[1] ᐁᑯᐢᐱ ᒫᑲ ᐁᕒᐊᐟ ᐊᓇ ᑌᐟᕒᐋᕒᐠ ᑭ ᐯᑕᑦ ᐁ ᐃᑕᒋᒥᑯᐊᐧᓯᔨᐟ ᒋᓴᓴ;
[2] ᐅᒥᓯ ᒫᑲ ᑭ ᐃᑌᐤ ᐅᐟ ᐊᑐᐢᑫᔮᑲᓇ, ᐁᐊᐧᑯ ᐊᐊᐧ ᒐᐣ ᐸᑊᑎᐢᐟ: ᑭ ᐊᐱᓯᓯᐣ; ᐁᐊᐧᑯ ᒫᑲ ᒪᒪᑕᐃᐧ ᐊᑐᐢᑫᐃᐧᓇ ᑳ ᐅᐦᒋ ᐊᑐᐢᑲᑕᕽ.
[3] ᐃᐧᔭ ᐁᕒᐊᐟ ᐁ ᑭ ᐅᑎᑎᓇᐟ ᒑᓇ ᒥᓇ ᐁ ᑭ ᒪᒪᒋᑲᐧᐱᑕᐟ, ᐁᑯᓯ ᒫᑲ ᐁ ᑭ ᑭᐸᐋᐧᐟ ᑭᐸᐦᐅᑐᐃᐧᑲᒥᑯᕽ ᐁᕒᐅᑎᔭᐢ ᐅᐦᒋ, ᐅᒋᐋᐧᒪ ᐱᓬᐃᐸ ᐃᐧᐃᐧᔨᐊᐧ.
[4] ᒋᑫᒪ ᒐᐣ ᐅᒥᓯ ᑭ ᐃᑌᐤ, ᓇᒪᐃᐧᔭ ᑲᐧᔭᐢᐠ ᐃᑌᔨᑕᑲᐧᐣ ᑭᔭ ᑭᑕ ᐊᔭᐊᐧᐟ.
[5] ᐃᐢᐱ ᒫᑲ ᐃᐧᔭ ᑭᑕ ᑭ ᓂᐸᐊᐸᐣ, ᑭ ᑯᐢᑌᐤ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᒋᑫᒪ ᐅᑭᐢᑭᐁᐧᐦᐃᑫᑭ ᐃᑕᑭᒣᐊᐧᐠ.
[6] ᒫᑲ ᐃᐢᐱ ᐁᕒᐊᐟ ᐅ ᑎᐱᐢᑲᒧᐃᐧᑭᓯᑲᑦ ᐁᐧᑎᒋᐸᔨᔨᐠ, ᐅᑖᓂᓴ ᐁᕒᐅᑎᔭᐢ ᑭ ᓂᒥᐃᑐᔨᐊᐧ ᒣᑳᐧᐨ ᐃᑕ ᐁ ᐊᔮᒋᐠ, ᐁᕒᐊᐟ ᒫᑲ ᑭ ᒥᐁᐧᔨᑕᑦ.
[7] ᐁᐊᐧᑯ ᒫᑲ ᐅᐦᒋ ᑭ ᐊᓱᑕᒪᐁᐧᐤ ᑭᐦᒋ ᐃᑌᐧᐃᐧᓂᕽ ᑭᑕ ᒥᔮᐟ ᐱᑯ ᑫᑲᐧᐩ ᑫ ᓇᑕᐁᐧᔨᑕᒪᑯᐟ.
[8] ᐃᐧᔭ ᒫᑲ, ᐁ ᑭ ᓂᑲᓂ ᑭᐢᑭᓄᐦᐊᒫᑯᐟ ᐅᑳᐃᐧᔭ, ᐅᒥᓯ ᑭ ᐃᑌᐧᐤ, ᐯᒋ ᒥᔨᐣ ᐅᑕ ᐅᐢᑎᑲᐧᐣ ᒐᐣ ᐸᑊᑎᐢᐟ ᐅᔭᑲᓂᕽ.
