[1] Sawa feki ahu aburoho yoho deri dukumahana. Yoho ohoru karakigini, Yesus Égé Éné murid yoho bake yohoni marahana.
[2] Damu yori emiyoho, "Ahu aburoho nogo yoho Nu kotoféri égenani, mése asu ukumasiyo mériya. Damu yoho ohoru arenané mahana égéki mése karakigina. Emohoni, Nu ahu nonéyuhuwoho nogoki etori esumu woruméré.
[3] Yoho bake yahaeni kusumu ahanangkumaka, yoho yedi kumu pesanggi féri ahanané. Damu yoho égena ékému ahu tuhuremu busu hama kumu dahana," emiyoho.
[4] Damu Yesus Éné murid yoho utuhu haméri yohona, "Ériyato nogoki siyanto gahakumu égé. Emohoni, ahu yoho ohoru wayamu yeri ahu aburoho yoho arenané kudukinan deyoho."
[5] Damu Yesus yoho bake abamu yoho, "Gugu égena ékému du-roti égéte makemere ége?" Abamu yohoni yoho ememere utuhu haméri yohona, "Birikuma-berahafi-ukuma (7)," emiyohona.
[6] Damu Égé yohoni ahu aburoho énéyuhuwoho yoho soho teyo kumu bahana. Ememere emahanaka, Yesus du-roti birikuma-berahafi-ukuma (7) égéki yeri Ala bake degi kuroho ememere yori feyahafunggu. Damu du-roti égéki bero féri ahahaméri Éné murid yoho ahu yoho bake kemerohonan niye kemeroho. Emohoni, Éné murid yohote ahu aburoho yoho bake kemerahana.
[7] Damu yoho hate ahae unaware yahamuto de égena. Damu Yesus Égé ahae égena égéki yeri hamemere Ala bake degi kuroho ememere yoho. Damu yohoni Éné murid yoho ahae égena nogoki kemerohona.
[8] Damu yoho énggena yaki esumu kudukesemahana. Damu ohoru ganggene dakamu yeri mutu birikuma-berahafi-ukumamu (7) kemukungguna yaki esemu bong bahana.
[9] Damu ahu ohoru énggena énéyuhuwoho 4.000 rahamo ememere bahana. Damu Yesus yoho bake yohoni kusumu yohona busu hamu dakamu hohona.
[10] Damu Égé kakumu Éné murid kotoféri yufung womu kumu oguri aumahanani, Dalmanuta soho ékému hohona.
[11] Damu Farisi nahu yahamuto Yesus bake dahanaka, damu Yesus kumu u kutumu yohona. Damu yoho Yesus Égéki ikuhaméri u fe gebufunan niye ememere yohona, "Bafa-Guruwa, Ala Éné habigiyo féri ukukuwoho-mujizat enu! Ememere emongkumaki, nugu awe etori nafamowané Ala mése Guki kusumohoni daha emiyohowané."
[12] Yesus modu sibuméri sifing piyaha fiyoho. Damu utuhu haméri yoho, "Ahu soho nokumu bahana yoho Nu bake Ala Éné habigiyo féri ukukuwoho-mujizat degemu enu, emohoni yoho awe nafamenané Ala mése Nuki kusumohoni dere égéki nafamenané ememere yohona. Makemoho niye yoho ememere yohonae? Nu haiyangmu yahae Ala Éné habigiyo féri ukukuwoho-mujizat degemu awe eméréte, Nu wiyaha modi. Gugu niye fani Ala Éné habigiyo féri ukukuwoho-mujizat degemu eme deyoho," emiyoho.
[13] Damu Yesus damu Éné murid yoho ékému munggunaka, damu yufung womu kumu oguri urémisi afi onuguna.
[14] Damu Yesus Éné murid yoho gagabuméri du-roti wayamu fani yahana deyoho. Yoho kamu du-roti fikoyaha kamisige yufung womu kumu yeri kufiyohona.
[15] Damu Yesus Égé yoho bake u aseméri yoho, "Gugu, Farisi nahu yohona kukuwoho-ragi damu ahuhabang-raja Herodes énahu yohona kukuwoho-ragi égéki wayamu etotoméri enané," emiyoho. Damu Yesus u aseméri yoho éné u feki ememere kubumoho: Farisi nahu damu Herodes énahu yohona u yokukubumahana nogoki u fani manggohokigi deyoho. Damu kukuwoho-ragi du-roti kumu kokumenangkumaka, du-roti fafani osugu. Ememere yoho yokukubumahana éné u égé kukuwoho-ragi gahakumu soho fe soho fe yo ahanan kiyoho. Emohoni, yoho wayamu etori emenan niye u aseméri yokukubumoho.
