[1] ᐁᑯᓯ ᒫᑲ ᒋᓴᐢ ᑭ ᐊᔭᒥᐁᐤ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᒥᓇ ᐅ ᑭᐢᑭᓄᐦᐊᒪᐋᐧᑲᓇ,
[2] ᐅᒥᓯ ᐁ ᐃᑌᐧᐟ, ᒪᓯᓇᐦᐃᑫᐃᐧᔨᓂᐊᐧᐠ ᒥᓇ ᐸᕒᐊᓯᔭᐠ, ᐊᐱᐊᐧᐠ ᒧᓯᓴ ᐅᐟ ᐊᐱᐃᐧᓂᔨᕽ;
[3] ᐁᐊᐧᑯ ᒫᑲ ᐅᐦᒋ, ᑲᐦᑭᔭᐤ ᑫᑲᐧᐩ ᑳ ᐃᓯ ᐃᐧᐦᑕᒫᑯᔦᑯᐠ ᑭᑕ ᑐᑕᒣᐠ, ᐁᐊᐧᑯ ᑐᑕᒧᐠ ᒥᓇ ᑭᓯᑕᐠ; ᒫᑲ ᐁᑳᐃᐧᔭ ᑭᐢᑭᓇᐊᐧᐸᒥᑯᐠ ᐅᐟ ᐊᑐᐢᑫᐃᐧᓂᐊᐧᕽ; ᒋᑫᒪ ᐃᑌᐧᐊᐧᐠ, ᓇᒪᐃᐧᔭ ᒫᑲ ᑐᑕᒪᐧᐠ.
[4] ᒋᑫᒫ ᑕᑯᐱᑕᒪᐧᐠ ᐁ ᑯᓯᑲᐧᓂᔨᑭ ᓇᔭᒋᑲᓇ, ᒥᓇ ᐁ ᑯᑕᑭᐸᑲᑭ ᑭᑕ ᓇᔭᑕᒥᕽ, ᐁ ᓇᔭᑕᐊᒋᐠ ᒫᑲ ᐊᔨᓯᔨᓂᐊᐧ ᐅ ᑎᑎᒪᓂᔨᕽ; ᒫᑲ ᐃᐧᔭᐋᐧᐤ ᑎᐱᔭᐁᐧ ᓇᒪᐊᐧᐨ ᑲᓇᑫ ᐯᔭᐠ ᐅ ᒋᐦᒋᐋᐧᐤ ᐃᐧ ᐅᐦᒋ ᐋᐦᑎᓇᒪᐧᐠ.
[5] ᒫᑲ ᑲᐦᑭᔭᐤ ᐅᐟ ᐊᑐᐢᑫᐃᐧᓂᐊᐧᐊᐧ ᑐᑕᒪᐧᐠ ᐱᑯ ᑭᑕ ᐋᐧᐸᒥᑯᒋᐠ ᐊᔨᓯᔨᓂᐊᐧ; ᒥᓇ ᐊᔭᑳᐢᑭᑕᐊᐧᐠ ᐅᐟ ᐊᐢᐱᑖᐱᐢᑲᑲᓂᐊᐧᐊᐧ, ᒥᓇ ᐁ ᒪᒥᓴᑕᒋᐠ ᐁ ᓀᔦᑭᑲᐧᑌᔨᑭ ᐅᐢᑯᑕᑲᐊᐧᐊᐧ,
[6] ᒥᓇ ᐁ ᓴᑭᑖᒋᐠ ᐁ ᐃᐢᐹᔨᑭ ᐊᐱᐃᐧᓇ ᐃᐧᐦᑯᐦᑐᐃᐧᓂᕽ, ᒥᓇ ᑫᐢᑌᔨᑖᑲᐧᑭ ᐊᐱᐃᐧᓇ ᐊᔭᒥᐦᐁᐃᐧᑲᒥᑯᕽ.
