[1] Yesus Égé ukukuwoho emu-hori-daha égéki yokukubuméri feyahafungguka, damu Égé Galilea soho ékému musuri hori uré Yordan tinggeméri Yudea soho ékému ogoho.
[2] Damu ahu aburoho yoho Égé kumu kotoféri hohonaka, damu Égé hokumu ahu aburoho wiyahakesemahana yohoki ahafu kemoho.
[3] Emohote, Farisi nahu yohona gogo égena ékému ahu yahamuto yoho hate deri Yesus ikuhamenan niye Égé bake abamu yohona, "Ala Éné hukum yohoni yang égé u poréyahamu de éyongkumaka, besing fe énahamo untohomoné moho nogoki awe emon rahamohoe?" Ememere abamu yohona.
[4] Damu Yesus Égé utuhu hamoho, "Gugu mése Ala Éné Buku kumu u makemere kara unggunani égé égéki age mése etori nafaméri bahana: Ala mumangge besing kamisige damu yang kamisige yohoki emoho.
[5] Damu Ala ememere u yoho: "'Emohoni, besing égé énabo énéni mungguki, damu yang égé kotoféri bahana. Emohoni, yoho fani ahu ukumamu bahana deyohote, ahu kamisige kiri bahana,' emiyoho.
[6] Ememere emohoni, yoho fani ahu ukuma bahana deyoho, emohote yoho ahu kamisige kiri bahana. Nabo Ala Uku mése yang kuku kamisige kiri bunané ememere yakiré. Emohoni, ahu fe fani emoné yohote fani untohosumenan deyoho."
[7] Ememere dagenaka, damu Farisi nahu yoho Yesus bake abamu yohona, "Ememere de éyongkumaki, makemohore nuguna yahae Musa égé yori emiyoho, 'Ahu yang untohomongkumaki, uku kara yang untohomoné moho égéki uni kurohoné.'" Yoho ememere abamu yohona.
[8] Yesus utuhu hamoho, "Gugu esemu gung botokiginani, fani Ala Éné u mumangge ahu yoho bake yoho yaki égéki fani dagena deyoho. Emohoni, Musa égé emiyoho, 'Ahu yang untohomongkumaki, uku kara yang untohomoné moho égéki uni kurohoné,' emiyoho. Emohote, mumangge Ala ahu emaki égéki Éné u fani ememere yaki deyoho."
[9] Yesus tafe yoho bake yori emiyoho, "Ahu fe énahamo fani besing fe hahafemenan deyohote, égé homereyaha untohomonéka, damu yang fe aféngkumaki, Ala fimohoni égé mése yang muno égéki hahafemoho. Kamu énahamo besing fe hahafemongkumaki, énuhu énahamo awe untohomoné," emiyoho.
[10] Damu Yesus Éné murid nugu Yesus bake emiyoriya, "Ememere yang kuku mése kamisigemu bahana damu yoho fani untohomenan dekumaka, besing égé uku fani yang yaha de pumise bohoné moho égéki esumu wayamu éyoné," ememere yoriya.
[11] Emohote, Yesus Égé yoho bake emiyoho, "Ahu emu-hori-daha yoho fani habigiyoméri uku pumise bohonan deyoho. Kamu Ala ahu mése degemu kufiyoho bahana yohote awe pumise bohonané.
[12] Damu besing tuhuremu yohonéni modu kumu pesingkéri bahanani, yohonéni asufiyohonani, yang fani yahana de burahae bahana. Damu ahu fe yoho emohoni, besing tuhuremu yoho pesingkéri bahanani, yang fani afén de pumise bahana. Damu besing tuhuremu yang fani afénan deyoho ememere inggeméri Ala Éné furubo yeri mahamu emenan niye. Ahu menohosé Nu yokukubuméré nogoki habigiyoméri hamemere bohongkumaki, uku damu awe ememere bohoné," emiyoho.
[13] Sawa feki ahu yoho Yesus bake ofo ware yeri dahana. Yoho Yesus Éné bero ofo ware yohona habang teyo kumu kufiyori Ala bake u yohon niye yeri dahana. Mite, Yesus Éné murid Égé kotoféyoriya nugu ahu yoho bake kefari yoriya.
[14] Ememere etohoka, Yesus Égéte Éné murid nugu bake yori emiyoho, "Meneféyané! Ofo yoho Nu bake defena! Ofo ware yohona modu amiféri yoku yohonabo yohonéni u dari ibimiri bahana gahakumu hamemere ahu yohona modu amiféri bahana yoho kamu Nané u dari Nuki kotoféyahana. Emohoni, Ala emoné yoho Énahu kiri bohonané," emiyoho.
[15] Ememere yori Yesus Éné bero féri ofo ware isige-isige yohona habang teyo kumu kufuri yoho niye Ala bake yoho. Ememere emohoka, Égé ékému musuri hoho.
[16] Damu Yesus yedi kumu bohohoni, ahu fe Yesus bake maraha. Ahu égé Yesus Égé asuféri bahate égésé amiféri baha ememere kubumon niye Éné sama kumu bukumu tini abamu yoho, "Bafa-Guruwa, nute makerahae wayamu emeka, damu bahae embahae posu-posukine?" ememere abamu yoho.
