[1] Sawa feki Yesus Éné murid nugu Yesus bake deri abamu yoriya, "Nabo Ahuyaha, sawa Gusé soho nokumu Ahuhabang kiri Ganahu yoho hafuféri bohoné moho égéki ahu bahana ékému ahu menohosé esumu asuféri ahuhabang kiri bohone?"
[2] Abamu yoriyani dagika, Yesus ofo unaware fe Égé bake defen niye yohoni, ofo unaware égéte daha. Damu Yesus ofo égéki yeri nuguna womu kumu kufiyoho.
[3] Damu Yesus yori emiyoho, "Nu katugo u yahae méré nogoki narané: Gugu asuféri bahana ememere fimahana égéki degemu fimiri ofo unaware nogo gahakumu guguna modu fani amiféri bohonan dekumaka, gugu awe fani Nu Ahuhabang kiri bere ékému Nanahu kiri bohonan deyoho.
[4] Emohote, ahu menohosé ofo ware nogo gahakumu éné modu amiféri bohongkumaki, égé Nanahu kiri esumu asuféri ahuhabang kiri bohoné.
[5] Damu ahu fe Nanini fimiri bahani, égé ahu ofo ware nogo gahakumu yohona modu amiféri bahana yoho bake hanikéri wayamu emongkumaki, ahu égésé Nuki hanikéri wayamu emoho kéré," emiyoho.
[6] Yesus yori emiyoho, "Ahu fe éné hogi Nanini fimiri amiféri baha égé bake dosa yahani, éné hogi égéte dosa yari fani Nanini tafe fimiri bohon dekumaki, Ala ahu égé bake esumu hakereméri poréyahamu emoné. Ahu égé dosa esumu fikoyaha yahani, Ala égé bake poréyahamu emoné moho égéki esumu bodukigi. Emohote, ahu égé ememere dosa fikoyaha afén de, dakasuhumu iyobégé fikoyaha féri kapebégé kumu yuhu féri guma asuri pemoné otori kiyohouyaha kumu oguwoné moho égéki fani esumu bodukigi deyoho.
[7] "Ahu menohosé soho nokumu baha égé ahu fe égé bake yahamu yohoni, ahu fe égéte dosa aféngkumaki, ahu u yoho égé ukuné ha kumoné. Ahu ahu fe ikuhamoné moho égéki soho nokumu de esemu égenate, ahu menohosé ahu fe bake yahamu yohoné damu ahu fe égéte dosa aféngkumaki, égé u yoho égéki ukuné ha kumoné.
[8] Emohoni, bero rahamo hate bégé rahamo ememere emohoni gu dosa aféngkumaki, bero rahamo bégé rahamo ememere tumiri damu penu otohoiné. Gu Nabo Ala kumu kotoféri kamu gané bero afi remu rahamo bégé afi remu rahamo ememere égé égé féri bohongkumaki, esumu manggohokigi. Emohote, gané bero ukuma rahamo bégé ukuma rahamo ememere damu de égenate, éno fani bunéri égé de éné busu ékému pemoné otohoingkumaki, égéki poréyahakigi.
[9] Gané kiyo dosa aféngkumaki, kiyo égéki dunu. Gu kiyo afi remu féri Ala kumu bohoné embahae posu-posukéri bohongkumaki, nogoki manggohokigi. Mite, gané kiyo ukuma damu égenate, éno fani bunéri égé de éné busu ékému atungkumaki, nogoki poréyakigi," emiyoho.
[10] Damu Yesus u tafe yoho, "Gugu, Nu u yahae méré nogoki dakamu finané! Ahu Ala Énini fimiri amiféri bahana yoho de bahana ékému ahu fe esumu amiféri baha égé bake fani ememere yohonan deyoho, 'Ahu wa gahakumu baha.' Gugu égé bake ememere dirimeféri yohonangkumaka, malaikat ahu égéki etori baha égésé gugu dirimeféri yohona égéki Nabo Ala bake esumu yohonané. Ahu éné malaikat égé Nugunabo Ala Éné busu mene baha Égé bake u yohoné asu-sawa fengféyori etori baha kéré. [
[11] Ahu Ala bahato ékému dere Nusé ahu anigigi égéki umburome niye dere.]
[12] Damu gugu sisi nogoki fifinané! Ahu fe éné wi-domba 100mu égena. Damu égé soho haibe siyaha wi-domba yoku hatang énggamsumahanato ékému wi-domba kamisige anigiyongkumaki, égé makemere emone? Égé esemu 99 wi-domba damu soho haibe siyaha ékému kufiyonéka, damu hori wi-domba kamisige anigigi égéki agugumoné.
