[1] Damu Yesus damu Éné murid yoho yufung oguri urémisi tinggeméri onderi uku Kapernaum busu kageto baha ékému dakumu ogahana.
[2] Damu ahu yahamuto yohote ahu darukigi égé abuge kifang teyo kumu kufuri Yesus bake yeri dahana. Damu Yesus ahu yohona modu etori nafamohoni ahu yoho Énini kirimu fimiri bahana: Yoho fimahanani Égé habigiyoméri ahu darukigi égéki ahafu aféné. Emohoni, Égé ahu darukigi bake yori emiyoho, "Hai Namuwa, gané modu habigiyonu! Gané dosa kemesumoho égéki mése tobunsuméré," ememere yoho.
[3] Bafa-Guru Musa éné hukum yokukubumahana nahu yahamuto ékému bahana. Yoho Yesus ememere u yoho nogoki dagenaka, damu hakereméri yohona modu kumu ememere fimahana, "Kamu Alasé ahu yohona dosa kemesumoho kéré. Ahu nogo Ala gahakumu yori Ala bake u keiyongmu yoho."
[4] Emohote, yoho yohona sifing fimahana égéki Yesus mése nafamohoka, damu yoho bake yori emiyoho, "Makemohore gugu mése guguna modu kumu Nané uki degemu keiyongkéri sifing fimiri bahanae? Fani ememere fimenan deyoho, meneféyané.
[5] Damu ahu éné dosa tobunsumoho nogoki Nuku Nané na we. U ukuma de égena: U kamisige égéki 'Gané dosa tobunsuméré' damu u feki 'Dotori gané kifang nerika, damu nohoi' ememere égena. Ememere égena ékému u makerahare yahaekumaka, esumu sahaekige? Gané dosa tobunsuméré ememere yahaekumaka, u nogoki sahaekigi.
[6] Emohote, ahu darukigi égé bake gané dosa tobunsuméré ememere yoré. Emohoni, u yoré nogo féri gugu awe ememere nafamenané: Ala Égésé Éné habigiyo Ahu Ala bahato ékému dere. Nu bake kurohoni, Nute Nané na habigiyo yeri soho nokumu ahu yohona dosa égéki kemesuméré ememere nafamenané." Ememere yohoka, Égé ahu darukigi égé bake yori emiyoho, "Dotori gané kifang nerika, damu gané afahang nohoi," emiyoho.
[7] Emohoni, ahu darukigi égé dotori damu kusumu éné afahang hoho.
[8] Ahu égena yoho u ememere égé nogoki etohonaka, mokéri Nabo Ala Énaukungguna. Yoho yori emiyahana, "Nugunabo Ala mése Éné habigiyo fikoyaha égéki ahu yoho bake kuroho," ememere yori Ala Énaukungguna.
[9] Yesus ahu darukigi égé ahafu yahaka, damu soho égé égéki kufiyohoki, damu ékému musuri yahamu hoho. Hori etohoni afahang Roma nahu yoho niye aneséyang kemesemahanato ékému Matius nu de ékému bere. Yesus nu bake u yori emiyoho, "Marari Nu kotoféna," emiyoho. Emiyohoni daréka, damu Yesus kotoféri horiya.
[10] Kotoféri horiyaka, damu Yesus nané afahang osuri ohoru énggé. Ohoru béénggé égéki ahu aneséyang kemesuméri ahuhabang-kaisar bake kurosumahana yohona gogo yoho dahana, damu ahu Musa éné hukum fani dagena de dosa kemesumahana yoho hate deri Yesus kumu Éné murid kumu ohoru bééniya.
[11] Nugu ememere ohoru bééniya égéki Farisi nahu yoho etahanaka, nugu bake emiyohona, "Gugunabo Guruki ahu aneséyang kemesuméri ahuhabang-kaisar bake kurosuméri poréyahamu bahana yoho kumu ahu Musa éné hukum fani dagena de dosa kemesumahana yoho kumu kotoféri ohoru béénggena égéki manggohokige? Karawoho," emiyohona.
[12] Damu Yesus utuhu haméri yoho, "Ahu haniya yoho fani dokter égé bake hohona deyoho, mite kamu ahu kumangkesemahana yoho remu dokter bake hohona.
[13] Emohoni, gugu hori wayamu ayoméri nafamenan niye u nogoki Ala Éné Buku kumu Ala ahu-nabi fe bake u yaki égéki etori nafanané: " 'Nu esemu hanikéri fimiri égéki fani kamu Nu bake ohoru uri aguto duri kurohonané mahana égé deyoho, mite gugu ahu fe yoho kuyoméri worumenané mahana égé kéré.' Nu dere nogoki ahu yoku kokokéri nu haiyangmu bere ememere yohona yohona fi ai niye dere deyoho. Emohote, Nuku ahu dosa kemesumahana yohona fi aika, damu yohote yohona dosa kemesumahana égéki ukuni modinanéka, damu Ala Éné u dari bohonan niye dere," emiyoho.
