[1] Damu Yesus damu Éné murid yoho urémisi Galilea afi Gerasa soho kumu ogahana.
[2] Damu Yesus yufung kumu monu migi égéki, ahu besing kamisige hohoi keiyong osugu bahani, ahu soho kukumahana yohona béng égenato ékému kakumu monu musuri Yesus bake maraha.
[3] Damu ahu égé ahu yohona béng égenato ékému bamoho. Damu ahu yoho fani égéki habigiyoméri yuhu aragena deyoho, damu hate yuhu-rantai féri fani habigiyoméri aragena deyoho.
[4] Damu ahu yoho mése éné bégé éné bero yuhu-rantai féri arasumahana. Emohote, yuhu-rantai bero aragena égéki agiyomusumoho, damu yuhu-besi bégé aragena égéki ahafusumoho. Égé esumu habigiyomohoni, ahu yoho égé esemu fani yeri égena deyoho.
[5] Asu-sawa uku ahu soho kukumahana yohona béng égenato kumu soho siyaha kumu beri yahahanéri awiwiméri iyobégé féri haha gigisakumohoni, peso bahana.
[6] Damu égé hamamu éri Yesuski etohoka, damu boniri deri Éné sama kumu Yesus Égé asuféri baha ememere kubumon niye bukumu tini uhung hoho.
[7] Damu Yesus ahu égé bake yori emiyoho, "Ha hohoi keiyong, gu ahu nokumu musuri dogu nohoi." Ememere yohoni ahu égé u esemu hanggeramu yoho, "Yesusa, Gusé Ala esumu asuféri baha Énamu kéré. Gu kumu nu kumu makemere égére? Nu kumu Gu kumu fani kotoféri arari ériya deyoho. Nu Gu bake fisini yahae, Gu katugo nogoki nu bake fani poréyahamu emon deyoho ememere u yahanu," emiyoho.
[9] Damu Yesus égé bake abamu yoho, "Gané fi makerahare?" Hohoi ahu afuri baha égé utuhu hamoho, "Nugu, hohoi aburoho ememere ahu égé afuri beriya, nemohoni nuguna fiki Legion," emiyoho.
[10] Damu égé bubutumu yoho, "Nabo Yesusa, Gusé nugu fani soho nokumu uwahafumon deyoho," emiyoho.
[11] Damu soho haibe siyaha negemoho ékému wi aburoho éné gogo hatangni fofoméri béénggena.
[12] Damu hohoi yoho Yesus bake fisini yori emiyohona, "Nouni nugu wi koku womu kumu oguri bohowané."
[13] Emiyahanani, Yesus dari emiyoho, "Yahae, fake notuwané." Emiyohoni, hohoi yoho ahu afuri bahana ékému musuri wi koku womu kumu oguguna. Ogugunani, wi moku éné gogo yoho bibitakéri haibe kumu ukuri urémisi kumu oguri oho kumukuri hosanggigina. Wi emu-hori-daha wogoki yoku de 2.000mu égena.
[14] Damu wi etori bahana nahu yoho bibitakéri busu fikoyaha kumu soho ita égena ékému hohona. Hori damu katugo wi éné gogo mése bibitakéri haibe kumu ukuri urémisi kumu oguri oho kumukuri hosanggigina égéki yo hohona. Ememere dagenaka, ahu yohote u makemere égé égéki etohonan niye dahana.
[15] Damu yoho Yesus bake dahanaka, damu ahu hohoi aburoho yoho osusumahanani baha égé mése ifita kungguka, damu katugo éné sifing damu manggohomu fimiri baha égéki etahana. Emohoni, yoho esemu mokigina.
[16] Damu ahu mumangge yohona kiyomu etori yakena yoho ahu hohoi osuri baha égé makemereye dakamu sifing wayamu baha éné sisi damu wi yohona sisi égéki yohona. Emohoni, ahu katugo dahana yoho dagena.
[17] Damu ahu soho bahana énéyuhuwoho Yesus bake ditini yohona, "Nabo, Gu soho nokumu musuri nohoi," emiyohona.
[18] Damu Yesus yufung womu kumu oguguni, ahu hohoi afuri baha yaki égé Yesus bake fisini yoho, "Nu kotoféri ahaya!"
[19] Emohote, Yesus fani "yahae" emiyoho deyoho. Damu yori emiyoho, "Kusumu gané afahang hori ganahu yoho bake Nugunabo Ala guki woruméri makemere emoho yaki éné sisi nogoki nou," emiyoho.
[20] Emohoni, ahu égé dakamu hori damu Dekapolis soho ékému sisi yobuwoméri yoho. Damu Yesus Égéte ahu égé bake makemereye emoho nogoki yohoni ahu emu-hori-daha yohote dari hanikéri habang gonggongmahana.
[21] Damu Yesus yufung oguri dakumu urémisi afi kumu onugu égéki, ahu aburoho urémisi haisa ékému deri dukuméri Égéki aumukungguna.
[22] Damu ahu besing fe, éné fiki Yairus égé daha. Égé uku busu ékému Yahudi nahu yohona sunafahang ékému ahuhabang kiri hafuféri bahana yohona ahuhabang fe kéré. Égé Yesus Égéki etohoki, égé Yesus Égé asuféri baha ememere kubumon niye Éné sama kumu bukumu tini uhung hoho.
