫᑲ ᐸᑭᑎᓈᐤ ᑭᑕ ᒋᐢᑖᐢᑳᐧᑎᐦᐟ.
[3] ᐁᑯᓯ ᒫᑲ ᑭ ᒫᒪᐃᐧ ᒫᐊᐧᒋᐃᑐᐊᐧᐠ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ, ᒥᓇ ᑳ ᓂᑳᓀᔨᑖᑯᓯᒋᐠ ᐊᔨᓯᔨᓂᐊᐧᐠ, ᐊᓂᑕ ᐅ ᑭᐦᒋ ᐊᐧᐢᑲᐦᐃᑲᓂᕽ ᑭᐦᒋ ᐊᔭᒥᐦᐁᐃᐧᔨᓂᐤ, ᑲᔭᐸᐢ ᑳ ᐃᓯᔨᐦᑳᓱᐟ.
[4] ᐁᑯᓯ ᒫᑲ ᑭ ᐃᑕᓱᐁᐧᐊᐧᐠ ᐊᐧᔦᓯᐦᐃᐁᐧᐃᐧᓂᕽ ᑭᑕ ᐅᑎᓇᒋᐠ ᒋᓴᓴ ᒥᓇ ᑭᑕ ᓂᐸᐊᒋᐠ.
[5] ᒫᑲ ᐅᒥᓯ ᑭ ᐃᑌᐧᐊᐧᐠ, ᓇᒪᐃᐧᔭ ᐃᐧᐦᑯᑐᐃᐧ ᑭᓯᑳᑭ, ᐁᑳ ᑭᑕ ᐅᐯᐧᐃᐧᒋᐠ ᐊᔨᓯᔨᓂᐊᐧᐠ.
[6] ᒣᑳᐧᐨ ᒋᓴᐢ ᐁ ᐊᔭᐟ ᐯᑕᓂᐃᕽ, ᐅ ᐋᐧᐢᑲᐃᑲᓂᕽ ᓴᐃᒪᐣ ᑳ ᒪᒑᐢᐱᓀᐟ.
[7] ᐁᑯᑕ ᑭ ᐯ ᓈᑎᐠ ᐯᔭᐠ ᐃᐢᑫᐧᐊᐧ ᐁ ᐯ ᑕᑯᓇᒥᔨᐟ ᐁ ᐊᓯᐊᐧᑌᔨᐠ ᓇᐢᐱᐨ ᐁ ᐋᑲᐧᑭᑌᔨᐠ ᑕᒪᐢᑯᐃᐧᐣ, ᐁ ᑭ ᓯᑭᓇᒥᔨᐟ ᒫᑲ ᐅᐢᑎᑲᐧᓂᕽ, ᒣᑳᐧᐨ ᐁ ᐊᐱᐟ ᐁ ᒥᒋᓱᐟ.
[8] ᒫᑲ ᐃᐢᐱ ᐅ ᑭᐢᑭᓄᐦᐊᒪᐋᐧᑲᓇ ᐃᐧᔭᐸᑕᒥᔨᐟ, ᑭ ᑭᓯᐁᐧᔨᑕᒥᔨᐊᐧ ᐅᒥᓯ ᐁ ᐃᑌᐧᔨᐟ ᑖᓀᑭ ᐅᒪ ᐁᐧᒋ ᐱᑲᐧᓂᑕ ᒣᐢᑎᓇᒥᕽ?
[9] ᒋᑫᒪ ᐅᒪ ᑕᒪᐢᑰᐃᐧᐣ ᒥᐢᑕᐦᐃ ᑭᑕ ᑭ ᐅᑎᓯᓈᓂᐊᐧᓄᐸᐣ ᐊᑖᐋᐧᑫᕽ ᑭᑕ ᑭ ᒥᔨᑕᐧᐸᐣ ᑫᑎᒪᑭᓯᒋᐠ.
[10] ᐃᐢᐱ ᒫᑲ ᒋᓴᐢ ᓀᓯᑐᑕᕽ, ᐅᒥᓯ ᑭ ᐃᑌᐤ, ᑖᓀᑭ ᑳ ᒥᑯᐢᑳᒋᐦᐋᔦᐠ ᐊᐊᐧ ᐃᐢᑫᐧᐤ? ᒋᑫᒪ ᒥᔪ ᐊᑐᐢᑫᐃᐧᐣ ᓂ ᑭ ᑭᓯᑕᒫᐠ.
[11] ᒋᑫᒪ ᒧᓴᐠ ᐅᑭᑎᒪᑭᓴᐠ ᑭ ᐃᐧᒉᑯᐋᐧᐊᐧᐠ; ᒫᑲ ᓂᔭ ᓇᒪᐃᐧᔭ ᒧᓴᐠ ᑭᐟ ᐊᔭᐃᐧᓈᐋᐧᐤ.
[12] ᒋᑫᒫ ᐊᓂᒪ ᐁ ᑭ ᓯᑭᓇᕽ ᐅᒪ ᑕᒪᐢᑯᐃᐧᐣ ᓂᔭᐃᐧᕽ ᑭᑕ ᓇᐃᓂᑲᐃᐧᔮᐣ ᑭ ᐅᐦᒋ ᑐᑕᑦ.
[13] ᑖᐯᐧ ᑭᐟ ᐃᑎᓈᐋᐧᐤ ᐱᑯ ᐃᑌ ᐅᒪ ᒥᐋᐧᒋᒧᐃᐧᐣ ᑫ ᑲᑫᐢᑭᒥᐋᐧᓂᐊᐧᓄᑫᐧ ᒥᓯᐁᐧ ᐊᐢᑭᕽ, ᐁᑯᑌ ᐅᒪ, ᐊᐊᐧ ᐃᐢᑫᐧᐤ ᑳ ᑭ ᑐᑕᕽ, ᑭᑕ ᐃᐧᒋᑳᑌᐤ ᑭᑕ ᑭᐢᑭᓯᑐᑕᐦᐟ.