[7] ᒥᓇ ᐊᑕᒥᐢᑲᑐᐃᐧᓇ ᐊᑕᑐᐃᐧᓂᕽ, ᒥᓇ ᑭᑕ ᐃᓯᔨᐦᑳᑎᑯᒋᐠ ᐊᔨᓯᔨᓂᐊᐧ, ᕒᐋᐸᐩ,
[8] ᒫᑲ ᐁᑳᐃᐧᔭ ᑭᔭᐋᐧᐤ ᕒᐋᐸᐩ ᐃᐧᐃᑎᑯᓯᐠ; ᒋᑫᒫ ᐯᔭᑯ ᑯᑭᐢᑭᓄᐦᐊᒪᑫᒥᐋᐧᐤ; ᑲᐦᑭᔭᐤ ᒫᑲ ᑯᒋᐋᐧᒥᑐᓈᐋᐧᐤ.
[9] ᒥᓇ ᐁᑳᐃᐧᔭ ᐊᐃᐧᔭᐠ ᓄᑖᐃᐧᓇᐣ ᐃᑎᕽ ᐆᑕ ᐊᐢᑭᕽ; ᒋᑫᒫ ᐯᔭᑯ ᐱᑯ ᑯᑕᐃᐧᐋᐧᐤ, ᐁᐊᐧᑯ ᑭᐦᒋ ᑭᓯᑯᕽ ᑳ ᐊᔮᐠ.
[10] ᐊᐦᐳ ᒥᓇ ᐁᑳᐃᐧᔭ ᐅᑭᒫᐤ ᐃᐧ ᐃᓯᔨᐦᑳᑎᑯᓯᐠ; ᒋᑫᒫ ᐯᔭᑯ ᐱᑯ ᑭᐟ ᐅᑭᒪᒥᐋᐧᐤ, ᐁᐊᐧᑯ ᙭.
[11] ᒫᑲ ᑳ ᑭᐦᒑᔨᐃᐧᐟ ᐅᒪ ᑳ ᐃᑕᓯᔦᐠ, ᐁᐊᐧᑯ ᑫ ᐅᐟ ᐊᑐᐢᑫᔮᑲᓂᔦᐠ.
[12] ᐊᐁᐧᓇ ᒫᑲ ᑫ ᑭᐢᑌᔨᒥᓱᑫᐧ, ᑭᑕ ᑕᐸᑌᔨᒧᐋᐤ; ᐊᐃᐧᓇ ᒫᑲ ᑫ ᑖᐸᑌᔨᒧᐦᐃᓱᐟ, ᑭᑕ ᑭᐢᑌᔨᑕᑯᐊᐤ.
[13] ᒫᑲ ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ ᒪᓯᓇᐦᐃᑫᐃᐧᔨᓂᑎᐠ ᒥᓇ ᐸᕒᐊᓯᑎᐠ, ᐅᑕᔭᒥᐦᐁᑳᓱᐢᑲᐠ! ᒋᑫᒫ ᑭ ᑭᐸᐦᐊᒪᐧᓈᐋᐧᐤ ᐊᔨᓯᔨᓂᐊᐧᐠ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ, ᒋᑫᒫ ᓇᒪᐃᐧᔭ ᑭᔭᐋᐧᐤ ᑭ ᐃᐧ ᐱᑐᑳᓈᐋᐧᐤ, ᓇᒪᐃᐧᔭ ᒫᑲ ᒥᓇ ᑭᐟ ᐃᔨᓇᒪᐋᐧᐋᐧᐊᐧᐠ ᐊᓂᑭ ᑳ ᐃᐧ ᐱᐦᑐᑫᒋᐠ ᑭᑕ ᐱᐦᑐᑫᒋᐠ.
[14] ᑭ ᑲᑳᐧᑕᑭᓯᓈᐋᐧᐤ ᐃᓴ ᑭᔭᐋᐧᐤ ᒪᓯᓇᐦᐃᑫᐃᐧᔨᓂᑎᐠ, ᒥᓇ ᐸᕒᐊᓯᑎᐠ, ᐅᑕᔭᒥᐦᐁᑳᓱᐢᑲᐠ! ᒋᑫᒫ ᑭ ᓂᓯᐊᐧᓈᒋᑖᓈᐋᐧᐤ ᓯᑳᐊᐧᐠ ᐃᐧᑭᐋᐧᐊᐧ, ᒥᓇ ᑲᔦᓯᐃᐁᐧᐃᐧᓂᕽ ᐱᑯ ᑭᓀᐧᐢ ᑯᐦᒋ ᐊᔭᒥᐦᐋᓈᐋᐧᐤ; ᐁᐊᐧᑯ ᒫᑲ ᑫ ᐅᐦᒋ ᑲᐢᑭᑕᒫᓱᔦᐠ ᐊᐊᐧᓯᒣ ᑭᐦᒋ ᓈᓂᐳᒥᑯᐃᐧᐣ.