[16] Emohote, Yesus Éné murid yoho Yesus u aseméri yoho égéki fani femu nafamahana deyoho. Damu yoho u kutumu abubaméri éyohona, "Nugu du-roti fani yeri deriya deyoho, nemohoni Yesus Égé ememere nugu bake yoho," emiyohona.
[17] Damu yoho u kutumu yohona égéki Yesus nafamoho. Damu Égé yoho bake abamu yoho, "Makemoho niye gugu du-roti karakigi nogoki u kutumu éyohonae? Gugu Nané u mése yoré yaki nogoki fani wayamu nafamahana deyohoe? Gugu gung dekigini fani dagena deyohoe?
[18] Guguna kiyo sunto de bahanate, gugu fani etori dari fifimahana deyoho.
[19] Gugu Nu mése du-roti kuroré énggena égéki fani femu wayamu fimiri nafamahana deyohoe? Du-roti birikuma égéki mése ahu 5.000 yoho bake kuroré énggena yaki kudukesemahana, damu gugu ohoru ganggise égéki dakamu gogokunggunaka, damu mutu kumu e kemukungguna yaki, damu inahamahanani, makemere égenae?" Yoho utuhu hamahana, "Bibirikuma-ketahafi-ukuma (12) moho," emiyohona.
[20] Damu Yesus tafe emiyoho, "Du-roti birikuma-berahafi-ukuma (7) égena égéki ahu 4.000 yoho bake kuroré éyangkenani, kudukesemahana. Damu ohoru ganggise égéki mutu ékému kemukuwangkenani, mutu bong bahana. Damu inahamahanani makemere égenae?" Damu yoho utuhu hamahana, "Birikuma-berahafi-ukuma (7) moho," emiyohona.
[21] Damu yoho bake yoho, "Nu Nabo Ala Éné habigiyo féri degemu emesuméré nogoki gugu fani nafamahana deyoho," emiyoho.
[22] Ememere damu Yesus kumu Éné murid kumu kotoféri Betsaida busu kumu ogohona. Ékému ahu yoho ahu kiyo ketanggi baha égéki yeri Yesus bake dahanaka, damu Égé bake fisini yori emiyohona, "Yesusa, ahu kiyo ketanggi baha égéki gohoméri ahafu neri," emiyohona.
[23] Damu Yesus ahu éné bero tuhumu yeri busu pamakigi homu hohona. Damu Yesus Égé ahu éné kiyo kumu mise si uri Éné bero féri ahu éné kiyo afifiye kumu gohomoho. Damu ahu égé bake abamu yoho, "Kageto gu kukuwoho égena égéki awe etohoe?"
[24] Damu ahu égé sama kumu keroho etoho. Damu emiyoho, "Ahu yohoki etoréte, debahae gahakumu hohona-dahana mahana," emiyoho
[25] Damu Yesus tafe Éné bero féri ahu éné kiyo afifiye kumu gohomoho. Damu ahu égé éné kiyo abuwomoho. Damu éné kiyo age gogerimohoni, égé age kirimu etoho.
[26] Damu Yesus yori emiyoho, "Kusumu gané afahang kumu nohoi. Damu gusé busu nogo fani muson deyoho," emiyoho.
[27] Ememere emohoka, Yesus damu Éné murid yoho busu Kaisarea Filipi soho ita kumu égena ékému hohona. Hori yedi womu kumu Yesus yoho bake abamu yoho, "Ahu yohote Nure emiyohona, 'Ahu menohosé re?' "
[28] Yoho yori emiyohona, "Tuhuremu yori emiyohona, 'Ahu baptismusumoho nahu Yohanes égé séré.' Hate tuhuremu emiyohona, 'Nuguna yahae ahu-nabi Elia égé séré.' Hate tuhuremu emiyohona, 'Guku ahu-nabi yoho égena ékému ahu-nabi fe kéré.' "
[29] Damu Yesus yoho bake ememere abamu yoho, "Mite, gugute makemere fimahanae? Nute menoho Nu sere?" Damu Petrus utuhu haméri emiyoho, "Guku Kristus. U feki Ala Guki kubumu yohoni Ahuhabang kiri baha Égé séré," emiyoho.
