[1] Damu Sawa-Sabat feki Yesus tafe dakumu deri Yahudi nahu yohona sunafahang ékému osugu. Ékému ahu fe bero afi darukigi égé de baha.
[2] Damu Farisi nahu yahamuto yoho ékému éri Yesus u fe emoné etori ditini yohonan niye égena. Sawa-Sabat égéki Yesus ahu ahafu aféngkumaki, Égé sawa gemu bahana égéki furubo yaha ememere ditini yohonan niye bemahana.
[3] Damu Yesus ahu éné bero afi darukigi égé bake yoho, "Marari ahu emu-hori-daha yohona sama nokumu méséri ena!"
[4] Emiyohoki, damu yoho bake abamu yoho, "Ala Éné hukum Musa bake kuraki égéki yohoni Sawa-Sabat égéki nugu fani poréyahamu eman deyoho, mite damu esumu wayamu emowané. Damu sawa égéki fani ahu fuwan deyoho, mite ahu yohoki mahamu eméri umburomowané. Nugu ememere esumu emériya égéki de haiyangmu égére?" Ememere abamu yohote, yoho weikéri égena.
[5] Damu Yesus hakereméri yohoki awiwiméri etoho. Damu yohona modu esumu botokiginani, Éné modu budiyahangféri égé. Emohoni, Égé ahu éné bero afi darukigi égé bake emiyoho, "Gané bero kusunu ahainé!" Damu ahu égé dari bero amiféri kusumoho hohoni, bero gogeriméri haniyakigi.
[6] Ememere etohonaka, Farisi nahu yoho Yahudi nahu yohona sunafahang ékému musuri hori kakumu ahuhabang-raja Herodes Antipas égéki kotoféyahana nahu yoho gebuuri Yesus Égéki funan niye Énahaisiri fimahana.
[7] Damu Yesus kumu Éné murid Égé kotoféyahana yoho yoku pumise bohonané bemahanani, hori urémisi Galilea kumu ogori ogahana. Emohote, ahu aburoho Égé bake marahana. Yoho Galilea soho damu Yudea soho ékému marahana.
[8] Damu yoho Yerusalem busu fikoyaha, Idumea soho, damu soho afi sawa musuguto uré Yordan ékému marahana. Damu hate busu-busu Tirus soho kumu Sidon soho kumu égena ékému marahana. Damu Yesus Égé mése ukukuwoho-mujizat emesumoho égéki yohonani dagenaka, damu marahana.
[9] Damu Égé ahu aburoho kumangkesemahana yohoki mése ahafu kemoho yaki, nemohoni ahu esumu aburoho yoho aumukuni sisahaménané bemahana. Damu ahu aburoho kumang hamu homuuguna yoho hagigisakuméri hanikéri Éné haha gohomenané bemahana. Ememere etohoni, Yesus Éné murid yoho bake emiyoho, "Nané niye yufung fengfénané! Ékému oguri beri awe usisi yokukubume," emiyoho.
[11] Damu hohoi keiyong ahu yoho osuri afuri bahana yoho Yesuski etahana égéki, yoho Éné sama kumu bukumu tini uhung hohona. Damu hanggerakéri yori emiyohona, "Guki Ala Énamu kéré!"
[12] Emohote, yoho bake u hanggeramu yori emiyoho, "Gugu ahu kumangkesemahana yohoki ahafu keméré nogoki fani ahu fe yoho bake Nané sisi yohonan deyoho," ememere yoho.
[13] Damu Yesus soho haibe siyaha fe ékému ogusugu. Damu Égé ahu hanikigi yohona fi iri kubumu yohoni ahu énéyuhuwoho Égé bake dahana.
[14] Damu ahu bibirikuma-ketahafi-ukuma (12) yohona fi igika, damu yoho ahu-rasul kinan niye ememere emiyoho, "Ahu nonéyuhuwohoki Yesus Nusé kukubumeni yohote Nané u yo ahanané.
[15] Damu gugu bake awe habigiyo kurahae, emohoni gugute hohoi yohoki uwahafumenané"
[16] Ahu bibirikuma-ketahafi-ukuma (12) yohona fi ememere égena: Simon, Yesus Simon éné fi feki Petrus ememere yoho.
[17] Yakobus kumu énukuda Yohanes, yoho Zebedeus énsiyo kéré. Yesus Égé yohona fi feki Boanerges ememere iri yoho. U feki "Hou bukumoho gahakumu égena."
[18] Andreas, Filipus, Bartolomeus, Matius, Tomas, Alfeus énamu Yakobus, Tadeus, Simon. Simon uku Zelot nahu fe kéré.
