[1] Damu Yesus kumu Éné murid yoho kumu kotoféri Yerusalem busu fikoyaha ékému mése botakenamahana. Damu Betfage busu damu Betania busu égéki Soho Haibe Siyaha Debahae-Zaitun égena negemoho ékému ogohona. Ékému ogori Yesus Éné murid ukuma yoho mumangge kusumoné ahanan niye yoho bake u yori emiyoho,
[2] "Gugu, busu samamoho hokumu nohoyané! Damu hori ékému ogori kakumu awe etohonané wi-keledai amuke ahu fani ogusuri yeri hohomusumahana de égéki de éyoné. Emohoni, wi-keledai égéki yuhu abuwonanéka, damu égéki yeri dohoné.
[3] Damu ahu yoho makemohore emahanaye ememere abamu yohonangkumaka, yori ememere nowané, 'Nugunabo Ahuyaha Yesus Égésé ogusuri bohoné yohoré. Damu Égé yohoné ahu fe kakumu yeri deri dakamu nokumu kufiyoné,' " emiyoho.
[4] Damu Yesus Éné murid ukuma yoho hori damu wi-keledai amuke kongkungguna égé égéki afiteto yedi baga ékému gebuugunaka, damu abuwomahana.
[5] Damu ahu yahamuto ékému égena yoho yori emiyahana, "Gugu makemoho niye wi-keledai égéki yuhu abuwomahanae?"
[6] Ememere dagenaka, yoho Yesus Égé u yoho yaki hamu hanéri utuhu hamahana. Damu ahu yohote dagenaka, damu yoho muni égenani, yoho yeri hohona.
[7] Damu yoho wi-keledai amuke égéki yeri Yesus bake hohona. Damu yoho yohona ifita-tahano-mamana-piyaha féri wi-keledai éné mobigi kumu unggunani, Yesus Égé wi-keledai amuke mobigi ékému ogusuri baha.
[8] Damu ahu aburoho tuhuremu yoho yohona ifita-tahano-mamana-piyaha égéki akusuhunggunaka, damu yedi kumu ung hohona. Damu ahu tuhuremu yohote fofu asuméri yedi kumu ung hohona.
[9] Damu ahu moguri hohona énéyuhuwoho damu mo dahana énéyuhuwoho kotoféri u hanggeramu yori emiyohona, "Hosana, Ala Énaukumowa! Ala Égéki kubumu yohoni Ala Éné habigiyo féri Ahuhabang kiri degi maraha. Ala nuguna Ahuhabang Égéki awe wayamu emoné!
[10] Nuguna yahae ahuhabang-raja Daud hafuféri baki hamemere Nuguna Ahuhabang Égésé nuguki hafuféri bohoné bemoho! Ala nuguna Ahuhabang Égéki awe wayamu emoné Hosana, Ala Énaukumowa! Ala Éné busu mene hou esumu siyaha teyo kumu égé ékému Ala Énaukumowa!"
[11] Ememere emohoka, Yesus Yerusalem busu fikoyaha maraha, damu Ala Éné Afahang pama kumu osugu. Damu ékému Égé femu etori awiwimoho. Mite, mése basukigi égéki, Égé Éné murid bibirikuma-ketahafi-ukuma (12) yoho kotoféri Betania busu ékému hohona.
[12] Igiri mimiki Yesus damu Éné murid bibirikuma-ketahafi-ukuma (12) yoho Betania busu ékému musuri hohona. Bohohona égéki, Yesus areyakigi.
[13] Hama kumu Égé debahae-ara fe yong aburoho égena égéki kerohori etoho. Emohoni, Égé de yo féri égé rahamo ememere etohon niye debahae égéto ékému ogoho. Emohote, sawa égéki ero fani yofiyoni diyadaha deyoho. Emohoni, Égé ero fe fani gebuugu deyoho, mite kamu yong remu gebuugu.
[14] Emohoni, Yesus debahae égé bake butumu yoho, "Damu sawa nogoki debahae gu, fani tafe yo fiyon deyoho. Emohoni, ahu fe gané yo tafe fani aren deyoho!" Damu Yesus Éné murid yoho u yoho égéki dagena.
[15] Ememere emohoka, damu Yesus Yerusalem busu fikoyaha ogori Ala Éné Afahang pama kumu osugu. Damu ékému ahu emu-hori-daha ohoru damu kukuwoho Ala bake kurohonané mahana égéki tokunsumahana nahu yohoki uwahafunggu. Damu ahu yohona aneséyang égéki Yahudi nahu yohona aneséyang féri kutumu tokunsumenan niye aneséyang gogokungguna éné abuge-meja égéki abubahamu kunggu. Damu ahu é hayo merpati tokunsuméri égena yohona abuge égéki abubahamu kunggu.
[16] Damu hate Égé mungguni ahu fe fani toto yeri Ala Éné Afahang pama kumu defenan deyoho.
[17] Damu ememere Yesus ahu égena yohoki yokukubumoho. Égé yori emiyoho, "Ala Éné u ememere kara uwangki: " 'Nané Afahang nogoki uku ahu gogoyaha soho hamu bahana yoho Nu bake u yosumenan niye égé.' Emohote, gugu katugo Ala Éné Afahang degemu poréyahamu emahana. Emohoni, Ala Éné Afahang égéki ahu keiyongkéri ahu fe yoho bake yahamu yori yohona toto damu aneséyang kemahana yoho dukumahana yohona afahang gahakumu égé," emiyoho.