[15] ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ, ᒪᓯᓇᐦᐃᑫᐃᐧᔨᓂᑎᐠ, ᒥᓇ ᐸᕒᐊᓯᑎᐠ, ᐅᑕᔭᒥᐦᐁᑳᓱᐢᑲᐠ! ᒋᑫᒫ ᑭ ᐋᐧᐢᑳᐢᑫᓈᐋᐧᐤ ᑭᐦᒋᑲᒥ ᒥᓇ ᐊᐢᑭ, ᑭᑕ ᐅᓯᐊᔦᐠ ᐯᔭᐠ ᐅᑫᐧᐢᑭᐱᒫᑎᐢ, ᐃᐢᐱ ᒫᑲ ᑳ ᐅᓯᐋᔦᑯ, ᑭᐟ ᐃᓯᐊᐧᐋᐧᐤ ᓂᓵᐧᐤ ᐃᔨᑯᕽ ᐊᐊᐧᓯᒣ ᑭᑕ ᐅᐟ ᐊᐋᐧᓯᒥᓯᒥᑯᐟ ᐃᐢᑯᑌᐤ ᐃᐢᐱᐨ ᑭᔭᐋᐧᐤ.
[16] ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ, ᐁᑳ ᑳ ᐋᐧᐱᔦᐠ ᐅᐱᒧᑕᐃᐁᐧᐊᐧᐠ, ᐅᒥᓯ ᑳ ᐃᑌᐧᔦᐠ, ᐊᐃᐧᔭᐠ ᑫ ᐊᐢᐱ ᑭᐦᒋ ᐃᑌᐧᑫᐧ ᑭᐦᒋ ᐊᔭᒥᐦᐁᐃᐧᑲᒥᐠ, ᓇᒪᐃᐧᔭ ᓈᓂᑕᐤ ᐃᐦᑭᐣ; ᒫᑲ ᑭᐢᐱᐣ ᐊᐃᐧᔭᐠ ᑫ ᐊᐢᐱ ᑭᐦᒋ ᐃᑌᐧᑫᐧ ᐅᓵᐃᐧᓱᓂᔮᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᒪᓯᓇᐦᐃᑫᐤ!
[17] ᑭᔭᐋᐧᐤ ᐅᑲᑫᐸᑎᓴᐠ, ᒥᓇ ᐁᑳ ᑳ ᐋᐧᐱᔦᐠ; ᑖᓂᒪ ᓇᐊᐧᐨ ᑫᐦᒐᔨᐊᐧᕽ, ᐊᓂᒪ ᐅᓵᐃᐧᓱᓂᔮᐤ ᐊᐦᐳ ᐊᓂᒪ ᑭᐦᒋ ᐊᔭᒥᐦᐁᐃᐧᑲᒥᐠ ᑳ ᐅᐦᒋ ᑲᓈᑎᓯᐟ ᐅᓵᐃᐧᓱᓂᔮᐤ?
[18] ᒥᓇ, ᐊᐃᐧᔭᐠ ᑫ ᐊᐢᐱ ᑭᐦᒋ ᐃᑌᐧᑫᐧ ᐸᑭᑎᓇᓱᐃᐧᓇᐱᐢᐠ, ᓇᒪᐃᐧᔭ ᓈᓂᑕᐤ ᐃᐦᑭᐣ; ᒫᑲ ᑭᐢᐱᐣ ᐊᐃᐧᔭᐠ ᑫ ᐊᐢᐱ ᑭᐦᒋ ᐃᑌᐧᑫᐧ ᐊᓂᒪ ᒣᑭᐃᐧᐣ ᐁᑯᑕ ᑳ ᐊᔮᐠ ᒪᒋ ᑐᑕᑦ ᐃᓴ.
