[1] Damu asu yahamuto mohoka, Yesus Égé tafe dakumu Kapernaum busu ékému ogoho. Damu Égé afahang kumu baha éné u égéki yofiyohona hoho.
[2] Damu ahu aburoho yoho dagenaka, hori afahang aumukungguna. Damu hate afite sama kumu esumu begeyakigi. Damu Yesus Égé Ala Éné u égéki yoho bake yoho.
[3] Damu u éyohoni, ahu sanggere yoho ahu darukigi égé abuge kifang teyo kumu kufuri Yesus bake yeri dahana.
[4] Emohote, ahu esemu aburoho de bahanani, yoho hokumu fani Yesus bake ogahana deyoho. Emoho nemohoni, yoho afike pama égé ékému osuri afahang miru teyo kumu osuguna, damu doge tahaiméri sigina Yesus bahato ékému to fikomu gumahana. Damu ememere ahu darukigi égé yeri éné abuge kumu yuhu gagumu asuguna égéki kotoféri kusumahana ogugu.
[5] Damu Yesus ahu yohona modu etori nafamohoni ahu yoho kirimu fimahanani Yesus Égé habigiyoméri ahu darukigi égéki ahafu aféné. Emohoni, Égé ahu darukigi bake yori emiyoho, "Hai Namuwa, gané dosa kemesumoho égéki mése tobunsuméré," emiyoho.
[6] Damu bafa-guru Musa éné hukum yokukubumahana nahu yahamuto yoho ékému bahana. Yoho Yesus ememere u yoho nogoki dagenaka, damu hakereméri yohona modu kumu ememere fifimahana,
[7] "Makemohore Yesus égé ememere yohoe? Égé Ala gahakumu yori Ala bake keiyongmu yoho. Ahu menohosé habigiyoméri ahu dosa kemesumahana égéki tobunsumohoe? Karawoho, kamu Ala séré," ememere fimahana.
[8] Emohote, Yesus nafamohoni yohona sifingmu ememere fifimahana. Damu yoho bake yori emiyoho, "Makemohore guguna modu kumu ememere fimahanae? Fani ememere fimenan deyoho, meneféyané.
[9] Damu u ukuma de égena: U kamisige égéki gané dosa tobunsuméré, damu u feki dotori gané kifang nerika, damu nohoi. Ememere égena ékému u makerahare ahu darukigi nogo bake yahaekumaki, esumu sahaekige?
[10] Damu Nu ahu darukigi égé bake gané dosa tobunsuméré ememere u sahaekigi égéki yoré. Emohoni, u yoré nogo féri gugu awe ememere nafamenané: Ala Égésé Éné habigiyo Ahu Ala bahato ékému dere Nu bake kuroho. Emohoni, Nute Nané na habigiyo yeri soho nokumu ahu yohona dosa égéki kemesuméré ememere nafamenané," emiyoho. Damu Égé ahu darukigi égé bake yori emiyoho,
[11] "Dotori gané kifang nerika, damu kusumu gané afahang nohoi," emiyoho.
[12] Damu ahu darukigi égé kakumu dotori éné kifang yahaka, damu kakumu ahu bahana yohona sama kumu musuri hoho. Ahu égena énéyuhuwoho hanikéri mokéri Ala Énaukungguna. Yoho yori emiyahana, "Nugu ememere emoho nogoki fani etoriya deyoho," emiyohona.
[13] Damu Yesus Égé tafe dakumu urémisi Galilea haisa ékému maraha. Damu ahu aburoho Égé bake marahana. Damu Égé yohoki yokukubumoho.
[14] Ememere damu Yesus ékému musuri ogori etohoni Alfeus énamu Lewi égé afahang Roma nahu yoho niye aneséyang kemesemahanato ékému baha. Damu égé bake yori emiyoho, "Marari Nu kotoféna!" Emohoni, Lewi, éné fi feki Matius égé méséri Yesus kotoféri hohona.
[15] Hori Yesus Lewi éné afahang osuri ohoru énggé. Ohoru béénggé égéki, ahu aneséyang kemesuméri ahuhabang-kaisar bake kurosumahana yohona gogo yoho dahana. Damu ahu Musa éné hukum fani dagena de dosa kemesumahana yoho hate deri Yesus kumu Éné murid yoho kumu kotoféri ohoru béénggena. Ahu énéyuhuwoho Yesus kotoféyahana, nemohoni dahana.
[16] Damu bafa-guru yahamuto Musa éné hukum yokukubumahana yoho Farisi nahu we. Yoho etohonani Yesus ahu aneséyang kemesuméri ahuhabang-kaisar bake kurosumahana yoho damu ahu dosa kemesumahana yoho kumu kotoféri ohoru béénggena. Damu yoho Éné murid yoho bake ememere abamu yohona, "Makemohore Gugunabo Égé ahu aneséyang kemesesemahana yoho kumu ahu dosa kemahana yoho kumu kotoféri du béénggenae?"
