[1] Israelan taqi ch'amani Tatitu Diosapax Moab markatakiw aka arunak arsu: “¡Ay Nebo marka! ¡Kunja t'unjatätasa! ¡Quiriataim sat markasti, katuntata, jisk'achjatawa! ¡Ch'amapas uraqir liwinukutawa!
[2] Moab markan jach'a kankañapasti tukusxiwa. uñisirinakapax Hesbón chiqan amtasipki Moab markan markpach chhaqtxañapataki. Madmén marka, jumas tukjatarakiw uñjasïta, nuwasiñasti jumxarux jutapuniniwa.
[3] Horonaim sat chiqatsti arnaqasitanakaw ist'asi; ‘¡Aynacht'añampi, q'ala t'unjatäñampiw utjaraki!’
[4] “Moab markasti t'unjatawa; usuyasiñat warariñanakasti Sóar chiqakamaw ist'asi.
[5] Makhatirinakax jacht'asisaw Luhit sat amstanjam makhatasipki; saraqirinakax warart'asisaw t'unjatätapatxa, Horonaim sata aynachanjam saraqasinipkaraki.
[6] ¡Jaltxapxam! ¡Ch'amanïki ukax jaltxpan! ¡Monte asnonakjam jaltxapxam!
[7] “Moab marka, jumasti ch'amamaru, qamir yänakamaruw alkatasïyätaxa, ukampis jumax katuntataw uñjasirakïta. Quemós sat diosamasa jayar apatäniwa, sacerdotenakapampi, jilïr jaqinakapampi kuna.
[8] T'unjatäñasti taqi markanakaruw purini, janirakiw mä markas qhispkaniti; qhirwasa, pampasa t'unjataw uñjasini. Naya, Tatituw uk arsta.
[9] ¡Moab markatakix amay imañ chiqa wakichapxam, uka markasti q'ala tukjatäniwa! ¡Markanakapasti, jan mä jaqiniw uñjasini.”
[10] (¡Ñanqhachatäpan kawkïr jaqitix Tatitun iwxata irnaqañanak jan taqi chuymampi phuqkani ukaxa. Ñanqhachatäpan kawkïr jaqitix jan jiwayañ munkani ukaxa!)
[11] Moab markax sumakipuniw jakasiskäna, janipuniw kunapachas jaya markarux apayat uñjaskänti. Mä suma vinor uñtatänwa, mä chiqanakpun suman jakasiskäna. Ukatpï taqi kunas uka markatakix walikipunïskänxa, janirakiw saräwinakapsa chhaqhayaskänti.
[12] Ukampis Tatitux siwa: “Mä uruw purinini kunapachatix uñisiripax nuwantkani, ukatsti katuntasaw jaya markar apasxani. Naya, Tatituw uk arsta.
[13] Ukapachaw Moab markax Quemós sat diosapat p'inqasini, kunjämatix Israel markax Betel chiqar alkatasïnxa, ukatsti uka chiqat p'inqasirakïnxa ukhama.
[14] “Moab markax jan siskpati: ‘Nanakax jan kuna axsarir jaqinakäpxtwa, nuwasïwin nuwasir ch'aman jaqinakäpxtwa’ sasa.
[15] Moab markar t'unjirix niyaw purinxi, yaqha markanakapar t'unjiris niyaw purinxi. Suma soldadonakapas nuwasïwin jiwarapxani. Israelan taqi ch'amani Tatitupaw ukham arsu.
[16] Moab markan t'unjatäñapax niyaw jak'achasini, aynacht'añapasa niyaw purinirakini.
[17] Moab marka jak'an utjasirinaka, jach'a kankañap uñt'irinaka, uka markat jachapxam, sapxarakim: ‘¡Uñtapxam, kunjämas aka markax tukjat uñjasi, ch'amampi apnaqañapasa, jach'at uñt'atäñasa, q'ala tukjatawa!’ sasa.
[18] “Dibón marka, uka jach'a qunuñamat saraqanim, waña uraqir qunt'asim, Moab markar t'unjirix jutantiwa, sayt'asiñ chiqanakamsa t'unjarakiwa.
[19] Aroer markankirinaka, thakhi jak'ar sayt'asisin uñtapxam; khitinakatix jaltxapxi ukanakar jiskt'apxam, ‘¿Kunas aka chiqan lurasi?’ sasa.
[20] Jupanakasti sapxätamwa, Moab markax q'ala t'unjatawa, axsarañampi phuqhantatawa. ¡Uka markat jachapxam! ¡Arnón jawiransti yatiyapxarakim Moab markan t'unjatätapata!”
[21] Pata pampankir markanakatak arsuta mutuyäwinakax purinxiwa: Holón, Jahas, Mefáat,
[22] Dibón, Nebo, Bet-diblataim,
[23] Quiriataim, Bet-gamul, Bet-megón,
[24] Queriot, Bosrá, ukhamaraki jak'ankiri, jayankiri Moab tuqin utjkis taqi uka markanakataki.
[25] Tatitux siwa: “Moab markan ch'amapax t'unjatawa, munañanïñapas t'unjatarakiwa” sasa.