[14] ᐁᑯᓯ ᒫᑲ ᐯᔭᐠ ᐊᓂᑭ ᒥᑖᑕᐟ ᓂᓱᓵᑊ, ᒍᑕᐢ ᐃᐢᑲᕒᐃᔭᐟ ᐁᓯᔨᑲᓱᐟ, ᑭ ᓈᑌᐤ ᑭᐦᒋ ᐊᔭᒥᐦᐁᐃᐧᔨᓂᐊᐧ.
[15] ᐁ ᑭ ᐃᑕᐟ, ᑫᑲᐧᐩ ᑎᔦᐯᔨᒧᔦᐠ ᑭᑕ ᒥᔨᔦᐠ, ᐁᑯᓯ ᒫᑲ ᑭ ᑲ ᐸᑭᑎᓇᒫᑎᓈᐋᐧᐤ? ᑭ ᐊᓱᑕᒪᐁᐧᐊᐧᐠ ᒫᑲ ᓂᐢᑐᒥᑕᓇᐤ ᑕᑖᐧᐱᐢᐠ ᓱᓂᔮᐊᐧ.
[16] ᐁᑯᐢᐱ ᒫᑲ ᐅᐦᒋ ᑭ ᓇᓇᑐᓇᑦ ᑫ ᐃᓯ ᓇᐃᐸᔨᔨᐠ ᑭᑕ ᐸᑭᑎᓇᒪᐋᐧᐟ.
[17] ᐃᐢᐱ ᒫᑲ ᓂᐢᑕᑦ ᐁ ᐃᐧᐦᑯᐦᑐᐃᐧ ᑭᓯᑳᐠ ᐁᑳ ᐁ ᐅᐦᐱᓱᐟ ᐸᑫᐧᓯᑲᐣ ᐁ ᐋᐸᒋᐦᐃᐦᐟ, ᑭᐢᑭᓄᐦᐊᒪᐋᐧᑲᓇᐠ ᑭ ᐯ ᓈᑌᐊᐧᐠ ᒋᓴᓴ, ᐅᒥᓯ ᐁ ᐃᑖᒋᐠ, ᑖᓂᑕ ᐁᓯ ᓇᑕᐁᐧᔨᑕᒪᐣ ᑭᑕ ᐊᐧᐁᐧᔨᑕᒪᑖᕽ ᑭᑕ ᒥᒋᔭᐣ ᒪᔭᐢᑯᑕᑐᐃᐧᑯᑐᐃᐧᐣ?
[18] ᐅᒥᓯ ᒫᑲ ᑭ ᐃᑌᐤ, ᐃᑐᐦᑌᐠ ᐅᑌᓈᕽ ᑭᑕ ᓈᑖᔦᐠ ᐯᔭᐠ ᐁᑯᑕ ᐊᔨᓯᔨᓂᐤ, ᐅᒥᓯ ᒫᑲ ᐃᑎᕽ, ᐅᑭᐢᑭᓄᐦᐊᒫᑫᐤ ᐅᒥᓯ ᐃᑌᐧᐤ, ᓂ ᑭᓯᑲᑦ ᓵᓴᐩ ᐅᑎᐦᒋᐸᔨᐤ; ᓂ ᑲ ᐃᐧᒋ ᒪᔭᐢᑯᑕᑐᐃᐧᑯᑐᒪᐊᐧᐠ ᓂ ᑭᐢᑭᓄᐦᐊᒪᐋᐧᑲᓇᐠ ᑭ ᐊᐧᐢᑲᐦᐃᑲᓂᕽ.
[19] ᑭᐢᑭᓄᐦᐊᒪᐋᐧᑲᓇᐠ ᒫᑲ ᑭ ᑐᑕᒪᐧᐠ ᑳ ᑭ ᐃᑎᑯᒋᐠ ᒋᓴᓴ; ᑭ ᑲᐧᔭᒋᑖᐊᐧᐠ ᒪᔭᐢᑯᑖᑐᐃᐧᑯᐦᑐᐃᐧᐣ ᒫᑲ.
[20] ᐃᐢᐱ ᒫᑲ ᐁᑎ ᐅᑖᑯᓯᐠ, ᑭ ᐃᐧᒋ ᓇᐦᐊᐱᒣᐤ ᒥᑖᑕᐦᐟ ᓂᓱᓵᑊ ᑳ ᐃᐦᑕᓯᔨᐟ.
[21] ᒣᑳᐧᐨ ᒫᑲ ᐁ ᒥᒋᓱᒋᐠ, ᐅᒥᓯ ᑭ ᐃᑌᐧᐤ, ᑖᐯᐧ ᑭᐟ ᐃᑎᓈᐋᐧᐤ, ᐯᔭᐠ ᐅᒪ ᑳ ᐃᑕᓯᔦᐠ ᓂ ᑲ ᒥᓯᐃᐠ.
[22] ᓈᐢᐱᐨ ᒫᑲ ᑭ ᒪᒥᒋᔭᐁᐧᓯᐊᐧᐠ, ᐁᑯᓯ ᒫᑲ ᑲᐦᑭᔭᐤ ᐁ ᐃᐦᑕᓯᒋᐠ ᑭ ᐊᔨᑌᐊᐧᐠ, ᑌᐯᔨᐦᒋᑫᔭᐣ, ᓂᔭ ᒋ?
[23] ᑭ ᓇᐢᑫᐧᐊᐧᓯᒣᐤ ᒫᑲ ᐅᒥᓯ ᐁ ᑭ ᐃᑖᐟ, ᐊᓇ ᑳ ᑭ ᐃᐧᒋ ᑭᐦᑖᓇᒧᒥᐟ ᐅ ᒋᐦᒋ ᐅᔭᑲᓂᕽ, ᐁᐊᐧᑯ ᑫ ᒥᓯᐦᐃᐟ.
