[1] Damu mimi asituhu sawa matahani, Yahudi nahu yohona yeyoho matahai yoho damu ahu-imam yohona ahuhabang yoho damu bafa-guru Musa éné hukum yokukubumahana nahu yoho dukuméri kakumu u kutumu yori inggemahana. Damu yoho Yesus Éné bero yuhu aragenaka, damu yeri hori ahuhabang-gubernur Pilatus égé bake kurohona.
[2] Damu Pilatus dagika, égé Yesus bake abamu yoho, "Haiyangre? Gu Yahudi nahu yohona Ahuhabang kere?" Damu Yesus utuhu hamoho, "Yahae, guku u yoho égé kéré," ememere utuhu hamoho.
[3] Damu ahu-imam yohona ahuhabang yoho u aburoho Yesus Égé poréyahamu emoho égéki ditini kubuméri yohona.
[4] Damu ahuhabang-gubernur Pilatus tafe Yesus bake abamu yoho, "Gu fani tafe utuhu hamon deyohoe? Maha eta! U aburoho mése Guki kiyotini yohona."
[5] Emohote, Yesus fani tafe esumu utuhu hamoho deyoho. Emohoni, ahuhabang-gubernur esumu éhéng ememere yori habang gonggongmoho.
[6] Damu sufébégé hamu Sawa-Paskah kubu geisuméri bahana égéki ahuhabang-gubernur uku mése Yerusalem busu fikoyaha ékému u ememere emesumoho: Yahudi nahu yoho ahu aburoho bui womu kumu bahana ékému ahu kamisige éné fi ainangkumaka, ahuhabang-gubernur égé ahu éné fi dari ahu égéki bui kumu suhungfiyosumoho.
[7] Sawa égena égéki, ahu fe éné fiki Barabas égé bui womu kumu baha. Égé kumu éné matahai yahamuto yoho kumu kotoféri Roma nahu yohona tentara yoho kumu uma keméri taki aragena égéki, Barabas égéki ahu fe uri kufiyoho.
[8] Emohoni, ahu aburoho yoho deri dukuméri ahuhabang-gubernur Pilatus bake fisini yohona. Damu Pilatus égé emesuméri ahu bui kumu bahana feki suhungfiyosumoho.
[9] Ahuhabang-gubernur Pilatus yoho bake abamu yoho, "Gugu hanikiginani nu Yahudi nahu guguna ahuhabang égéki gugu niye suhungfiyeye?"
[10] Ahuhabang-gubernur Pilatus égé nafamohoni ahu-imam yohona ahuhabang yoho Yesus Égéki bubufiyohoni, Yesus Égéki égé bake kurohona.
[11] Emohote, ahu-imam yohona ahuhabang yoho ahu aburoho yoho bake yokuni yohona. Emohoni, ahu yohote ahuhabang-gubernur Pilatus bake fisini yohonani, égéte Barabas égéki suhungfiyoné.
[12] Damu ahuhabang-gubernur Pilatus tafe ahu aburoho yoho bake abamu yoho, "Emohote, Barabas gugu bake kurahaekumaki, Yahudi nahu guguna Ahuhabang kéré ememere iri yohona Égéki gugu fimahanani nute makemere emeye?"
[13] Ahu ékému égena yoho u hanggerakéri yohona, "Debahae-abufiya ékému pakuméri funané," emiyohona.
[14] Damu ahuhabang-gubernur Pilatus yoho bake yoho, "Emohote, Égé u makenahare keiyongmu emakire?" Ememere yohote, yoho tafe esumu hagiyakéri yohona, "Debahae-abufiya kumu pakuméri funané," emiyohona.
[15] Damu ahuhabang-gubernur Pilatus égé yohona modu afén niye Barabas éné fi iri suhungfiyahanani, musugu. Damu égé yohoni yoho Yesus Égéki yangge féri ufiyohona. Damu ahuhabang-gubernur Pilatus égé Yesus debahae-abufiya ékému uri kufiyonan niye yoho bake kuroho.
[16] Ememere damu ahuhabang-gubernur Pilatus éné tentara yoho Yesus yeri hori ahuhabang-gubernur éné afahang fikoyaha ékému womu fe tentara yoho bahanato ékému yeri osuguna. Damu yoho yohonani, ahu-tentara emu-hori-daha yoho deri dukumahana. Damu yoho Yesus Égéki tingaumu kuni égena.
