[1] Tatitusti siwa: “Israel marka, jumatix kuttanxañ munstaxa, jan juk'ampi jucha lurkxamti. Uka axtaskañ diosanakamsti apanukxam, nayatsti janirak jayarst'amti.
[2] Kunapachatix nayan sutixar juramento luräta ukkhasti, nayampisa, taqinimpisa chiqa chuymampi luram. Ukhamat jumar munatax layku, taqi markanakarux askinakax churarakï, uka markanakasti nayaruw yupaychapxarakitani” sasa.
[3] Tatitusti, Judá markankirinakaru, Jerusalén markankirinakarux saskakiwa: “Jan yapuchat uraqinakar yapuchapxam; ch'aphinak taypirusti jan yapuchkxapxamti.
[4] Judá markankirinaka, Jerusalén markan utjir jaqinaka, jumanakax q'umachasxapxam, nayarusti Tatitut uñt'asxapxita, jumanakampi lurata arust'äwi phuqhapxam, ukampis chiqpachapin phuqhapxam; ukhamat ñanqha luratanakam laykux phiñasiñaxax ninjam jan aqtaskañapataki, uksti janiw khitis jiwaraykaspati.
[5] “Aka arunaksti Jerusalén markana, Judá uraqin yatiyapxam; trompeta phust'as taqi markpachar yatiyapxam, wali jach'at art'apxam: ‘¡Jaqinakax uyuchrantat markanakar imantasir jaltxapxpan!’
[6] Jerusalén tuqir uñtat wiphal aytapxam; ¡imantasiñ chiqanak thaqtapxam, jan suyapxamti! Nayasti amsta tuqit jach'a t'aqhisiñanakampi, tukjatäñanakampi apayanïxa.
[7] Leonax niyaw putupat mistuni; markanak tukjiristi niyaw jutanti; markam t'unjiriw markapat mistuniwayi, markanakamxa, ch'usa wasara, q'ala t'unjat tukuyani.
[8] Jichhasti, chhankha isinakampi isthapisipxam, jachapxam, usuyasiñatsa ayqupxarakim, Tatitun aqkiri phiñasiñapasti janiw jiwasat jithiqtkiti” sasa.
[9] Tatitux siwa: “Uka urux purinkani ukkhasti, reyisa, jach'a jilïrinakas axsarañat wal khathatipxani, sacerdotenakasti wal mulljasipxani, profetanakas wali sustjataw uñjasipxarakini.”
[10] Ukat naya Jeremiasax sista: “Tatay, ¿kunatarak Jerusalenankir jaqinakar sallqjtasti? Suman sarnaqasiñaw utjani sarakïyätasä, jichhasti jiwañakirakis muyuntxixä” sasa.
[11] Mutuyañ pachax purinkani ukkhasti, Jerusalén markarux satarakïniwa: “Wasar tuqit mä junt'u thayaw thayt'ani, ukasti markax tuqiruw thayt'ani. Uka thayax janiw trigo khuyuñatak suja thayäkiti;
[12] nayax thayt'ayankä ukasti wali jach'a thayäniwa, jichhpachaw jupanakatakix juchañchäwi arsurakï.”
[13] Uñtapxam, uñisirinakax mä qinayjamaw jutanti, nuwasiñ carronakapasti mä jach'a thayjamaw jutantapxi, caballonakapasti pakat sipansa juk'ampi jalapxi. ¡Kunakïkan jiwasatakixa, janiw kawkhar imantasiñasas utjkistuti!
[14] Jerusalén, ñanqhanakat chuymam q'umachasim, ukhamat jumax qhispit uñjasïta. ¿Kunapachkamas uka jan wali amtañanakampix apnaqayasïta?
[15] Dan siski uka uraqitpacha, Efraín qullunak tuqit jan wali yatiyäwinakax purini:
[16] “Markanakaru, Jerusalén markarusa yatiyapxam, uñisirinakax mä jaya markat jutantapxi, nuwasiñatak arnaqt'asisaw jutantapxi, Judá uraqinkir markanakar t'unjiriw jutantapxi.
