[1] Yesus kumu Éné murid nugu kumu kotoféri Yerusalem busu fikoyaha bohoriya yakiya, mése ékému botakenamériya. Damu Betfage busu égéki Soho Haibe Siyaha Debahae-Zaitun égena negemoho ékému ogoriya. Ékému ogori Yesus Éné murid ukuma yoho mumangge kusumoné ahanan niye yoho bake u yori emiyoho,
[2] "Gugu, busu samamoho hokumu nohoyané! Damu hori ékému ogori kakumu awe etohonané wi-keledai énéniyaha kong yuhu guma asugunani éyoné, damu éné amuke énéniyaha afi kumu éyoné. Emohoni, énéniyaha yuhu abuwonanéka, damu yohoki yeri dohoné.
[3] Damu ahu yoho makemoho niye emahanae ememere abamu yohonangkumaka, yori ememere nouwané, 'Nugunabo Ahuyaha Égésé ogusuri bohoné yohoré.' Ememere yohonangkumaka, wi-keledai nesi égé emiyohoné, 'Yahae, gugu fake kakumu yeri nohoyané. Damu gugu wi-keledai ukuma yohoki yeri dohoné,'" emiyoho.
[4] Yesus Égé awe wi-keledai ogusuri defené moho égéki anggo posuyahaki ahu-nabi fe Ala Éné u dari u yaki. Damu u yaki égéki Yesus Égésé emoné, katugo hamu hanéri haiyangmu éyoné. Ala ahu-nabi égé bake ememere u yaki: "Ahu Sion busuyaha ékému bahana yoho bake yori nouwané, 'Gugu narané! Guguna Ahuhabang katugo gugu bake daha. Égé Éné modu amiféri wi-keledai, u feki wi-keledai amuke teyo ékému ogusuri katugo daha.'"
[6] Damu Yesus Éné murid ukuma yoho Éné u dagenaka, damu hori Égé mése u yoho égéki hamemere emahana:
[7] Yoho wi-keledai amuke damu énéniyaha yohoki yeri Yesus bake hohona. Damu yoho yohona ifita-tahano-mamana-piyaha féri wi-keledai yohona mobigi kumu unggunani, Yesus Égé wi-keledai amuke mobigi ékému ogusuri ifita-tahano-mamana-piyaha teyo kumu bahani, yeri hohona.
[8] Damu ahu aburoho dukuméri bahana yoho Yesus Énaukumenan niye ememere emahana: Ahu aburoho tuhuremu yoho yohona ifita-tahano-mamana-piyaha égéki akusuhunggunaka, damu yedi kumu ung hohona. Damu ahu tuhuremu yohote fofu asuméri yedi kumu ung hohona. Emohoni, wi-keledai yoho ifita damu fofu ékému asisiméri nahangkungguna.
[9] Ahu moguri égena énéyuhuwoho damu ahu mo égena énéyuhuwoho yoho kotoféri hohona égéki u hanggeramu yori emiyohona: "Hosana, Ala Énaukumowa! Nuguna yahae Daud éné Go Énaukumowa! Ala Égéki kubumu yohoni Ala Éné habigiyo féri Ahuhabang kiri degi maraha. Ala nuguna Ahuhabang Égéki awe wayamu emoné! Hosana, Ala Énaukumowa! Ala Éné busu mene hou esumu siyaha teyo kumu égé ékému Ala Énaukumowa!"
[10] Ememere Yesus Yerusalem busu fikoyaha ékému osuguni, ahu busu fikoyaha ékému bahana yoho hagigisakumahana. Damu yoho hori ememere abamu yohona, "Yesus nogo esumu menohosé re? Emohoni, hanikéri kumukuni dahanae?" emiyahana.
[11] Damu ahu aburoho Yesus kotoféyahana yoho utuhu hamahana, "Ahu égé Yesus! Égé ahu-nabi, Ala Éné u yosumoho égé séré. Damu Égé Nazaret busu Galilea soho kumu égé énahu we," emiyohona.