[9] ᑭᐦᒋ ᐅᑭᒫᐤ ᑭ ᒥᒋᔭᐁᐧᓯᐤ: ᐁᔨᐁᐧᕽ ᒫᑲ, ᑭᐦᒋ ᐃᑌᐧᐃᐧᐣ ᐅᐦᒋ, ᒥᓇ ᐊᓂᐦᐃ ᑳ ᐃᐧᑕᐱᒥᑯᐟ ᐁ ᒥᒋᓱᐟ ᑭ ᐃᑕᓱᐁᐧᐤ ᑭᑕ ᒥᔨᒥᐦᐟ.
[10] ᑭ ᐃᓯᑎᓴᐦᐅᐁᐧᐤ ᒫᑲ, ᐁᑯᓯ ᐁ ᑭ ᑭᐢᑭᑫᐧᑕᐊᐧᐟ ᒑᓇ ᑭᐸᐦᐅᑐᐃᐧᑲᒥᑯᕽ.
[11] ᐅᐢᑎᑲᐧᐣ ᒫᑲ ᑭ ᐯᑕᐊᐧᐣ ᐅᔭᑲᓂᕽ, ᐁ ᑭ ᒥᔨᐦᐟ ᒫᑲ ᐅᐢᑭᓂᑭᐢᑫᐧᐤ; ᐁᑯᓯ ᑭ ᐯᑕᒪᐁᐧᐤ ᐅᑳᐃᐧᔭ.
[12] ᐅ ᑭᐢᑭᓄᐦᐊᒪᐋᐧᑲᓇ ᑭ ᐯ ᐃᑐᐦᑌᔨᐊᐧ, ᐁ ᑭ ᐯ ᐅᑎᓇᒪᐧᒋᐠ ᐃᐧᔭᐤ, ᒥᓇ ᐁ ᑭ ᓇᐃᓇᑭᐠ, ᐁᑯᓯ ᑭ ᓯᐯᐧᑌᐊᐧᐠ ᐁ ᑭ ᐃᐧᐦᑕᒪᐊᐧᒋᐠ ᒋᓴᓴ.
[13] ᐃᐢᐱ ᒫᑲ ᒋᓴᐢ ᑳ ᐯᐦᑕᕽ, ᑭ ᓯᐯᐧᑌᐤ ᐅᓯᕽ ᐁ ᑭ ᐳᓯᐟ ᐱᑲᐧᑕᐢᑲᒥᑲᕽ ᐁ ᐃᑐᐦᑌᐟ ᐁ ᐯᔭᑯᐟ, ᐃᐢᐱ ᒫᑲ ᐊᔨᓯᔨᓂᐊᐧᐠ ᑳ ᐯᐦᑕᐦᑭᐠ, ᑭ ᐱᒥᑎᓴᐁᐧᐊᐧᐠ ᐁ ᑭ ᒧᐢᑐᑌᒋᐠ ᐅᑌᓈᕽ ᐅᐦᒋ.
[14] ᑭ ᐯ ᐃᑐᐦᑌᐤ ᒫᑲ ᐁ ᑭ ᐊᐧᐸᒪᐟ ᑭᐦᒋ ᒥᐦᒉᐟ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᐁᑯᓯ ᑭ ᑭᑎᒫᑭᓇᐁᐧᐤ, ᒥᓇ ᒫᑲ ᑭ ᐃᔨᓂᑲᐦᐁᐤ ᐅᐟ ᐋᑯᓯᐃᐧᓂᔨᐊᐧ.
