[1] ᐁᑯᐢᐱ ᒫᑲ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᑭᑕ ᐃᓯᓈᑲᐧᐣ ᑕᐱᐢᑯᐨ ᒥᑖᑕᐦᐟ ᐅᐢᑭᓂᑭᐢᑫᐧᐊᐧᐠ, ᑳ ᐅᑎᓇᑭᐠ ᐅ ᐊᐧᐢᑌᓇᒫᑲᓂᐊᐧᐊᐧ, ᐁᑯᓯ ᒫᑲ ᑳ ᓯᐯᐧᑌᒋᐠ ᑭᑕ ᓇᑭᐢᑲᐊᐧᒋᐠ ᐅᐃᐧᑭᐦᑐᐊᐧ.
[2] ᓂᔭᓇᐣ ᒫᑲ ᑭ ᐃᔨᓂᓯᐊᐧᐠ, ᒥᓇ ᓂᔭᓇᐣ ᑭ ᑭᐢᑫᐧᐊᐧᐠ.
[3] ᐊᓂᑭ ᒫᑲ ᑳ ᑭᐢᑫᐧᒋᐠ ᑭ ᐅᑎᓇᒪᐧᐠ ᐅ ᐊᐧᐢᑌᓇᒫᑲᓂᐋᐧᐊᐧ, ᒫᑲ ᓇᒪᐃᐧᔭ ᐱᒥ ᑭ ᐊᓯᒋ ᑕᑯᓇᒪᐧᐠ.
[4] ᒫᑲ ᐃᐧᔭ ᐊᓂᑭ ᑳ ᐃᔨᓂᓯᒋᐠ ᑭ ᑕᑯᓇᒪᐧᐠ ᐱᒥ ᐅᐟ ᐊᓯᐊᐧᒋᑲᓂᐊᐧᕽ ᐊᓯᒋ ᐅ ᐋᐧᐢᑌᓇᒫᑲᓂᐋᐧᐊᐧ.
[5] ᒣᑳᐧᐨ ᒫᑲ ᐅᐃᐧᑭᐦᑐ ᐁ ᐯᐃᐦᐟ, ᑲᐦᑭᔭᐤ ᑭ ᓄᑌᑲᐧᓯᐊᐧᐠ ᒥᓇ ᑭ ᓂᐹᐊᐧᐠ.
[6] ᐃᐢᐱ ᒫᑲ ᐁ ᐋᐱᑕᑎᐱᐢᑲᐠ ᑭ ᐃᓯ ᑌᐸᐧᓂᐊᐧᐣ, ᒋᐢᐟ ᐅᐃᐧᑭᐦᑐ ᐯ ᑕᑯᓯᐣ; ᐁᑲᐧ ᐯ ᐊᐧᔭᐃᐧᐠ ᑭᑕ ᓇᑭᐢᑲᐋᐧᔦᐠ,
[7] ᐁᑲᐧ ᒫᑲ ᑲᐦᑭᔭᐤ ᐊᓂᑭ ᐅᐢᑭᓂᑭᐢᑫᐧᐊᐧᐠ ᐊᐧᓂᐢᑳᐊᐧᐠ, ᐁ ᑲᐧᔮᒋᐦᑕᒋᐠ ᒫᑲ ᐅ ᐋᐧᓴᐢᑯᑌᓂᑲᓂᐊᐧᐊᐧ.
[8] ᐊᓂᑭ ᒫᑲ ᑳ ᑭᐢᑫᐧᒋᐠ ᐅᒥᓯ ᐃᑌᐊᐧᐠ ᑳ ᐃᔨᓂᓯᔨᐟ, ᒥᔨᓇᐣ ᑭ ᐱᒥᒥᐋᐧᐤ ᐅᐦᒋ; ᒋᑫᒪ ᓂ ᐊᐧᐢᑌᓇᒪᑲᓂᓈᓇ ᐊᐢᑕᐁᐧᐊᐧ.
