[1] Tatitux siwa: “Babilonia markat kuttanxapxani uka urunakanxa, nayaw taqi Israel markan Diosapäyä, jupanakasti nayan markaxäpxarakiniwa” sasa.
[2] Tatitux siwa: “Wasaran sarnaqapkäna ukkhaxa, nayax jach'a munasiñax uñacht'äniwayta. Nuwasiñan jan jiwarapki ukanakarux samart'äniwaytwa.
[3] Nayax jupar jayatpach uñstasaw sista: Wiñay munasiñampiw nayax munsma, ukat khuyapayasiñampi jichhakam uñjsma.
[4] Israel marka, jumarux wasitat sayt'ayxäma. Wasitat chhullu chhullunakampi, k'uchik thuqt'asir jutäta.
[5] Samaria qullu tuqinakarusti wasitat uva alinak ayruntäta, uva yapunak yapuchasirinakasti, uka achunakat manq'asipxarakini.
[6] Mä uruw purinini, kunapachatix marka uñjirinakax Efraín qullunakan arnaqasipkani: ‘Jutapxam, Jerusalén markar sarapxañäni, ukansti, Tatitur yupaychapxañäni’ ” sasa.
[7] Tatitux siwa: “Israelitanaka, kusisiñat q'uchupxam, jumanakax taqi markanakat sipansa aytat markäpxtawa. Q'uchutanakamsti ist'ayapxam, sapxarakim: ‘Tatitux Israel markan jilt'irinakaparux qhispiyiwa’ sasa.
[8] Nayaw Babilonia markat kuttayanxapxäma, aka uraqi tukusitpach jumanakarux tantachxapxäma. Jumanakampi chikasti juykhunaka, kayu wixchunakaw kuttanxapxani, usur warminakasa, wawachasxapxi ukanakasa, ¡waljanipuniw kuttanxapxani!
[9] Tatitur yuspagarasa, jacht'asisarakiw kuttanxapxani. Nayasti jalir uma thiyanakaruw jupanakar irparakï, jan liwisipxañapatakisti, mä suma khuskhachat thakhinjam irparakï. Nayaw Israelan awkipätxa, jupasti jilïr yuqall wawaxarakiwa.
[10] “Markanaka, Tatitun arunakap ist'apxam, jach'a quta jaya thiyanakan yatiyapxam: ‘Tatitux Israel markarux ananukünwa, ukampis jichhax tantachthapxaniwa, ukatsti sumarak uñjani, awatirir uñtataw ovejanakap sum uñjasxani” sasa.
[11] Tatituw israelitanakarux qhispiyi; mä jach'a ch'aman markat qhispiyaniraki.
[12] “Jerusalén markar purinisinsti, kusisiñat q'uchupxani, Tatitut katuqapkani uka askinakat kusisipxani: trigo, vino, aceite, ovejanaka, vacanaka, taqi ukanakata. Suma qarpata muxsa achunak churir yapjamäxaniwa, janirakiw ch'amapas tukuskxaniti.
[13] Tawaqunakax k'uchikiw thuqt'asipxani, uka kipkarak waynanakasa, chuyman jaqinakas kusist'apxani. Nayaw jupanakarux chuymachä: jachatanakapsa kusisiñaruw tukuyä, t'aqhisiñanakapat sipansa juk'ampi jach'a kusisiñ churarakï.
[14] Sacerdotenakarusti suma manq'anaka manq'apxañapatakix churä, markaxarusti jilarkir askinakaxampiw phuqhantä. Naya, Tatituw uk arsta.”
[15] Tatitux siwa: “Ramá chiqan mä aruw ist'asi, maynin chuyma jan utt'ayasis jachatapa. Raquel warmiw wawanakapat jachaski, wawanakapan jiwaratapatxa, janiw chuymachatäñ munkiti.”
[16] Ukampis Tatitux sarakiwa: “Raquel, jan juk'ampi jachkxamti; jachanakam jan juk'ampi wartkxamti, llakisitanakamasti janiw inamayatakïkaniti: wawanakamax uñisirin uraqipat kuttanxapxaniwa. Naya, Tatituw uk arsta.
[17] Qhipa urunakamatakix mä suyt'äwiw utjaski: wawanakamax markaparuw kuttanxapxani. Naya, Tatituw uk arsta.
[18] Markaxan jachatap ist'twa, jupanakasti akham sasaw jachapxi: ‘Nayax mä uri vaca qallur uñtatäyätwa, ukampis jumax axa tukuyista; juman ukaruy kuttayanxita, jumätaw Tatitu Diosaxaxa.
[19] Nayaw jumat jayarst'awayta, ukampis jichhax walpun amtta; juchax uñt'asta, ukat chuymax liq'ista; wayna kankañaxan jucha lurataxatxa, p'inqachata, jisk'achjataw uñjasta.’
[20] “Efraín markax nayatakix munat wawaxawa; taqinit sipansa sinti munat wawaxawa. Jupar tuqintkta ukasa, janipuniw nayax jupat armaskti; taqi chuymaxampiw munasta, jupatsti walpun khuyapt'ayasirakta. Naya, Tatituw uk arsta.
