[1] Tatitux Jeremiasar wasitat parläna, ukatsti sarakïnwa:
[2] “Tatitun utap punkur sayt'asim ukatsti aka arunak yatiyarakim: Judá uraqinkir taqi jaqinaka, khitinakatix aka punkunak tuqi Tatitur yupaychir mantapkta ukanaka, aka arunak ist'apxam.
[3] Kuntix taqi ch'aman Tatituxa, Israelan Diosapax siski uka arunaka: ‘Sarnaqäwinakama, luräwinakam askichasipxam, nayasti jumanakarux aka uraqin jakayasipkämawa.
[4] K'arinak parlirinakarux jan alkatapxamti, khitinakatix sapki: ¡Tatitun utapaw akanki, Tatitun utapaw akanki! sasa.
[5] “ ‘Jumanakax sarnaqäwinakamsa, luräwinakamsa sum askichasipxam, maynit maynikamas chiqapar uñjasipxam;
[6] yaqha markat jutirinakarusa, wajchanakarusa, ijmanakarus jan sinti irnaqayapxamti, jan juchan jaqinakarus aka chiqanxa jan jiwayapxamti, yaqha diosanakarutix yupaychasipkakïta ukkhax, jumanakpachaw aynacht'apxäta,
[7] nayasti aka uraqin jakayasipkämawa, kawkïr uraqtï nayra awkinakamar wiñayatak churkäyäta ukana.
[8] “ ‘Jumanakax k'ari arunakarukiw iyawsapxtaxa, uka arunakasti janiw kunatakis jumanakatak askïkiti.
[9] Lunthatapxta, jaqi jiwayapxta, wachuqa juchan sarnaqapxta, k'ari juramentonak lurapxta, Baal diosar inciensonak luqtasipxta, ukatsti yaqha diosanakaruw yupaychapxaraktaxa, ukanakampix janiw kuna lurañanakamas utjkiti,
[10] taqi ukanak lurasinsti, nayar luqtatäki uka utaxarux jutapxaraktawa, nayan nayraqataxar uñstiri. Aka utan suma uñjatäpkasmas ukham amuyasipxtaxa, ukatsti utaxat mistxasinxa taqi jan walinak lurasipkaktawa, uka luratanakamax axtasiyituwa.
[11] Aka utax nayar luqtat utawa, ukampis jumanakax lunthatanakan putup tukuyxapxatäta. ¡Naya pachpaw ukham uñjta! Naya, Tatituw taqi ukanak arsta.
[12] Israelitanaka, jichhax Siló siski uka chiqan nayan ajllit qullan utaxar sarapxam, kawkhantix qalltatpach nayar yupaychapkäyäta uka chiqaru, jumanakan juchanakam laykuw uka utxa q'al t'unthapta.
[13] Nayasti mayamp mayampi jumanakar ñanqha luratanakamat iwxapxsma, ukampis jumanakax janiw nayar ist'apkistati, janirakiw jaysapkistasa. Naya, Tatituw uk arsta.
[14] Ukat jichhax, kuntix Siló chiqan qullan utaxampi lurkta, ukhamarakiw jichhax aka nayar luqtata utaxampix lurä, aka utsti jumanakampiru nayra pacha awkinakamampiruw churta, jumanakasti uka utaruw wal alkatasipxaraktaxa.
[15] Jumanakarusti, naya nayraqataxat jayaruw jaqunukupxäma, kunjämatix Efrainan wawanakaparu, jumanakan jilanakamäki ukanakarux jaqunukta ukhama.’
[16] “Jichhasti Jeremías, sum ist'ita: aka markatakix jan nayar achikt'istati. Jan ist'asis achikt'askakitäta ukkhasti, janiw nayax ist'kämati.
[17] ¿Janit jumax uñjkta kuntix Judá markanakansa, Jerusalén markansa lurapki ukxa?
[18] Wawanakax lawa apthapipxi, awkinakasti nina naktayapxi, warminakasti muxsa t'ant'anak lurañatakix t'ant'a masa wakichapxi, ukatsti uka t'ant'anakxa, Alaxpacha Mama sapki uka diosaruw luqtapxaraki. Yaqha diosanakar waxt'äwinak luqtasitanakapampix ñanqhachapxituwa.
