[1] Yahudi nahu asuféri yohonahu hafuféri bahana yoho damu bahana égéki, Yesus tafe yoho bake sisi yahamuto aseméri yoho.
[2] Égé yori emiyoho, "Ala sisi nokumu ahuhabang-raja gahakumu égé. Damu ahuhabang-raja énamu yang yahani, énamu niye kubu ainé moho.
[3] Damu égé kubu ainé moho ékému ahu kefo defenané mahana yohoki mése kubuméri yohoni égena. Damu kubu ainé moho égéki fengféyohoka, damu kusumohoni ahu éné furubo yeri bahana yoho hori ahu kefo yoho defenan niye yoho bake yo hohona. Emohote, ahu kefo énéyuhuwoho yohote fani hohona de wiyaha mungguna.
[4] "Emohoni, ahuhabang-raja égé kusumohoni hate ahu éné u dari éné furubo yahana fe yoho ahanané mahana égéki, yoho bake yori emiyoho, 'Hori ahu kefo kubu ai méréto ékému defenan niye yoho bake nouwané! Kubu iri ohoru arenané mahana égéki mése fengféyoré. Wi-sapi besing damu nané ohoru moku akungbaha yeri mése haunggiyoméri kuni duri kufiyoré. Emohoni, nouwané kubu iri ohoru arenané mahanato nokumu defenané,' emiyoho.
[5] Emohote, éné kefo yoho bake yo hohona égéki, yoho dari muni ureyafuri hori yoku yohona furubo hamu kemahana: Ahu tuhuremu yoku yohona giyong ékému hohona, damu ahu tuhuremu toto tokunsumenan niye hohona.
[6] Damu ahu tuhuremu ahuhabang-raja éné furubo yahana nahu yohoki berahae yeri unggufiyori abutakuni damu homuuri kufiyahana.
[7] Damu ahuhabang-raja u égéki dagika, égé esemu hakereméri ufuyohoka, damu yohoni éné tentara yoho musuri ahu kefo yoho bahana yohona busu fikoyaha ékému hohona. Hohona égéki yakenani, damu ahu tentara yohosé ahuhabang-raja éné furubo yahana nahu yohoki homuuri kufiyahanato ékému ogori hamu homuuri kufiyahanaka, damu ahu kefo yohona busu fikoyaha égéki indo kungguna.
[8] "Ememereya ahuhabang-raja égé ahu éné furubo yahana yoho bake emiyoho, 'Namu yang yahani kubu iri ohoru arenané mahana égéki mése fengféyoré. Emohote, Nu ahu kefo mumangge kubuméri yoré yaki yoho awe defenané mahana égéki wiyaha modi. Emohoni, yoho fani defenan deyoho, meneféyané.
[9] Emoho nemohoni, gugu yedi kayaha hamu ékému yo nohoyané. Hori ahu mekenohoki gebufunangkumaka, yoho bake nouwané. Emohoni, ahu yoho namu yang yaha kubu iri ohoru arenané mahanato nokumu defenané,' emiyoho.
[10] Damu ahu éné furubo kemahana yoho dagenaka, yoho musuri yedi kayaha hamu hori damu hokumu ahu aburoho yoho bake gebuuri yohonani, ahu emu-hori-daha u mése dagena yoho deri gogoyaha damu dukumahana; ahu keiyongkigina damu ahu manggohokigina ememere deri afahang yang yahani ohoru arenané mahanato ékému osuri dukumahanani, esemu bong bahana.
[11] "Ememere damu ahuhabang-raja égé osuri ahu kefo deri katugo bahana yohoki etori ahu kefo isige-isige efefeméri nafamohoni ahu kamisige égé kubu ainané mahanato ékému atuné moho éné ifita-mamana fani kuni baha deyoho.
[12] Damu égé ahu égé bake abamu yoho, 'Nohogi, gu kubu ainané mahanato atuné moho éné ifita-mamana fani kunggu de makemere homereyaha nokumu musuri bahare?' Emiyohote, ahu égé u fani yoho deyoho, égé weikéri baha.
[13] Damu ahuhabang-raja égé ahu éné furubo yeri égena yoho bake yori emiyoho, 'Ahu nogo bero keto yuhu arari ufunanéka, damu awe soho asuguguto ékému penané otohoiné. Ékému égé awe efe uri éno aroné efe uri esumu kugutoméri bamoné,'" emiyoho.
[14] Damu Yesus u aseméri yoho égéki Ukuné sifingmu fimiri u yori feyahafumoho, "Ala Égé ahu aburoho yoho bake Énahu kiri bohonan niye yohona fi igi. Emohote, Ala kamu ahu yahamuto yohona fi iri kubumu yohoni, yohote Ala Énahu kiri bohonané," emiyoho.
