[1] بئر سبّت گونو عئسا فرئسی ریئسلرئندن بئرئنئن اِوئنه چؤرک یمه‌یه گتدی و اونلار اونو گودوردولر.
[2] اورادا اونون قاباغیندا بئر آدام وار ائدی کی، بدنئنده سو ییغیلمیش ائدی.
[3] عئسا شرئعت عالئملری و فرئسئلره خئطاب ادئب ددی: «آیا سبّت گونو شفا ورمک جائزدئر؟»
[4] لاکئن اونلاردان هچ بئر سس چیخمادی. عئسا او آدامی توتوب صاغالتدی و اونو مورخّص اتدی.
[5] عئسا اونلارا ددی: «سئزلردن کئم وار کی، اگر اِششَک و یا اؤکوزو سبّت گونو قویویا دوشسه، تزلئکله اونو چیخارتماسین؟!»
[6] اونلار اونون بو سوآلینا جاواب وره بئلمه‌دئلر.
[7] عئسا یمه‌یه دعوت اولونانلارین نجه یوخاری باشی سچدئکلرئنی گؤرنده، اونلارا بو مثلی ددی:
[8] «سنی بئر نفر تویا دعوت اتسه، یوخاری باشدا اوتورما. اولماسین کی، سندن داها حؤرمتلئسئنی دعوت اتمئش اولسون
[9] و مئزبان گلئب سنه دسئن: ”بو آداما یر ور.“ و او واخت اوتانیب، لاپ آشاغی باشدا اوتورمالی اولاسان.
[10] آمّا دعوت اولوندوغون زامان، گدئب لاپ آشاغی باشدا اوتور کی، مئزبان گلئب، سنه دسئن: ”دوستوم، یوخاری باشا کچ.“ او واخت مجلئسده اوتورانلارین حوضوروندا عئزّتلی اولارسان.
[11] چونکی اؤزونو اوجالدان هر کس آلچالاجاق، لاکئن اؤزونو آلچالدان آدام اوجالاجاق.»
[12] و اونو دعوت اده‌نه ددی: «گون اورتا و یا شام قوناقلیغی ورن واخت نه اؤز دوستلارینی، نه اؤز قارداشلارینی، نه اؤز قوحوملارینی، نه ده اؤز وارلی قونشولارینی دعوت ات کی، اونلار دا سنی دعوت ادئب بله‌جه سنه عوضئنی ورسئنلر.
[13] لاکئن قوناقلیق ورن واخت، یوخسوللاری، علئل‌لری، توپاللاری، و کورلاری دعوت ات کی،
[14] بختور اولارسان. چونکی اونلار سنه عوضئنی وره بئلمئرلر و صالحلرئن دئرئلدئیی واخت سنه عوض ورئله‌جک.»
[15] عئسا ائله سوفره باشیندا اوتورانلاردان بئری بونو اشئدن واخت ددی: «خوش او آدامین حالینا کی، تارینین پادشاهلیغیندا چؤرک یسئن!»
[16] لاکئن عئسا اونا ددی: «بئر آدام بؤیوک بئر شام قوناقلیغی وردی و چوخلو قوناق دعوت اتدی.
[17] یمک واختی گلن واخت نؤکرئنی دعوت اولونانلارین یانینا گؤندَ‌ردی کی، اونلارا دسئن: ”بویورون، چونکی آرتیق هر شی حاضیردیر.“
[18] لاکئن قوناقلارین هامیسی بئردن عوذر ائستمیه باشلادیلار. بئرئنجئسی اونا ددی: ”بئر زمی ساتین آلمیشام، گدئب اونا باخمالی‌یام. سندن خاهئش ادئرم منی معذور سایاسان.“
[19] او بئری ددی: ”بش جوت اؤکوز ساتین آلمیشام و اونلاری ائمتاحان اتمه‌یه گدئرم. سندن خاهئش ادئرم منی معذور سایاسان.“
[20] اوچونجوسو ددی: ”من اِولنمئشم، بونا گؤره ده گله بئلمه‌رم.“
[21] نؤکر قاییدیب بو شیلری اؤز آغاسینا چاتدیردی. او واخت اِو صاحئبی قضبله‌نئب نؤکرئنه ددی: ”تز گت، شهرئن کوچه‌لر و دؤنگه‌لرئنده اولان یوخسوللاری، علئل‌لری، توپاللاری، و کورلاری بورایا گتئر.“
[22] نؤکر ددی: ”آغا! امرئن یرئنه یتئرئلدی، آمّا گئنه یر وار.“
[23] آغاسی نؤکره ددی: ”گت، بوتون یوللاری و چپرلری آختار و آداملاری گلمه‌یه مجبور ات کی، اِوئم دولسون.
[24] سئزه دیئرم کی، ائلک دعوت اولونان او آداملاردان هچ بئری منئم قوناقلیغیمدان دادمایاجاق.“»
[25] عئسا ائله چوخ آدام گدئردی. و دؤنوب اونلارا ددی:
[26] «کئم اؤز آتاسیندان، آناسیندان، آرواد و اوشاقلاریندان، قارداشلار و باجیلاریندان حتّا اؤز حیاتیندان نئفرت اتمه‌یئب منئم یانیما گلسه، منئم شاگئردئم اولا بئلمز.
[27] و کئم اؤز چارمیخینی گؤتورمه‌یئب دالیمجا گلسه، منئم شاگئردئم اولا بئلمز.
[28] سئزلردن کئم وار کی، بئر بورج تئکمک ائسته‌ینده، اوتوروب اوّلجه خرجئنی حساب اتمز کی، گؤرسون آیا اونو باشا یتئرمک اوچون پولو وار؟
[29] چونکی اگر بونؤوره‌سئنی قویوب ائشی باشا یتئره بئلمه‌سه، او زامان اونو گؤرن هر کس رئشخند اتمه‌یه باشلاییب،
[30] دئیه‌جک: ”بو آدام تئکمه‌یه باشلادی، لاکئن بئتئره بئلمه‌دی.“
[31] و یا هانسی پادشاه وار کی، اؤزگه بئر پادشاهلا موحارئبه‌یه چیخاندا، اوّلجه اوتوروب مصلحتلشمز کی، گؤرسون آیا اون‌مئن نفر عسگرله قادئردئر او پادشاهین قاباغینا چیخسین کی، ائیئرمی مئن عسگرله اوستونه گلئر؟
[32] یوخسا، او بئرئسی حله اوزاقدا ائکن، یانینا اِلچئلر گؤندَ‌رئب، صولح اتمه‌یه چالیشار.
[33] بله‌جه ده، سئزلردن کئم بوتون وار-یوخوندان اَل چکمه‌سه، منئم شاگئردئم اولا بئلمز.
[34] دوز یاخشی شی‌دئر؛ آمّا اگر دوز دادسیز اولسا، اونا نه ائله داد ورئلر؟
[35] نه تورپاغا فایداسی وار، نه ده پِیئنه؛ اونو اشئیه آتارلار. اشئتمه‌یه قولاغی اولان اشئتسئن.»