[9] ᐊᓂᑭ ᒫᑲ ᑳ ᐃᔨᓂᓯᒋᐠ ᓇᐢᑫᐧᐊᐧᓯᒣᐊᐧᐠ, ᐅᒥᓯ ᐁ ᐃᑕᒋᐠ, ᓇᒪᐃᐧᔭ ᑭᑕ ᑭ ᐃᐦᑭᐣ; ᒋᑫᒪ ᓇᒪᐃᐧᔭ ᒫᐢᑯᐨ ᑕᐱᐢᑰᐨ ᑭ ᑲ ᑌᐱᐸᔨᐃᑯᓈᓇᐤ; ᒫᑲ ᓇᐊᐧᐨ ᓇᑎᑯᐠ ᐊᓂᑭ ᑳ ᐊᑖᐋᐧᑫᒋᐠ ᐊᑖᐁᐧᐢᑕᒪᓱᐠ ᒫᑲ.
[10] ᒣᑳᐧᐨ ᒫᑲ ᐁ ᐃᑐᐦᑌᒋᐠ ᑭᑕ ᐊᑖᐁᐧᒋᐠ, ᐅᐃᐧᑭᐦᑐ ᑕᑯᓯᐣ; ᐊᓂᑭ ᒫᑲ ᑳ ᑭ ᐊᐧᐁᐧᔨᒋᐠ ᐃᐧᒋ ᐱᐦᑐᑫᒣᐊᐧᐠ ᐃᐧᑭᑐᐃᐧᓂᕽ; ᐃᐢᑲᐧᑌᒪ ᒫᑲ ᑭᐸᐦᐃᑳᑌᐊᐧ.
[11] ᒣᐧᐢᑕᐢ ᒫᑲ ᐃᐧᐢᑕᐋᐧᐤ ᑕᑯᓯᓇᐧᐠ ᐊᓂᑭ ᑯᑕᑲᐠ ᐅᐢᑭᓂᑭᐢᑫᐧᐊᐧᐠ, ᐅᒥᓯ ᐁ ᐃᑌᐧᒋᐠ, ᑌᐯᔨᐦᒋᑫᔭᐣ, ᑌᐯᔨᐦᒋᑫᔭᐣ, ᐸᐢᑭᑌᓇᒪᐃᐧᓈᐣ.
[12] ᒫᑲ ᓇᐢᑫᐧᐊᐧᓯᒣᐤ ᐅᒥᓯ ᐁ ᐃᑖᐟ, ᑖᐯᐧ ᑭᐟ ᐃᑎᓈᐋᐧᐤ, ᓇᒪᐃᐧᔭ ᑭ ᑭᐢᑫᔨᒥᑎᓈᐋᐧᐤ.
[13] ᐁᐊᐧᑯ ᒫᑲ ᐅᐦᒋ ᐊᓴᐊᐧᐱᐠ, ᒋᑫᒪ ᓇᒪᐃᐧᔭ ᑭ ᑭᐢᑫᔨᑌᓈᐋᐧᐤ ᑕᓂᒪ ᐁ ᑭᓯᑳᐠ ᐊᐦᐳ ᐁ ᐃᐢᐸᔨᐠ ᑎᐸᐦᐃᐱᓯᒫᐧᐣ ᑫ ᑕᑯᓯᕽ ᐃᔨᓂᐃᐧᑯᓯᓵᐣ.
[14] ᒋᑫᒫ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᐣ ᐃᓯᓈᑲᐧᐣ ᑖᐱᐢᑯᐨ ᐊᔨᓯᔨᓂᐤ ᑳ ᐃᑐᐦᑌᐟ ᐊᐧᔭᐤ ᐅᑌᓈᕽ, ᑳ ᓇᑐᒫᐟ ᑎᐱᔭᐁᐧ ᐅᐟ ᐊᑐᐢᑫᔮᑲᓇ, ᐁᑯᓯ ᐁ ᐸᑭᑎᓇᒪᐋᐧᐟ ᐅᐟ ᐊᔮᓇ.