[24] ᐃᔨᓂᐃᐧᑯᓯᓵᐣ ᓯᐯᐧᑌᐤ ᒣᐧᐦᒋ ᑳ ᐃᑕᓯᓇᐦᐃᑳᑌᐠ; ᒫᑲ ᑲᑳᐧᑕᑭᓯᐤ ᐊᓇ ᐊᔨᓯᔨᓂᐤ ᑳ ᒥᓯᒫᐟ ᐃᔨᓂᐃᐧᑯᓯᓵᓇ! ᓇᐊᐧᐨ ᐅ ᑲ ᑭ ᒥᐊᐧᐸᒋᐃᑯ ᐊᓇ ᐊᔨᓯᔨᓂᐤ ᑭᐢᐱᐣ ᐁᑳ ᑭ ᓂᐦᑖᐃᐧᑭᑯᐸᓀ.
[25] ᐁᑯᓯ ᒍᑕᐢ, ᑳ ᒥᓯᒫᐟ, ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑫᐢᑭᓄᐦᐊᒫᑫᔭᐣ, ᓂᔭ ᒋ? ᐅᒥᓯ ᒫᑲ ᑭ ᐃᑌᐤ, ᑭ ᑭ ᐃᑖᐧᐣ.
[26] ᒣᑳᐧᐨ ᒫᑲ ᐁ ᒥᒋᓱᒋᐠ, ᒋᓴᐢ ᑭ ᐅᑎᓀᐤ ᐸᑫᐧᓯᑲᓇ, ᒥᓇ ᐁ ᑭ ᓇᓈᐢᑯᒧᐟ, ᒥᓇ ᐁ ᑭ ᐸᑫᐧᓈᐟ, ᐁ ᑭ ᒥᔮᐟ ᑭᐢᑭᓄᐦᐊᒪᐋᐧᑲᓇ, ᐅᒥᓯ ᒫᑲ ᐁ ᐃᑖᐟ, ᐅᑎᓂᕽ, ᒧᐃᐧᕽ; ᐁᐊᐧᑯ ᐅᒪ ᓂᔭᐤ.
[27] ᒥᓇ ᒫᑲ ᑭ ᐅᑎᓇᑦ ᒥᓂᑳᐧᑲᓂᐢ, ᒥᓇ ᐁ ᑭ ᓇᓇᐢᑯᒧᐟ, ᒥᓇ ᐁ ᑭ ᒥᔮᐟ, ᐅᒥᓯ ᐁ ᐃᑌᐧᐟ, ᒥᓂᐦᑫᐧᐠ ᐅᒪ ᑲᐦᑭᔭᐤ ᐁ ᐃᑕᓯᔦᐠ;
[28] ᒋᑫᒪ ᐁᐊᐧᑯ ᐅᒪ ᓂ ᒥᐦᑯ ᐅᐢᑭ ᐃᓯᐦᑕᐧᐃᐧᓂᕽ, ᐊᓂᒪ ᒥᐦᒉᐟ ᑳ ᐅᐦᒋ ᓯᑭᓇᒪᒋᐠ ᑭᑕ ᐳᓀᔨᒋᑲᑌᑭ ᒪᒋᐃᑎᐃᐧᓇ.
[29] ᒫᑲ ᓂᔭ ᑭᐟ ᐃᑎᓈᐋᐧᐤ, ᐅᑕ ᐅᐦᒋ ᓇᒪᐃᐧᑲᐨ ᒥᓇ ᓂ ᑲ ᒥᓂᑳᐧᐣ ᒥᓂᓯᐃᐧ ᓱᒥᓈᐳ, ᐹᑎᒫ ᐊᓂᒪ ᑭᓯᑳᑭ ᐃᐢᐱ ᐅᐢᑭ ᐃᐧᒋ ᒥᓂᑫᐧᒥᑕᑳᐧᐃᐧ ᓄᑖᐃᐧ ᐅᐟ ᐅᑌᓇᐃᐧᐃᐧᓂᕽ.
[30] ᐃᐢᐱ ᒫᑲ ᑳ ᓂᑲᒧᒋᐠ ᓂᑲᒧᐣ, ᑭ ᐊᐧᔭᐃᐧᐊᐧᐠ ᐁ ᑭ ᐃᑐᐦᑌᒋᐠ ᐅᓬᐃᑊᐢ ᐊᐧᒋᕽ.
[31] ᐁᑯᐢᐱ ᒫᑲ ᒋᓴᐢ ᐅᒥᓯ ᐃᑌᐤ, ᑲᐦᑭᔭᐤ ᑭᔭᐋᐧᐤ ᓂᔭ ᑭ ᑲ ᐅᐦᒋ ᓇᔦᑕᐁᐧᔨᑌᓈᐋᐧᐤ ᐊᓄᐦᐨ ᑫ ᑎᐱᐢᑳᐠ; ᒋᑫᒪ ᐃᑕᓯᓇᐦᐃᑳᑌᐤ, ᓂ ᑲ ᐸᑲᒪᐋᐧᐤ ᐅᑲᓇᐃᐧᒫᔭᑎᐦᑫᐧᐤ, ᐁᑯᓯ ᒫᑲ ᒫᔭᑎᐦᑲᐧᐠ ᑳ ᒫᒪᐁᐧᔭᑎᒋᐠ ᒥᓯᐁᐧ ᑭᑕ ᓯᓭᐧᐢᑲᐊᐧᐠ.
[32] ᒫᑲ ᐃᐢᐱ ᒥᓇ ᑭ ᐊᐧᓂᐢᑳᓂᑲᐃᐧᔮᓀ, ᑭ ᑲ ᓇᑕᐃᐧ ᐯᐦᐃᑎᓈᐋᐧᐤ ᑲᓬᐊᓬᐃᕽ.