[13] Damu Nu katugo u yahae méré nogoki narané: Ahu égé wi-domba anigigi égéki dakamu gebufungkumaki, égé awe esemu hanikiné. Emohote, wi-domba 99mu fani anigigina de damu égena égéki etori fani hamu hanéri hanikin deyoho.
[14] Hamemere ahu Ala Énini fimiri amiféri bahana ékému ahu fe égé Ala mungguka, damu fani Énini fimiri bohon dekumaki, ememere égé nogoki Gugunabo Ala Éné busu mene baha Égésé fani hanikigi deyoho," emiyoho.
[15] Yesus u nogoki tafe yoho, "Damu guguna matahai Alani fimiri bahana ékému ahu kamisige égé gu bake dosa aféngkumaki, guku égé bake hori kamu gu kumu égé kumu ememere bahana ékému u fe poréyahamu emoho égéki kubuméri nou. Ahu égé dagika, damu dosa yaha égéki ukuni yobuwoméri yori poréyahamu emoné moho égéki modingkumaki, guku ahu égé kumu mése dakamu bero ayoméri feyahafunu.
[16] Emohote, égé fani gané u areyon de damu u fe poréyahamu emoho égéki fani yobuwoméri yohon dekumaki, Ala Énini fimiri bahana éné gogo ékému ahu kamisige rahamo ahu ukuma rahamo ememere tafe yeri deri égé gebufunané. Damu ahu yohona kiyomu kukuuri etori u areyonané mahana yohona sama kumu u fe égéki kutumu yori awe femu wayamu inggeméri feyahafunané.
[17] Emohote, ahu yohona akiya égé fani areyon dekumaka, u égéki ahu-jemaat emu-hori-daha yoho bake nouwané. Emohote, damu hate yohona u fani areyon dekumaki, égé kumu hamamu bunané. Gugu ahu fani Alani fimiri bahana de yoho kumu fani kotoféri arari bahana deyoho, damu hate gugu ahu aneséyang kemesuméri Roma nahu yohona ahuhabang-kaisar bake kurosumahana yohoki etori ahu dosa yahana nahu kéré ememere fimahanani, yoho kumu fani kotoféri bahana deyoho. Hamemere ahu égé bake enané.
[18] "Nu katugo u yahae méré nogoki narané: Gugu soho nokumu Ala Éné sifing fimiri emoné moho égéki hamu hanéri u yori inggeméri ahu yoho bake emiyohonané, 'Gugu, fani emenan deyoho, meneféyané.' Ememere yohonangkumaka, u yori inggemahana égéki hamemere éyoné. Damu gugu soho nokumu hate Ala Éné sifing fimiri emoné moho hamu hanéri u yori inggeméri ahu yoho bake emiyohonané, 'Yahae, fake enané!' Ememere yohonangkumaka, u yori inggemahana égéki hamemere éyoné.
[19] Damu Nu gugu bake esumu tafe yahae: Gugu bahana ékému ahu ukuma yoho kotoféri dukuméri modu kamisigemu beri ukukuwoho fimiri bahana égéki Ala bake yohonangkumaka, Nabo Ala Éné busu mene baha Égésé awe ukukuwoho yohona égéki hamemere emoné.
[20] Emohoni, ahu ukuma rahamo hate ukumasiyo rahamo ememere Nanini fimiri bahana yoho dukuméri bahana ékému Nu de yohona womu kuni éré," emiyoho.
[21] Damu Petrus égé Yesus bake deri takenamu éri Égé bake abamu yoho, "Nabo Ahuyaha, nané matahai Ganini fimiri bahana ékému ahu fe nu bake poréyahamu emesuméri bohongkumaki, makemere inahameka, égé bake u kutumu yori bero ayoméri feyahafumowane? Birikumu-berahafi-ukumamu (7) nu bake poréyahamu emongkumaki, égé bake kamu birikuma-berahafi-ukumamu (7) u kutumu yori feyahafumekumaka, degige?"
[22] Damu Yesus égé bake yori emiyoho, "Nu gu bake yahae. Fani kamu birikuma-berahafi-ukumamu (7) u kutumu yori feyahafumenan deyoho. Birikumu-berahafi-ukumamu (7) enu, damu tafe birikuma-berahafi-ukumamu (7) enu, damu tafe ememere emoné fani inahamon deyoho. Ememere fani inahamon de guku emesuméri enu.