[26] Moab markarux machjayapxam, Tatitutak sayt'asitap layku. Ukapachaw Moab markax pachpa waq'sutapar qurumsuni, taqiniw jupat larusipxarakini.
[27] Moab, jumax Israel markat larusïyätawa; jisk'achañampiw uka markat parläyätaxa, lunthatäkaspas ukhama.
[28] Moab uraqinkir jaqinaka, aka markanak apanukuwayxapxam; palomanakjam qarqanak taypir jakir sarxapxam, qarqa pata lakanakarurak tapachasipxam.
[29] Moab markan jach'a jach'a tukurïtap yatipxtanwa, jach'a jach'a tukutapa, jisk'achirïtapa, jan axsartir chuymanïtapsa.
[30] Tatitusti ukham jan wali chuymanïtap yatirakiwa, kunsa inampi parlirïtapa, jach'a jach'a tukurïtapa. Taqi ukanakasti jumatakix janiw kunatakis askïkaniti.
[31] Ukat Moab markat jachä, jaqinakapatsa wali amtarakï, Quir-heres sat markankir jaqinakatsa, wal jacharakï.
[32] Sibmá chiqan jakir jaqinaka, jumanakat jachä, uva yapjamaw jach'ar tukuwayapxtaxa; Jazer chiqakamaw uva laphinakamax purïna, jach'a qutat juk'ampi khursakamaw purïna. Jichhasti uva achunakamax q'ala t'unjatawa.
[33] Moab suma achur pampanakanxa, janirakiw k'uchik arnaqasiñanakas ist'askxiti. Vinos pist'xarakiwa vino uchañ utanakanxa, janiw khitis uva takirix utjkxiti, janirakiw kusisiñat q'uchuñanakas utjkxiti.
[34] Hesbón markankir jaqinakax wal wararipxi, wararitanakapasti Elalé, Jahas markakamaw ist'asi, Sóar ukkhat Horonaim, Eglat-selisiya ukakamaw ist'asi, Nimrim chiqankir uma jalsunakapas wañantatarakiwa.
[35] Tatitux siwa: “Nayaw Moab markankir jaqinakarux t'unjä, qullu patanakar yaqha diosanakaru yupaychañ utanakar makhatapki, inciensonaka, wilañchanaka uka diosanakapar luqtasir sarapki ukanakaru” sasa.
[36] Ukat chuymaxax Moab markankirinakat pinkillur uñtat jachsu, Quir-heres markankir jaqinakat jachi, walja qamir yänak imkatatap q'al apt'asipxi.
[37] P'iqi ñik'utanakapas mururatkamakiwa, sunkhanakapas khithuratkamakiwa; taqiniw amparanakap chhuxriñchjasipxi, chhankha isinakampiw isthapisipxaraki.
[38] “Moab markan taqi uta patanakansa, thakhinakapansa, jaqinakan wararitapakiw ist'asiski, nayaw Moab markarux jisk'a jisk'a t'unjta, jan kunatak inamay sañükaspas ukhama. Naya, Tatituw uk arsta.”
[39] ¡Moab markatjam jakhusipxam! ¡Uka markax q'ala tukjatawa! ¡Mä p'inqaw qhipäx uñtxi! Axtaskaña, jisk'achkañarakiw marka jak'anakapatakis tukxaraki.
[40] Tatitux siwa: “Moab markan uñisiripax jutantiwa, chhiqhas janatatat jach'a pakar uñtataw jutanti.
[41] Markanakapax katuntatäniwa, sayt'asiñ chiqanakapasa uñisiripan amparaparuw purini. Uka urusti Moab markan nuwasirinakapax wawachasir warmjamaw khathatipxani.
[42] Moab markasti jan mayampitak tukjatäniwa, naya Tatitutak sayt'asitap layku.
[43] Ukatpï naya, Tatitux sistxa: Moab markan utjir jaqinakaxa, uywanakjam jiwayirinakampi arknaqatäpxaniwa, jan ukax mä sipitaru, mä p'iyar jalantirjamäpxaniwa.
[44] Jiwayirinakat jaltirixa p'iyaruw jalantani, uka p'iyat misturisti sipitaruw jalt'ani, nayaw Moab markxarux mutuyäwipan urup apanirakï. Naya, Tatituw uk arsta.”
[45] “Yaqhipanakax jan ch'amaniw jaltxapxi, Hesbón markan ch'iwipar imantasiri; ukampis, Sihón reyin Hesbón markapax ninampi phichhantatäniwa, uka ninasti jach'aruw aqatati, uka ch'axwir Moab markan qullunakapsa q'al nakhantaraki.
[46] ¡Ay Moab, kunakïkan jumatakixa! ¡Quemós diosan markapa, aynacht'atätawa! ¡Yuqanakamarusa, phuchhanakamarusa jaya markaruw katuntat apapxi!
[47] Ukampisa tukuyarusti, nayaw Moab markan saräwipxa sumar tukuyxä; naya, Tatituw uk arsta.” Ukaw Moab markataki arsuta Tatitun mutuyäwipaxa.