[1] Tatay, jumampi ch'axwañarutix uskusïxa, juman arumakipuniw chiqapaxa; ukampis nayax jiskt'añ munirisma, ¿kunatsa ñanqha jaqinakatakix taqi kunas sumak lurasirapi? ¿kunatsa ch'uxña luririnakax sumak jakasipxi?
[2] Jumaw jupanakarux ayrunttaxa, jupanakasti saphintapxiwa, jilatatasinsti, achunak churapxi. Jupanakax lakampikiw juma jak'ankasipki, chuymanakapanxa jumat wali jayankapxiwa.
[3] Ukampis Tatay, jumax nayar uñt'istawa; jumax uñjistawa, jumatak amtatanakaxäki uksa yatirakistawa. ¡Uka jaqinakarux khariñ ovejanakarjam apasxam, khariñ urutak chimpt'awayarakim!
[4] ¿Kunapachkamas uraqix wañantatäskakini, pampanakan quranakas wañsuskarakini? Aka markan jakir jaqinakan ñanqha luratanakapatxa uywanakasa, jamach'inakas jiwarasipkiwa, jupanakax janis jumax luratanakap uñjkasma ukham amuyapxi.
[5] “Kayut jalir jaqinakampi jalasatix wal qarstaxa, ¿kunjämarak caballot jalir jaqinakamp chik jalätasti? Suma uraqinxa k'uchikïsktawa, ukampis ¿Jordán tuqin walja alinak taypin kamacht'ätasa?
[6] Pachpa jilanakama, khitinakatix wila masinakamäki ukanakaw jumarux ch'uxña lurapxtam, qhipäxamatsti jan wali arunakampiw arnaqapxtam. Suma arunakampi parlapkchïtam ukasa, jupanakarux janipun alkatasimti.
[7] “Markaxarux jaytanuktwa, nayankkäna uka markarux apanuktwa. Wali munat markaxarux, uñisirinakan amparaparuw katuyta.
[8] Nayar kutkatasitapata, nayatak montenkir leonjam tukutapat jichhax uñista.
[9] Markaxax mä suma phuyunakan jamach'jamawa, yaqha jach'a jamach'inakan katjañatak arknaqatawa. ¡Jichhax taqi ch'uminkir animalanak jutapxam; manq'antañatak tantacht'asipxam!
[10] Uñisir reyinakaw uva yapuxar tukjapxi, uraqinakaxsa takisipxarakiwa. Nayan wali munat uraqixsti llakiskañ wasararuw tukuyapxi.
[11] Llakiskañ wasararuw tukuyawayapxi; jupan jachatapsa nayax uñjaraktwa. Taqi aka uraqpachaw ch'usa wasarar tukuta, ukampis janiw khitis llakt'askiti.
[12] Taqi wasar qullu patanakatsti, qhuru jaqinakaw jutantapxäna, ukampis naya, Tatitux mä espada ayt'atätwa, aka marksti uka espadax maysat maysa t'unjani, janirakiw khititakis suman sarnaqasiñax utjkaniti.
[13] Trigo yapuchasipxäna, ukatsti ch'aphinakak apthapxapxi, yapu luratanakapasti inamayakiwa. Nayan phiñasiñaxan nakhatap laykux yapunakan achunakapax q'ala aynacht'atawa.”
[14] Tatitusti Israel marka jak'ankiri ñanqha markanakaruxa, kawkïr uraqtix jupax Israel markaparu mä tuti churki uka uraqi t'unjirinakarux akham siwa: “Nayaw uka markanakarux uraqinakapat jik'inukü, Judá markarusti jupanak taypitxa apsunxarakïwa.
[15] Ukham jik'inukutatsti, jupanakat khuyapayasirakïwa, pachpa uraqiparu, pachpa markaparuw kuttayanxä.
[16] Jupanakaw markaxarux Baal diosatak juramento lurañsa yatichapxäna, ukampis jichhax markax taypin utjnuqapxaspawa, ukampis jupanakax nayan yatichäwinakaxaruw jaysapxañapa, ukatsti nayan sutixar juramento lurañ yatiqapxañaparaki: ‘Tatitux jakaskiwa’ sasa.
[17] Ukampis kawkïr markatix jan nayar jayskitani ukarusti, saphitpach jik'inukü, ukatsti t'unjarakïwa. Naya Tatituw uk arsta.”