[1] عئسا اؤز اون‌ائکی شاگئردئنی یانینا چاغیریب، هامی ائبلئسلری قووماق اوچون و ناخوشلوقلاری صاغالتماق اوچون اونلارا ائقتئدار و قووّت وردی.
[2] و اونلاری گؤندَ‌ردی کی، تارینین پادشاهلیغینی وعظ ادئب ناخوشلارا شفا ورسئنلر.
[3] و اونلارا ددی: «یول اوچون هچ بئر شی گؤتورمه‌یئن؛ نه عصا، نه توربا، نه چؤرک، نه پول، نه ده بئر کؤینکدن آرتیق.
[4] هانسی اِوه گئره‌سئنئز، او شهردن چیخاناجاق اورادا قالین.
[5] و سئزی هارادا قبول اتمسه‌لر، او شهردن چیخاندا آیاقلارینیزین توزونو چیرپین کی، اونلارین ضئدّئنه شهادت اولسون.»
[6] اونلار دا یولا دوشوب کندلری گزئردئلر و ائنجئلئن خوش خبرئنی یاییب ناخوشلارا شفا ورئردئلر.
[7] تِترارخ هئرود عئسانین نه‌لَر اتدئیئنئن هامیسینی اشئتدی و گئج اولموشدو. چونکی بعضی آداملار دیئردئلر؛ «یحیا اؤلولردن دئرئلئب.»،
[8] بعضی آداملار دیئردئلر؛ «ائلیا ظوهور ادئب»، و قالانی دا دیئردی کی، «قدئم پیغمبرلردن بئری دئرئلئب.»
[9] لاکئن هئرود ددی: «یحیانین باشینی من کسدئردئم، بس بو آدام کئمدئر کی، حاقّیندا بو شیلری اشئدئرم؟» و اونو گؤرمه‌یه جهد اتدی.
[10] حوارئلر قاییدیب، گؤردوکلری ائشلرئن هامیسینی عئسایا نقل اتدئلر. او دا اونلاری اؤزو ائله گؤتوروب، بیت صیدا آدلی بئر شهره آپاردی.
[11] آمّا خالق بونو بئلئب اونون دالینجا گتدی. عئسا دا اونلاری قبول ادئب تارینین پادشاهلیغی حاقّیندا اونلارلا دانیشدی و شفایا مؤحتاج اولانلاری صاغالتدی.
[12] گون باتماغا باشلایاندا اون‌ائکی شاگئرد گلئب اونا ددئلر: «جاماعاتی مورخّص ات کی، اطرافدا اولان کندلر و زمئلره گدئب اؤزلری اوچون یمک و یر تاپسینلار، چونکی بورا بوش چؤلدور.»
[13] آمّا عئسا شاگئردلره ددی: «اونلارا سئز یمک ورئن.» اونلار جاواب وردئلر: «بئزئم بش چؤرک و ائکی بالیقدان باشقا بئر شیئمئز یوخدور. مگر بئز گرک گدئب بو آداملار اوچون چؤرک آلاق؟!»
[14] چونکی اونلار بش مئن نفر کئشئیه یاخین ائدئلر. لاکئن عئسا شاگئردلرئنه ددی: «اونلاری الّی-الّی دسته‌لر‌له اوتوردون.»
[15] اونلار دا بله ادئب، هامینی اوتورتدولار.
[16] عئسا بش چؤرکله ائکی بالیغی گؤتوردو، گؤیه باخیب برکت وردی و بؤلوب شاگئردلرئنه وردی کی، جاماعاتین قاباغینا قویسونلار.
[17] هامی ییئب دویدو و آرتیق قالان تئکه‌لر‌له اون‌ائکی سبد دولدورولدو.
[18] بئر دفه عئسا تک باشینا بئر یرده دوعا ادئردی و شاگئردلری ده اونونلا ائدئلر. اونلاردان سوروشدو: «خالق دیئر من کئمم؟»
[19] شاگئردلر جاواب ورئب ددئلر: «بعضئلری تعمئد ورن یحیا دیئر، بعضئلری ائلیا. لاکئن بعضئلری ده دیئر کی، قدئم پیغمبرلردن بئری دئرئلئب.»
[20] اونلاردان سوروشدو: «بس سئز منئم کئم اولدوغومو دیئرسئنئز؟» پطروس جاواب ورئب ددی: «سن تارینین مسئحی‌سن.»