[12] Ememere emohoka, damu Yesus Yerusalem busu fikoyaha ogori Ala Éné Afahang pama kumu osugu. Damu ékému ahu emu-hori-daha ohoru damu kukuwoho Ala bake kurohonané mahana égéki tokunsumahana nahu yohoki uwahafunggu. Damu ahu yohona aneséyang égéki Yahudi nahu yohona aneséyang féri kutumu tokunsumenan niye aneséyang gogokungguna éné abuge-meja égéki abubahamu kunggu. Damu ahu é hayo merpati tokunsuméri égena yohona abuge égéki abubahamu kunggu.
[13] Damu Égé ahu yoho bake emiyoho, "Ala Éné u ememere kara uwangki: "'Nané Afahang nogoki uku ahu yoho Nu bake u yosumenan niye égé.' Emohote, gugu katugo Ala Éné Afahang degemu poréyahamu emahana. Emohoni, Ala Éné Afahang égéki ahu keiyongkéri ahu fe yoho bake yahamu yori yohona toto damu aneséyang kemahana yoho dukumahana yohona afahang gahakumu égé," emiyoho.
[14] Emiyoho yaki, damu ahu kiyo ketanggenani bahana yoho damu ahu bégé afi poréyahakigina yoho ememere Yesus bake Ala Éné Afahang pama kumu baha ékému dahana. Damu Yesus yoho ahafu yahani, ahu kiyo ketangenani bahana yoho etahana, damu ahu yohona bégé afi poréyahakigina yoho méséri hohona.
[15] Emohote, ahu-imam yohona ahuhabang yoho damu bafa-guru Musa éné hukum yokukubumahana yohosé Yesus Ala Éné habigiyo féri ukukuwoho-mujizat deregemu emoho égéki etahana. Damu yoho Yesus bake hakeremahana. Damu yoho hate ofo ware yoho Ala Éné Afahang pama kumu ememere u hanggeramu Énaukungguna égéki dagena, "Hosana, Ala Énaukumowa! Ahuhabang-raja Daud éné Go niye esumu Ala Énaukumowa!" Emoho nemohoni, yoho Yesus bake esumu hakeramahana.
[16] Damu yoho Yesus Égé bake hakereméri emiyohona, "Ha, Gu katugo ofo yoho u yohona égéki dagi. Emohote, makemohore Gu fani yoho bake meneféyané ememere yoho deyohoe?" Ememere abamu yohonani, Yesus dagika, damu yoho bake utuhu hamoho, "Yahae, Nu daré. Emohote, anggo posuyahaki embahae ofo yoho Ala Énaukumenané mahana égéki Ala Éné Buku kara ékému kara uniyéré. Ahuhabang-raja Daud égésé Ala bake u emiyaki: "'Gu yohoni ofo bebeyaha yoho damu ofo duruko ware yoho Gané niye kubu ainané.' Ememere anggo posuyahaki Ala Éné umu yaki égéki katugo haiyangmu égé. Gugu mése kara nogoki esumu etori nafamahana. Haiyangre?"
[17] Damu Yesus kumu Éné murid nugu kumu ahu yohoki muniyaka, Yerusalem busu fikoyaha ékému musuri Betania busu hori damu ékému kunu iriya.
[18] Igiri mimiki Yesus damu Éné murid nugu dakamu Yerusalem busu fikoyaha ékému horiya. Bohoriya égéki, yedi womu kumu Yesus areyakigi.
[19] Damu Égé debahae-ara yedi baga kumu égé égéki etohoka, damu debahae ékému ogoho. Emohote, ero fe fani tangkuni égé deyoho, de kamu éné yong remu égena. Emohoni, Yesus debahae égé bake u guni yoho, "Gu awe tafe fani yo fiyon deyoho!" Emohoni, debahae-ara égé wahaekigi.
[20] Damu Yesus Éné murid nugu Égé emoho égéki etoriyaka, damu nugu éhéng ememere yori habang gonggongméri emiyoriya, "Makemohore debahae-ara égé esumu kakumu wahaekige?"
