[1] بئر دفه عئسا بئر یرده دوعا ادئردی. دوعاسینی بئتئردئیی زامان، شاگئردلرئندن بئری اونا ددی: «یارب! دوعا اتمه‌یی بئزه اؤیرت، نجه کی، یحیا دا شاگئردلرئنه اؤیرتدی.»
[2] عئسا اونلارا ددی: «دوعا ادن واخت دیئن: آتا، آدین موقدّس اولسون. سلطنتئن گلسئن.
[3] گونده‌لئک چؤره‌یئمئزی بئزه هر گون ور.
[4] گوناهلاریمیزی باغیشلا، چونکی بئز ده بئزه بورجلو اولان هر آدامی باغیشلاییریق. بئزی ائمتئحانا چکمه.»
[5] و اونلارا ددی: «فرض ادک کی، سئزلردن بئرئنئن بئر دوستو وار. گجه یاریسی اونون اِوئنه گلئب دیئر: ”دوستوم، منه اوچ چؤرک بورج ور.
[6] چونکی یولدان یانیما بئر دوستوم گلئب و قاباغینا قویماغا بئر شیئم یوخدور.“
[7] او دا ائچه‌رئدن جاواب ورئب دیئر: ”منه زحمت ورمه، قاپی آرتیق باغلی‌دیر و اوشاقلاریم منئمله یاتاقدادیرلار. قالخیب سنه بئر شی وره بئلمه‌رم.“
[8] سئزه دیئرم کی، اگر او، دوستلوق سببئندن اؤتری قالخیب ورمه‌سه ده، اونون اوزلو اولدوغونا گؤره قالخیب نه قدر لازیم اولسا، وره‌جکدئر.
[9] من سئزه دیئرم: ائسته‌یئن، سئزه ورئله‌جک. آختارین، تاپاجاقسینیز. قاپینی دؤیون، سئزه آچیلاجاقدیر.
[10] چونکی هر ائسته‌ین آلیر، آختاران تاپیر و قاپینی دؤینه، آچیلیر.
[11] سئزدن هانسی آتا وار کی، اگر اوغلو اوندان چؤرک ائسته‌سه، داش ورسئن؟ و یا اگر بالیق ائسته‌سه، اونا بالیق عوضئنده ائلان ورسئن؟
[12] و یا یومورتا ائسته‌سه، اونا عقرب ورسئن؟
[13] ائندی اگر سئز کی، شرورسونوز، اؤولادلارینیزا یاخشی شیلری ورمه‌یی بئلئرسئنئز، نه قدر آرتیق سماوی آتانیز اوندان ائسته‌ینلره موقدّس روحو وره‌جک.»
[14] عئسا لال اولان بئر ائبلئسی قوووردو. ائبلئس آدامدان چیخاندان سونرا، لال دانیشماغا باشلادی و خالق تعجّوب اتدی.
[15] لاکئن اونلاردان بعضئلری دیئردئلر: «او، ائبلئسلرئن ریئسی بعلزبولون گوجو ائله ائبلئسلری قووور.»
[16] و بعضئلری ده عئسانی ائمتاحان اتمک اوچون اوندان ائسته‌یئردئلر کی، گؤیدن بئر علامت گؤرسدسئن.
[17] آمّا عئسا اونلارین فئکئرلرئنی بئلدی و اونلارا ددی: «هر مملکت کی، اؤزو اؤز ائچئنده بؤلونسه، وئران قالار و اؤزو اؤز ائچئنده بؤلونموش اِو ییخیلار.
[18] و اگر شیطان دا اؤزو اؤز ائچئنده بؤلونسه، سلطنتی نجه داوام ادر؟! بونو اونا گؤره دیئرم کی، دیئرسئنئز من بعلزبولون گوجو ائله ائبلئسلری قووورام.
[19] ائندی اگر من بعلزبولون گوجو ائله قووورام، سئزئن اوغوللارینیز کئمئن گوجو ائله قووورلار؟ اونلار سئزه قاضی اولاجاقلار.
