[1] Matán chachan Sefatías yuqapa; Pashur jaqin, Guedalías yuqapa; Selemías jaqin Jucal sat yuqapa; Malquías jaqin Pashur sat yuqapa; taqi jupanakaw Jeremiasarux aka arunak taqi jaqinak nayraqatan parlaskir ist'apxäna, akham sasa:
[2] “Tatitux siwa: ‘Khititix aka markar qhiparkani ukax nuwasïwina, manq'atjama, jan ukax kunayman usumpiw jiwani. Ukampis khititix aka markat mistuwayxani ukat babilonionakar katuyasxarakini ukax janiw jiwayatäkaniti.’
[3] Tatitusti sarakiwa: ‘Aka markax Babiloniankir reyin amparaparuw jalt'ani. Jupaw katuntani, janirakiw khiti jark'aqirsa jikxataskaniti’ ” sasa.
[4] Ukatsti uka jilïrinakax reyir sapxarakïnwa: —Jeremiasarux jiwayañawa, ukham parlatapampix kawkïr soldadonakatix markar qhiparapki, kawkïr jaqinakatix aka markankapki ukanakaruw ch'ama thayjtayi. Aka jaqix janiw aka markan askipa munkiti, jan ukasti aka markan aynacht'añap muni —sasa.
[5] Sedequías reyisti jupanakarux sarakïnwa: —Walikiwa, kuntix jumanakax uka jaqimpi lurañ munapkta uk lurapxam, janiw nayax jan kunsa lurapxamti siskiristti —sasa.
[6] Ukhamasti jupanakax Jeremiasar katuntasinxa, Malquías sata jilïrin phuch'uparuw jaquntapxäna, kawkïritix uñjirinakan uta anqapankkän ukaru. Wiskanakat warkuntapxäna, uka phuch'unsti janiw umax utjkänti jan ukasti ñiq'ikiw utjäna, Jeremiasasti uka ñiq'iruw jalantäna.
[7] Mayni jaqiw ukan utjäna Ébed-mélec sata, jupasti Etiopía uraqinkirïnwa, reyin utapansti wali aski jaqit uñt'atarakïnwa, jupaw ukham Jeremiasax uma phuch'ur jaquntatätap ist'äna. Mä urusti reyix mä tantachasïwinkaskänwa Benjaminan Punkupa sata chiqana.
[8] Ukhamasti Ébed-mélec sat jaqix reyin utapat mistuwayasinxa reyir yatiyiriw saräna, akham sasa:
[9] —Jach'a rey, kuntix uka jaqinakax Jeremiasampi lurapki ukax wali jach'a juchawa. Mä phuch'uruw jaquntapxi ukan manq'atjam jiwaski, t'ant'asti janirakiw markan utjkxiti —sasa.
[10] Reyisti ukspachaw Ébed-mélec jaqirux mayïna, jupampi chika kimsa tunka jaqinakar irpasiñapataki, ukatsti Jeremiasar janïra jiwkipan uka phuch'ut apsuñapataki.
[11] Ébed-mélec jaqisti ukhamaw jaqinak irpäna, ukatsti reyin utapar sarasinxa, reyin isi imasiñapat thantha isinak apsunïna, uka isinaksti mä wiskar chinuntasaw kawkha uma phuch'unkkäntix Jeremiasax ukkhar warkuqäna.
[12] Ukat Jeremiasarux sarakïna: —Uka thantha isinak chhiqhanqarar uskt'asim, ukhamat wiskanakax jumar jan usuchañapataki —sasa. Jeremiasasti ukham luräna.
[13] Jaqinakasti uka wiskat jiyt'asaw uma phuch'ut apsupxäna. Uka qhipatsti Jeremiasax uñjirinakan uta anqapan qhipararakïna.
[14] Sedequías reyix Jeremiasarux jupan ukar irptayaniñapatakiw mayïna, Tatitun utap taypin kimsïr punkükis ukkharu. Ukan reyix Jeremías profetarux säna: —May jumar jiskt'äma, uka jiskt'arusti qhanpin jaysitäta —sasa.