[19] ᑭᔭᐋᐧᐤ ᐅᑲᑫᐹᑎᓴᐠ, ᒥᓇ ᐁᑳ ᑳ ᐋᐧᐱᔦᐠ; ᑖᓂᒪ ᓇᐊᐧᐨ ᑫᐦᒑᔨᐊᐧᕽ, ᒣᑭᐃᐧᐣ, ᐊᐦᐳ ᐊᓂᒪ ᐸᑭᑎᓂᓱᐃᐧᓇᐱᐢᐠ ᑳ ᑲᓈᒋᑖᒪᑲᕽ ᒣᑭᐃᐧᐣ?
[20] ᐁᐊᐧᑯ ᒫᑲ ᐅᐦᒋ ᐊᐃᐧᔭᐠ ᑫ ᐊᐢᐱ ᑭᐦᒋ ᐃᑌᐧᑫᐧ ᐸᑭᑎᓇᓱᐃᐧᓇᐱᐢᐠ, ᐊᐢᐱ ᑭᐦᒋ ᐃᑌᐧᐤ ᐁᐊᐧᑫᐧᔨᐤ, ᒥᓇ ᑲᐦᑭᔭᐤ ᑫᑲᐧᐩ ᐁᑯᑕ ᑳ ᐊᔮᔨᐠ.
[21] ᐊᐃᐧᔭᐠ ᒫᑲ ᑫ ᐊᐢᐱ ᑭᐦᒋ ᐃᑌᐧᑫᐧ ᑭᐦᒋ ᐊᔭᒥᐦᐁᐃᐧᑲᒥᐠ, ᐊᐢᐱ ᑭᐦᒋ ᐃᑌᐧᐤ, ᒥᓇ ᐊᓂᐦᐃ ᐁᑯᑕ ᑳ ᐃᐧᑭᔨᐟ.
[22] ᐊᓇ ᒫᑲ ᐃᐧᔭ ᑫ ᐊᐢᐱ ᑭᐦᒋ ᐃᑌᐧᐟ ᑭᐦᒋ ᑭᓯᐠ, ᐊᐢᐱ ᑭᐦᒋ ᐃᑌᐧᐤ ᑭᓭᒪᓂᑐ ᐅᐟ ᐅᑭᒫᐊᐧᐱᐃᐧᐣ, ᒥᓇ ᐊᓂᐦᐃ ᐁᑯᑕ ᑳ ᐊᐱᔨᐟ.
[23] ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ ᒪᓯᓇᐦᐃᑫᐃᐧᔨᓂᑎᐠ ᒥᓇ ᐸᕒᐊᓯᑎᐠ, ᐅᑕᔭᒥᐦᐁᑳᓱᐢᑲᐠ! ᒋᑫᒫ ᑭ ᑎᐸᐁᓈᐋᐧᐤ ᒥᑖᑕᐟ ᐃᔨᑯᕽ ᒥᐣᐟ ᒥᓇ ᐊᓂᓯ ᒥᓇ ᑲᒥᐣ, ᐁᑯᓯ ᒫᑲ ᐃᐧᔭ ᐁ ᑭ ᐸᑕᐊᒣᐠ ᐊᐊᐧᓯᒣ ᐁᐢᐱᑌᔨᑖᑲᐧᑭ ᐃᑕᓱᐁᐧᐃᐧᓂᕽ, ᐅᔭᓱᐋᐧᓯᐁᐧᐃᐧᐣ, ᑭᓭᐋᐧᑎᓯᐃᐧᐣ, ᒥᓇ ᑖᐯᐧᐊᐧᑫᔨᑕᒧᐃᐧᐣ; ᐁᐊᐧᑲᐧᓂ ᐃᓴ ᐅᐦᐃ ᑭ ᑲ ᑭ ᑐᑌᐦᑕᐋᐧᐤ ᓇᒪᐃᐧᔭ ᒫᑲ ᑯᑕᑲ ᐁᑯᓯ ᑭᑕ ᐃᓯ ᐸᑕᐊᒣᐠ ᐁᑳ ᑲᑕ ᑐᑕᒣᐠ.