[33] ᐱᑕᕒ ᑭ ᓇᐢᑫᐧᐊᐧᓯᒣᐤ ᐅᒥᓯ ᒫᑲ ᐁ ᑭ ᐃᑖᐟ, ᐋᑕ ᑲᐦᑭᔭᐤ ᐊᔨᓯᔨᓂᐊᐧᐠ ᑭᔭ ᐅᐦᒋ ᓇᔦᑕᐁᐧᔨᑕᑲᐧᐃᐧ ᐁᔨᐁᐧᕽ ᓇᒪᐃᐧᑳᐨ ᓂᔭ ᓂ ᑲ ᓇᔦᑕᐁᐧᔨᑌᐣ.
[34] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑖᐯᐧ ᑭᐟ ᐃᑎᐣ, ᐊᓄᐦᐨ ᐅᒪ ᑫ ᑎᐱᐢᑳᐠ, ᐁ ᒪᐧᔦ ᐯᐦᑖᑯᓯᐟ ᐹᑲᐋᑳᐧᐣ, ᓵᓴᐩ ᑭᔭ ᓂᐢᑖᐧᐤ ᑭ ᑲ ᐋᓀᐧᑕᐃᐧᐣ.
[35] ᐱᑕᕒ ᒫᑲ ᐅᒥᓯ ᑭ ᐃᑌᐤ, ᐋᑕ ᐃᐧᒋ ᓂᐳᒥᑕᓂ, ᐁᔨᐁᐧᕽ ᓇᒪᐃᐧᔭ ᑭ ᑲ ᐊᓀᐧᑕᑎᐣ. ᐁᑯᓯ ᒫᑲ ᐃᐧᐢᑕᐋᐧᐤ ᑭ ᐃᑌᐧᐊᐧᐠ ᑲᐦᑭᔭᐤ ᑭᐢᑭᓄᐦᐊᒪᐋᐧᑲᓇᐠ.
[36] ᐁᑲᐧ ᒫᑲ ᒋᓴᐢ ᑭ ᐯ ᐃᓯ ᐃᐧᒉᐁᐧᐤ ᐊᓂᑌ ᑫᐟᓭᒪᓂ ᐁᓯᔨᑲᑌᐠ, ᐅᒥᓯ ᒫᑲ ᐃᑌᐤ ᑭᐢᑭᓄᐦᐊᒪᐋᐧᑲᓇ, ᐅᑕ ᐊᐱᐠ, ᐁ ᓇᑕᐃᐧ ᐃᐢᐱᐦᒋ ᐊᔭᒥᐦᐋᔮᐣ ᓀᑌ.
[37] ᐁᑯᓯ ᐃᐧᒉᐁᐧᐤ ᐱᑕᕒ, ᒥᓇ ᐊᓂᐦᐃ ᓂᓱ ᐅ ᑯᓯᓴ ᓭᐱᑎ, ᐁ ᑭ ᒥᐦᑕᒣᔨᑕᕽ ᒫᑲ ᒥᓇ ᒥᐢᑕᐦᐃ ᐁ ᒥᑯᐢᑳᑌᔨᑕᕽ.
[38] ᐁᑯᓯ ᒫᑲ ᐅᒥᓯ ᑭ ᐃᑌᐤ, ᓂᐟ ᐊᐦᒐᕽ ᓈᐢᐱᐨ ᒥᑕᒣᔨᑕᑦ ᓂᐳᐃᐧᓂᕽ ᐃᓯ; ᐅᑕ ᑭᔭᐋᐧᐤ ᐊᔭᐠ, ᒥᓇ ᐃᐧᒋ ᐊᓴᐊᐧᐱᒥᐠ.
[39] ᑭ ᐊᑎ ᔭᑯᑌᐤ ᒫᑲ ᐊᐱᓯᐢ, ᐁᑯᓯ ᐁ ᑭ ᐅᒋᐦᒋᑲᐧᓇᐱᐟ, ᒥᓇ ᐁ ᑭ ᐊᔭᒥᐦᐋᐟ, ᐅᒥᓯ ᐁ ᐃᑌᐧᐟ, ᐅ ᓄᐦᑖ, ᑭᐢᐱᐣ ᑫ ᑭ ᐃᑭᓄᑫᐧ, ᑭᔮᑦ ᐅᒪ ᒥᓂᑳᐧᑲᓂᐢ ᓂ ᑲ ᒪᔮᐢᑳᑯᐣ! ᒫᑲ ᐁᔨᐁᐧᕽ, ᓇᒪᐃᐧᔭ ᓂᔭ ᐁ ᐃᑌᔨᐦᑕᒫᐣ, ᒫᑲ ᑭᔭ ᐁ ᐃᑌᔨᐦᑕᒪᐣ.
[40] ᑭ ᐯ ᓈᑌᐤ ᒫᑲ ᐅ ᑭᐢᑭᓄᐦᐊᒪᐋᐧᑲᓇ, ᐁ ᒥᐢᑲᐋᐧᐟ ᒫᑲ ᐁ ᓂᐸᔨᐟ, ᐅᒥᓯ ᐃᑌᐤ ᐱᑕᕒ, ᑖᓂᓯ! ᓇᒪ ᒋ ᑭ ᑭ ᐃᐧᒋ ᐊᓴᐋᐧᐸᒥᓈᐋᐧᐤ ᐯᔭᐠ ᑎᐸᐦᐃᐱᓯᒫᐧᐣ ᐃᔨᑯᕽ?