[14] Damu sawa fe égéki oho féri ahu baptismusumoho nahu Yohanes éné murid yoho Yesus bake dahana. Damu Égé bake u abamu yori emiyahana, "Nugu kumu Farisi nahu éné matahai yoho kumu ememere Ala bake u yohowané mériya égéki, ohoru fani éniya de Ala bake u yosuméri bohowané arohoriya ohoru areyané mériya éné sawa hamu hanigi égéki ohoru éniya. Emohote, makemohore Gané murid yoho fani ememere emahana deyohoe?"
[15] Ememere abamu yohonani, Yesus dari aseméri utuhu haméri yoho. U aseméri yoho nogoki Yesus damu Éné murid yohona sisi égéki kubumoho. Yesus yori emiyoho, "Ahu yang yaha éné kubu igina égéki, besing katugo yang yaha éné matahai yohosé besing katugo yang yaha égé kumu kotoféri damu bahana égéki fani ohoru arenan deyohoe? Karawoho, besing katugo yang yaha éné matahai yohosé hanikéri arenané. Emohote, énaki sawa feki besing yang yaha égéki ahu yoho awe keraha afénané. Damu ememere keraha yahana égéki besing yang yaha éné matahai yoho ohoru fani arenan deyoho," emiyoho.
[16] Damu Yesus damu ukusi fe hate aseméri yoho, "Ahu ifita muno mése sesahaméri giyakigi ékému tahano koro harahai fani oho uroho kungguna de égé féri fani kufuri kotoféri tetebumon deyoho. Ifita muno ékému tahano koro harahai fani oho uroho kungguna de égé féri kufuri tetebuméri oho uroho kuni kufiyahanani, sokingkumaki, tahano koro harahai égé esumu abisini ifita muno égé sesahaméri giyakéri kirimu tatani deri ahainé.
[17] Hate ememere ahu ero-anggur noho harahai ohoru ha féri mutu sigina muno kumu fani akukumon deyoho. Ero-anggur noho harahai égé fafani osugute, mutu muno égéki fani unggigimon deyoho. Ememere emenangkumaka, mutu égé awe taneri ahainéka, damu ero-anggur noho harahai égé akusakumonéka, damu ukuma égena égé pemoné otohoiné. Ero-anggur noho harahai égé ohoru ha mutu harahai ékému kokunu," emiyoho.
[18] Ememere damu Yesus Yohanes éné matahai yoho bake u éyoho égéki, ahu besing fe Yesus bake daha. Égé uku busu ékému Yahudi nahu yohona sunafahang ékému ahuhabang kiri bahana yohona ahuhabang fe kéré. Égé Yesus Égéki etohoki, damu Yesus Égé asuféri baha ememere kubumon niye Éné sama kumu bukumu tini uhung hori habang gonggongméri damu fisini yori emiyoho, "Nabo, nosubang katugo age kunggu. Emohote, Gu hori damu Gané bero égéki éné haha teyo kumu kufuna. Emohoni, égé awe dakamu dotohoné," emiyoho.
[19] Damu Yesus méséri Éné murid nugu damu ahu égé ememere kotoféri horiya.
[20] Damu nugu kokumu ogoriya. Ogoriya égéki, yang fe Yesus Éné mo kumu marari takenaméri Yesus éné ifita-tahano-mamana-piyaha mageme ékému gohomoho. Yang égé sufébégé bibirikuma-ketahafi-ukuma (12) éné kukuwoho gong migamsumohoni, kumangkeseméri wowiyokéri bamoho.
[21] Égé ememere fimoho, "Nu Éné ifita-mamana piyaha égéki gohomekumaki, awe gogeriméri haniyakiné." Yang égé ememere fimiri éné bero kusumoho hohoni, Yesus Éné ifita-mamana piyaha mageme égéki gohomoho.
[22] Emohote, Yesus abuméri yang égéki etori damu égé bake yori emiyoho, "Nosubangwa! Gané modu habigiyonu! Nu awe habigiyoméri esemu guki ahafu afe ememere kirimu Nanini fimohoni, gu mése gogeriméri karakigi." Ememere emiyoho égéki yang égé mése gogeriméri haniyakigi.
[23] Damu ememere Yesus Éné murid nugu damu Yesus érékangni, age Yahudi nahu yohona sunafahang ékému ahuhabang kiri baha éné afahang ékému ogoriya. Damu Yesus etohoni ahu yoho wikito kuni uri efe uguna, damu ahu aburoho yoho deri ofo kunggu égéki efe uri damu kumukuni bahana.