[17] Damu yoho Yesus bake ifita-tahano-mamana-piyaha kanggo féri kungguna. Damu yuhu yomohong baha féri habangsabo siginaka, damu ahuhabang-raja éné habangsabo kunggu gahakumu Yesus Éné habang kumu kungguna.
[18] Damu yoho hanikéri Yesus bake gogohomenan niye yori emiyohona, "Hai, Yahudi nahu yohona ahuhabang!"
[19] Damu yoho Yesus Éné habang yangge bago féri ufiyahana. Damu Égéki mise si ugunaka, damu yoho yahamu Énaukumenan niye bukumu tini uhung hohona.
[20] Ememere Yesus Égéki gogohomahanaka, damu yoho ifita-tahano-mamana-piyaha kanggo nogo akusuhunggunaka, damu Ukuné ifita dakumu kungguna. Damu Égé debahae-abufiya ékému funan niye yeri pama kumu osuri yeri hohona.
[21] Damu ahuhabang-gubernur éné tentara yoho Yesus yeri bohohona égéki, ahu besing fe éné fi Simon, Kirene busu fikoyaha nahu égéki ékému maraha. Simon égé Aleksander damu Rufus yohonabo kéré. Égé ékému marari bonahangkunggu égéki, tentara yoho Simon égéki debahae-abufiya kengkuni yeri ahain niye tinibiyakuni yohona, "Gu, debahae-abufiya nogoki kengkunu," emiyohona.
[22] Damu yoho Yesus Égéki yeri soho fe éné fiki Golgota ékému ogahana. Golgota soho nogoki éné kusi ahu miyangge bégé gahakumu égéni, ahu yohona sifingmu fimiri ememere iri yohona, "Ahu miyangge bégé soho kéré."
[23] Ogori ékému yoho ero-anggur noho damu yahang éné fi mur kotoféri sesebumahanaka, damu Yesus bake kurohona. Oho nogoki amingkumaki, hekigi. Emohoni, Yesus Égé fani migi deyoho.
[24] Damu yoho Égé debahae-abufiya ékému pakuméri feyahafunggunaka, damu yoho Éné ifita égéki afénané mahanani, yoho iyobégé unaware ékému "Yesus Éné ifita aféné" ememere kara uni kokunggunaka, dakamu keméri etohonané. Ahu menohosé ka égéki aféngkumaki, égésé Yesus Éné ifita aféné. Yoho ememere eméri Éné ifita égéki afu yahana.
[25] Damu sawa materi kokumu bahaki, sawakiyo birikuma-berahafi-sanggere (9) égéki yoho Égé debahae-abufiya ékému pakuméri kufiyahana.
[26] Damu debahae-abufiya siyaha kumu yoho kara guma asuguna. Makemohore Égé awe funané mahana éné kara ememere ungguna: "Yahudi nahu yohona Ahuhabang."
[27] Yesus debahae-abufiya pakuméri kufiyahana égé ékému ahu keiyong ukuma yoho hate kotoféri debahae-abufiya ékému pakumahanani, égena. Ahu fe égé Yesus Éné auwa mene kumu égé, damu ahu fe auwa wa kumu égé. Ahu keiyong yohoki ahu yohona toto afénan niye ditini yori yohona tahae féri eméri kemesuméri bahana yoho kéré. [
[28] Yesus Uku ememere égé nogoki Ala Éné Buku kumu mése kara ememere uwangkena: Yoho fimiri emiyahana, "Uku ahu keiyong kéré," emiyahana.]
[29] Damu ahu ékému ogori nahangkuni hohona yoho habang gugubeméri Yesus bake dirimeféri yohona, "Ha, Gu Ala Éné Afahang umbuwomonéka, dakumu asu ukumasiyo siremoné.
[30] Maha debahae-abufiya ékému nemi! Damu Guku Gané aduwosoho égéki umburonu," emiyohona.
[31] Ememere ahu-imam yohona ahuhabang yoho kumu bafa-guru Musa éné hukum yokukubumahana nahu yoho kumu kotoféri Yesus Égéki inanggena, "Égé ahu fe yoho umburomusumohote, Uku Égéki fani umburomoho deyoho!
[32] Israel nahu nuguna Ahuhabang, Kristus, Guku debahae-abufiya ékému nemi! Emohoni, nugu etohowanéka, Gusé nuguna Ahuhabang kéré ememere kirimu fimiri bohowané," emiyohona. Damu hate ahu keiyong Yesus Égé kotoféri debahae-abufiya kumu pakuméri kufiyahana yoho hate Yesus Égé bake u keiyongmu yohona.