[41] ᐊᓴᐋᐧᐱᐠ, ᒥᓇ ᐊᔭᒥᐦᐋᐠ, ᐁᑳ ᑭᑕ ᐃᐢᐸᔨᔦᐠ ᑯᑌᔨᒥᑯᐃᐧᓂᕽ; ᐊᐦᒐᕽ ᒪᐢᑲᐁᐧᔨᐦᑕᑦ, ᒫᑲ ᐃᐧᔭᐢ ᓀᓱᐊᐧᐣ.
[42] ᒥᓇ ᒫᑲ ᐁᑲᐧ ᓂᓵᐧᐤ ᑭ ᐃᑐᐦᑌᐤ, ᐁᑯᓯ ᐁ ᑭ ᐊᔭᒥᐦᐋᐟ, ᐅᒥᓯ ᐁ ᐃᑌᐧᐟ, ᐅ ᓅᐦᑖ, ᑭᐢᐱᐣ ᐅᒪ ᒥᓂᑲᐧᑲᓂᐢ ᐁᑳ ᑫ ᒪᔭᐢᑲᑯᐊᐧᓀ, ᐸᑎᒫ ᐱᑯ ᒥᓂᑫᐧᔭᓂ, ᑭᔮᑦ ᑭᐟ ᐃᑌᔨᑕᒧᐃᐧᐣ ᑭᑕ ᐃᐧ ᐃᐦᑭᐣ.
[43] ᐁᑯᓯ ᒫᑲ ᑭ ᑕᑯᓯᐣ ᐁ ᑭ ᒥᐢᑲᐋᐧᐟ ᒥᓇ ᐁ ᓂᐹᔨᐟ; ᒋᑫᒪ ᑭ ᓵᑯᑎᑲᐧᓯᔨᐊᐧ.
[44] ᐁᑯᓯ ᒫᑲ ᑭ ᓇᑲᑌᐤ, ᒥᓇ ᒫᑲ ᐁ ᑭ ᓯᐯᐧᑌᐟ, ᐁᑲᐧ ᓂᐢᑖᐧᐤ ᒫᑲ ᐁ ᐊᔭᒥᐦᐋᐟ, ᐁᑲᐧᓂ ᐅᐦᐃ ᐃᑌᐧᐃᐧᓇ ᑫᔮᐱᐨ ᐁ ᐃᑌᐧᐟ.
[45] ᐁᑲᐧ ᒫᑲ ᒥᓇ ᑭ ᐯ ᐅᑎᐦᑌᐤ ᐅ ᑭᐢᑭᓄᐦᐊᒪᐋᐧᑲᓇ, ᐅᒥᓯ ᒫᑲ ᐁ ᑭ ᐃᑖᐟ, ᓂᐹᐠ ᐁᑲᐧ, ᒥᓇ ᐊᔦᐧᐱᐠ; ᒋᐢᐟ, ᐊᓂᒪ ᑎᐸᐃᐱᓯᒫᐧᐣ ᐅᑎᐦᒋᐸᔨᐤ, ᐃᔨᓂᐃᐧᑯᓯᓵᐣ ᐊᐧᔦᓯ ᐸᑭᑎᓈᐤ ᐅ ᒋᐦᒋᔨᕽ ᐅᒪᒑᑎᓴ.
[46] ᐊᐧᓂᐢᑳᐠ, ᐁᑲᐧ ᓯᐯᐧᐦᑌᑖᐠ; ᒋᐢᐟ, ᑭᓯᐋᐧᐠ ᐊᔮᐤ ᑳ ᒥᓯᒥᐟ.
[47] ᒣᑳᐧᐨ ᒫᑲ ᑫᔮᐱᐨ ᐁ ᐊᔭᒥᐟ, ᒋᐢᐟ, ᒍᑕᐢ, ᐯᔭᐠ ᐊᓂᑭ ᒥᑖᑕᐦᐟ ᓂᓱᓵᑊ ᑳ ᐃᐦᑕᓯᒋᐠ, ᑭ ᐯ ᑕᑯᓯᐣ, ᐁ ᐯ ᐃᐧᒉᐃᐧᑯᐟ ᑭᐦᒋ ᒥᐦᒉᐟ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ ᐁ ᐯ ᑕᑯᓇᑭᐠ ᐃᓴᐁᐧᐢᑲ ᒥᓇ ᒥᐢᑎᑯ ᐸᑲᒫᑲᓇ ᐁ ᐃᓯᑎᓴᐅᑯᒋᐠ ᑭᐦᒋ ᐊᔭᒥᐦᐁᐃᐧᔨᓂᐊᐧ, ᒥᓇ ᑳ ᓂᑳᓀᔨᑖᑯᓯᔨᐟ ᐊᔨᓯᔨᓂᐊᐧ.
[48] ᐊᓇ ᒫᑲ ᑳ ᒥᓯᒪᐟ ᑭ ᒥᔦᐤ ᑭᐢᑭᓇᐊᐧᒋᒋᑲᐣ, ᐅᒥᓯ ᐁ ᐃᑌᐧᐟ, ᐊᐃᐧᔭᐠ ᑫ ᐅᒉᒫᐊᐧᑫ, ᐁᐊᐧᑯ ᐊᓇ; ᐅᑎᓂᕽ.
[49] ᐁᑯᓯ ᒫᑲ ᓭᒫᐠ ᑭ ᐯ ᓇᑌᐤ ᒋᓴᓴ, ᐅᒥᓯ ᐁ ᐃᑌᐧᐟ, ᐁᓬ, ᑫᐢᑭᓄᐊᒪᑫᔭᐣ; ᐁ ᑭ ᐅᒉᒪᐟ ᒫᑲ.
[50] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᓂ ᑐᑌᑦ, ᐃᑐᑕ ᐊᓂᒪ ᑳ ᐅᐦᒋ ᐯ ᐃᑐᐦᑌᔭᐣ? ᐁᑯᓯ ᒫᑲ ᑭ ᐯ ᐃᑐᐦᑌᐊᐧᐠ ᐁ ᑭ ᐅᑎᐦᑎᓈᒋᐠ ᒋᓴᓴ, ᐁᑯᓯ ᐁ ᑭ ᐅᑎᓈᒋᐠ.