[17] Damu Yesus u yohona égéki dari utuhu haméri yoho, "Ahu haniya yoho fani dokter égé bake hohona deyoho, mite kamu ahu kumangkesemahana yoho remu dokter bake hohona. Hamemere Nu dere nogoki ahu yoku kokokéri damu nu haiyangmu bere ememere yohona yohona fi ai niye dere deyoho. Emohote, Nuku ahu yohona modu dosa wiyahakigina yoho niye dere," ememere utuhu hamoho.
[18] Damu sawa égena égéki ahu baptismusumoho nahu Yohanes éné murid yoho damu Farisi nahu yoho katugo ohoru fani énggena de Ala bake u yosuméri bahana. Damu ahu yahamuto yoho Yesus bake deri abamu yohona, "Ahu baptismusumoho nahu Yohanes éné murid yoho damu Farisi nahu yohona murid yoho ohoru fani énggena de Ala bake u yosuméri bahana. Emohote, makemohore Gané murid yoho fani ememere emahana deyohoe?" ememere abamu yohona.
[19] Damu Yesus aseméri utuhu haméri yoho. U aseméri yoho nogoki Yesus damu Éné murid yohona sisi égéki kubumoho. Yesus yori emiyoho, "Ahu yang yaha éné kubu igina égéki, besing katugo yang yaha égé damu éné matahai yoho kotoféri damu bahana égéki, éné matahai yoho ohoru fani arenan deyohoe? Karawoho, besing katugo yang yaha égé damu éné matahai yoho kotoféri bahana égéki, éné matahai yoho esumu ohoru énggena.
[20] Emohote, énaki sawa fe besing yang yaha égéki, ahu yoho awe keraha afénané. Damu ememere keraha yahana égéki éné matahai yoho ohoru fani arenan deyoho," ememere utuhu hamoho.
[21] Damu Yesus ukusi fe hate aseméri yoho, "Ahu ifita muno mése sesahaméri giyakigi ékému tahano koro harahai fani oho uroho kungguna de égé féri fani kufuri kotoféri tetebumon deyoho. Ifita muno ékému tahano koro harahai fani oho uroho kungguna de égé féri kufuri tetebuméri oho uroho kuni kufiyahanani, sokingkumaki, tahano koro harahai égé esumu abisini ifita muno égé sesahaméri giyakéri kirimu tatani deri ahainé.
[22] Hamemere ukusi fe de égé. Ahu ero-anggur noho harahai ohoru ha féri mutu sigina muno kumu fani akukumenan deyoho. Ememere emenangkumaka, ero-anggur noho harahai égé fafani osugute, mutu muno égéki fani unggigimon deyoho. Emohoni, mutu égé awe taneri ahainéka, damu oho-anggur noho harahai égé akusakumonéka, damu ukuma égena nogoki pemoné otohoiné. Emohote, ero-anggur noho harahai égé ohoru ha féri mutu harahai sigina ékému kokunu!"
[23] Damu Sawa-Sabat feki Yesus kumu Éné murid yoho kumu kotoféri hohoi du-gandum giyong égena ékému bohohona. Bohohona égéki, Yesus Éné murid yoho hohoi du-gandum éné ero gungguna.
[24] Ememere gungguna nogoki Farisi nahu ékému égena yoho etahanaka, damu Yesus bake u yohona, "Maha eta! Makemohore Gané murid yoho ahu gemu bahana éné sawa égéki hukum anggenekigina égéki emahanae? Yoho Sawa-Sabat nogoki fani ememere furubo afénan deyoho."
[25] Damu Yesus utuhu haméri yori emiyoho, "Nebigi yohoniya, nuguna yahae ahuhabang-raja Daud kumu éné matahai yoho kumu areyakiginate ohoru karakiyakena égéki, gugu Ala Éné Buku etori Daud emaki égéki fani nafamahana deyohoe?
[26] Anggo posuyahaki Abyatar égé ahu-imam yohona ahuhabang esumu asuféri baki. Égé baki égéki, ahuhabang-raja Daud égé Ala Éné Afahang tenda féri saka sigina ékému osuri du-rotini fisini yaki. Emohoni, ahu-imam yohona ahuhabang esumu asuféri baha égé Daud bake Ala Éné aguto du-roti égéki kurohoni, énggéka, damu éné matahai yoho bake kurohoni, hate éyangkena. Emohote, Musa éné hukum ékému Ala Éné aguto du-roti égéki kamu ahu-imam yohona na kigi, damu ahu hayang yoho fani arenan deyoho. Emohote, Ala yoho bake poréyahamu emahana ememere fani yoho deyoho," emiyoho.
[27] Yesus tafe yori emiyoho, "Nabo Ala Égésé moguri ahu emohoka, damu mo Sawa-Sabat emaki. Emohoni, Sawa-Sabat égéki ahu yoho niye de égéte, ahu yoho Sawa-Sabat égé niye bahana deyoho.
[28] Emohoni, Ahu Ala bahato ékému dere Nusé Nané na habigiyo de égéni, Sawa-Sabat égéki ukukuwoho makerahare ahu yoho emenané mahana égéki yori inggeme," emiyoho.