[15] ᐃᐢᐱ ᒫᑲ ᐁᑎ ᐅᑖᑯᓯᐠ, ᐅ ᑭᐢᑭᓄᐦᐊᒪᐋᐧᑲᓇ ᑭ ᐯᒋ ᓇᑎᐠ, ᐅᒥᓯ ᐁ ᐃᑌᐧᔨᐟ, ᐱᑲᐧᑕᐢᑲᒥᑲᐤ ᐃᓴ ᐅᒪ, ᑭᓯᑳᐤ ᒫᑲ ᓴᓴᐩ ᒪᔭᐢᑲᒧᐸᔨᐤ; ᓯᐯᐧᑎᓴᐦᐅᐠ ᐅᑯ ᑳ ᒫᒪᐁᐧᔭᑎᒋᐠ ᐊᔨᓯᔨᓂᐊᐧᐠ, ᑭᑕ ᐃᑐᐦᑌᒋᐠ ᐅᑌᓈᕽ, ᑭᑕ ᐊᑕᐁᐧᐢᑕᒪᓱᒋᐠ ᒥᒋᐣ.
[16] ᒫᑲ ᒋᓴᐢ ᐅᒥᓯ ᑭ ᐃᑌᐤ, ᓇᒪᐃᐧᔭ ᑭᑕ ᓯᐯᐧᑌᐊᐧᐠ; ᒥᔨᑯᐠ ᑭᔭᐋᐧᐤ ᑫ ᒥᒋᒋᐠ.
[17] ᐅᒥᓯ ᒫᑲ ᐃᑌᐊᐧᐠ, ᐱᑯ ᓂᔮᓇᐣ ᐸᑫᐧᓯᑲᓇᐠ ᐅᑕ ᓂᐟ ᐊᔭᐊᐧᓇᓇᐠ, ᒥᓇ ᓂᓱ ᑭᓄᓭᐊᐧᐠ.
[18] ᐅᒥᓯ ᒫᑲ ᑭ ᐃᑌᐧᐤ, ᐯᑕᒪᐃᐧᐠ ᐃᓴ.
[19] ᐁᑯᓯ ᒫᑲ ᑭ ᐃᐧᐦᑕᒪᐁᐧᐤ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ ᑭᑕ ᓇᐦᐊᐱᔨᐟ ᒪᐢᑯᓯᐢᑲᕽ; ᐁ ᑭ ᐅᑎᓈᐟ ᒫᑲ ᓂᔮᓇᐣ ᐸᑫᐧᓯᑲᓇ, ᒥᓇ ᓂᓱ ᑭᓄᓭᐊᐧ, ᐁ ᑭ ᐃᑖᐱᐟ ᒫᑲ ᑭᐦᒋ ᑭᓯᑯᕽ, ᑭ ᓇᓇᐢᑯᒧ, ᒥᓇ ᐁ ᑭ ᐱᑯᓈᐟ; ᐁ ᑭ ᒥᔮᐟ ᒫᑲ ᐸᑫᐧᓯᑲᓇ ᐅ ᑭᐢᑭᓄᐦᐊᒪᐋᐧᑲᓇ, ᐊᓂᑭ ᒫᑲ ᑭᐢᑭᓄᐦᐊᒪᐋᐧᑲᓇᐠ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ.
[20] ᐁᑯᓯ ᒫᑲ ᑲᐦᑭᔭᐤ ᑭ ᒥᒋᓱᐊᐧᐠ, ᒥᓇ ᑭ ᑭᐢᐳᐊᐧᐠ; ᐁᑯᓯ ᒫᑲ ᑭ ᒧᓴᑭᓇᒪᐧᐠ ᐊᓂᐦᐃ ᐃᐢᑲᐧᒋᑲᓇ ᑳ ᑭ ᐃᐢᑲᐧᑕᑭᐠ ᒥᑕᑕᐦᐟ ᓂᓱᓵᑊ ᐃᐧᑯᐱᐊᐧᑕ ᐁ ᓴᑲᐢᑭᓀᔨᑭ.
[21] ᐊᓂᑭ ᒫᑲ ᑳ ᑭ ᒥᒋᓱᒋᐠ ᓈᓂᑕᐤ ᓂᔮᓇᓇᐧᐤ ᑭᐦᒋ ᒥᑖᑐᒥᑕᓇᐤ ᑭ ᐃᑕᓯᐊᐧᐠ ᓈᐯᐊᐧᐠ, ᐊᓯᒋ ᐃᐢᑫᐧᐊᐧᐠ ᒥᓇ ᐊᐊᐧᓯᓴᐠ.