[21] Damu Yesus nugu bake utuhu hamoho, "Nu katugo u yahae méré nogoki narané: Gugu Ala habigiyoméri esumu emoné ememere Énini kirimu fimiri gagitomenan dekumaka, gugu awe Nu mése debahae-ara eméré nogoki hamemere emenané. Damu égé remu fani égé deyoho, damu hate gugu awe soho haibe nogo bake ememere nouwané, 'Soho haibeya, musuri womusunu hori kiyohouyaha womu kumu oguwoné!' Ememere yohonangkumaka, emohoni Ala awe emoné soho haibe égéki ememere kiyohouyaha womu kumu oguwoné.
[22] Gugu Ala bake fisini yohonané mahana égéki, haiyangne Ala esemu kurohoné ememere kirimu fimenangkumaka, ukukuwoho emu-hori-daha fimahana égéki Ala gugu bake awe kurohoné," emiyoho.
[23] Yesus mése dakamu Ala Éné Afahang pama kumu osuri ékému yokukubumoho. Ememere yokukubumoho égéki ahu-imam yohona ahuhabang kumu Yahudi nahu yohona yeyoho matahai yoho kumu Farisi nahu yoho kumu ememere Yesus bake marari Égé bake abamu yohona, "Ahu menohosé Gu bake yohoni Gané na habigiyo yeriye degemu yokukubumohoe? Gute Gané na habigiyo makuma kumu yeriye hahuye Gu ahu aburoho Ala Éné Afahang ékému toto tokunsuméri égena yohoki uwahafungguye ememere ukukuwoho hamu emesumohoe?" ememere abamu yohona.
[24] Yesus dagika, utuhu hamoho, "Nute hate gugu bake abamu yahae: Ahu menohosé yohoni, ahu baptismusumoho nahu Yohanes égé éné na yeriye ahu yoho bake baptismusumohoe? Ala yohoni Éné habigiyo yeriye emoho rahamo uku pumise éné sifingmu emoho rahamohoe? Ememere Nu u abamu yoré nogoki gugu utuhu hamenangkumaka, emohoni Nu hate gugu bake makuma kumu Nané na habigiyo yeriye eméré nogoki gugu bake yahae," emiyoho. Ememere Yesus u abamu yohoni, ahu imam yohona ahuhabang damu Yahudi nahu yohona yeyoho matahai yoho dari dukuméri utuhu hamenan niye u kutumu yori dagena: "Emohoni, Yohanes égé Ala Éné habigiyo féri emohoré ememere yohowangkumaka, Yesus Égé awe nugu bake u hanggeramu yori emiyohoné, 'Makemohore gugu fani Yohanes énini fimiri bahana deyohoe?' Ememere hanggeramu yohoné.
[26] Emohote, nugu Yohanes ahu yohona sifingmu fimiri éné na habigiyo féri emoho ememere utuhu haméri yohowangkumaka, ahu emu-hori-daha nokumu dukumahana yoho Yohanes égéki uku ahu-nabi, Ala Éné u dari yosumahana nahu fe kéré ememere kirimu fimahanani, nugute fani ememere utuhu haméri yohowan deyoho," emiyohona. Damu yoho ahu aburoho ékému dukumahana yohoki mokigina.
[27] Emohoni, yoho ememere fimiri yori inggeméri Yesus bake utuhu hamahana, "Yohanes égé éné na makuma kumu yeriye ahu yoho bake baptismusumoho égéki nugusé fani nafamériya deyoho," emiyahana. Damu Yesus yoho bake yori emiyoho, "Gugu ememere utuhu hamahanani, Nu ahu menohosé yohoni Nané na habigiyo yeriye degemu yokukubuméré, damu hahuye ahu aburoho Ala Éné Afahang kumu toto tokunsuméri égena yohoki uwahafuniye ememere ukukuwoho emesuméré nogoki gugu bake fani yahae deyoho," emiyoho.