[23] "Emohoni, Ala soho nokumu Ahuhabang kiri baha ékému Énahu kiri bahana gugu fani inahamenan de aburohomu bero ayoméri u kutumu yori feyahafumenané mahana égéki usisi nogoki hamemere égé: Ahuhabang-raja fe soho fikoyaha yeri ahu ékému bahana yohoki hafuféri baha. Énahu éné furubo kemesuméri bahana yoho deri égé bake emiyohona, 'Nugu aneséyang yeri gute awe dakumu kurohowané,' ememere yori aneséyang kemahana. Damu sawa feki ahuhabang-raja égé énahu yoho bake aneséyang kemeraki égéki inahaméri dakamu aféné bemoho.
[24] Damu ahuhabang-raja égé aneséyang kemeraki égéki age efefeméri inahamohoni, énahu éné furubo kemesumoho kamisige égé aneséyang esumu aburohomu yahate, égé fani dakamu inggeméri kuroho deyoho. Emohoni, ahuhabang-raja égé éné hohowe mumuro yoho bake yohoni, yohote hori ahu égéki yeri deri ahuhabang-raja éné sama kumu kufiyahana.
[25] Damu ahu égéte aneséyang karakigini, fani dakamu aneséyang inggeméri ahuhabang-raja bake kuroho deyoho. Emohoni, ahuhabang-raja égé ahu égé bake yoho, 'Nané aneséyang dakamu kurohon niye guku damu gahamo, gesiyo, damu gané toto emu-hori-daha égena égéki tokunsunuka, nané aneséyang dakamu nu bake kuro,' emiyoho.
[26] "Emohote, ahuhabang-raja éné furubo yaha nahu égé ahuhabang-raja éné sama kumu énaukumon niye bukumu tini uhung hori fisini yoho, 'Nabo, maha dakasuhumare, nu awe gané aneséyang emu-hori-daha keméréke égéki dakumu kurahae,' ememere fisini yoho.
[27] Ahuhabang-raja égé dagika, damu etori worumoho. Worumohoni, égé ahu éné furubo yaha nahu bake emiyoho, 'Nu gu woruméréni, Nané aneséyang kemaki égéki karawoho ememere fimiri. Emohoni, fani dakamu kurohon deyoho. Wiyaha menefé,' ememere yoho.
[28] "Ememere dagika, ahuhabang-raja éné furubo yaha nahu égé kusumu musuri hoho. Emohote, musuri hoho égéki, énohogi gebuugu. Énohogi égé ahu éné aneséyang yahamuto yakite, égé fani aneséyang dakumu kuroho deyoho. Emohoni, égé énohogi égéki berahae yeri tinibiyakuni yori emiyoho, 'Nané aneséyang dakumu kuro,' emiyoho.
[29] Emohoni, énohogi égé énaukumon niye éné sama kumu bukumu tini uhung hori fisini yori emiyoho, 'Nohogi, maha dakasuhumare. Nu gané aneséyang awe dakamu kurahae,' ememere fisini yoho.
[30] Emohote, ahuhabang-raja éné furubo kemesumoho nahu égé u égéki fani dagi deyoho, damu esumu hakereméri énohogi bui kumon niye berahae yeri adiri kurohoni, bui kunggunani, embahae éné aneséyang emu-hori-daha yaki égéki dakumu kurori feyahafumoné.
[31] "Ahuhabang-raja éné furubo kemesumahana tuhuremu yoho u moguri emoho égéki etori modu budiyahangféri damu u égéki ahuhabang-raja bake yohona.
[32] Ememere dagika, ahuhabang-raja égé yohoni, ahu éné furubo yeri keiyongkéri baha égé daha. Ahuhabang-raja égé yori emiyoho, 'Ha ahu keiyongkéri baha, gu nané sama kumu bukumu tini uhung hori gu mése nané aneséyang kemakite, fani dakamu inggeméri kuroho de égéki esemu fisini yohoni, nute u égéki mése yori feyahafuni.
[33] Damu nu guki woruméré hamemere guku hate esemu gohogi worumoho égéki haiyangmu égé kéré. Emohote, gu fani ememere emoho deyoho,' emiyoho.
[34] Damu ahuhabang-raja égé ahu éné furubo yaha égéki etori hakereméri bui womu kumu kungguni baha embahae égé aneséyang emu-hori-daha kemaki égéki dakamu kemerori esumu feyahafumoné," emiyoho.
[35] Yesus u nogoki yori sobu suhunggu. "Gugu égena nogoki guguna matahai fe gugu bake poréyahamu emongkumaki, damu gugute fani esemu modu féméri u femu yori feyahafumenan dekumaka, Nabo Ala Éné busu mene baha Égésé hate gugu poréyahamu emesumahana égéki fani tobunsumon deyoho," emiyoho.