[19] Ukampis nayar ñanqhachañat sipansa, jupanakpachaw juk'ampi ñanqhachasisipki, jupanakatakisti mä p'inqarakiwa. Naya, Tatituw uk arsta.
[20] Ukat naya, Tatitux taqi phiñasiñaxampi aka chiqar mutuyä, jaqinakxaru, animalanakxaru, quqanakxaru, yapunakxaru. Q'apisiñaxasti jan jiwarkir ninjamaw nakhani.”
[21] Taqi ch'aman Tatituxa, Israelan Diosapasti, markaparux siwa: “Taqi waxt'äwinaka, luqtäwinak luqtasisipkakim, uka luqtat aychanaksa manq'asipkakim.
[22] Ukampis kunapachatix nayax nayra awkinakamar Egiptot irpsunkta ukkhax, janiw nayax uka luqtasiñanak tuqit jupanakar kunsa siskti, janiw maykaraktsa.
[23] Ukampis jupanakarux nayar ist'apxañapatakiw mayta; ukhamat nayax jupanakan Diosapïrista, jupanakasti nayan markaxarakïspa sasa. Ukatsti sarakïyätwa kunjämtix nayax siskta ukarjam sarnaqapxañapa, ukhamat taqi kunas sumak sarañapataki.
[24] Ukampis janiw nayarux ist'apkituti, janiw jaysapkarakitusa, jan ukasti qala chuymanakapar jaysasakiw ñanqha lurañanakar katuyasipxi. Nayan ukar kuttaniñat sipansa, maysaruw uñtapxi.
[25] Nayra awkinakamax Egiptot mistunipkäna ukat jichhakamasti, nayax jumanakarux maynit maynxaruw profetanak khithanipxsma.
[26] Ukampis jumanakax janiw nayarux jaysapkistati, janiw ist'apkarakistasa, jan ukasti, nayra awkinakamat sipansa juk'ampi qhuru chuymaniw tukupxtaxa.
[27] “Jumasti Jeremías, taqi akanak jupanakar sarakim, janisay ist'asipkpan; jach'at art'askakim, janis jaysapkchïtam ukasa.
[28] Sarakim: ‘Aka markax janiw Tatitu Diosaparux jaysañ munkiti, janirakiw chiqachayasiñsa munkiti. Chiqa chuymampi sarnaqañasti janiw utjkxiti’ ” sasa.
[29] ¡Jerusalén markankirinaka, llakisiñ isinakampi isthapisipxam! ¡Wasar qullu patanakan llakiskañ q'uchunak q'uchupxam! Jumanakasti nayarux phiñasiyapxistawa, ukat apanukupxsma, jaytanukupxaraksma.
[30] Tatitusti siwa: “Judá uraqinkir jaqinakax nayar ñanqhachañatakix mä jan wal lurapxi: nayar luqtat utaruw uka axtaskañ idolonakap uchasxapxi, ukhamat utax q'añuchapxi.
[31] Ben-hinom qhirwansti Tófet sat nina phichhaña chiqaruw altar wakichapxi, ukan imill wawarusa jan ukax yuqall wawarusa phichhantapxi, nayasti janipuniw jupanakarux ukanak lurapxam siskti, janirakiw amtäwixansa ukanakax utjkänti.
[32] Ukatpï jichhax naya, Tatitux arstxa, akat qhiparusti uka chiqarux janiw Tófet siskxapxaniti, janirakiw Ben-hinom Qhirwa siskxapxanisa, jan ukasti, Jiwarayañ Qhirwa sasaw sutichxapxani. Jan juk'ampi uraqix amayanak imañatak utjatapatxa, Tófet chiqaruw jiwatanakarux imapxarakini.
[33] Uka jaqinakan jiwat janchinakapsti jach'a jamach'inakampi, monte animalanakampiw manq'apxani, janiw ukanakar khiti jark'iris utjkarakiniti.
[34] Judá uraqin markanakapatsti, Jerusalén markatsa, kusiskañanaka, phunchhäwinaka, jaqichasiñ q'uchunak q'al chhaqtayä; taqi markpachasti ch'usa wasarar tukutarakïniwa” sasa.