[15] ᐊᓂᐦᐃ ᒫᑲ ᐯᔭᐠ ᓂᔭᓇᐣ ᑭᐦᒋ ᓱᓂᔮᐊᐧ ᑭ ᒥᔦᐤ, ᒥᓇ ᒫᑲ ᑯᑕᐠ ᓂᓱ, ᒥᓇ ᑯᑕᐠ ᐯᔭᐠ; ᐁ ᐃᐦᑕᓯᔨᐟ ᐸᐱᑐᐢ ᑭ ᐃᓯ ᒥᔦᐤ ᐁ ᐃᓯ ᑲᐢᑭᐦᑖᔨᐟ; ᐁᑯᓯ ᒫᑲ ᑭ ᓯᐯᐧᑌᐤ.
[16] ᐁᑲᐧ ᒫᑲ ᐊᓇ ᓂᔮᓇᐣ ᑭᐦᒋ ᓱᓂᔮᐊᐧ ᑳ ᑭ ᐅᑎᓇᐟ ᑭ ᓯᐯᐧᑌᐤ, ᐁᑯᓯ ᐁ ᑭ ᓇᑕᐃᐧ ᐊᔭᑖᐁᐧᐟ, ᒥᓇ ᑯᑕᑲ ᓂᔮᓇᐣ ᑭᐦᒋ ᓱᓂᔮᐊᐧ ᐁ ᑭ ᑕᑯᐦᐋᐟ.
[17] ᐁᑯᓯ ᒫᑲ ᒥᓇ ᒣᐧᐦᒋ ᐊᓇ ᓂᓱ ᑳ ᑭ ᐅᑎᓇᐟ, ᐃᐧᔭ ᒥᓇ ᓂᓱ ᑭ ᐅᐦᑎᓯᐤ.
[18] ᒫᑲ ᐃᐧᔭ ᐊᓇ ᐯᔭᐠ ᑳ ᑭ ᐅᑎᓈᐟ, ᑭ ᓯᐯᐧᑌᐤ ᐁ ᑭ ᓇᑕᐃᐧ ᐋᐧᑎᐦᑫᐟ ᐊᐢᑭᕽ, ᐁᑯᓯ ᐁ ᑭ ᑲᑕᐟ ᐅᐟ ᐅᑭᒫᒪ ᐅ ᓱᓂᔮᒥᔨᐊᐧ.
[19] ᐹᑎᒪ ᒫᑲ ᑭᓀᐧᐢ ᐃᔨᑯᕽ, ᑳ ᑎᐯᔨᒫᐟ ᐊᓂᐦᐃ ᐊᑐᐢᑫᔮᑲᓇ ᑭ ᑕᑯᓯᐣ, ᐁᑯᓯ ᑭ ᐊᑭᐦᑕᒪᐁᐧᐤ ᑳ ᐃᓯ ᑲᐢᑭᑖᔨᐟ.
[20] ᐁᑯᓯ ᒫᑲ ᐊᓇ ᓂᔮᓇᐣ ᑭᐦᒋ ᓱᓂᔮᐊᐧ ᑳ ᑭ ᐅᑎᓇᐟ, ᑭ ᑕᑯᓯᐣ ᐁ ᑭ ᐯᓯᐊᐧᐟ ᒫᑲ ᑯᑕᑲ ᓂᔮᓇᐣ ᑭᐦᒋ ᓱᓂᔮᐊᐧ, ᐅᒥᓯ ᐁ ᐃᑌᐧᐟ, ᑌᐯᔨᐦᒋᑫᔭᐣ, ᑭ ᑭ ᐸᑭᑎᓇᒪᐃᐧᑕᐩ ᓂᔮᓇᐣ ᑭᐦᒋ ᓱᓂᔮᐊᐧᐠ; ᒋᐢᐟ, ᓂ ᑭ ᐅᐦᑎᓯᐣ ᑯᑕᑲᐠ ᓂᔮᓇᐣ ᑭᐦᒋ ᓱᓂᔮᐊᐧᐠ.