[15] Ememere Yesus yohoni dagenaka, Farisi nahu yahamuto yoho Ala Éné Afahang pama ékému musuri hohona. Hori yoho dukuméri Yesus Éné u fe gebufunan niye u kutumu yori dagena. Yoho Yesus bake u fe abamu yohonanéka, damu Yesus Égé utuhu hamoné moho égéki séséni yohonané bemahana.
[16] Damu ememere u kutumu yori inggemahanaka, yoho kusumahanani ahu Farisi nahu kotoféyahana yahamuto damu ahu ahuhabang-raja Herodes kotoféyohona nahu yahamuto yoho kotoféri Yesus bake dahana. Yoho Yesus bake u abamu yori u fe gebufunan niye dahana. Damu yoho Yesus Éné modu afénan niye Énaukuméri ememere abamu yohona, "Bafa-Guruwa, nugu nafamériyani Gu fani yahamu yosumoho deyoho, mite haiyangmu yosumoho, damu haiyangmu yokukubumoho. Damu Gu ahu yoho etori ahu asuféri bahana rahamo amiféri bahana rahamo fani ememere fimoho deyoho. Emohoni, Gu fani ahu yoho etori mokigi de, ahu emu-hori-daha yoho bake Ala Éné sifing fimiri emoné moho égéki hamu hanéri yokukubumoho.
[17] Emohoni, nugu bake nou, aneséyang ahuhabang-kaisar bake kemerosumériya égéki awe kurohowa rahamo modiya rahamohoe?" Ememere abamu yohona.
[18] Emohote, Yesus yohona modu keiyongkéri yohona égéki mése nafamoho. Emohoni, Égé yoho bake yori emiyoho, "Ha, gugu ahu yahamu manggoho gahakumu bahana. Gugu Nu ememere abamu yori ikuhamahana.
[19] Maha gugu aneséyang-dinar ahuhabang-kaisar bake kemerosumahana égéki nu bake kubunané." Emiyohoni, aneséyang-dinar égéki yeri Yesus bake dahana.
[20] Damu Yesus aneséyang-dinar égéki yeri yoho bake abamu yoho, "Aneséyang womu ahu fi damu usubang baha nogoki menoho fi re?"
[21] Yoho utuhu hamahana, "Roma nahu yohona ahuhabang-kaisar," emiyohona. Damu Yesus dari u yori emiyoho, "Emohoni, ahuhabang-kaisar éné na kingkumaka, ahuhabang-kaisar bake kemenorohoné. Mite, Ala Éné na kingkumaka, Ala bake kemenorohoné!"
[22] Ememere Farisi nahu yoho damu ahuhabang-raja Herodes éné matahai yoho Yesus bake ikuhamahanate, Yesus Ége u wayamu ayoméri yoho. Emohoni, ahu yoho u dagena égéki, yoho éhéng ememere yori habang gonggongmahana. Damu yoho Yesus Égéki munggunaka, damu musuri hohona.
[23] Sawa égéki Saduki nahu yahamuto yoho hate Yesus bake dahana. Saduki nahu yoho ahu kungguna nahu yoho fani dakumu dotohonan deyoho ememere kirimu fimahana. Yoho deri Yesus bake abamu yohona,
[24] "Bafa-Guruwa, nuguna yahae Musa ememere nugu bake yokukubumaki: 'Besing fe ofo karakiné akumongkumaki, énukuda besing égéte yang ahamo égéki yeri ofo ahu kunggu énéné ofo kuhumoné.'
[25] Emohote, nugu beriya ékému ahu besing yahagisi birikuma-berahafi-ukuma (7) bahana. Besing yoho égé yang yahaka, damu ofo karawe bahaki kunggu.
[26] Emoho etohoki, énukuda fe égéte ahamo égéki yaha. Mite, ofo karawe, uku hate kunggu. U nogoki hamemere énukuda fe hate hamemoho. Damu uku ememereya bohoho. Birikuma-berahafi-ukumamu (7) emohoka, damu yang égé hate kunggu.
[28] Emohoni, sawa ahu besing kungguna yoho dakumu dotohonané mahana égéki, yang égé mése besing birikuma-berahafi-ukuma (7) yohoki yeri bahaka, kungguni, égé ahu menoho énahamo kine?" emiyohona.
[29] Yesus yoho bake utuhu hamoho, "Gugu Ala Éné Buku etori fani femu wayamu nafamahana deyoho, damu Ala Éné habigiyo fani wayamu nafamahana deyoho. Emohoni, gugu degemu fimiri ahu mése kungguna yoho fani dakamu dotohonan deyoho ememere yohona.