[28] Yesus Yahudi nahu asuféri bahana yoho égena ékému u tafe aseméri yoho, "Katugo gugu bake sisi yahaeni dari Nu bake gugu fimahana égéki nouwané: Ahu besing fe énamu ukuma kufiyoho. Sawa fe kigini, égé énamu yoho bake yoho, 'Namuwa, sawa nogoki giyong-anggur hori ékému furubo neri,' emiyoho.
[29] Emiyohoni énamu yoho dagika, 'Nu modi,' emiyoho. Emohote, yaki égé fimiri sifing piyaha fiyohoka, damu giyong-anggur hori ékému éné furubo yaha.
[30] Hamemere ahu égé énamu dumori bake hori hate yori emiyoho, 'Namuwa, gu giyong-anggur hori ékému gané furubo neri,' emiyohoni, énamu dumori égé dagika, ememere utuhu hamoho, 'Nabo, yahae.' Emohote, égé fani hoho deyoho.
[31] "Gugu sisi ememere dagenaka, ofo mekenohosé énabo éné sifingmu fimoho égéki dari hamemere emohoe?" Yesus ememere yoho bake abamu yoho. Damu yoho utuhu hamahana, "Ofo yoho." Ememere yohonani, Yesus dagika, damu yoho bake yoho, "Nu katugo gugu bake u yahae méré nogoki haiyangne, maha narané: Ahu baptismusumoho nahu Yohanes deri Ala Éné sifing fimiri emoné moho égéki dari bohonané mahana égéki gugu bake yokukubumoho. Emohote, gugu fani éné u dari haiyangne ememere fimiri bahana deyoho. Emohote, ahu aneséyang kemesuméri ahuhabang-kaisar bake kurosumahana yoho, damu yang aneséyang afén niye ahu besing yoho kumu kotoféri kunu igina yohosé ofo yoho gahakumu Yohanes éné u dari haiyangne ememere fimiri bahana. Emohoni, sawa Ala soho nokumu Ahuhabang kiri Énahu hafuféri bohoné moho égéki yohote Ala Énahu kiri bohonané, damu Ala yohoki hafuféri bohoné. Emohote, gugu fani Ala Énahu kinan deyoho, emohoni Ala guguki hafuféri bohon deyoho," emiyoho.
[33] Yesus tafe u fe aseméri emiyoho, "Gugu u fe nogoki esemu narané: Ahu soho nesi kamisige égé ahu éné u dari éné furubo yeri bahana yoho bake yohoni, yohote giyong-anggur uri debahae-anggur kuhungsumahanaka, damu debahae uri kibahaméri hai siri awiwimahana. Ememere damu debahae-anggur éné yo yomukigini giyoméri hounginggumenan niye iyobégé esumu fiko gebuuri to fikomu guméri gumahanaka, anggur noho muson niye ima kumu to guméri fengféyahana. Damu giyong-anggur etori bohonan niye giyong womu kumu afahang saka siyahamu sifiyohona. Ememere emohoka, ahu yahamuto giyong etori bohonané mahana yohoki gebuuri u kutumu yori ememere inggemahana: Anggur yo gurinangkumaka, tuhuremu giyong-anggur nesi aféné, mite ahu giyong-anggur etori bahana yohote tuhuremu afénané. Damu giyong nesi égé ahu éné furubo kemesuméri bahana yoho kumu kotoféri kusumu soho fe hohona.
[34] Hori méké kebemu bahanaka, damu mése debahae-anggur yo féri yomukeseméri égenani, age sawa ero gurinané mahana botakenakigina. Emohoni, giyong nesi égé anggur yo éné na aféné mohoni, ahu éné furubo kemesumahana yoho kusumohoni yohote ahu giyong etosuméri bahana yoho bake marahana.
[35] Marahanate, ahu giyong etosuméri bahana yohote giyong nesi éné furubo kemesumahana yohoki berahae kemahana. Kemahanaka, ahu kamisige égé ufiyahanaka, damu kamisige fe uri kufiyahana, damu kamisige feki iyobégé féri womuri uguna.