[24] ᑭᔭᐋᐧᐤ ᐁᑳ ᑳ ᐋᐧᐱᔦᐠ ᐅᐱᒧᑕᐃᐁᐧᐊᐧᐠ! ᑳ ᓯᑯᐹᑎᓈᔦᐠ ᐁᔨᑯᐢ, ᒥᓇ ᑳ ᒥᓯᐁᐧᐸᔨᐦᐋᔦᐠ ᐱᐢᑳᐧᐃᐧᑲᓀᐃᐧᐱᓯᐢᑭᐤ.
[25] ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ ᒪᓯᓇᐦᐃᑫᐃᐧᔨᓂᑎᐠ ᒥᓇ ᐸᕒᐊᓯᑎᐠ ᐅᑕᔭᒥᐦᐁᑳᓱᐢᑲᐠ? ᒋᑫᒫ ᐊᐧᐢᑭᐨ ᐱᑯ ᑭ ᑲᓈᒋᑖᓈᐋᐧᐤ ᒥᑭᓯᔭᑲᓂᐢ, ᒥᓇ ᑳ ᐊᐢᐸᐢᑌᐠ, ᒫᑲ ᐃᐧᔭ ᐱᐦᒋ ᓵᑲᐢᑭᓀᐤ ᐊᓂᒪ ᑳᓴᑳᑎᓯᐃᐧᐣ ᒥᓇ ᐋᐢᐳᓀᔨᒧᐃᐧᐣ.
[26] ᑭᔭ ᐁᑳ ᑳ ᐋᐧᐱᔭᐣ ᐸᕒᐊᓯ! ᑲᓈᒋᑖ ᓂᐢᑕᑦ ᐊᓂᒪ ᐱᐦᒋ ᒥᑭᓯᔭᑲᓂᓯᕽ ᐁᔮᐠ ᒥᓇ ᑳ ᐊᐢᐸᐢᑌᐠ, ᐁᑯᓯ ᒫᑲ ᒥᓇ ᐊᐧᐢᑭᐨ ᑭᑕ ᑲᓇᑕᓇᐧ.
[27] ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ ᒪᓯᓇᐦᐃᑫᐃᐧᔨᓂᑎᐠ ᒥᓇ ᐸᕒᐊᓯᑎᐠ, ᐅᑕᔭᒥᐦᐁᑳᓱᐢᑲᐠ! ᒋᑫᒫ ᑖᐱᐢᑯᐨ ᐊᓂᐦᐃ ᑳ ᐋᐧᐱᐢᑭᐯᐃᑳᑌᑭ ᔨᑲᐧᐦᐊᐢᑳᓇ ᑭᐟ ᐃᓯᓈᑯᓯᓈᐋᐧᐤ, ᐊᓂᐦᐃ ᑖᐯᐧ ᐊᐧᐢᑭᐨ ᓈᐢᐱᐨ ᑳ ᒥᔪᓇᑲᐧᑭ, ᒫᑲ ᐃᐧᔭ ᐱᐦᒋ ᓵᑲᐢᑭᓀᐊᐧ ᓂᐳᐃᐧᐃᔨᓂᐃᐧᑲᓇ, ᒥᓇ ᑲᐦᑭᔭᐤ ᐁᑳ ᑳ ᐯᑲᕽ.
[28] ᐁᑯᓯ ᒫᑲ ᒣᐧᐦᒋ ᑭᔭᐋᐧᐤ ᐊᐧᐢᑭᐨ ᐁ ᐃᓯ ᑲᐧᔭᐢᑳᑎᓯᐢᑕᐋᐧᔦᑯᐠ ᐊᔨᓯᔨᓂᐊᐧᐠ, ᒫᑲ ᐃᐧᔭ ᐱᐦᒋᔭᐤ ᑭ ᓵᑲᐢᑭᓀᐢᑳᑯᓈᐋᐧᐤ ᐊᔭᒥᐁᑳᓱᐃᐧᐣ ᒥᓇ ᒪᒋ ᐃᑎᐃᐧᐣ.