[20] لاکئن اگر من ائبلئسلری تارینین بارماغی ائله قووورام، دمه‌لی تارینین پادشاهلیغی سئزه گلئبدئر.
[21] اگر قووّتلی بئر آدام، تپه‌دن دیرناغاجاق سئلاحلانیب اؤز اِوئنی قوروسا، اموالی سالامات قالار.
[22] آمّا اگر اوندان داها قووّتلی بئری هوجوم گتئرئب اونا قالئب گلسه، اونون بل باغلادیغی بوتون سئلاحلاری آلار و قنئمتی پایلار.
[23] منئمله اولمایان منئم ضئدّئمه‌دئر و منئمله ییغمایان داغیدیر.
[24] ناپاک روح بئر آدامدان چیخاندان سونرا، سوسوز یرلرده دولانیر و راحاتلیق آختاریر. لاکئن تاپمادیغی زامان دیئر: ”چیخدیغیم اِوه قاییدیم.“
[25] و گلدئیی واخت، اونو سوپورولموش و بزنمئش تاپیر
[26] او زامان گدئر و اؤزوندن داها پئس اولان یدّی ناپاک روح گؤتوروب گتئرئر و اورایا گئرئب یاشاییرلار. و او آدامین آخیری، اوّلکئندن داها پئس اولور.»
[27] عئسا بونو دئین واخت، بئر آرواد جاماعات ائچئندن سسئنی اوجالدیب اونا ددی: «خوش سنی داشییان بطنئن و سنی اَمئزدئرن دؤشلرئن حالینا!»
[28] لاکئن عئسا ددی: «عکسئنه، خوش او آداملارین حالینا کی، تارینین کلامینی اشئدئب اونا عمل ادئرلر.»
[29] و خالق اونون اطرافینا ییغیلدیغی زامان، عئسا دانیشماغا باشلادی: «بو نسئل پئس نسئلدئر. او، علامت آختاریر، لاکئن اونا یونوس پیغمبرئن علامتئندن باشقا بئر علامت ورئلمه‌یه‌جک.
[30] چونکی یونوس نینوا اهالئسئنه نجه علامت اولدو، ائنسان اوغلو دا بو نسئل اوچون اله علامت اولاجاق.
[31] جنوب ملکه‌سی قئیامت گونونده بو نسلئن آداملاری ائله قالخیب اونلاری محکوم اده‌جک. چونکی او، سولیمانین حئکمتلی سؤزلرئنی اشئتمک اوچون، دونیانین او باشیندان گلدی. و ائندی سولیماندان داها بؤیوکو بورادادیر.
[32] نینوا اهالئسی قئیامت گونونده بو نسلئن آداملاری ائله قالخیب اونلاری محکوم اده‌جک. چونکی اونلار یونوسون وعظی ائله تؤوبه اتدئلر. و ائندی یونوسدان داها بؤیوکو بورادادیر.
[33] هچ کئم چیراغی یاندیراندان سونرا، اونو گئزلی یره، یا دا قابین آلتینا قویماز. چیراق قابینا قویار کی، ائچه‌ری گئرنلر ائشیغی گؤرسونلر.
[34] بدنئن چیراغی گؤزدور؛ اگر گؤزون یاخشی اولسا، بوتون بدنئن ائشیقلی اولار. آمّا اگر گؤزون پئس اولسا، بوتون بدنئن ده قارانلیق اولار.
[35] پس دئقّت ات کی، سنده‌کی ائشیق قارانلیق اولماسین.
[36] اگر سنئن بوتون بدنئن ائشیقلی‌دیر، اله کی، بئر ذرّه ده اوندا قارانلیق یوخدور، او زامان بوتون بدنئن ائشیقلی اولاجاق؛ بئر چیراق کئمی کی، اؤز نورو ائله سنی ائشیقلاندیریر.»
[37] عئسا بونلاری دئینده، بئر فرئسی اونو اِوئنه یمک یمه‌یه دعوت اتدی. او دا ائچه‌ری گئرئب سوفره باشیندا اوتوردو.
