[1] Nayax Hilcías chachan yuqapa Jeremías profetätwa. Anatot sata markan jakasirïtwa, sacerdotenakan wila masipat saraqirïtwa. Anatot markax Benjamín ayllu uraqinkiwa.
[2] Kunapachatix Amón jaqin yuqapa, Josías sat reyix tunka kimsan mara Judá uraqi apnaqkäna, ukapachaw Tatitu Diosax aka yatiyäwi churitu.
[3] Ukhamarakiw yaqha yatiyäwinakampi churitu, kunapachatix Joacim, Sedequías jupanakax Judá uraqin reyipäpkäna ukapacha, jupanakax Josías reyin yuqanakapänwa. Sedequiasax tunka mayan mara, phisqa phaxsiniw Judá uraqi apnaqäna, Jerusalén markan utjirinakax jaya tuqir babilonionakan katuntat apatäpkän ukapachkama.
[4] Tatit Diosax nayaruw parlxayitu akham sasa:
[5] “Jumar jakaña janïr churkäyäsma ukkhatpach ajllissma; jumax janïr yurkäyät ukkhatpach nayax yaqhachassma; markanakan profetapäñamatakiw jumarux uchsma” sasa.
[6] Nayasti saraktwa: “¡Tatay! ¡Nayax wawäsktwa, janiw jaqinak taypin parlañ yatkti!” sasa.
[7] Ukampis Tatitux saskakituwa: “Jan jumax ‘Wawäsktwa’ samti. Kawkirutix nayax khitkäma ukaruw jumax saräta. Kuntix nayax siskäma uk parlarakïta.
[8] Jan khitirus axsaramti, nayaw jumar imañatak jumamp chikt'atäskä. Naya Tatituw uk arsta” sasa.
[9] Ukatsti Tatitux amparap luqtanisin lakaxat llamkt'itu, sarakituwa:
[10] “Nayaw arunakax lakamar uchta. Jichhax taqi munañanïñ chursma, marka apnaqäwinakxaru, markanakxaru, ukanakar jik'inukuñamataki, tinkuyañamataki, t'unjañamataki, pampa tukuyañamataki, ukhamaraki, wasitat utacht'asin sayt'ayañamataki” sasa.
[11] Ukatsti Tatitux sarakituwa: “Jeremías, ¿kunsa uñjta?” sasa. “Mä almendro ali uñjta” sasaw nayax sarakta.
[12] “Jïsa, ukapunïskiwa, ukampis jichhax sum uñjä, arunakaxan phuqhasiñapkama” sasaw Tatitux sarakitu.
[13] Tatitux wasitat saskakituwa: “¿Kunsa jichhax uñjarakta?” sasa. “Wallaqiskir mä phukhu uñjta, ukasti amsta tuqit niyas wartasinirpachawa” sasaw sista.
[14] Ukat Tatitux sarakitu: “Amsta tuqitpach jan walt'añanakax aka markan utjir jaqinakxarux jutani.
[15] Naya, Tatituw uk arsta, amsta tuqinkir marka apnaqäwinakaruw jawsarakï. Reyinakapasti jutasinxa, pachpa Jerusalén marka mantañaruw reyi qunuñanakap uskusipxani, muyuntki uka pirqanakapa uñkatasiru, Judá uraqin utjir taqi markanak nayraqataru.
[16] Ukham mutuyañatakiw nayax arsta, khitinakatix nayar apanukusina, jupanakpachan lurasita yaqha diosanakar inciensonaka luqtasipxi, killisipxaraki uka jucharar markatakixa.
[17] Jichhasti jumax ch'amañcht'asim; saram, ukatsti kuntix nayax sisksma taqi ukanak yatiyanim. Jan jupanakarux axsaramti, axsaräta ukapachasti, nayax jupanak nayräxan khathatiyäma.
[18] Nayaw jichhax jumarux sayt'aysma, mä suma uyuchrantat markäkasmas ukhama, hierrot lurat sayir pirqäkasmas ukhama, broncet lurat pirqäkasmas ukhama, ukhamat Judá uraqin reyinakaru, jilïrinakaru, sacerdotenakaru, taqi jaqinakar saykatañamataki.
[19] Jupanakax walpun juma tuqix sayt'asipxani, ukampis janiw atipjapkätamti. Nayaw jumampïskä jumar imañataki. Naya, Tatituw uk arsta” sasa.