[21] ᐅᑭᒫᒪ ᐅᒥᓯ ᑭ ᐃᑎᐠ, ᐁᑯᓵᓂ, ᑭᔭ ᒥᔪ ᒥᓇ ᐊᔭᑲᐧᒥᓯᐃᐧ ᐊᑐᐢᑫᔮᑲᐣ; ᑭ ᑭ ᐊᔭᑲᐧᒥᓯᑲᐦᑌᐣ ᐊᓂᐦᐃ ᐁ ᒐᑲᐊᐧᓯᓯᑭ, ᑭ ᑲ ᐃᓯᐃᑎᐣ ᑭᑕ ᑎᐯᔨᑕᒪᐣ ᒥᐦᒉᐟ ᑫᑲᐧᔭ; ᐱᐦᑐᑫ ᐅ ᒥᔭᐋᐧᑕᒧᐃᐧᓂᕽ ᑭᐟ ᐅᑭᒪᑦ.
[22] ᐃᐧᐢᑕ ᒫᑲ ᐊᓇ ᑳ ᑭ ᐅᑎᓇᐟ ᓂᓱ ᑭᐦᒋ ᓱᓂᔮᐊᐧ, ᑭ ᑕᑯᓯᐣ, ᐅᒥᓯ ᐁ ᐃᑌᐧᐟ, ᑌᐯᔨᐦᒋᑫᔭᐣ, ᑭ ᑭ ᐸᑭᑎᓇᒪᐃᐧᑕᐩ ᓂᓱ ᑭᐦᒋ ᓱᓂᔮᐊᐧᐠ; ᒋᐢᐟ ᓂ ᑭ ᐅᐦᑎᓯᐣ ᑯᑕᑲᐠ ᓂᓱ ᑭᐦᒋ ᓱᓂᔮᐊᐧᐠ.
[23] ᐅᑭᒫᒪ ᐅᒥᓯ ᑭ ᐃᑎᐠ, ᐁᑯᓵᓂ, ᑭᔭ ᒥᔪ ᒥᓇ ᐊᔭᑲᐧᒥᓯᐃᐧ ᐊᑐᐢᑫᔮᑲᐣ; ᑭ ᑭ ᐊᔭᑲᐧᒥᓯᐦᑲᑌᐣ ᐊᓂᐦᐃ ᐁ ᒐᑲᐊᐧᓯᓯᑭ, ᑭ ᑲ ᐃᓯᐃᑎᐣ ᑭᑕ ᑎᐯᔨᑕᒪᐣ ᒥᐦᒉᐟ ᑫᑲᐧᔭ; ᐱᐦᑐᑫ ᐅ ᒥᔭᐊᐧᑕᒧᐃᐧᓂᕽ ᑭᐟ ᐅᑭᒫᑦ.
[24] ᐁᑯᓯ ᒫᑲ ᐃᐧᔭ ᐊᓇ ᐯᔭᐠ ᑭᐦᒋ ᓱᓂᔮᐊᐧ ᑳ ᑭ ᐅᑎᓈᐟ, ᑭ ᐯ ᑕᑯᓯᐣ, ᐅᒥᓯ ᒫᑲ ᐁ ᑭ ᐃᑌᐧᐟ, ᑌᐯᔨᐦᒋᑫᔭᐣ, ᑭ ᑭ ᑭᐢᑫᔨᒥᑎᐣ ᓇᐢᐱᐨ ᐁ ᐊᔨᒥᓯᐃᐧ ᐊᔨᓯᔨᓂᐃᐧᔭᐣ, ᐁ ᒫᐊᐧᒋᒋᑫᔭᐣ ᐃᑕ ᐁᑳ ᐁ ᐅᐦᒋ ᐸᑭᑎᓂᑫᔭᐣ, ᒥᓇ ᐁ ᒧᓴᑭᓂᑫᔭᐣ ᐃᑕ ᐁᑳ ᐁ ᐅᐦᒋ ᑭᐢᑎᑫᔭᐣ;
[25] ᐁᑯᓯ ᒫᑲ ᓂ ᑭ ᐊᐢᑖᓯᐣ ᒥᓇ ᓂ ᑭ ᓯᐯᐧᑕᐣ ᐁ ᑭ ᓇᑕᐃᐧ ᑲᑕᐠ ᑭ ᑭᐦᒋ ᓱᓂᔮᑦ ᐊᐢᑭᕽ; ᒋᐢᐟ, ᐊᓂᒪ ᐃᑕ ᑭᔭ ᑳ ᑎᐯᔨᑕᒪᐣ.