[38] لاکئن فرئسی عئسانین یمکدن قاباق اللرئنی یومادیغینی گؤروب تعجّوب اتدی.
[39] رب اونا ددی: «ائندی، سئز فرئسئلر، فئنجان و بوشقابین چؤلونو تمئزله‌یئرسئنئز، آمّا ائچئنئز طاماح و پئسلئکله دولودور.
[40] آغیلسیزلار! مگر ظاهئری یارادان باطئنی ده یاراتمیر؟!
[41] قابلارینیزین ائچئنده‌کئنی صدقه ورئن، او زامان سئزئن اوچون هر شی تمئز اولاجاق.
[42] آمّا وای حالینیزا، فرئسئلر! چونکی نانَع، صدف‌اوتو و هر جور گؤیرتئنئن اوندا-بئرئنی ورئرسئنئز، لاکئن عدالت و تارینین سوگئسئنده اهمال ادئرسئنئز. بونلاری ورمک و اونلاردا اهمال اتمه‌مک گرکدئر.
[43] وای حالینیزا، فرئسئلر! چونکی کنئسه‌ده مجلئسئن باشیندا اوتورماغی و بازارلاردا سالام آلماغی سوئرسئنئز.
[44] وای حالینیزا، چونکی ائتمئش قبئرلر کئمی سئنئز کی، اونلارین اوستوندن کچنلرئن اونلاردان خبری یوخدور.»
[45] او واخت شرئعت عالئملرئندن بئری جاوابیندا اونا ددی: «اوستاد، بو سؤزلری دمکله بئزی تحقئر ادئرسن.»
[46] عئسا اونا ددی: «وای سئزئن ده حالینیزا، شرئعت عالئملری! چونکی سئز آداملارین بوینونا اِله یوکلر قویورسونوز کی، آپارماغی چوخ چتئندئر، لاکئن اؤزونوز بارماقلارینیزین بئری ائله ده بله، او یوکلره دیمئرسئنئز.
[47] وای حالینیزا! چونکی پیغمبرلره مقبره‌لر تئکئرسئنئز، حال بو کی، اونلاری اؤلدورن آتالارینیزدیر.
[48] بله‌جه آتالارینیزین ائشلرئنه شاهئدلئک اِدئب اونلاری تصدئق ادئرسئنئز؛ چونکی اونلار پیغمبرلری اؤلدوردولر، سئز ده اونلارا مقبره‌لر تئکئرسئنئز.
[49] اونا گؤره تارینین حئکمتی ددی: من اونلارین یانینا پیغمبرلر و حوارئلر گؤندَ‌ره‌جه‌یم، بونلاردان بعضئلرئنی اؤلدوره‌جکلر و بعضئلرئنه ده عذاب وره‌جکلر کی،
[50] دونیانین اساسی قویولاندان بری بوتون پیغمبرلرئن تؤکولموش قانی بو نسئلدن طلب اولونسون؛
[51] هابئلئن قانیندان توتموش زِکَرئیّانین قانینا قدر کی، قوربانگاهلا معبدئن قودسو آراسیندا تؤکولدو. سئزه دیئرم کی، بوتون بو تؤکولن قانلار بو نسئلدن طلب اولوناجاق.
[52] وای حالینیزا، شرئعت عالئملری! چونکی معرئفت قاپیسینین آچارینی گؤتوروبسونوز. اؤزونوز گئرمه‌دئنئز، گئرمک ائسته‌ینلره ده مانع اولدونوز.»
[53] عئسا اورانی ترک ادن واخت، دئن عالئملری و فرئسئلر اونو شئدّتله سیخیشدیردیلار و بئر چوخ شیلره اوندان جاواب آلماق ائسته‌دئلر.
[54] و کمئن ادئب جهد ادئردئلر کی، اونون ددئکلرئندن بئر سؤز قاپیب اوندان شئکایت اتسئنلر.