[15] Jeremiasasti sarakïnwa: —Nayatix uka jiskt'ar arusxatä ukkhaxa, juma reyix nayar jiwayitätawa, mä kun amuyt'ayirisma ukkhasti, janiw ist'kitätati —sasa.
[16] Ukampis Sedequías reyix Jeremías profetatakix jamasat aka juramento lurarapïna: —Khititix jakañ churkistu uka Tatitun sutipxaruw juramentompi arsurapsma, janiw jiwaykämati, janirakiw khitinakatix jiwayañ munapktam ukanakan amparaparus katuykämati —sasa.
[17] Jeremiasasti ukxarux sarakïnwa: —Israelan Diosapa, taqi ch'aman Tatitux siwa: “Jumatix mäpita Babiloniankir jilïrinakar katuyasxäta ukkhaxa, jumasa, wila masimasa janiw jiwarayat uñjasipkätati, aka markas janirakiw ninampi nakhantayatäkaniti.
[18] Ukampis janitix jupanakar katuyaskäta ukapachasti, babilonio ejercitow aka markxa katuntasini, ukatsti ninampiw phichhantani, jumasti janirakiw ukat jaltkätati” sasa.
[19] Sedequías reyisti ukxarux sarakïnwa: —Kawkïr judionakatix babilonionakampi mayachasxapxi ukanakaruw nayax axsarta; nayatix jupanakan amparanakapar jalt'ä ukkhasti, jupanakax nayarux wal nuwjapxitani —sasa.
[20] Jeremiasasti ukxarux sarakïnwa: —Juma, jach'a reyix janiw jupanakan amparaparux jalt'kätati. Jach'a rey, Tatitun arunakapar jaysam, kuntix jumaru yatiyksma uka arunakaru, ukapachasti taqi kunas walikïskakiniwa, janiw jiwayatäkarakïtasa.
[21] Ukampis juma, jach'a reyitix jan jayskätaxa, kunatix luraskani ukanakat Tatitux nayar yatiyarakitu.
[22] Judá markankir reyipan utapatsti qawqha warminakatix ukan qhiparapki ukanakax apsutäniwa, ukatsti Babiloniankir reyin jilïrinakapar katuyatäniwa, ukatsti uka pachpa warminakaw reyir akham sapxani: ‘Alkataskta uka suma masinakamasti sallqjasinxa atipjapxtamwa; kayumas mä ñiq'ir jalantatjamawa, ukasti janiw yanapt'apktamti’ sasa.
[23] Jeremiasasti reyirux saskakïnwa: —Taqi warminakamasa, wawanakamasa babilonionakar katuyatäniwa, juma jach'a reyisti janiw jupanakan amparapat jaltkätati, jan ukasti Babiloniankir reyir katuyataw uñjasïta, aka markarusti ninampiw phichhantapxarakini —sasa.
[24] Ukat Sedequías reyix Jeremiasar sarakïna: —Jumatix jan jiwañ munkstaxa, jan khitimpis aka tuqit parlamti.
[25] Jilïrinakatix jumampi parlatax yatipxani ukkhasti, jupanakax kunsa jumampi nayampix parltan taqi ukanak yatiñ munapxani, janitix uka jiskt'anakapar jayskäta ukkhasti, jiwayañ munapxätam.
[26] Ukampis jumax jupanakarux akham sañamawa: “Nayax reyiruw achikt'asiskäyäta jan wasitat Jonatán jaqin utapar apayaskañapataki, ukan jan jiwañaxataki” —sasa.
[27] Ukhampuniw jilïrinakax Jeremiasan ukar taqi kunat jiskhir sarapxäna, ukampis Jeremiasax kunjämtix reyix yatichkatayna ukhamarjamapuniw taqi jiskt'anakaparux arusxatäna. Ukatsti Jeremías profetarux khithanukxapxakïnwa, reyimpi jupampi parlapxatap janiw khitis ist'kataynati.
[28] Jeremiasasti, Jerusalén markax katuntatäkän ukkhakamaw uñjirinakan uta anqapan katuntat qhipararakïna.