[33] Damu sawa égéki Yesus debahae-abufiya ékému pakuméri kufiyahana. Sawa égéki sawa mingkimohoni (12), soho ita égena ékému damu asukigi yakiya sawakiyo dohori ukumasiyomu kubuméri baha.
[34] Damu sawakiyo ememere égé égéki Yesus u hanggeramu emiyoho, "Eli, Eli, lama sabakhtani?" U feki ememere égé: "Nabo Ala, Nabo Ala, Gute makemohore Nu etori mungge?"
[35] Emiyohoni, ahu yahamuto ékému égena yoho yori emiyahana, "Narané! Égé ahu-nabi Elia éné fi igi," emiyahana.
[36] Damu ahu égena ékému ahu fe kakumu hori kukuwoho-sepon égéki yeri ero-anggur noho maga toungkigi ékému kusumahana oguguni, yeri debahae piyaha yuhu aragenaka, kusumahana osuri Yesus Éné boto kumu afungguna. Damu yoho yori emiyahana, "Damu kidaéyowa! Nuguna yahae nabi Eliaki awe deri Égé debahae-abufiya ékému aroméri kufiyon kiyoho."
[37] Damu Yesus Égé u hanggeramu yori sifing akimamaga égéki fiyohoni, musuguna, damu kunggu.
[38] Damu Yesus kunggu égéki, Yerusalem busu fikoyaha kumu Ala Éné Afahang womu kumu tahano piyaha égé égéki Ala emohoni, si hosumu taneri fu kumu migi: Afi uku degemu égéte, afi uku degemu égé.
[39] Damu Roma nahu yohona tentara fe méké asuféri beri éné tentara 100 hafuféri baha égé Yesus kunggu égéki etohoka, damu yori emiyoho, "Ahu nogoki esumu Ala Énamu kéré," emiyoho.
[40] Égena ékému yang yahamuto yoho deri hamuyaha kumu éri keroho etori égena. Yoho égena ékému Magdala busu si Maria kumu Yakobus ofo hayang égé damu Yoses yohonéni Maria kumu Salome kumu ememere de égena.
[41] Yang énéyuhuwoho Yesus Égé Galilea soho kumu baki égéki gobuméri Yesus damu Éné murid yohoki mahamu emesumakena kéré. Damu yang aburoho tuhuremu yoho hate Yesus kotoféri soho ékému musuri Yerusalem busu fikoyaha ékému ogohona.
[42] Damu Yesus mése kunggu yaki sawa mése asukiné bemoho. Sawa nogoki Yahudi nahu yoho igirini gemu bohonané mahana éné sawa égé kéré. U feki Sawa-Sabat igiri éyoné moho.
[43] Emohoni, Arimatea busu nahu Yusuf égé ahuhabang-gubernur Pilatus gebufun niye daha. Yusuf égé uku ahu asuféri Yahudi nahu gogo hamu deregemu égena yoho dukuméri u kutumu yori inggemusumahana nahu fe kéré, damu ahu yoho égéki yauri bahana. Damu Ala kusumoné Ahuhabang deri Énahu hafuféri etori bohoné moho égéki égésé kidabaha. Damu égé habigiyoméri ahuhabang-gubernur Pilatus bake hori samaméri yori emiyoho, "Nabo ahuhabang-gubernur, Yesus Éné wosoho kuro," emiyoho.
[44] Damu ahuhabang-gubernur Pilatus Yesus mése kunggu égéki dagika, damu gagitomoho. Emohoni, égé yohoni Roma nahu yohona tentara 100 hafuféri baha égé daha. Égé dahani, damu abamu yoho, "Hai, Yesus mése kunggu yakiye?" Abamu yohoni utuhu hamoho, "Yahae, Égé mése kunggu."
[45] Ememere u yoho égéki dagika, damu ahuhabang-gubernur Pilatus égé Yusuf bake emiyoho, "Guku fake Yesus Éné wosoho neri."
[46] Damu Yusuf tahano esumu manggoho égéki tokungguka, damu Yesus Éné wosoho debahae-abufiya ékému arumu yeri migika, damu tahano égé féri fuhunggu. Damu Yesus Éné wosoho égéki yeri iyobégé siyaha éné to guméri égé ékému kufiyoho. Damu égé iyobégé fikoyaha yakebimoho otori to égéki ketanggi.
[47] Ememere Magdala busu si Maria damu Yoses énéni Maria yoho Yesus Éné wosoho kufiyahana Éné béng égéki etori nafamahana.