[51] ᒋᐢᐟ ᒫᑲ, ᐯᔭᐠ ᐊᓂᑭ ᑳ ᑭ ᐃᐧᒉᐊᐧᒋᐠ ᒋᓴᓴ ᑭ ᓱᐃᐧᓂᐢᑫᔨᐤ, ᒥᓇ ᐁ ᑭ ᑫᑕᐢᑲᐧᒋᐱᑕᕽ ᐅᐟ ᐃᓴᐁᐧᐢᐠ, ᐁ ᑭ ᐸᑲᒪᐊᐧᐟ ᒫᑲ ᑭᐦᒋ ᐊᔭᒥᐦᐁᐃᐧᔨᓂᐊᐧ ᐅᐟ ᐊᑐᐢᑫᔮᑲᓂᔨᐊᐧ, ᐁᑯᓯ ᒫᑲ ᐁ ᑭ ᒪᓂᐁᐧᐸᐊᒪᐧᐟ ᐅᑕᐊᐧᑳᔨᐤ.
[52] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᐊᓯᐊᐧᑕ ᒥᓇ ᑭᐟ ᐃᓴᐁᐧᐢᐠ ᐊᓂᑕ ᐱᒋᑯᒪᓈᓂᕽ; ᒋᑫᒫ ᑲᐦᑭᔭᐤ ᐊᓂᑭ ᐃᓴᐁᐧᐢᐠ ᑳ ᐅᑎᓇᑭᐠ ᐃᓴᐁᐧᐢᐠ ᑭᑕ ᐅᐦᒋ ᓂᓯᐊᐧᓈᑎᓯᐊᐧᐠ.
[53] ᑭᐟ ᐃᑌᔨᐦᑌᐣ ᒋ ᐁᑳ ᐊᓄᐦᐨ ᑭᑕ ᑭ ᐊᔭᒥᐃᐢᑕᐊᐧᐠ ᓄᑖᐃᐧ, ᐁᑯᓯ ᒫᑲ ᓭᒫᐠ ᑭᔨᐱ ᓂ ᑲ ᒥᔨᐠ ᐊᐊᐧᓯᒣ ᓂᓱᓵᑊ ᑕᐦᑐ ᓬᐃᒐᓇ ᐅᑭᓯᑯᐊᐧ?
[54] ᒫᑲ ᑖᓂᓯ ᑫ ᐃᓯ ᑎᐱᐸᔨᑭ ᒪᓯᓇᐦᐃᑫᐃᐧᓇ, ᐁᑯᓯ ᐅᒪ ᐅᐦᒋᑕᐤ ᑭᑕ ᐃᐦᑭᕽ?
[55] ᐁᑯᐢᐱ ᒋᓴᐢ ᐅᒥᓯ ᐃᑌᐤ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᑖᐱᐢᑯᐨ ᒋ ᑭᒧᑎᐢᐠ ᑭ ᐯ ᐃᓯ ᒪᐃᐧᓀᐅᓇᐋᐧᐤ ᐁ ᑕᑯᓇᒣᐠ ᐃᓴᐁᐧᐢᑲ ᒥᓇ ᒥᐢᑎᑯ ᐸᑲᒫᑲᓇ ᑭᑕ ᐅᑎᓂᔦᐠ? ᑕᐦᑭᓀ ᑭ ᑭ ᐃᐧᑕᐱᒥᑎᓈᐋᐧᐤ ᐁ ᑭᐢᑭᓄᐦᐊᒫᑫᔮᐣ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᓇᒪᐃᐧᔭ ᒫᑲ ᑭ ᑭ ᐅᑎᓂᓇᐋᐧᐤ.
[56] ᒫᑲ ᑲᐦᑭᔭᐤ ᐅᒪ ᑭ ᐃᐦᑭᐣ, ᑭᑕ ᑎᐱᐸᔨᔨᑭ ᐅ ᒪᓯᓇᐦᐃᑫᐃᐧᓂᐊᐧᐊᐧ ᐊᓂᑭ ᐅᑭᐢᑭᐁᐧᐦᐃᑫᐊᐧᐠ. ᐁᑯᐢᐱ ᒫᑲ ᑲᐦᑭᔭᐤ ᑭᐢᑭᓄᐦᐊᒪᐋᐧᑲᓇᐠ ᑭ ᓇᑲᑌᐊᐧᐠ ᐁ ᑭ ᑕᐸᓯᒋᐠ.
[57] ᐊᓂᑭ ᒫᑲ ᑳ ᑭ ᐅᑎᓈᒋᐠ ᒋᓴᓴ ᑭ ᐃᑐᐦᑕᐦᐁᐊᐧᐠ ᐅ ᐋᐧᐢᑳᐦᐃᑲᓂᔨᕽ ᑳᔭᐹᓴ, ᐊᓂᐦᐃ ᑭᐦᒋ ᐊᔭᒥᐦᐁᐃᐧᔨᓂᐊᐧ, ᐃᑕ ᒪᓯᓇᐦᐃᑫᐃᐧᔨᓂᐊᐧ ᒥᓇ ᑳ ᓂᑳᓀᔨᑖᑯᓯᔨᐟ ᐁ ᐃᑕᓯ ᒫᐊᐧᒋᐃᑐᔨᐟ.