[29] ᑭ ᑲᑳᐧᑕᑭᓯᓈᐋᐧᐤ ᑭᔭᐋᐧᐤ ᒪᓯᓇᐦᐃᑫᐃᐧᔨᓂᑎᐠ ᒥᓇ ᐹᕒᐊᓯᑎᐠ ᐅᑕᔭᒥᐦᐁᑳᓱᐢᑲᐠ! ᒋᑫᒫ ᑯᓯᑖᐋᐧᓈᐋᐧᐤ ᐅ ᔨᑲᐧᐦᐊᐢᑳᓂᐋᐧᐊᐧ ᐅᑭᐢᑭᐁᐧᐦᐃᑫᐊᐧᐠ ᒥᓇ ᑭ ᐊᐧᐁᐧᓯᑖᐋᐧᓈᐋᐧᐤ ᐅ ᔨᑲᐧᐦᐊᐢᑳᓂᐋᐧᐊᐧ ᐅᑲᐧᔭᐢᑭᑖᑎᓯᐊᐧᐠ,
[30] ᒥᓇ ᐁ ᐃᑌᐧᔦᐠ, ᑭᐢᐱᐣ ᑭ ᐊᔮᔮᕽ ᒣᑳᐧᐨ ᐁ ᐅ ᑭᓯᑳᒥᒋᐠ ᓄᑖᐃᐧᓈᓇᐠ ᓇᒪᐃᐧᔭ ᓂ ᑲ ᑭ ᐃᐧᒋᐋᑕᓈᓇᐠ ᐅ ᒥᑯᔨᕽ ᐅᑭᐢᑭᐁᐧᐦᐃᑫᐊᐧ.
[31] ᐁᑯᑕ ᒫᑲ ᑯᐦᒋ ᐋᒋᒧᐢᑖᓱᓈᐋᐧᐤ, ᑭᔭᐋᐧᐤ ᐁ ᐅᐟ ᐊᐋᐧᓯᒥᓯᒥᑯᔦᑯᐠ ᑳ ᑭ ᓂᐸᐦᐋᒋᐠ ᐅᑭᐢᑭᐁᐧᐦᐃᑫᐊᐧ.
[32] ᓵᑲᐢᑭᓇᑖᐋᐧᕽ ᒫᑲ ᐅ ᑲᐢᑭᑕᒫᓱᐃᐧᓂᐋᐧᐤ ᑯᑖᐃᐧᐋᐧᐊᐧᐠ.
[33] ᑭᔭᐋᐧᐤ ᑭᓀᐱᑲᐧᐠ ᑭᔭᐋᐧᐤ ᑳ ᐅᑕᐋᐧᓯᒥᓯᒥᑯᔦᑯᐠ ᑭᓀᐱᑲᐧᐠ, ᑖᓂᓯ ᑫ ᑭ ᐃᓯ ᑕᐸᓯᑖᔦᐠ ᑫ ᐅᔭᓱᐋᐧᑎᑲᐃᐧᔦᐠ ᐃᐢᑯᑌᕽ ᐃᓯ.
[34] ᐁᑯᓯ ᒫᑲ, ᒋᐢᐟ, ᑭᐟ ᐃᓯᑎᓴᐊᒫᑎᓈᐋᐧᐤ ᐅᑭᐢᑭᐁᐧᐦᐃᑫᐊᐧᐠ, ᒥᓇ ᐃᔨᓂᓯᐃᐧ ᐊᔨᓯᔨᓂᐊᐧᐠ, ᒥᓇ ᒪᓯᓇᐦᐃᑫᐃᐧᔨᓂᐊᐧᐠ; ᐋᑎᐦᐟ ᒫᑲ ᑭ ᑲ ᓂᐸᐦᐋᐋᐧᐊᐧᐠ ᒥᓇ ᑭ ᑲ ᒋᐢᑖᐢᑳᐧᑖᐧᐋᐧᐊᐧᐠ; ᒥᓇ ᐋᑎᐦᐟ ᑭ ᑲ ᐸᐸᓴᐢᑌᐋᐧᐋᐧᐊᐧᐠ ᑭᐟ ᐊᔭᒥᐃᐁᐧᑲᒥᑯᐋᐧᕽ, ᒥᓇ ᑭᑕ ᐋᔮᓱᐃᐧ ᑲᑳᐧᑕᑭᐊᔦᑲᐧᐤ ᓇᓇᑐᕽ ᐅᑌᓈᕽ.