[21] عئسا اونلارا جئدّی تاپشیریب، امر اتدی کی، بونو هچ کئمه دمه‌سئنلر.
[22] و ددی کی، «ائنسان اوغلو گرک چوخ عذاب چکسئن و آغساقّاللار، باش کاهئنلر و دئن عالئملری طرفئندن ردّ اولونوب، اؤلدورولسون و اوچونجو گون اؤلولردن دئرئلسئن.»
[23] سونرا عئسا اونلارین هامیسینا بله ددی: «کئم ائسته‌یئر دالیمجا گلسئن، گرک اؤزونو ائنکار اتسئن و چارمیخینی گؤتوروب هر گون منه پِیرَو اولسون.
[24] چونکی کئم جانینی خئلاص اتمک ائسته‌سه، اونو الدن وره‌جک. لاکئن کئم جانینی منئم اوچون الدن ورسه، اونو قورتاراجاق.
[25] آداما نه فایدا وار کی، بوتون دونیانی قازانسین، آمّا اؤزونو محو اتسئن و یا اؤزونه ضرر وورسون.
[26] اونا گؤره کی، کئم مندن و منئم سؤزلرئمدن اوتانسا، ائنسان اوغلو دا اؤزونون، آتاسینین، و موقدّس ملکلرئنئن شؤوکتی‌ائله گلن زامان او آدامدان اوتاناجاق.
[27] لاکئن حقئقتی سئزه دیئرم: بورادا دورانلاردان بعضئسی وار کی، تارینین پادشاهلیغینی گؤرمه‌یئنجه اؤلومو دادمایاجاقلار.»
[28] بو سؤزلری دئیندن سکّئز گون سونرا، عئسا، پطروسو، یوحنّانی، و یعقوبو اؤزو ائله گؤتوروب دوعا اتمک اوچون داغا چیخدی.
[29] و دوعا ادن زامان اوزونون گؤرونوشو دیئشئلدی و پالتاری آغاریب پارلاق اولدو.
[30] باخ، ائکی نفر اونونلا صؤحبت ادئردی. بونلار موسا و ائلیا ائدئلر.
[31] اونلار شؤوکتله ظاهئر اولوب عئسانین رحلتی حاقّیندا کی، اونو اورشلئمده تاماملایاجاق ائدی، دانیشیردیلار.
[32] پطروس و اونونلا اولانلار درئن بئر یوخویا گتمئشدئلر. لاکئن یوخودان اویاناندا عئسانین شؤوکتئنی و اونونلا دوران او ائکی کئشئنی گؤردولر.
[33] اونلار عئسادان آیریلاندان سونرا، پطروس عئسایا ددی: «اوستاد، بورادا اولماغیمیز نه یاخشی اولدو! اوچ چادیر قوراق؛ بئری سنه، بئری موسایا، بئری ده ائلیایا.» چونکی نه ددئیئنی باشا دوشموردو.
[34] پطروس بو سؤزلری دئین زامان، بئر بولود گلدی و اونلارا کؤلگه سالدی. بولود اونلارین اطرافینی آلان واخت قورخدولار.
[35] و بولوددان بئر سس گلئب ددی: «بو منئم اوغلومدور، سچئلمئش اولان، اونا قولاق آسین.»
[36] بو سسئن کسئلدئیی واخت، عئسانین تک باشینا اولدوغو گؤروندو. و اونلار سوکوت ادئب، او گونلرده گؤردوکلری باره‌ده هچ کسه بئر سؤز دمه‌دئلر.
[37] او گونون صاباحی داغدان اِنَن زامان، بئر چوخ خالق عئسانین پئشوازینا چیخدی.
[38] بئردن جاماعات آراسیندان بئر آدام قیشقیریب ددی: «اوستاد، سنه یالواریرام، اوغلوما نظر سال، چونکی او، منئم بئرجه بالامدیر.
[39] بئر روح اونو توتور، او دا بئردن بئره باغیرماغا باشلاییر. روح اونو اِله تئتره‌دئر کی، اوشاغین آغزی کؤپوکله‌نئر. و اونو قووّتدن سالاندان سونرا زورلا اوندان آیریلیر.
[40] سنئن شاگئردلرئنه یالواردیم کی، روحو قووسونلار، لاکئن باجارا بئلمه‌دئلر.»
[41] عئسا جاواب ورئب ددی: «ای ائمانسیز و ترسه نسئل! نه واختا قدر سئزئنله اولوب سئزه دؤزه‌جه‌یم؟! اوغلونو بورایا گتئر.»
