[1] ¡Nayranakaxan jachapax mä uma jalsjamakïspa, walja jalir umanakjama, ukhamata markaxan jiwarat jaqinakata uruy aruma jachañaxataki!
[2] ¡Walïspawa wasaran mä utax utjitaspa ukat ukan jakasiñaxataki, ukhamat markaxat jayaru sarxañataki! Taqinis janiw chiqa chuymanïpkiti, ch'uxña lurirkamakïpxiwa.
[3] K'arisiñatakix jank'akïpxiwa, mich'inaksa antutt'apkaspa ukhama. Aka markansti k'arisiñakiw phuqt'atäski, janiw chiqapax utjkiti; jan walit juk'ampi jan walirukiw sarapxi, ukatsti pachpa Tatituw arsuraki: “Janiw nayar uñt'añ munapkituti” sasa.
[4] Mä jilat masirus janiw alkatasiñjamäkiti; pachpa jilarus janirakiw alkatasiñjamäkiti, jilapuras jupanakpachaw lunthatjasipxi, jila masinakas jupanakkamaw k'arintasipxi.
[5] Sapa mayniw maynitsa larusi, janiw khitis chiqap arsurix utjkiti. Taqinis k'arisiñar yatintatkamakiwa; ñanqhakamakïpxiwa,
[6] janirakiw kun yatiqañsa munapkiti. Tatitusti siwa: “¡Nuwasiñat nuwasiñaru, k'arisiñat k'arisiñaru, ukakiw utjaski! Markaxax janiw uñt'añ munkituti.
[7] Ukatpï naya, taqi ch'aman Tatitux sistxa: ¿Kunsa jichhax markaxampix luriristxa? Jan ukasti q'umachatäñapatak ninar uskuñakiw wakisxi.
[8] Laxranakapax jiwayir mich'inakjamawa; parlatanakapasti k'arikamakiwa. Jila masinakaparux wali sum aruntt'apxi, ukampis qhanpachax sipitanakak jupanakatak uchasipki.
[9] Ukatpï jupanakarux mutuyäxa, uka luratanakapatjam churarakï. Naya, Tatituw uk arsta.
[10] “Qullunakata, wasaranakat jachapxam, ayqupxarakim, suma ch'uxña uraqinakat jachapxam, ukanakasti q'ala nakhantatäxiwa, janirakiw khitis uka chiqa sarakipkxiti, janiw uywanakan wararitapas ist'askxiti, jamach'inakasa, monte laq'unakasa jayaruw sarxapxatayna.
[11] “Jerusalén markarux qala chhaxwaruw tukuyä; qamaqinakan putunakaparuw tukuyarakï; Judá uraqinkir markanakarusti mä ch'usa wasararuw tukuyä; jan jaqiniw qhiparxapxani.”
[12] ¿Khitis wali yatiñani taqi akanak amuyt'añatakixa? ¿Khitirus Tatitux taqi akanak yatiyi mayninakar yatiyañapataki? ¿Kunatsa aka markax q'ala t'unjat uñjasi, mä wasarar uñtata waña, kawkhantix jan khitis sarnaqki ukhama?
[13] Tatitusti ukxarux siwa: “Israelitanakan taqi yatichäwinakax apanukupxatapata, nayar jan ist'apxatapata, yatichäwinakaxarjam jan sarnaqapxatapat taqi akanakax ukham lurasiski.
[14] Chuymanakapan jan wali amtatanakaparuw arkapxäna, ukatsti k'ari diosanakaruw yupaychapxarakïna, kunjämtix awkinakapax yatichkatayna ukhama.
[15] Ukatpï naya, taqi ch'amani Tatitu, Israelan Diosapax arstxa: Jupanakarux thujsantat manq'a manq'ayä, jiwayir uma umantayarakï.
[16] Ukatsti kawkïr markanaktix awkinakapasa, jupanakasa jan uñt'apki uka markanakaruw ananukurakï; espadas ayt'ataw jupanakar arknaqayä, taqinin jiwarañapkama.”
[17] Taqi ch'aman Tatitux siwa: “¡Sum ist'apxam! Jachir warminakar jawsayanipxam.”
[18] ¡Jïsa, jank'ak jutapxpan, ukatsti jiwasat jachapxpan; nayranakasasti jachampi phuqhantatäpan, ajanunakasansti jachax warasirakpan!
[19] Taqi aka markpachan jaqinakan jachatanakapax ist'asi: “Q'ala t'unjatarakïtansä, jisk'achjatarakis uñjastanxä. Utanakasax q'ala t'unjatawa, markasat sarxañakiw wakt'xistu” sasa.
[20] Jachir warminaka, Tatitun arunakap ist'apxam, kuntix siskani ukanak sum ist'apxam. Wawanakamar jachañ yatichapxam, masinakamarusti llakisiñat jakhusiñ yatichapxarakim, akham sasa:
[21] “Jiwax utanakasaruw mantani; ventananak chiqaw mantani; wawanakarusti marka thakhinakan anataskir jiwarayi, waynanakarus plazanakan jiwarayaraki.
[22] Jaqinakan jiwat janchinakapax liwirtatäskiwa, q'añu t'unar uñtataw tukusiski, kunjämatix mä grano puyax yawirin qhipäxapar liwiqtki, ukat janirak khitis apthapki ukhama” sasa. Tatituw uk arsu.
[23] Tatitux siwa: “Yatiñan jaqix yatiñapampix jan jach'a jach'a tukpati, munañanisa munañanïtapatxa jan jach'a jach'a tukpati, qamiris qamir yänakapat janirak jach'a jach'a tukpati.
[24] Maynitix jach'a jach'a tukuñ munchixa, nayar uñt'atapat jach'a jach'a tukpan, nayan Tatitütax yatitapata, aka uraqin munasiñampi, askimpi, chiqampi lurataxata, ukham luräwix wal kusisiyitu. Naya, Tatituw uk arsta.”
[25] Tatitux siwa: “Kawkïr markanakatix janchin circuncisión katuqapki uka markanakar mutuyañ urux niyaw purinxi:
[26] Egipto, Judá, Edom, Amón, Moab, uka markanakaru, taqi wasara tuqin utjirinakaru, khitinakatix paranakapa khithurasipki ukanakarusa. Taqi uka markanakaxa, taqpach Israel markasa, janiw chuymanakapanxa Tatitur uñt'apkiti.”