[1] عئسا شاگئردلرئنه بونلاری دا ددی: «وارلی بئر آدامین بئر ناظئری وار ائدی و اونا خبر گلدی کی، ناظئر اونون مالینی ائصراف ادئر.
[2] آغا ناظئری یانینا چاغیریب ددی: ”سنئن حاقّیندا بو اشئتدئکلرئم نه‌دئر؟ ناظئرلئیئنئن حسابینی ور، چونکی داها ناظئر اولا بئلمزسن.“
[3] ناظئر اؤز-اؤزونه ددی: ”نه ادئم؟ آغام اِوئن ائداره‌سئنی مندن آلیر. تورپاق قازماغا گوجوم یتمز، یولچولوقدان دا کی، اوتانیرام.
[4] بئلئرم نه ادئم کی، ناظئرلئکدن قووولدوغوم زامان اؤزگه آداملار منی اِولرئنه قبول اتسئنلر.“
[5] او واخت آغاسینا بورجلو اولانلارین هامیسینی تک-تک یانینا چاغیردی. بئرئنجئسئنه ددی: ”آغاما نه قدر بورجلوسان؟“
[6] او آدام ددی: ”یوز اؤلچو زیتون یاغی.“ ناظئر اونا ددی: ”اؤز قبضئنی گؤتور، تز اوتور و یاز، الّی.“
[7] سونرا او بئرئسئنه ددی: ”سن نه قدر بورجلوسان؟“ او آدام ددی: ”یوز اؤلچو بوغدا.“ ناظئر اونا ددی: ”اؤز قبضئنی گؤتور و یاز، هشتاد.“
[8] آغاسی دوروست اولمایان ناظئری، فراستلی رفتار اتدئیئنه گؤره تعرئفله‌دی. چونکی بو دؤورانین اوغوللاری اؤزلرئنه بنزه‌ر آداملارلا اولان موناسئبتلرئنده، نور اوغوللاریندان داها فراستلی‌دئرلر.
[9] سئزه دیئرم: دونیانین یالان اولان ثروتی ائله اؤزونوزه دوستلار قازانین کی، ثروتئنئز یوخ اولان زامان، اونلار سئزی ابدی مسکنلره قبول اتسئنلر.
[10] بالاجا بئر ائشده صادئق اولان، بؤیوک ائشده ده صادئقدئر. لاکئن بالاجا بئر ائشده صادئق اولمایان، بؤیوک ائشده ده صادئق دیئل.
[11] بله‌جه، اگر دونیانین یالان اولان ثروتئنده صادئق اولمایاسینیز، دوغرو اولانی کئم سئزه تاپشیرار؟
[12] و اگر اؤزگه بئر آدامین مالیندا صادئق اولمایاسینیز، اؤز مالینیز اولانی سئزه کئم وِرَر؟
[13] هچ بئر نؤکر ائکی آغایا قوللوق اده بئلمز؛ چونکی یا بئرئندن نئفرت ادئب او بئرئسئنی سوه‌جک، یا دا بئرئنه باغلی قالاجاق، او بئرئسئنه حقئر باخاجاق. هم تارییا هم ده دونیانین ثروتئنه قوللوق اده بئلمزسئنئز.»
[14] پول‌پرست فرئسئلر عئسانین بوتون بو سؤزلرئنی اشئدئب اونا رئشخند ادئردئلر.
[15] عئسا اونلارا ددی: «سئز او آداملارسینیز کی، ائنسانلارین قاباغیندا اؤزونوزو صالح گؤرسدئرسئنئز، آمّا تارینین سئزئن اوره‌یئنئزدن خبری وار. چونکی ائنسانلار آراسیندا اَعلا ساییلان شی، تارینین یانیندا ائیره‌ندئرن بئر شی‌دئر.
[16] شرئعت و پیغمبرلر یحیایا قدر ائدئلر. او زاماندان بو یانا تارینین پادشاهلیغینین خوش خبری موژده ورئلئر و هر کس اورایا زورلا گئرمه‌یه چالیشیر.
[17] لاکئن گؤی و یرئن محو اولماسی، شرئعتئن بئر نؤقطه‌سئنئن دوشمه‌سئندن داها آساندیر.
[18] آروادینی بوشاییب آیری آروادلا اِوله‌نَن هر کس زئنا ادئر. اَرئندن بوشانان آروادلا اِوله‌نَن هر کس زئنا اتمئش اولور.
[19] وارلی بئر آدام وار ائدی کی، قیرمیزی و نازئک کتاندان پالتار گِیَردی و هر گون طمطراقلا کف اِدَردی.
[20] ائلعازر آدلی بئر فاغیر وار ائدی کی، بدنئنی یارا بوروموشدو و وارلی آدامین قاپیسینین یانیندا اوزانمیشدی.
[21] آرزو اِدَردی کی، وارلی آدامین سوفره‌سئندن تؤکولن خیریم-خیردالارلا قارنینی دویورسون؛ حتّا ائتلر گلئب، اونون یارالارینی یالاییردیلار.
[22] بو فاغیر اؤلدو و ملکلر طرفئندن ائبراهئمئن قوجاغینا آپاریلدی؛ وارلی آدام دا اؤلدو و باسدیریلدی.
[23] اؤلولر دئیاریندا عذاب چکدئیی زامان، گؤزلرئنی قالدیریب اوزاقدا ائبراهئمی و اونون قوجاغیندا ائلعازری گؤردو.
[24] وارلی آدام باغیریب ددی: ”ای ائبراهئم آتا! منه رحمئن گلسئن. ائلعازری گؤندَر، بارماغینین اوجونو سودا ائسلاتسین و منئم دئلئمی سرئنلَتسئن، چونکی بو آلوودا عذاب چکئرم.“
[25] لاکئن ائبراهئم ددی: ”اوغول، یادینا سال کی، سن اؤز حیاتیندا یاخشیلیق پایینی آلدین. حال بو کی، ائلعازر پئسلئک پایینی آلدی. ائندی او تسلّی تاپیر، آمّا سن عذاب چکئرسن.
[26] بوندان علاوه، سئزئنله بئزئم آرامیزدا بؤیوک بئر اوچوروم قویولوب کی، بورادان سئزئن طرفه کچمک ائسته‌ینلر، کچه بئلمئرلر. اِله‌جه ده اورادان بئزئم یانیمیزا کچه بئلمئرلر.“
[27] وارلی آدام ددی: ”اگر بله‌دئر، یالواریرام ای آتا! اونو آتامین اِوئنه گؤندَ‌ره‌سن.
[28] چونکی منئم بش قارداشیم وار، قوی اونلاری خبردار اتسئن کی، مبادا بو عذاب یرئنه گلسئنلر.“
[29] ائبراهئم اونا ددی: ”اونلارین یانیندا موسا و پیغمبرلر وار، قوی اونلارا قولاق آسسینلار.“
[30] وارلی آدام ددی: ”خیر، ائبراهئم آتا! اگر اؤلموشلردن بئری اونلارین یانینا گتسه، تؤوبه ادرلر.“
[31] آمّا ائبراهئم اونا ددی: ”اگر موسایا و پیغمبرلره قولاق آسمیرلار، اؤلولردن بئری دئرئلسه بله، ائنانمازلار.“»