[30] Damu Yesus yoho bake u hanggeramu emiyoho, "Gugu fani Nané u yohona égéki ahu fe yoho bake yohonan deyoho, meneféyané," emiyoho.
[31] Ememere emohoka, Yesus Éné murid yoho bake ememere yokukubumoho, "Embahae Ala Éné sifing fimoho hamemere ukukuwoho ememere éyonané: Ahu Ala bahato ékému dere Nu awe ukukuwoho esumu agefekigi égéki aburohomu gebuuri kugutoméri bahae. Yahudi nahu yohona yeyoho matahai yoho kumu bafa-guru Musa éné hukum yokukubumahana nahu yoho kumu ahu-imam yohona ahuhabang yoho kumu ememere kotoféri fani Nuki hanikinan de ansakuméri undomenané. Damu ifiyo-tifiyomenanéka, damu awe esumu funané akumete, asu ukuma meka, yeya igiri mimiki awe dakamu dotohoi," emiyoho.
[32] Damu Yesus Égé Éné murid yoho bake u nogoki femu wayamu tafe ayoméri yoho. Emohote, Petrus égé Yesus adibimoho marahani, damu Égé bake hagiyakéri yoho, "Menefé!"
[33] Emohote, Yesus abuméri Éné murid yohoki etori Petrus égé bake agebahaméri yoho, "Ha hohoi yohona ahuhabang Iblis, nokumu musuri nohoi! Gu u yoho nogoki ahu yohona sifingmu fimiri yohona égé kéré, mite fani Ala Éné sifing fimiri emoné moho égé deyoho," emiyoho.
[34] Yesus Petrus bake ememere yori feyahafumoho. Damu Yesus Égé ahu aburoho yoho damu Éné murid ékému bahana yoho bake emiyoho, "Ahu menohosé Nu kotoféri éyongkumaki, égé esemu éné sifingmu hanikéri emoné moho égéki modinéka, damu ememere fimiri uku damu Nuki kotoféna: 'Ahu yoho nuki awe debahae-abufiya kumu pakumenané mahanate, nu awe nuku damu Yesus kotoféri eme,' ememere fimiri Nu kotoféna.
[35] Ahu menohosé uku soho nokumu esumu posu-posukéri bohon niye ukuni sifingmu fimiri bohongkumaki, emohoni égé awe fani Ala kumu kotoféri bohonané embahae posu-posukin deyoho. Emohote, ahu menohosé Nu kotoféyoné damu Nané sisi manggoho yo ahai niye uku énéné fimiri bohoné moho égéki amageiméri bohoné damu tafe hamu awe uri kufiyonané mahana égéki éné modu féri fengféyongkumaki, égé awe Ala kumu kotoféri bohoné embahae posu-posukiné," emiyoho.
[36] Ahu fe ememere emiyoho, "Nu awe kukuwoho emu-hori-daha soho nokumu égena égéki yaré." Ememere yohote, ahu égé fani Ala kumu kotoféri bohoné embahae posu-posukin dekumaki, égé kukuwoho emu-hori-daha yaha égéki karawe égé.
[37] Damu ahu égé fani Ala kumu kotoféri bohon dekumaki, égé awe kukuwoho fe Ala bake kurohonéka, damu Ala kumu kotoféri bohonané embahae posu-posukine?" Karawoho.
[38] Femu fifinané! Ahu soho nokumu bahana yoho fani Ala Éné u dari bahana deyoho, damu dosa kemesuméri bahana. Yoho Ahu Ala bahato ékému dere Nuki awe kotofénané mahana égéki fani fimiri etori bahana deyoho. Emohoni, ahu menohosé ahu yoho bake Nu kumu Nané u égéki yohonané mahana égéki hosumongkumaki, Nute hate ahu énéyuhuwohoki hosume. Embahae Ahu Ala bahato ékému dere Nusé awe Nabo Ala Éné kakani hori esemu hayokéri égé hamemere Nané kibi kubuméri damu soho nokumu dakamu defe. Damu Ala malaikat yohoki kubumu yohoni yohote Nuki tingaumukuni éyonané defe. Ememere Nu defe méré égéki, ahu menohosé Nu kotoféri Nané u dari baha égéki hosumahana yohoki Nute hate hosume," emiyoho.