[35] ᑭᔭᐋᐧᐤ ᒫᑲ ᑭᑕ ᐸᑲᒥᐢᑳᑯᔦᐠ ᑲᐦᑭᔭᐤ ᐊᓂᒪ ᑲᐧᔭᐢᐠ ᐃᓯᐁᐧᐱᓯᐃᐧᓂ ᒥᐦᑯ ᑳ ᓯᑭᓂᑳᑌᐠ ᐊᐢᑭᕽ, ᐊᓂᑕ ᐅᐦᒋ ᐅ ᒥᐦᑯ ᑲᓈᑎᓯᐃᐧ ᐁᐱᓬ ᐱᔨᐢ ᐅ ᒥᐦᑯ ᓵᑲᕒᐋᔭᐢ ᐅᑯᓯᓴ ᐹᕒᐊᑲᐃᐊᐢ, ᑳ ᑭ ᓂᐸᐦᐋᔦᐠ ᑖᐢᑕᐋᐧᔨᕽ ᒋ ᐊᔭᒥᐦᐁᐃᐧᑲᒥᑯᕽ ᒥᓇ ᐸᑭᑎᓇᓱᐃᐧᓈᐱᐢᑯᕽ;
[36] ᑖᐯᐧ ᑭᐟ ᐃᑎᓈᐋᐧᐤ, ᑲᐦᑭᔭᐤ ᐅᐦᐃ ᑫᑲᐧᔭ ᑭᑕ ᐸᑲᒥᐢᑳᑲᐧᐠ ᐅᑯ ᑳ ᐊᓂᐢᑫ ᐱᒫᑎᓯᒋᐠ.
[37] ᐋ ᒉᕒᐅᓴᓬᐊᑦ, ᒉᕒᐅᓴᓬᐊᑦ, ᑭᔭ ᑳ ᓂᐸᐊᒋᐠ ᐅᑭᐢᑭᐁᐧᐦᐃᑫᐊᐧᐠ ᒥᓇ ᑳ ᐱᒫᐧᐱᐢᑲᐊᒋᐠ ᑳ ᑭ ᐯ ᐃᓯᑎᓴᐊᒫᑲᐃᐧᔭᐣ, ᑖᓂᑕᐦᑖᐧᐤ ᑳ ᐋᑕ ᐃᐧ ᒫᒪᐃᐧ ᒫᐊᐧᒋᐊᑭᐠ ᑭᐟ ᐊᐋᐧᓯᒥᓴᐠ, ᑖᐱᐢᑯᐨ ᒥᓯᔦᐤ ᑳ ᐃᓯ ᒫᐊᐧᒋᐦᐋᐟ ᐅ ᒥᓯᔦᓯᓯᒪ ᓯᐹ ᐅᑕᑕᑲᐧᓂᕽ, ᒫᑲ ᓇᒪᐃᐧᔭ ᑭᐟ ᐃᑌᔨᑌᓈᐋᐧᐤ!
[38] ᒋᐢᐟ ᒫᑲ, ᑭ ᐋᐧᐢᑳᐦᐃᑲᐣ ᑭ ᓇᑲᑕᒫᑲᐃᐧᐣ ᐁ ᐱᓯᓯᑲᐧᐢᑌᐠ.
[39] ᒋᑫᒫ ᓂᔭ ᑭᐟ ᐃᑎᓈᐋᐧᐤ, ᓇᒪᐃᐧᑳᐨ ᒥᓇ ᑭ ᑲ ᐋᐧᐸᒥᓈᐋᐧᐤ, ᐹᑎᒫ ᐱᑯ ᐃᑌᐧᔦᑯ, ᓴᐁᐧᔨᑖᑯᓯᐤ ᑳ ᐯ ᐃᑐᐦᑌᐟ ᑳ ᑎᐯᔨᐦᒋᑫᐟ ᐅᐟ ᐃᓯᔨᐦᑳᓱᐃᐧᓂᕽ.