[22] ᐁᑯᓯ ᒫᑲ ᒋᓴᐢ ᑭ ᓯᑭᒣᐤ ᐅ ᑭᐢᑭᓄᐦᐊᒪᐋᐧᑲᓇ ᑭᑕ ᐳᓯᔨᐟ ᐅᓯᐠ, ᑭᑕ ᓂᑕᐃᐧ ᐊᐢᑲᒪᑯᐠ ᐊᓂᑌ ᑫᐧᐢᑲᑲᑦ ᒣᑳᐧᐨ ᐁ ᓯᐯᐧᑎᓴᐋᐧᐟ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ.
[23] ᐃᐢᐱ ᒫᑲ ᑳ ᓯᐯᐧᑎᓴᐋᐧᐟ ᑳ ᒫᒪᐁᐧᔭᑎᔨ ᐊᔨᓯᔨᓂᐊᐧ, ᑭ ᐯᔭᑯ ᐊᒪᒋᐁᐧᐤ ᐊᐧᒋᔨᐤ ᑭᑕ ᐊᔭᒥᐦᐋᐟ: ᐃᐢᐱ ᒫᑲ ᐁᑎ ᐅᑖᑯᓯᐠ, ᐁᑯᑌ ᑭ ᐊᔮᐤ ᐁ ᐯᔭᑯᐟ.
[24] ᒫᑲ ᐃᐧᔭ ᐅᓯ ᓴᓴᐩ ᒣᑲᐧ ᓵᑲᐦᐃᑲᓂᕽ ᑭ ᐊᔮᐤ, ᐁᑕᑌᑕᐊᕽ ᐁᐢᐱᒋ ᒪᒪᑲᐊᕽ: ᐃᐧᔭ ᐁ ᑭ ᐅᑎᐢᑲᐊᐧᐠ.
[25] ᐃᐢᐱ ᒫᑲ ᓀᐋᐧᐤ ᐁ ᐃᐢᐸᔨᐠ ᑎᐸᐃᑲᐣ ᒣᑫᐧᐨ ᐁ ᑎᐱᐢᑳᐠ, ᒋᓴᐢ ᑭ ᓇᑌᐤ, ᐁ ᐱᒧᐦᑌᐟ ᓂᐱᕽ.
[26] ᐃᐢᐱ ᒫᑲ ᑭᐢᑭᓄᐦᐊᒪᐋᐧᑲᓇᐠ ᐃᐧᔭᐸᒫᒋ ᐁ ᐱᒧᐦᑌᔨᐟ ᓂᐱᕽ, ᑭ ᒥᑯᐢᑲᑌᔨᑕᒪᐧᐠ, ᐅᒥᓯ ᐁ ᐃᑌᐧᒋᐠ, ᒋᐸᐩ ᐃᓴ ᐁᐊᐧᑯ; ᐁᑯᓯ ᒫᑲ ᑭ ᑌᐯᐧᐊᐧᐠ ᐁ ᐃᐢᐱᒋ ᓭᑭᓯᒋᐠ.
[27] ᒫᑲ ᓭᒫᐠ ᒋᓴᐢ ᑭ ᐊᔭᒥᐁᐤ, ᐅᒥᓯ ᐁ ᐃᑖᐟ, ᒥᐁᐧᔨᑕᒧᐠ ᓂᔭ ᐅᒪ; ᐁᑳᐃᐧᔭ ᑯᐢᑕᒋᐠ.
[28] ᐱᑕᕒ ᒫᑲ ᑭ ᓇᐢᑫᐧᐊᐧᓯᒣᐤ, ᐅᒥᓯ ᐁ ᐃᑖᐟ, ᑌᐯᔨᐦᒋᑫᔭᐣ, ᑭᐢᐱᐣ ᑭᔭ, ᓇᑐᒥᐣ ᑭᑕ ᓇᑎᑕᐣ ᓂᐱᕽ.