[58] ᒫᑲ ᐃᐧᔭ ᐱᑕᕒ ᐊᐧᐦᔭᐤ ᑭ ᐅᐦᒋ ᐱᒥᑎᓴᐁᐧᐤ, ᑭᐦᒋ ᐊᔭᒥᐦᐁᐃᐧᔨᓂᐤ ᐅ ᐊᐧᐢᑲᐦᐃᑲᓂᕽ ᐃᓯ, ᐁ ᑭ ᐱᐦᑐᑫᐟ ᒫᑲ, ᐁ ᑭ ᐃᐧᑕᐱᒪᐟ ᐅᑎᓂᐁᐧᐊᐧ ᑭᑕ ᐋᐧᐸᐦᑕᕽ ᐱᔨᐢ ᑭᓯᐸᓄᕽ.
[59] ᐊᓂᑭ ᒫᑲ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒥᓇ ᑳ ᓂᑳᓀᔨᑖᑯᓯᒋᐠ, ᒥᓇ ᑲᐦᑭᔭᐤ ᐊᓂᑭ ᑳ ᒫᐊᐧᒋᐃᑐᒋᐠ, ᑭ ᓇᓇᑐᓇᒪᐧᐠ ᑭᑕ ᑭᔭᐢᑭᐃᐧ ᐋᒋᒥᒥᐦᐟ ᒋᓴᓴ ᑭᑕ ᐅᐦᒋ ᓂᐸᐦᐋᒋᐠ:
[60] ᒫᑲ ᐁᑳ ᐁ ᑭ ᒥᐢᑲᐦᑭᐠ; ᐁᐦᐁ, ᐋᑕ ᒥᐦᒉᐟ ᐅ ᑭᔮᐢᑭᐋᐧᒋᒧᐊᐧᐠ ᐁ ᑭ ᑕᑯᓯᐦᑭᐠ, ᑫᔮᐱᐨ ᓇᒪᐃᐧᔭ ᑭ ᒥᐢᑲᒪᐧᐠ. ᒫᑲ ᐃᐢᑲᐧᔮᐨ ᑭ ᑕᑯᓯᓇᐧᐠ ᓂᓱ ᐅᑭᔭᐢᑭᐊᐧᒋᒧᐊᐧᐠ,
[61] ᐅᒥᓯ ᒫᑲ ᐁ ᑭ ᐃᑌᐧᒋᐠ, ᐊᐊᐧ ᐊᔨᓯᔨᓂᐤ ᐅᒥᓯ ᑭ ᐃᑌᐧᐤ, ᓂ ᑲ ᑲᐢᑭᑖᐣ ᑭᑕ ᓂᓯᐊᐧᓈᒋᑖᔮᐣ ᑭᓭᒪᓂᑐ ᐅᐟ ᐊᔭᒥᐦᐁᐃᐧᑲᒥᐠ, ᐁᑯᓯ ᑭᑕ ᐅᓯᑖᔮᐣ ᓂᐢᑐ ᑭᓯᑳᑭ.
[62] ᑭᐦᒋ ᐊᔭᒥᐦᐁᐃᐧᔨᓂᐤ ᒫᑲ ᑭ ᐸᓯᑰ, ᐅᒥᓯ ᒫᑲ ᐁ ᑭ ᐃᑖᐟ, ᓇᒪ ᒋ ᑫᑲᐧᐩ ᑭᐟ ᐃᓯ ᓇᐢᑫᐧᐊᐧᓯᑕᐣ? ᑫᑲᐧᐩ ᐊᓂᒪ ᐅᑯ ᑳ ᐃᑖᒋᒥᐢᑭᐠ?
[63] ᒫᑲ ᒋᓴᐢ ᓇᒪᐃᐧᔭ ᑭ ᑭᑐ. ᑭᐦᒋ ᐊᔭᒥᐦᐁᐃᐧᔨᓂᐤ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑭᐟ ᐊᐢᐱ ᑭᑐᑎᑎᐣ ᑳ ᐱᒫᑎᓯᐟ ᑭᓭᒪᓂᑐ, ᑭᑕ ᐃᐧᐦᑕᒪᐃᐧᔮᕽ ᑭᐢᐱᐣ ᑭᔭ ᐅᑯᓯᓴ ᑭᓭᒪᓂᑐ.
[64] ᒋᓴᐢ ᒫᑲ ᐅᒥᓯ ᑭ ᐃᑌᐤ, ᑭ ᑭ ᐃᑖᐧᐣ; ᒫᑲ ᐁᔨᐁᐧᕽ, ᓂᔭ ᑭᐟ ᐃᑎᓈᐋᐧᐤ, ᐹᑎᒪ ᑭ ᑲ ᐊᐧᐸᒪᐋᐧᐤ ᐃᔨᓂᐃᐧᑯᓯᓵᐣ ᑭᑕ ᐊᐱᐟ ᐁ ᐅ ᑭᐦᒋ ᓂᐢᑭᐊᐧᕽ ᑭᐦᒑᔨᐃᐧᐃᐧᐣ. ᒥᓇ ᑭᑕ ᐯ ᑕᑯᓯᕽ ᐊᐧᐢᑯᕽ ᑭᓯᑯᕽ.
[65] ᐁᑯᓯ ᒫᑲ ᑭᐦᒋ ᐊᔭᒥᐦᐁᐃᐧᔨᓂᐤ ᑭ ᔮᔨᑭᐱᑕᑦ ᐅᐟ ᐊᔪᐃᐧᓂᓴ, ᐅᒥᓯ ᐁ ᐃᑌᐧᐟ, ᑭ ᐹᐢᑖᒧ; ᑫᑲᐧᐩ ᐊᐊᐧᓯᒣ ᑫ ᐅᐦᒋ ᓇᑕᐁᐧᔨᒫᔭᑲᐧᐤ ᐅᑖᒋᒧᐊᐧᐠ? ᒋᐢᐟ, ᑭ ᑭ ᐯᑕᒫᐧᓈᐋᐧᐤ ᐅ ᐹᐢᑖᒧᐃᐧᐣ.