[24] Damu Yesus yoho bake u yori emiyoho, "Gugu kusumu nohoyané. Ofo égé fani kirimuyaha kunggu deyoho. Mite, égé kunuwe igi." Emiyohote, ahu emu-hori-daha yohote Yesus Égéki gogohoméri abegegena.
[25] Ememere damu Yesus yohoni ahu aburoho yoho kusumu pama kumu osugunaka, damu Égé afahang osuri damu ofo kungguni kufiyohona égé ékému osuri ofo égéki bero tuhumu yahani ofo égé dakumu dotoho.
[26] Damu ofo mése dakumu dotoho éné sisi égéki yofiyahanani, soho emu-hori-daha busu-busu hamu égena ékému yofiyahana hoho.
[27] Yesus afahang ékému musuri hoho, damu womu fe kumu ogoho égéki ahu ukuma kiyo ketanggenani bahana yoho Égé kumu kotoféyahana. Yoho u hanggerakéri yori emiyahana, "Hai nuguna yahae ahuhabang-raja Daud éné Gowa, nugu worunu," emiyahana.
[28] Yesus damu hori afahang fe womu kumu osuguni, ahu ukuma kiyo ketanggenani bahana yoho hate osuri Yesus bake ogohona. Yesus Égéte ahu yoho bake abamu yoho, "Nu habigiyoméri guguna kiyo emeni, guguna kiyo daneri etohonané ememere esemu kirimu fimahanae?" Abamu yohoni dagenaka, Yesus bake utuhu hamahana, "Yahae, Nabo Ahuyaha, nugu kirimu fimiriyani Gu habigiyoméri nuguki ahafu aféné."
[29] Utuhu hamahana égéki dagika, Yesus ahu yohona kiyo teyo kumu gohoméri damu yori emiyoho, "Gugu fimahana égéki hamemere awe éyonané!"
[30] Emohoni, yoho dakamu etahana, damu Yesus yoho bake u hanggeramu ememere yoho, "Usisi nogoki hafumu etotoméri fani yohonan deyoho, emohoni ahu fe fani nafamon deyoho," emiyoho.
[31] Emohote, Yesus Éné sisi égéki ahu yoho musuri hori soho emu-hori-daha busu-busu hamu égena ékému yofiyahana hoho.
[32] Ememere ahu ukuma kiyo ketanggenani bahana yoho musuri hohonana, damu ahu yahamuto yoho ahu hohoi osuri u fani yoho de égéki yeri Yesus bake dahana.
[33] Damu Yesus Égé hohoi keiyong égéki uwahafungguni, ahu fani u yoho de égé uku hate u yoho. Emohoni, ahu dukuméri égena yoho mokéri hanikéri ememere yohona, "Nugu Israel soho fikoyaha ékému ahu fe ememere emoho égéki fani etosumériya deyoho," emiyahana.
[34] Emohote, Farisi nahu yohote yori emiyahana, "Hohoi yohona ahuhabang Iblis Yesus bake habigiyo kurohoni, Égéte yeri hohoi yohoki uwahafunggu," ememere yohona.
[35] Ememere emohoka, Yesus Galilea soho ékému busu fikoyaha damu busu-busu hamu égena égéki awiwiméri hoho. Égé Yahudi nahu yohona sunafahang ékému osu-musuméri Ala Éné u manggoho égéki ememere yobuwoméri yokukubumoho, "Ala soho nokumu Ahuhabang kiri Énahu yohoki hafuféri bohoné moho." Damu hate ahu kumang hamu homuugu bahana yohoki ahafu kemoho. Damu ahu furubo afénané mahanate, yohona koru kiwiyokéri bahana yoho kotoféri ahafu kemoho.
[36] Damu Yesus ahu aburoho Égé bake dahana yohoki etoho. Etoho égéki, yohote wi-domba yoho ahu yohoki hafuféri etori bahana nahu karakigi hamemere bahanani, ahu yoho u fe de égenate, yoho emenané mahana égéki fani nafamahana de gagitoméri bahana. Emohoni, Yesus yohoki esumu worumoho.
[37] Damu Yesus Éné murid nugu bake u aseméri yori emiyoho, "Hohoi du-gandum mése yo fiyori tangkéri égenani, mése giyomona na we égéte, ahu giyomenané mahana yoho kamu kamukumamu égena. Hamemere ahu embahae Nanini fimiri bohonané mahana yoho aburohomu mése égena. Emohote, ahu Nané sisi yo ahanané mahana yoho kamukumamu égena.
[38] Emoho nemohoni, Ala ahu Nané sisi manggoho yo ahanané mahana yohoki yori kubumusumohoni, Nugunabo Ala bake fisini nouwané. Emohoni, Égé awe ahu Éné furubo yeri bahana yohoki kusumoné defenané," emiyoho.