[26] ᐅᐟ ᐅᑭᒫᒪ ᒫᑲ ᑭ ᓇᐢᑫᐧᐊᐧᓯᒥᐠ ᐅᒥᓯ ᐁ ᑭ ᐃᑎᑯᐟ, ᑭᔭ ᑳ ᒪᒑᑎᓯᔭᐣ ᒥᓇ ᑫᐦᑎᒥᐢᑭᔭᐣ ᐊᑐᐢᑫᔮᑲᐣ, ᑭᐟ ᐋᑕ ᑭᐢᑫᔨᑌᐣ ᐁ ᒫᐊᐧᒋᐦᒋᑫᔮᐣ ᐃᑕ ᐁᑳ ᐁ ᐅᐦᒋ ᐸᑭᑎᓂᑫᔮᐣ, ᒥᓇ ᐁ ᒧᓴᑭᓂᑫᔮᐣ ᐃᑕ ᐁᑳ ᐁ ᐅᐦᒋ ᑭᐢᑎᑫᔮᐣ:
[27] ᐁᐊᐧᑯ ᒫᑲ ᐅᐦᒋ ᑭ ᑲ ᑭ ᐊᔭᑕᐩ ᐊᓇ ᓂ ᓲᓂᔮᑦ ᐊᓂᑭ ᑳ ᒥᐢᑯᑐᓂᑫᒋᐠ, ᐁᑯᓯ ᒫᑲ ᐃᐢᐱ ᐯ ᑕᑯᓯᓂᔮᐣ ᓂ ᑲ ᑭ ᐅᑎᓀᑕᐩ ᐊᓂᒪ ᑳ ᑎᐯᔨᑕᒫᐣ ᑭᑭ ᑳ ᑲᐢᑭᒋᑫᐸᔨᒋᐠ.
[28] ᒪᐢᑲᒥᕽ ᒫᑲ ᐊᓂᐦᐃ ᑭᐦᒋ ᓱᓂᔮᐊᐧ, ᒥᔨᕽ ᐊᓇ ᒥᑖᑕᐟ ᑭᐦᒋ ᓱᓂᔮᐊᐧ ᑳ ᐊᔮᐋᐧᐟ.
[29] ᒋᑫᒪ ᑕᐦᑐ ᐊᐃᐧᔭᐠ ᑳ ᐊᔮᐟ ᑭᑕ ᒥᔮᐤ, ᐁᑯᓯ ᒫᑲ ᐊᐊᐧᓯᒣ ᒥᐢᑕᐦᐃ ᑭᑕ ᐊᔮᐤ; ᒫᑲ ᐃᐧᔭ ᐊᓇ ᐁᑳ ᑳ ᐊᔮᐟ ᑭᑕ ᒪᐢᑲᒫᐤ ᐊᐦᐳ ᐊᓂᒪ ᑳ ᐃᓯ ᐊᔮᐟ.