[18] Damu ahu-imam yohona ahuhabang yoho damu bafa-guru Musa éné hukum yokukubumahana nahu yoho u égéki dagena. Damu yoho u fe gebuuri Yesus Égéki funané bemahana. Emohote, yohote Yesus berahae afénané mahana égéki mokigina. Ahu aburoho yoho Yesus u yokukubumoho égéki dari hanikéri mokigina. Emohoni, yoho fimahanani Yesus berahae afénangkumaka, ahu aburoho yoho Yesus Éniyoméri yoho bake uma afénané.
[19] Damu basukigini, Yesus damu Éné murid busu fikoyaha égéki munggunaka, damu kusumu hohona.
[20] Igiri mimiki Yesus damu Éné murid Égé kotoféyahana yoho debahae-ara égéki bonahangkuni hohona. Damu yoho debahae égéki etohonani mése wahaekéri hayo baha ékému migi.
[21] Damu Petrus sawa feki u emoho yaki égéki dakamu fifimiri Yesus bake yori emiyoho, "Bafa-Guruwa, maha eta! Debahae-ara Nabo Gu u guni keiyongmu yoho égéki mése wahaekigi."
[22] Damu Yesus utuhu hamoho, "Nabo Ala Énini fimiri bunané!
[23] Nu katugo u yahae méré nogoki narané: Nu u haiyangmu yahae. Gugu Ala habigiyoméri esumu emoné ememere Énini kirimu fimiri gagitomenan dekumaka, gugu soho haibe nogo bake ememere nouwané, 'Soho haibeya! Musuri womusunu hori kiyohouyaha womu kumu ogunu!' Ememere yohonangkumaka, emohoni Ala awe emoné soho haibe égéki ememere kiyohouyaha womu kumu oguwoné.
[24] Emohoni, Nu gugu bake yahae Gugu Ala bake u fisini yohonané damu u yohona égéki haiyangne Ala esumu kurohoné ememere kirimu finané. Emohoni, Ala gugu bake awe kurohoné.
[25] Damu gugu Gugunabo Ala bake u yohonané mahana égéki, ahu fe gugu bake keiyongmu emahana égéki fimiri guguna modu fani hanikin dekumaka, guguna modu womu kumu yohona dosa tobunsunanéka, damu u kutumu yori bero ayoméri feyahafunané. Emohoni, Ala Éné busu mene baha Égésé guguna dosa égéki tobunsumoné." [
[26] Emohote, ahu gugu bake poréyahamu emahana yoho bake u kutumu yori bero ayoméri feyahafumenan dekumaka, Nugunabo Ala Éné busu mene baha Égésé hate gugu ahu fe yoho bake poréyahamu emahana éné dosa égéki fani tobunsumon deyoho.]
[27] Damu Yesus kumu Éné murid yoho kumu kotoféri dakumu Yerusalem busu hohona. Damu Yesus Ala Éné Afahang pama kumu awiwiméri hoho égéki, ahu-imam yohona ahuhabang yoho kumu bafa-guru Musa éné hukum yokukubumahana nahu yoho kumu Yahudi nahu yohona yeyoho matahai yoho kumu ememere Yesus bake marahana.
[28] Damu yoho Yesus bake abamu yohona, "Ahu menohosé Gu bake yohoni Gané na habigiyo yeriye degemu yokukubumohoe? Gute Gané na habigiyo makuma kumu yeriye ukukuwoho hamu emesumohoe?" ememere abamu yohona.
[29] Damu Yesus yoho bake utuhu hamoho, "Nute hate gugu bake abamu yahae, damu gugu Nu bake utuhu haméri nowané. Emohoni, Nu awe gugu bake makuma kumu Nané na habigiyo yeriye ukukuwoho emesuméré nogoki hamu yahae.
[30] Ahu baptismusumoho nahu Yohanes égé éné na yeriye ahu yoho bake baptismusumohoe? Ala yohoni Éné habigiyo yeriye emoho rahamo uku pumise éné sifingmu emoho rahamohoe? U nogoki Nu bake utuhu haméri nowané!"
[31] Ememere dagenaka, yoho u kutumu yori dagena. Damu yoho kutumu emiyahana, "Emohoni, Yohanes égé Ala Éné habigiyo féri emohoré ememere yohowangkumaka, Yesus Égé awe nugu bake u hanggeramu yori emiyohoné, 'Makemohore gugu fani Yohanes énini fimiri bahana deyohoe?' Ememere hanggeramu yohoné.
[32] Emohote, nugu Yohanes ahu yohona sifingmu fimiri éné na habigiyo féri emoho ememere utuhu haméri yohowangkumaka, ahu emu-hori-daha nokumu dukumahana yoho Yohanes égéki uku ahu-nabi fe kéré ememere kirimu fimahanani, nugute fani ememere utuhu haméri yohowan deyoho," emiyohona. Yoho ahu aburoho yohoki mokigina.
[33] Emohoni, yoho ememere fimiri yori inggeméri Yesus bake utuhu hamahana, "Yohanes égé éné na makuma kumu yeriye ahu yoho bake baptismusumoho égéki nugusé fani nafamériya deyoho," emiyahana. Damu Yesus yoho bake yori emiyoho, "Gugu ememere utuhu hamahanani, Nu ahu menohosé yohoni Nané na habigiyo yeriye degemu yokukubuméré damu ukukuwoho emesuméré nogoki gugu bake fani yahae deyoho," emiyoho.