[1] Kunapachatix Jeremiasax kuntix Tatitu Diosax siskatayna ukanak jaqinakar yatiyañ tukuyxän ukkhasti,
[2] Hosaíasan Azarías sat yuqapa, Caréah jaqin Johanán yuqapa, yaqha jach'a jach'a tukur jaqinakampiw Jeremiasarux sapxäna: “¡Jumax parlkta uka arunakax janiw chiqäkiti! Janiw Tatitu Diosasax jumarux sisktamti nanakaru ‘Egiptor jan sarapxamti’ sañamatakixa.
[3] Nerías jaqin Baruc yuqapakiw jumarux ukham nanak tuqi arsuñamatak amtaytamxa, ukhamat nanakan babilonionakan amparapar jalt'apxañaxataki, ukat uka markar katuntat apanukutäpxañaxataki, jan ukax jiwayatäpxañaxatakisa” sasa.
[4] Ukhamapï, janiw Johanán jaqisa, jilïr militaranakasa, taqi jaqinakasa Judá uraqir qhiparapkänti; ukhamat Tatitun arsutapar jan ist'apkänti.
[5] Jan ukasti, Johanán jaqimpi taqi jilïr militaranakampix, khitinakatix ananukutäkasin Judá markar kuttanxapxatayna taqi uka jaqinakaruw tantacht'apxäna:
[6] chachanakaru, warminakaru, wawanakaru, reyin phuchhanakaparu, taqi jaqinakaru, khitinakarutix Nebuzaradán sat uñjirinakan jilïripax Guedaliasan apnaqatäpxañapatak utt'ayawaykatayna ukanakaru, Jeremiasampiru, Baruc sat chachamppacharu.
[7] Tatitur jan ist'asaw taqi uka jaqinakax Egipto markar jakasir sarxapxäna, ukatsti Tafnes sata chiqaruw puripxäna.
[8] Tafnes chiqansti Tatitux Jeremiasaruw parläna, akham sasa:
[9] “Mä qawqha jach'a qalanak aptam, ukatsti Judá uraqit jutiri taqi jaqinakan uñjkata, reyin utapar mantañäkis uka uñkatasir allintam.
[10] Jupanakarusti sarakim: ‘Israelan taqi ch'amani Tatitu Diosapasti akham siwa: Nayaw Babilonia markan Nabucodonosor reyiparu irptayanï, ukatsti kawkharutix uka qalanak allintkta uka patxaruw qunuñap utt'ayarakï.
[11] Jupasti jutasin aka Egipto marka t'unjani. Khitinakatix jiwañatak katuyatäpki ukanakasti, jiwarapxaniwa; kawkïrinakatix yaqha markar apatäpxañapatak katuyatäpki ukanakasti, jaya markar apatäpxaniwa; kawkïrinakatix nuwasïwin jiwaratäñatak katuyatäpki ukanakasti, uka nuwasïwin jiwarapxarakini.
[12] Egipto markan diosanakapan utanakapsti ninampiw phichhantani, diosanakaparusti katuntatäkaspas ukham apasxani. Egipto markarusti q'uma tukuyani, kunjämatix mä awatirix isipat lap'anak thalsuskix ukhama, ukatsti jan khitin kun kamsatakiw sarxani.
[13] Egipto markanxa, Bet-semes sata chiqan intin utapatak lurat jach'a chutanak q'al tinkurayani, Egipton utjir diosanakapan utanakaparusti ninampiw phichhantayarakini’ ” sasa.