[30] ᐊᐧᔭᐃᐧᐁᐧᐱᓂᕽ ᒫᑲ ᐃᐧᔭ ᐊᓇ ᐁᑳ ᓈᓂᑕᐤ ᑳ ᐃᑕᐸᑎᓯᐟ ᐊᑐᐢᑫᔮᑲᐣ ᐊᓂᑌ ᐁᑳ ᑳ ᒥᓴᐢᑫᔭᐠ ᐊᐧᓂᑎᐱᐢᑲᕽ; ᐃᑌ ᑫ ᑕᓯ ᒪᒪᑐᕽ ᒥᓇ ᑫ ᑲᑭᒋᐢᑲᐱᑌᕽ.
[31] ᐃᐢᐱ ᒫᑲ ᐃᔨᓂᐃᐧᑯᓯᓵᐣ ᐯ ᑕᑯᓯᑭ ᐅ ᑭᐢᑌᔨᑖᑯᓯᐃᐧᓂᕽ, ᑲᐦᑭᔭᐤ ᐅᑭᓯᑯᐊᐧ ᐁ ᐃᐧᒉᑯᐟ, ᐁᑯᐢᐱ ᑫ ᐊᐱᐟ ᐅᐟ ᐅᑭᒫᐊᐧᐱᐃᐧᓂᕽ ᑭᐢᑌᔨᑖᑯᓯᐃᐧᓂᕽ:
[32] ᐊᓂᑕ ᒫᑲ ᐁᑕᐢᑕᒪᐱᐟ ᑭᑕ ᒫᐊᐧᒋᐦᐃᑐᔨᐊᐧ ᑲᐦᑭᔭᐤ ᑳ ᑕᐦᑐᐢᑳᓀᓯᔨᐟ ᐊᔨᓯᔨᓂᐊᐧ; ᐁᑯᓯ ᒫᑲ ᑭᑕ ᐸᐱᐢᑭᑕᔦᐤ, ᑖᐱᐢᑯᐨ ᐅᑲᓇᐃᐧᒫᔭᑎᐦᑫᐧᐤ ᑳ ᐃᓯ ᐱᐢᑭᐦᑕᔮᐟ ᒫᔭᑎᐦᑲᐧ ᒥᐢᑖᐳᓴᐧ ᐅᐦᒋ:
[33] ᐁᑯᓯ ᒫᑲ ᑭᑕ ᐊᐦᔦᐤ ᒫᔭᑎᐦᑲᐧ ᐅ ᑭᐦᒋᓂᐢᑭᕽ, ᒫᑲ ᐃᐧᔭ ᒥᐢᑕᐳᓴᐧ ᐅ ᓇᒪᑎᓂᕽ
[34] ᐁᑯᐢᐱ ᒫᑲ ᑭᐦᒋ ᐅᑭᒫᐤ ᐅᒥᓯ ᑭᑕ ᐃᑌᐤ ᐊᓂᐦᐃ ᐅ ᑭᐦᒋᓂᐢᑭᕽ; ᐋᐢᑕᒥᑎᐠ ᑭᔭᐋᐧᐤ ᑳ ᓴᐁᐧᔨᒥᑯᔦᐠ ᓄᑖᐃᐧ, ᑎᐯᔨᑕᒧᐠ ᐊᓂᒪ ᐅᑌᓇᐃᐧᐃᐧᐣ ᑳ ᐊᐧᐁᐧᔨᑕᒫᑲᐃᐧᔦᐠ ᐊᐢᐱᐣ ᓂᐢᑕᑦ ᐁ ᐊᐢᑭᐊᐧᐠ:
[35] ᒋᑫᒪ ᓂ ᑭ ᓄᐦᑌᑲᑖᐣ, ᑭ ᑭ ᐊᓴᒥᓈᐋᐧᐤ ᒫᑲ; ᓂ ᑭ ᓄᑌᔭᐹᑳᐧᐣ, ᑭ ᑭ ᒥᓇᐃᓈᐋᐧᐤ ᒫᑲ; ᓂ ᑭ ᒪᓂᑌᐃᐧᐣ, ᑭ ᑭ ᐱᑐᑲᐃᓈᐋᐧᐤ ᒫᑲ:
[36] ᐁ ᒧᓭᐢᑲᑌᔭᐣ, ᑭ ᑭ ᐃᐧᔮᑕᐃᓈᐋᐧᐤ; ᓂ ᑭ ᐋᑯᓯᐣ, ᑭ ᑭ ᐸᒥᐦᓈᐋᐧᐤ ᒫᑲ; ᓂ ᑭ ᑭᐸᐦᐅᑲᐃᐧᐣ, ᑭ ᑭ ᐯᒋ ᓈᓯᓈᐋᐧᐤ ᒫᑲ.