[21] “Israel, thakhinakam sum chimpusim, ukhamat wasitat jank'ak uk jikxatañamataki; uka thakhinak saratam sum amuyasim. ¡Israel marka, kuttanxam, kuttanxam markanakamaru!
[22] ¿Kunapachkamarak uksa aksa sarnaqäta, saranukut wawar uñtatasti? Naya, Tatitux, aka uraqin machaqat lurtxa: warmix chacharuw munapayani.”
[23] Israelan Diosapa, taqi ch'aman Tatitux siwa: “Kunapachatix nayax Judá markankir jaqinakan sarnaqäwip sumar tukuyxä, ukat jupanakax wasitat uraqipankxani, markanakapankxani ukkhax wasitat sapxani: ‘¡Tatituy Jerusalén markan utjir Tatitun utaparu, askinakampi phuqt'pan, kawkhantix chiqa kankañax utjki ukaru!’
[24] Judá uraqinkir jaqinakasti, markanakapankir jaqinakasa, yapuchirinakasa, uywa awatirinakasa ukan jakapxani.
[25] Qarjatanakaru, jan ch'aman sarnaqirinakarusti manq'añampi, umañampi jilarkir churarakï” sasa.
[26] Ukapachaw nayax uñatatta. Samkasiskakitätwa, ukampis uka samkax nayatakix wali sumapunïnwa.
[27] Tatitux siwa: “Mä uruw purinini, kunapachatix Judá uraqina, Israel uraqinsa, jaqinakasa, uywanakas walipun utjkani uka uru.
[28] Kunjämatix nayrax jik'inukuñataki, liwinukuñataki, pampa t'unjañataki, tukjañataki, kunayman ñanqhanak lurañatakis nayax jank'akïyätxa, ukhamarak jichhax wasitat sayt'ayañatakisa, ayruntañatakis jank'akirakïyä. Naya, Tatituw uk arsta.
[29] “Uka urunakanxa janiw wasitat parlatäkxaniti: ‘Awkinakaw k'allk'u uvanak manq'apxi, ukat wawanakan laka ch'akhanakapax ñusaratkamakïxi’ sasa.
[30] K'allk'u uvanak manq'irin laka ch'akhanakapaw ñusaraskani. Sapa maynisa juchapatjam jiwaskarakini” sasa.
[31] Tatitux siwa: “Mä uruw purinini kunapachatix nayax Judá markampi, Israel markampi mä machaq arust'äwi lurkä uka uru.
[32] Aka arust'äwisti janiw kunjämtix nayra awkinakapampi lurkayäta ukhamäkaniti, kunapachatix jupanakarux Egipto markat amparat wayxarusin irpsunkta ukhama; jupanakasti uka arust'äwixarux janiw phuqhapkiti, nayax jupanakan uywiripäkchiyäta ukasa. Naya, Tatituw uk arsta.
[33] Khä urun Israelampi lurkä uka arust'äwix akhamäniwa: Nayan kamachinakaxsti chuymanakaparuw uskü, p'iqinakaparuw qillqantarakï. Nayax jupanakan Diosapäyäwa, jupanakasti nayan markaxarakïniwa. Naya, Tatituw uk arsta.
[34] Nayar uñt'añatakix janiw wakiskxaniti, maynit maynikama, masinakkama, wila masinakkam yatichasiñanakapaxa, taqiniwa jisk'at jach'akama nayarux uñt'apxitani. Nayasti jupanakarux ñanqha luratanakapat pampachäwa, jucha luratanakapatsti janirakiw mayampsa amtaskxäti. Naya, Tatituw uk arsta” sasa.
[35] Tatituw inti usku urun qhanañapataki, phaxsisa, warawaranakasa aruma qhanañapatakiraki, jupaw jach'a qutsa, mathapi qhuthutinaksa luraraki, jupax “Taqi Ch'amani Tatitu satarakiwa,” jupasti siwa:
[36] “Kuna urutix nayan utt'ayat kamachinakax jan phuqhapkani ukapachax, Israel markax janiw juk'ampi markaxäkxaspati. Naya, Tatituw uk arsta.
[37] Mä urutix alaxpach tupt'apxaspa, aka uraqin qalltap yatxatapxarakispa ukaxa, taqi jan walinak luratapatxa, Israel markaxarux apanukuristwa. Naya, Tatituw uk arsta.”
[38] Tatitux siwa: “Mä uruw purinini kunapachatix Jerusalén markaxax wasitat sayt'ayatäxani uka uruxa, Hananel sata pukarat qalltasina, pirqa muyt'ankkis uka Punkukama.
[39] Qurpanakapasti chiqak sarani, ukat qalltasina, Gareb sata uka jisk'a qullukama, ukatsti Goá sata uksaruw muyt'arakini.
[40] Kawkharutix jiwatanakax imatäki, qhillas wartatäkaraki, Cedrón jawira patanaka, inti jalsu tuqin Caballonakan punkupa satäki taqi ukanakax nayar katuyatkamakïniwa, taqi uka chiqanakasti janipuniw mayampis t'unjatäkxaniti” sasa.