[29] ᐅᒥᓯ ᒫᑲ ᑭ ᐃᑌᐧᐤ, ᐊᐢᑕᑦ ᒫᑲ. ᐃᐢᐱ ᒫᑲ ᐱᑕᕒ ᐅᓯᕽ ᑳ ᐯ ᐅᐦᒋ ᓂᓴᑕᐃᐧᐟ, ᑭ ᐱᒧᐦᑌᐤ ᓂᐱᕽ, ᑭᑕ ᓈᑖᐟ ᒋᓴᓴ.
[30] ᐃᐢᐱ ᒫᑲ ᐃᐧᔭᐸᑕᕽ ᐁ ᒪᒪᑲᐊᓂᔨᐠ, ᑭ ᓭᑭᓯᐤ; ᐁᑯᓯ ᒫᑲ ᐁ ᐃᐧᑯᓴᐯᐸᔨᐟ, ᑭ ᑌᐯᐧᐤ ᐁ ᐃᑌᐧᐟ, ᑌᐯᔨᐦᒋᑫᔭᐣ, ᐱᒪᒋᐃᐣ.
[31] ᐁᑯᓯ ᒫᑲ ᓭᒫᐠ ᒋᓴᐢ ᑭ ᓱᐃᐧᓂᐢᑫᐢᑕᐁᐧᐤ, ᐁᑯᓯ ᐁ ᑭ ᐅᒋᐱᑖᐟ, ᐅᒥᓯ ᒫᑲ ᐁ ᑭ ᐃᑖᐟ, ᐅ ᑭᔭ ᑳ ᐊᐱᓵᓯᐠ ᑭ ᑖᐯᐧᔦᔨᑕᒧᐃᐧᐣ, ᑖᓀᑭ ᑳ ᐅᐦᒋ ᐊᓯᐁᐧᔨᑕᒪᐣ?
[32] ᐃᐢᐱ ᒫᑲ ᑳ ᐳᓯᒋᐠ ᐅᓯᕽ, ᑭ ᑭᐱᒋᔪᐁᐧᐤ.
[33] ᐊᓂᑭ ᒫᑲ ᐅᓯᕽ ᑳ ᐳᓯᒋᐠ ᑭ ᐯᒋ ᓈᑌᐊᐧᐠ ᐁ ᐊᔭᒥᐦᐁᐢᑕᐋᐧᒋᐠ, ᐅᒥᓯ ᐁ ᐃᑌᐧᒋᐠ, ᑖᐯᐧ ᑭᔭ ᑭᓭᒪᓂᑐᐃᐧᑯᓯᓵᐣ.
[34] ᐃᐢᐱ ᒫᑲ ᑳ ᐊᓱᐊᐧᐊᑭᐠ ᑭ ᐯ ᐃᑐᐦᑌᐊᐧᐠ ᐊᓂᑌ ᑫᓀᓭᕒᐁᐟ ᐊᐢᑭ.
[35] ᐃᐢᐱ ᒫᑲ ᐊᔨᓯᔨᓂᐊᐧᐠ ᐁᑯᑌ ᑳ ᐊᔮᒋᐠ ᑳ ᓂᓯᑕᐁᐧᔨᒪᒋᐠ ᑭ ᐃᓯᑎᓴᐦᐅᐁᐧᐊᐧᐠ ᒥᓯᐁᐧ ᐁᑯᑕ ᐊᓂᒪ ᐊᐢᑭᕽ, ᐁ ᑭ ᐯᓯᐊᐧᒋᐠ ᒫᑲ ᑲᐦᑭᔭᐤ ᑳ ᐋᑯᓯᔨᐟ;
[36] ᐁ ᑭ ᐸᑯᓭᔨᒫᒋᐠ ᒫᑲ ᐱᑯ ᑭᑕ ᓵᒥᓇᒫᐧᒋᐠ ᐅᐢᑯᑕᑲᔨᐤ; ᑕᐦᑐ ᒫᑲ ᑳ ᑭ ᓴᒥᓈᒋᐠ ᒥᑐᓂ ᑭ ᒥᔪ ᐊᔭᐊᐧᐠ.