[37] ᐁᑯᓯ ᒫᑲ ᐅᑲᐧᔭᐢᑭᑕᑎᓯᐊᐧᐠ ᑭᑕ ᓇᐢᑫᐧᐊᐧᓯᒣᐊᐧᐠ, ᐅᒥᓯ ᑭᑕ ᐃᑕᒋᐠ, ᑌᐯᔨᐦᒋᑫᔭᐣ, ᑕᓂᐢᐱ ᑳ ᐊᐧᐸᒥᑕᕽ ᐁ ᓄᑌᑲᑌᔭᐣ, ᐁ ᐊᓴᒥᑖᕽ ᒫᑲ? ᐊᐦᐳ ᐁ ᓄᑌᔮᐹᑫᐧᔭᐣ, ᐁ ᒥᓇᐃᑖᕽ ᒫᑲ?
[38] ᑕᓂᐢᐱ ᑳ ᐊᐧᐸᒥᑖᕽ ᐁ ᒪᓂᑌᐃᐧᔭᐣ, ᐁ ᐱᑐᑲᐃᑖᕽ ᒫᑲ? ᐊᐦᐳ ᐁ ᒧᓭᐢᑲᑌᔭᐣ, ᐁ ᐃᐧᔮᑕᐃᑖᕽ ᒫᑲ?
[39] ᐊᐦᐳ ᑕᓂᐢᐱ ᑳ ᐋᐧᐸᒥᑖᕽ ᐁ ᐊᑯᓯᔭᐣ ᐊᐦᐳ ᐁ ᑭᐸᐦᐅᑲᐃᐧᔭᐣ ᐁᑯᓯ ᐁ ᑭ ᓈᑎᑖᕽ?
[40] ᑭᐦᒋ ᐅᑭᒫᐤ ᒫᑲ ᑭᑕ ᓇᐢᑫᐧᐊᐧᓯᒣᐤ ᐅᒥᓯ ᑭᑕ ᐃᑌᐤ, ᑖᐯᐧ ᑭᐟ ᐃᑎᓈᐋᐧᐤ, ᐅᒪ ᐃᔨᑯᕽ ᑳ ᑭ ᑐᑕᒪᐧᐋᐧᔦᐠ ᐯᔭᐠ ᐊᓂᑭ ᑳ ᐊᐱᐢᑌᔨᑖᑯᓯᒋᐠ ᓂᒋᐋᐧᒪᐠ, ᓂᔭ ᑭ ᑭ ᑐᑕᒪᐃᐧᓈᐋᐧᐤ.