[17] Damu Yesus égé bake utuhu hamoho, "Gute makemohore u manggoho égé esumu emoné moho égéki abamu yohoe? Uku damu manggohokigi Égésé Ala séré. Damu gu awe sifing fimiri bohoné embahae posu-posukiné fimongkumaki, Musa éné hukum ékému Ala u yoho yaki égéki dari bunu!"
[18] Emiyohoni, damu ahu égé tafe abamu yoho, "Ala u yoho yaki ékému u makerahare emeye?" Emiyohoni, Yesus utuhu hamoho, "Gu ahu fani fun deyoho; yang hahafemon deyoho; kei fani afén deyoho; gané kiyomu fani etohon de ahu fe yohona sisi yahamu yohon deyoho;
[19] guku gabo kumu géni yohona u dari hanikéri bunané; guku gané haha aduwosoho worumoho hamemere gané matahai gané ita bahana yohoki worunu," emiyoho.
[20] Damu ahu ofo hayang égé Yesus bake yori emiyoho, "Bafa-guruwa, Ala Éné u yoho yaki égéki mése dari hamemere eméré. Emohote, fe makerahae tafe emeye?"
[21] Ememere abamu yohoni, damu Yesus Égéte ahu égé bake emiyoho, "Gu awe esemu kirimu Ala Éné u dari bohongkumaki, hori gané toto tokunsunuka, damu aneséyang yeri ahu toto kara nahu yoho bake kemenoro. Emohoni, gu awe Ala Éné busu mene ékému ukukuwoho de égena égéki awe aféné. Ememereya, deri Nu kotoféna," emiyoho.
[22] Damu Yesus ememere yoho égéki dagiki, ahu ofo hayang égé éné modu ugu. Égé éné toto esumu aburoho baha, damu fani éné toto tokumoné moho deyoho. Emohoni, éné modu gahafukuni égé égéto ékému musuri hoho.
[23] Ememere etohoki, Yesus Égé Éné murid nugu bake yoho, "Nu katugo u yahae méré nogoki narané: Ahu toto aburoho baha nahu égé Ala Énahu kiri bohoné moho nogoki esemu gagubangkigi," emiyoho.
[24] Yesus tafe yori emiyoho, "Nu gugu bake u nogoki tafe yahae: Wi-unta esumu fikoyahakigi égé yomohong ifita tetebumona éné to ware atuné moho égéki yahamutomu agefekigi. Emohote, ahu toto aburoho baha nahu égé Ala Énahu kiri bohoné moho nogoki aburohomu agefekigi," emiyoho.
[25] Damu Éné murid Égé kotoféyoriya nugu Yesus Éné u égéki dariyaka, mokéri hanikéri hakurumériya. Emohoni, nugu u kutumu abamu yoriya, "Ememere éyongkumaki, Ala ahu mekenohoki awe umburomonéka, damu ahu égéte hori Ala kumu kotoféri bohone?"
[26] Emohote, Yesus nuguki keroho etori damu utuhu haméri yoho, "Ahu égé uku éné modu awe fani umburomon deyoho, mite ahu ukukuwoho emu-hori-daha égéki fani emesumahana de égéki Alasé esumu habigiyoméri esumu emoné," emiyoho.
[27] Damu Petrus yori emiyoho, "Nabo Ahuyaha, eta! Nugu mése nuguna afahang kumu nuguna toto kumu ememere nuguna na emu-hori-daha égéki kufiyoriyaka, damu Nabo Gu kotoféyoriya. Emohoni, nugu makerahare awe aféyane?" Ememere abamu yoho.
[28] Yesus yoho bake utuhu hamoho, "Nu katugo u yahae méré nogoki narané: Embahae Ala hou damu soho damu éné fenegene yori emaki égéki awe degemu harahaimu emoné. Degemu harahaimu emoné moho égéki, Ahu Ala bahato ékému dere Nusé Ahuhabang kiri awe Ahuhabang éné abuge-kursi ékému beri Nanahu yohoki hafuféri eme. Damu ahu yohote Nu esumu habigiyoméri bere égéki awe etohonané. Damu Nané murid gugu ahu isige-isige ahuhabang éné abuge-kursi bibirikuma-ketahafi-ukuma (12) ékému beri Israel nahu yohona go bibirikuma-ketahafi-ukuma (12) égena yohoki awe hafuféri etori bohonané," emiyoho.
[29] Damu Yesus tafe yori emiyoho, "Ahu isige-isige égé Nu kotoféyonan niye éné afahang, énamkesiyo, éné yahagisi yangna besingna, énéni, énabo, damu éné soho giyong modingkumaki, ahu égé awe aburohomu aféné, awe 100mu arohoféri dakamu aféné. Damu égé hate sifing féri Ala kumu bohoné embahae posu-posukiné.
[30] Emohote, ahu aburoho yoho katugo esemu asuféri bahana yoho embahae sawa fe Ala Ahuhabang kiri Énahu yohoki hafuféri baha égéki, yoho awe amiféri bohonané. Damu ahu aburoho yoho katugo amiféri bahana yoho awe asuféri bohonané," emiyoho.