[66] ᑖᓂᓯ ᑭᔭᐋᐧᐤ ᐁᑌᔨᑕᒣᐠ? ᑭ ᓇᐢᑫᐧᐊᐧᓯᒣᐊᐧᐠ ᐅᒥᓯ ᐁ ᑭ ᐃᑌᐧᒋᐠ, ᑲᐢᑭᐦᑕᒪᓱ ᓂᐳᐃᐧᐣ.
[67] ᐁᑲᐧ ᒫᑲ ᑭ ᓴᓯᑳᐧᑌᐊᐧᐠ ᐅᑳᐧᑲᓂᔨᕽ ᒥᓇ ᐁ ᑭ ᐸᐸᓯᑫᐧᐋᐧᒋᐠ; ᑯᑕᑲᐠ ᒫᑲ ᐃᐧᔭ ᐅ ᒋᐦᒋᐋᐧᐊᐧ ᐁ ᑭ ᐅᐦᒋ ᐸᐸᑲᒪᐋᐧᒋᐠ,
[68] ᐅᒥᓯ ᐁ ᐃᑖᒋᐠ, ᐃᐧᐦᑕᒪᐃᐧᓈᐣ, ᑭᔭ ᙭, ᐊᐁᐧᓇ ᑳ ᐸᑲᒪᐦᐅᐢᐠ?
[69] ᐱᑕᕒ ᒫᑲ ᐊᐧᔭᐃᐧᑎᒥᕽ ᐅᑭᒪᐃᐧᑲᒥᑯᕽ ᑭ ᐊᐱᐤ; ᐁᑯᓯ ᐅᐢᑭᓂᑭᐢᑫᐧᐤ ᑭ ᐯ ᓇᑌᐤ, ᐅᒥᓯ ᐁ ᐃᑖᐟ, ᑭᐢᑕ ᑭ ᑭ ᐃᐧᒉᐋᐧᐤ ᒋᓴᐢ ᑲᓬᐊᓬᐃᕽ ᑳ ᐅᐦᒋᐟ.
[70] ᒫᑲ ᑭ ᐊᓀᐧᑕᑦ ᑲᐦᑭᔭᐤ ᐁ ᑲᓇᐋᐧᐸᒥᑯᐟ, ᐅᒥᓯ ᐁ ᐃᑌᐧᐟ, ᓇᒪᐃᐧᔭ ᓂ ᑭᐢᑫᔨᑌᐣ ᑖᓂᓯ ᑳ ᐃᑌᐧᔭᐣ.
[71] ᐃᐢᐱ ᒫᑲ ᐱᑕᐃᐧᐊᐧᐢᑲᐃᑲᓂᕽ ᑳ ᐃᓯ ᐊᐧᔭᐃᐧᐟ, ᑯᑕᑲ ᐅᐢᑭᓂᑭᐢᑫᐧᐊᐧ ᑭ ᐊᐧᐸᒥᐠ, ᐅᒥᓯ ᒫᑲ ᐁ ᑭ ᐃᑖᔨᐟ ᐁᑯᑕ ᑳ ᐊᔮᔨᐟ, ᐊᐊᐧ ᐊᔨᓯᔨᓂᐤ ᐃᐧᐢᑕ ᑭ ᐃᐧᒉᐁᐧᐤ ᒋᓴᓴ ᓇᓴᕒᐁᑎᕽ ᑳ ᐅᐦᒋᔨᐟ.
[72] ᒥᓇ ᒫᑲ ᑭ ᐊᓀᐧᑕᑦ ᑭᐦᒋ ᐃᑌᐧᐃᐧᓂᕽ, ᓇᒪᐃᐧᔭ ᓂ ᑭᐢᑫᔨᒫᐤ ᐁᐊᐧᑳᐧᓇ ᐊᔨᓯᔨᓂᐤ.
[73] ᓈᑫᐢ ᐃᔨᑯᕽ ᒫᑲ ᒥᓇ ᑭ ᐯ ᓈᑌᐊᐧᐠ ᐊᓂᑭ ᐁᑯᑕ ᑳ ᓂᐸᐃᐧᒋᐠ, ᐅᒥᓯ ᒫᑲ ᐁ ᑭ ᐃᑖᒋᐠ ᐱᑕᕒᐊ, ᑫᒋᓈ ᑭᔭ ᒥᓇ ᐯᔭᐠ ᐅ ᑎᐯᔨᒪᑲᓇ; ᒋᑫᒪ ᑭ ᑭᓭᐧᐃᐧᐣ ᑭ ᑭᐢᑫᔨᐦᑖᑯᐃᑯᐣ.
[74] ᐁᑯᓯ ᒫᑲ ᑭ ᐊᑎ ᒫᒪᒋ ᐃᑌᐧᐤ ᐅᒥᓯ ᐁ ᐃᑌᐧᐟ, ᓇᒪᐃᐧᔭ ᓂ ᑭᐢᑫᔨᒫᐤ ᐊᓇ ᐊᔨᓯᔨᓂᐤ. ᓭᒫᐠ ᒫᑲ ᐸᑲᐋᑳᐧᐣ ᑭ ᑭᑐ.
[75] ᐱᑕᕒ ᒫᑲ ᑭ ᑭᐢᑭᓱᐸᔨᐤ ᐅᐟ ᐃᑌᐧᐃᐧᓂᔨᐤ ᒋᓴᓴ, ᑲ ᑭ ᐃᑎᑯᐟ, ᒪᐧᔦᐢ ᐸᑲᐋᐦᑳᐧᐣ ᑭᑐᐟ, ᓵᓴᐩ ᓂᐢᑖᐧᐤ ᑭ ᑲ ᐋᓀᐧᑕᐃᐧᐣ. ᐁᑯᓯ ᒫᑲ ᑭ ᐊᐧᔭᐃᐧᐤ, ᐁ ᑭ ᐊᐧᐃᐧᓴᑲᑌᐧᒧᐟ.