[41] ᐁᑯᐢᐱ ᒫᑲ ᒥᓇ ᐅᒥᓯ ᑭᑕ ᐃᑌᐤ ᐊᓂᐦᐃ ᐅ ᓇᒪᑎᓂᕽ, ᐊᐊᐧᓯᑎᐠ ᑭᔭᐋᐧᐤ ᑳ ᓈᓂᐳᒥᑲᐃᐧᔦᐠ, ᐊᓂᑌ ᑲᑭᑫ ᐃᐢᑯᑌᕽ ᑳ ᑲᐧᔮᒋᑕᒫᐦᐟ ᒪᒋ ᐊᐦᒑᕽ ᒥᓇ ᐅᐟ ᐊᑐᐢᑫᔮᑲᓇ:
[42] ᒋᑫᒪ ᓂ ᑭ ᓄᑌᑲᑕᐣ, ᓇᒪᐃᐧᔭ ᒫᑲ ᑭ ᑭ ᐊᓴᒥᓈᐋᐧᐤ; ᓂ ᑭ ᓄᑌᔮᐹᑳᐧᐣ, ᓇᒪᐃᐧᔭ ᒫᑲ ᑭ ᑭ ᒥᓇᐃᓈᐋᐧᐤ:
[43] ᓂ ᑭ ᒪᓂᑌᐃᐧᐣ, ᓇᒪᐃᐧᔭ ᒫᑲ ᑭ ᑭ ᐱᐦᑐᑲᐃᓈᐋᐧᐤ; ᓂ ᑭ ᒧᓭᐢᑲᑖᐣ, ᓇᒪᐃᐧᔭ ᒫᑲ ᑭ ᑭ ᐃᐧᔮᑕᐃᓈᐋᐧᐤ; ᓂ ᑭ ᐋᑯᓯᐣ, ᓂ ᑭ ᑭᐸᐦᐅᑲᐃᐧᐣ ᓇᒪᐃᐧᔭ ᒫᑲ ᑭ ᑭ ᐱᓯᐢᑫᔨᒥᓈᐋᐧᐤ.
[44] ᐁᑯᓯ ᒫᑲ ᐃᐧᐢᑕᐋᐧᐤ ᑭᑕ ᓇᐢᑫᐧᐊᐧᓯᒣᐊᐧᐠ, ᐅᒥᓯ ᑭᑕ ᐃᑖᒋᐠ, ᑌᐯᔨᐦᒋᑫᔭᐣ, ᑕᓂᐢᐱ ᑳ ᐋᐧᐸᒥᑖᕽ ᐁ ᓄᑌᑲᑌᔭᐣ, ᐊᐦᐳ ᐁ ᓄᑌᔮᐹᑫᐧᔭᐣ, ᐊᐦᐳ ᐁ ᒫᓂᑌᐃᐧᔭᐣ, ᐊᐦᐳ ᐁ ᒧᓭᐢᑲᑌᔭᐣ, ᐊᐦᐳ ᐁ ᐋᑯᓯᔭᐣ, ᐊᐦᐳ ᐁ ᑭᐸᐦᐅᑲᐃᐧᔭᐣ, ᐁᑳ ᒫᑲ ᐁ ᑭ ᐸᐱᓯᐢᑫᔨᒥᑖᕽ?
[45] ᐁᑯᓯ ᒫᑲ ᑭᑕ ᓇᐢᑫᐧᐊᐧᓯᒣᐤ, ᐅᒥᓯ ᑭᑕ ᐃᑖᐟ, ᑖᐯᐧ ᑭᐟ ᐃᑎᓈᐋᐧᐤ, ᐊᓂᒪ ᒣᐧᐦᒋ ᐁᑳ ᑳ ᑭ ᐃᓯ ᑐᑕᒪᐋᐧᔦᐠ ᐯᔭᐠ ᐅᑭ ᑳ ᐊᐱᐢᑌᔨᑖᑯᓯᒋᐠ, ᓇᒪᐃᐧᔭ ᓂᔭ ᑭ ᑭ ᑐᑕᒪᐃᐧᓈᐋᐧᐤ.
[46] ᐅᑯ ᒫᑲ ᑭᑕ ᐃᑐᐦᑌᐊᐧᐠ ᑲᑭᑫ ᑲᑲᐧᑕᑭᑖᐃᐧᓂᕽ: ᐅᑲᐧᔭᐢᑭᑕᑎᓯᐊᐧᐠ ᒫᑲ ᑲᑭᑫ ᐱᒫᑎᓯᐃᐧᓂᕽ.