[36] Ememere etohoki, giyong nesi tafe yohoni ahu éné furubo kemesumahana fe yoho hohona: Yoho mumangge hohona fani ememere hohona de ahu esumu aburoho éné furubo kemesumahana yoho hohona. Emohote, ahu giyong etori bahana yoho hamemere emesumahana.
[37] "Ememere etohoki, giyong nesi égé uku akimamaga égéki ememere fimoho, 'Namu kusumeni ahaingkumaki, ahu giyong etori bahana yoho namu égéki awe hanikéri esemu éné u dari bohonané.' Ememere fimiri énamu bake yohoni, énamute ahu giyong etori bahana yoho bake hoho.
[38] Emohote, ahu giyong etosuméri bahana yoho ofo soho habang nesi égé etahanaka, damu yoho ahu fe ahu fe ememere u kutumu yori dagena, 'Yahae, égé giyong nesi énamu we. Énabo akumongkumaki, égé awe giyong-anggur nogoki aféné. Marohoné, nugu égé ufiyowa akumoné. Emohoni, nugu hate giyong habang nesi kiyowané.'
[39] Emiyohonaka, damu yoho ofo égéki berahae yahanaka, damu giyong ékému yeri musuri pama kumu uri kufiyahana. U fe karawoho."
[40] Yesus ememere yohoka, Yahudi nahu asuféri yohonahu hafuféri bahana yoho bake abamu yoho, "Ahu giyong etosuméri bahana yoho ememere emahanani, giyong nesi dakumu defenéka, égéte makerahare yoho bake emone?"
[41] Yoho dagenaka, damu utuhu hamahana, "Égé awe deri giyong etosuméri bahana yohoki homuuri kufiyonéka, damu giyong égéki ahu fe yohosé etosuméri bohonan niye kurohoné. Damu anggur yo gurinané mahana égéki, ahu giyong etosuméri bahana yohote hate anggur yo tuhuremu awe afénané," emiyohona.
[42] Damu Yesus dari yoho bake emiyoho, "Mése Ala Éné Buku womu kumu kara nogoki de égena. Mite, gugu fani etakena dere? "'Ahu afahang gesisimahana yoho iyobégé yeri pemahana otoho. Emohote, Ala iyobégé égéki kufiyohoni, iyobégé égé debahae kane gahakumu bahani, Ala ékému afahang sigi. Ememere Ala Égésé degemu emohoni, nugu etoriyani, esumu hanikéri mokiriya.'
[43] Emohoni, Nu katugo gugu bake yahae. Ememere Ala Éné Buku ékému kara uwangki hamemere Yahudi nahu gugu Ahuhabang Nuki undomahana. Emohoni, gugu fani Ala Énahu kiri bohonan deyoho. Mite, ahu yoho soho emu-hori-daha nokumu beri Ala Éné u dari Éné sifingmu fimiri emoné moho égéki hamemere eméri bohonangkumaka, yohote Ala Énahu kiri bohonané, damu Alate yohoki hafuféri bohoné. [
[44] Ahu menohosé iyobégé debahae kane gahakumu égé ékému peroho miri ogutatungkumaki, ahu égé ungsamoné. Iyobégé debahae kane gahakumu égé gahari miri ufiyongkumaki, ahu égé oguri unggusamoné esumu mugurukéri akumoné," emiyoho.]
[45] Ahu-imam yohona ahuhabang damu Farisi nahu yoho Yesus u aburoho aseméri yoho égéki dari nafamahanani, Yesus u yoho égéki yohoki kubuméri aseméri yoho.
[46] Ememere nafamahanani, yoho Yesus Égéki berahae afénané apasiri bemahana. Emohote, ahu gogoyaha yohote Yesus Égéki ahu-nabi fe kéré ememere fimahana. Emohoni, yoho ahu gogoyaha yohoki etori mokéri mungguna.