[30] Sawa ahu mése kungguna yoho dakamu dotohonané mahana égéki, fani yang hu kutumu fani kemenan deyoho. Yohoku malaikat gahakumu Ala Éné busu mene kumu bohonané.
[31] Emohote, gugu Ala Éné Buku etahanate, Ala ahu kungguna yoho dakamu dotohonané mahana éné u yaki égéki fani femu nafamahana deyoho. Ala nuguna yahae Musa bake ememere u yaki,
[32] 'Nusé Abraham, damu énamu Ishak, damu énamunamu Yakub Yohonabo Ala séré.' Ala Musa bake u nogoki yaki égéki, nuguna yahae Abraham damu énamu Ishak damu énamunamu Yakub mése kuwangkena. Emohote, yoho Ala Éné sama kumu damu bahanani, Ala bake sembayang yeri Énaukuni embahae niyaki. Ahu mése kungguna yoho fani Ala bake sembayang yeri Énaukungguna deyoho, mite ahu Ala Éné sama kumu damu bahana yohote Ala bake sembayang yeri Énaukungguna. Emoho nemohoni, nugu nafamériyani ahu kungguna yoho dakamu dotohonané," emiyoho.
[33] Ahu aburoho ékému dukumahana yoho Yesus Éné u yokukubumoho égéki dagenaka, ahu yoho mokéri hanikéri hakurumahana.
[34] Saduki nahu yoho Yesus bake abamu yohonate, Yesus Égé esumu utuhu ayoméri wayamu yohoni, Égé habigiyomoho. Emohoni, Saduki nahu yoho u fe fani tafe yohona deyoho. Ememere égé nogoki yofiyahana hohoni, Farisi nahu yoho dagena. Damu yoho dukuméri Yesus Égéki tafe ikuhaméri Éné u fe gebufunan niye sasahamahana.
[35] Damu Farisi nahu bahana ékému bafa-guru kamisige Musa éné hukum yokukubumoho nahu égé Yesus bake daha. Damu égé Yesus Éné u fe gebuuri séséni yohon niye ememere abamu yori ikuhamoho,
[36] "Bafa-Guruwa, Ala Éné hukum ékému u aburoho nugu bake yoho. U aburoho égena ékému u makenahare esumu wayamu ége?" ememere abamu yoho.
[37] Abamu yohoni, Yesus dagika, damu utuhu hamoho, "Ala Éné hukum ékému u aburoho égena ékému mumangge égé nogoki Gugunabo Alaki esemu worunu: Sifing fimiri worunu, modu féméri worunu, damu hate gu damu baha féri habigiyoméri worunu.
[39] Éné u fe égéki gugu guguna haha aduwosoho worumahana hamemere guguna matahai guguna ita bahana yohoki worunané.
[40] U ukuma égena égéki Musa éné hukum emu-hori-daha ékému égena kumu ahu-nabi yoho kara uni yakena kumu ememere égena ékému éné u womu kane kéré égena," emiyoho.
[41] Damu Farisi nahu yoho kumu Yesus kumu kotoféri bahana. Damu Yesus yoho bake yokukubumon niye ememere abamu yoho,
[42] "Kristus Égéki Gugusé makemere fimahanae? U feki Ala Énamu kubumu yohoni Ahuhabang kiri baha Égéki Gugusé makemere fimahanae? Damu Égéte ahu mekenoho éné go re?" emiyoho. Yoho utuhu hamahana, "Nuguna yahae ahuhabang-raja Daud éné Go we," emiyohona.
[43] Damu Yesus yoho bake emiyoho, "Ememere gugu yohonangkumaka, anggo posuyahaki ahuhabang-raja Daud uku Ala Éné Ubana Hayo afuyeri bahani, makemohore Kristus Égé bake Nabo Ahuyaha ememere iri yake? Anggo posuyahaki ahuhabang-raja Daud égé u ememere yaki:
[44] "'Nabo Alasé Nabo Ahuyaha bake u emiyoho, "Afi Nané auwa mene kumu beri kotoféri etori emowa. Embahae Nu ahu Gu kumu kutumu dengkigina yoho Gané bégé fu kumu kufiye." '
[45] Ememere yohoni, ahuhabang-raja Daud égé Kristus, Nu bake ememere Nanaukuni yoho, 'Nabo Ahuyaha.' Emohoni, Kristus Égé bake kamu ahuhabang-raja Daud éné go kéré ememere yohonangkumaka, u nogoki fani wayamu égé deyoho."
[46] Yesus ememere abamu yori emiyoho égéki dagenaka, ahu fe fani utuhu hamahana deyoho. Damu sawa égéki ahu fe fani ikuhaméri Éné u fe gebuuri séséni yohonan niye Yesus bake tafe abubaméri yohona deyoho.