[17] Judá uraqirusti q'alpun muyuntapxani, Tatitutak sayt'asitapat ukham muyuntapxani. Naya, Tatituw uk arsta.
[18] “Jerusalén, jan wal sarnaqatamat taqi akanakax ukham lurasiski. Ñanqha luratamax axtkañawa, ukaw chuymamsa usuchjaraktam.”
[19] ¡Chuymaxax walpun usutu! ¡Niya phallirpachawa! ¡Janiw inakt'irjamäkti, janirakiw amukt'irjamäktsa! Mä trompetan phust'asitap ist'ta, nuwasiñ arnaqasitanak ist'arakta.
[20] Jan walt'añanakat yatiyäwinakaw purini; taqi markpachaw jichhax t'unjataraki. Utjnuqäwinakaxas akatjamat q'ala t'unjataw uñjasi, chhujllanakaxas q'ala t'unjatapuniwa.
[21] ¿Kunapachkamas uñisirin wiphalap alayar aytat uñjäxa, trompetan atipt'äwi phust'asitapsa ist'arakïxa?
[22] Tatitux siwa: “Markaxax q'ala luqhiratawa, janiw uñt'kxarakituti. Jan amuyt'asiri wawanakäpxiwa, janiw kun satas amuythapisipkiti. Ñanqhanak lurañatakisti, ch'amanakapax jilarkiriwa, ukampis janiw kunatix askïki uk lurañ yatipkiti.”
[23] Uraqi uñatatta, ukasti jan amuykaña ch'usa wasarar tukutänwa; alaxpacha uñtarakta, ukansti janiw kuna qhanas utjkänti.
[24] Jach'a qullunak uñtta, ukanakasti khathatipxänwa; jisk'a qullunakas chhijthaptapxänwa.
[25] Uñatatasta ukkhasti janiw kuna jaqis utjkxänti, taqi jamach'inakas jaltxapxarakitaynawa.
[26] Suma uraqinakasti, jichhax ch'usa wasarar tukuyatänwa, taqi markanakasti q'ala t'unjatarakïnwa. Taqi akanaksti Tatitun jach'a phiñasiñapaw ukham luratayna.
[27] Tatitux siwa: “Taqi aka uraqpachaw tukjatäni, ukampis janiw q'al tukjkarakïti.
[28] Aka uraqix llakisiñampi phuqhantatäniwa, alaxpachas ch'amakampi phuqhantatarakïniwa. Nayaw arsta, ukhamapuniw lurasini, taqi kunas amtatäxiwa, janipuniw qhipar kuttkäti.
[29] Caballonakar lat'xatat jutapki, mich'inakap apt'at jutapki ukanakan arnaqasitaparusti, taqi jaqinakaw jalakamak chhuksuwayxapxi; ch'uminak taypiruw imantasipxi, qarqanakaruw jat'stapxaraki. Taqi markanakasti q'ala apanukutawa; janirakiw mä sapa jaqis ukanakan jakkxiti.
[30] Jumasti, tukjat Jerusalén marka, ¿Kunatakis suti chupik isinakampi isthapista? ¿Kunatakis uka quri yänakampi k'achachasta? ¿Kunatakis nayranakamsa ch'iyarar tukuyasta? Ukham k'achachasitamax inamayatakiwa, munirinakamas jichhax apanukupxtamwa, jiwayatäñam munapxaraki.
[31] Usuchjatanakan wararitap ist'ta, tayna wawap wawachasiri warmin wararitapjama; ukasti Jerusalenankirinakan wararitapawa, janiw samsurjamäpkisa, wali jach'at art'asaw yanap mayipxi. Amparanakap luqatatataw sapxi: ‘¡Ay kunakïkan nayatxa! ¡Jaqi jiwayirinakaw jiwayapxitani!’ ” sasa.