[19] Damu Kariot busu nahu Yudas, embahae égésé Yesus awe sésémoné.
[20] Damu Yesus dakumu afahang hoho. Emohote, ahu aburoho dakamu dukumahana. Emohoni, Yesus damu Éné murid Égé kotoféyahana yoho fani ohoru énggena deyoho.
[21] Ememere baha égéki, Éntegiyo yoho ememere u yohona égéki dagena, "Yesus Égé homene osuri baha." Ememere dagenaka, yoho Yesus bake ditini yori yeri ahanan niye dahana.
[22] Damu bafa-guru Musa éné hukum yokukubumahana yahamuto yoho Yerusalem busu fikoyaha ékému deri emiyohona, "Hohoi yohona ahuhabang Iblis, éné fi feki Beelzebul Yesus Égéki osuri baha." Damu hate emiyohona, "Hohoi yohona ahuhabang Iblis Yesus bake habigiyo kurohoni, Égéte yeri hohoi yohoki uwahafunggu," emiyohona.
[23] Emohoni, Yesus Égé yohoni ahu aburoho yoho deri dukumahana. Damu Yesus yoho bake usisi yahamuto aseméri yoho, "Hohoi yohona ahuhabang Iblis égé hohoi tutuhu yohoki uwahafumohoe? Karawoho, Iblis fani hohoi yohoki fani uwahafumon deyoho.
[24] Ahuhabang soho fikoyaha hafuféri etori baha. Damu ahuhabang égé kumu ahu soho ékému bahana yoho kumu ememere ahahaméri dukuméri kutumu homufunangkumaka, soho ékému ahu karakiné.
[25] Damu hate ahu fe uku énahamo kumu énamkesiyo kumu ememere kutumu uma afénangkumaka, yoho awe yeyemokinané, damu ahu fe karakiné.
[26] Hamemere hohoi yohona ahuhabang Iblis damu éné hohoi mumuro yoho kutumu dengkéri ansakuméri ahahaméri bohonangkumaka, yohona gogo fe awe karakiné.
[27] Emohote, Nu usisi fe aseméri yahae: Afahang nesi fe éné habigiyo botokéri baha. Ahu fe égé afahang nesi éné habigiyo botokéri baha éné afahang osuri éné toto aféné fimongkumaki, moguri afahang nesi éné habigiyo botokéri baha égéki esumu ifimoné. Ahu fe égé afahang nesi fani ifimon dekumaki, fani atun deyoho. Ememere afahang nesi ifimonéka, damu osuri éné toto kemoné.
[28] Damu Nu gugu bake haiyangmu yahae: Ahu dosa éné kibi hoso-hoso kemesumahana égéki damu Ala bake u keiyongmu yohona égéki Nabo Alasé awe tobunsumoné.
[29] Emohote, ahu fe Ala Éné Ubana Hayo emesumoho égéki etori ansakuméri keiyongmu yohongkumaki, Ala fani dosa égéki tobunsumon deyoho. Ahu égé dosa yaha égéki damu de éyoné embahae posu-posukiné," ememere yoho.
[30] Yesus u yoho égéki ememere égé: Ahu yoho Yesus bake emiyohona, "Hohoi keiyong Yesus osuri hafuféri baha." Ememere yori Ala Éné Ubana Hayo Yesus Égéki mahamu emohoni emesumoho égéki ansakuméri yohonani, Égé moguri ememere u yoho kéré.
[31] Damu Yesus Énéni kumu Énukuda besinggiyoho kumu ememere ogahana. Yoho ogori pama kumu kidabahana. Damu yoho yohonani, ahu fe osuri Yesus bake yoho.
[32] Ahu aburoho yoho Yesus Égéki aumukuni bahana, damu Égé bake yoho, "Nabo-Guruwa, Géni kumu Gukuda besinggiyoho kumu ememere Gu kumu u kutumu yohonan niye pama kumu hosiyonaki," emiyoho.
[33] Damu Yesus ahu yoho bake utuhu hamoho, "Ahu menohosé kirimu wadi damu nokuda besinggiyoho kere?"
[34] Damu ahu bahana égéki sama kusumoho hoho ememere efefeméri awiwimohoki, damu emiyoho, "Bahana nogoki wadi kumu nokuda besinggiyoho kéré.
[35] Ahu menohosé Nabo Ala Éné sifing fimiri emoné moho égéki emongkumaki, ahu égésé wadi damu nukuda besing damu nokuda yang kéré," emiyoho.