[42] اوشاق عئسانین یانینا گلن واخت، ائبلئس اونو یره چیرپیب چوبالاتدی. آمّا عئسا اونا آجیقلاندی و اوشاغی صاغالدیب آتاسینا وردی.
[43] هامی تارینین عظمتئنه مات قالمیشدی. و هر کس عئسانین اتدئیی بوتون ائشلره حیرت ادنده، او، اؤز شاگئردلرئنه ددی:
[44] «بو سؤزلر قولاقلارینیزدا قالسین؛ چونکی ائنسان اوغلو ائنسانلارین الئنه تسلئم ادئله‌جک.»
[45] لاکئن اونلار بو سؤزو آنلامادیلار و سؤزون معناسی اونلار اوچون درک ادئلمه‌مئش قالدی و بو باره‌ده عئسادان سوروشماغا قورخوردولار.
[46] اونلارین آراسیندا بله بئر موباحئثه دوشدو کی، اونلاردان هانسی داها بؤیوکدور.
[47] عئسا اونلارین اورَکلرئنده‌کی فئکئری بئلدی و کؤرپه بئر اوشاغی گؤتوروب یانینا چکدی
[48] و اونلارا ددی: «کئم بو اوشاغی منئم آدیما قبول اتسه، منی قبول اتمئش اولور و کئم منی قبول ادئر، منی گؤندَ‌ره‌نی قبول اتمئش اولور. آرانیزدا لاپ کئچئک کئم اولسا، اِله لاپ بؤیوک اودور.»
[49] بو زامان یوحنّا سؤز آلیب ددی: «اوستاد، بئر آدام گؤردوک کی، سنئن آدینلا ائبلئسلری قووور و اونا مانع اولدوق چونکی بئز‌ئمله سنئن دالینجا گلمئر.»
[50] عئسا اونا ددی: «اونا مانع اولمایین. چونکی سئزه ضئدّ اولمایان سئزئن طرفدارینیزدیر.»
[51] عئسانین دونیادان گؤیه آلیناجاغی گونلر یاخینلاشاندا، او، اورشلئمه گتمک قرارینا گلدی.
[52] اؤزوندن قاباق الچئلر گؤندَ‌ردی. اونلار، عئسا اوچون تداروک گؤرمک قصدی ائله سامئره‌لی‌لرئن بئر کندئنه گئردئلر.
[53] لاکئن اورانین اهلی اونو قبول اتمه‌دئلر، چونکی اونون قصدی اورشلئمه گتمک ائدی.
[54] عئسانین شاگئردلری یعقوب و یوحنّا بونو گؤرن زامان ددئلر: «یارب! ائسته‌یئرسن امر ادک کی، گؤیدن اود یاغسین و اونلاری محو اتسئن؟»
[55] لاکئن عئسا دؤنوب اونلارا آجیقلاندی. و ددی: «سئز هانسی روحدان اولدوغونوزو بئلمئرسئنئز.
[56] چونکی ائنسان اوغلو گلمه‌یئب کی، ائنسانلارین جانینی محو اتسئن. گلئب کی، اونلاری خئلاص اتسئن.» و آیری بئر کنده گتدئلر.
[57] اونلار یولدا گدن واخت، بئر نفر عئسایا ددی: «یارب! هارایا گده‌سن، سنئن دالینجا گله‌رم.»
[58] عئسا اونا ددی: «تولکولرئن یوواسی، گؤی قوشلارینین دا یوواسی وار، لاکئن ائنسان اوغلونون باشینی دایاماغا بئر یری یوخدور.»
[59] و آیری بئر آداما ددی: «منئم دالیمجا گل.» آمّا او ددی: «یارب منه ائجازه ور، اوّلجه گدئم آتامی دفن ادئم.»
[60] عئسا اونا بله ددی: «قوی اؤلولر اؤز اؤلولرئنی دفن اتسئنلر. آمّا سن گت تارینین پادشاهلیغینی اعلان ات.»
[61] آیری بئری ده ددی: «یارب! سنئن دالینجا گله‌جه‌یم، آمّا ائجازه ور اوّلجه اِوئمده اولانلارلا وئداعلاشیم.»
[62] لاکئن عئسا اونا ددی: «اَلئنی جوت اوستونه قویوب آرخایا باخان آدام تارینین پادشاهلیغینا یاراشماز.»