[23] Damu fisini yoho, "Nabo, nosubang katugo kumangkéri wowiyokéri akumoné bemoho. Deri damu Gané bero égéki éné haha teyo kumu kufuna. Emohoni, égé fani akumon deyoho, damu bohoné," emiyoho.
[24] Damu Yesus Égé Yairus égé kumu kotoféri hohona. Ahu aburoho yoho kotoféri hohonaka, damu Yesus Égéki aumukuni kutumu apepeméri hohona.
[25] Ememere hohona ékému yang fe égé. Yang égé mése sufébégé bibirikumu-ketahafi-ukumamu (12) éné kukuwoho gong migamsumohoni, kumangkeseméri wowiyokéri bamoho.
[26] Égé wiyahakigini, dokter yoho bake hoho-daha mohote, fani gogeriméri haniyakigi deyoho. Ememere eméri éné aneséyang esemu karakigi. Mite, égé kumangkigi égéki esemu tafe bowowiyokigi.
[27] Damu yang égé Yesus Éné sisi aburohomu dagi. Emohoni, égé ahu aumukungguna ékému deri Yesus Éné mo kumu marari takenaméri Yesus Éné ifita-mamana piyaha mageme ékému gohomoho.
[28] Damu égé ememere fimoho, "Nu Éné ifita-tahano-mamana-piyaha gohomekumaki, awe gogeriméri haniyakiné," ememere fimoho.
[29] Damu yang égé Yesus Éné ifita-tahano-mamana-piyaha gohomohoni, égé gong migi égéki karakigi. Damu éné haha aduwosoho age mése gogeriméri haniyakigi ememere fimoho.
[30] Damu ememere égé égéki, Yesus nafamohoni Égé habigiyo Éné modu kumu musuri dohoho. Damu Égé abuméri ahu aburoho yoho bake abamu yoho, "Ahu menohosé Nané ifita-tahano-mamana-piyaha gohomohoe?"
[31] Damu Éné murid Égé kotoféyahana yoho utuhu haméri yohona, "Maha Guku eta! Ahu nogo yoho aumukuni Gu bake égena. Damu ahu menohosé Gané tahano gohomohoe ememere abamu yoho nogoki fani femu nafamériya deyoho."
[32] Emohote, Yesus etori awiwiméri efefeméri ememere fimoho, "Ahu menohosé Nané ifita gohomohoe?"
[33] Damu yang égé mése ememere éné gong migi karakigi égéki nafamohoni, mokéri koru teiméri Yesus Éné sama kumu bukumu tini uhung hori égé mése emoho égéki Yesus bake haiyangmu yoho.
[34] Damu Yesus yang égé bake emiyoho, "Nosubangwa, Nu awe habigiyoméri esemu guki ahafu afe ememere kirimu fimoho, nemohoni guki ahafu yaré. Damu fake nohoi! Ala awe guki etori bohoné, gané modu awe gemu wayamu bohoné, damu gu esumu gogeriméri haniyakina!"
[35] Yesus damu yang égé bake éyoho égéki, ahu yahamuto ahuhabang Yahudi nahu yohona sunafahang ékému hafuféri etori baha Yairus éné afahang ékému furubo yahana nahu yoho deri Yairus égé bake emiyohona, "Gosubang mése kunggu, damu Bafa-Guru bake tinibiyakuni gané afahang fani ahain deyoho," emiyohona.
[36] Emohote, Yesus Égé yoho u yahana égéki dagite, Yairus bake yoho, "Fani mokin de, menefé! Damu Nu awe gosubang bake mahamu eme, emohoni gosubang awe gogeriméri haniyakiné ememere kirimu finu," emiyoho.
[37] Damu Yesus bohoho égéki, Égé yori emiyoho, "Ahu fe fani Nu kotoféyon deyoho. Kamu uku Petrus kumu Yakobus kumu Yakobus énukuda Yohanes kumu ememere kotoféyonané," emiyoho.
[38] Damu yoho hori Yairus éné afahang ogohona. Damu Yesus etohoni, ahu yoho esumu hanggeramu efe uguna, damu esumu budiyahangféri bahana.
[39] Ememere etohoka, damu afahang womu kumu osuri yoho bake emiyoho, "Makemohore kumukukuméri damu efe iugunae? Ofo égé fani kirimuyaha kunggu deyoho. Mite, égé kunuwe igi."
[40] Emohote, yoho Yesus Égéki gogohoméri abegegena. Emohoni, Yesus Égé yohoni ahu yoho kusumu pama kumu osuguna. Damu Égé ofo énéni énabo kumu Éné murid ukumasiyo yeri afahang womu ofo éné wosoho kufiyahana ékému osuguna.
[41] Damu Yesus Égé ofo éné bero tuhumu yeri damu yori emiyoho, "Talita kum." U feki "Nosubangwa, Nu gu bake yahae doto nohoi!"
[42] Damu ofo amgebu égé bagumu dotori damu hoho. Éné sufébégé bibirikuma-ketahafi-ukuma (12) moho. Ahu aburoho etori égena yoho esumu mokéri hanikéri hakurumahana.
[43] Damu Yesus hanggeramu yori emiyoho, "Gugu usisi nogoki fani ahu fe emu-hori-daha yoho bake yohonan deyoho, meneféyané," emiyoho. Damu tafe emiyoho, "Ofo égé bake ohoru kurohoné arené," emiyoho.