[1] Ememere emohoka, damu Yesus ahu aburoho yoho damu Éné murid nugu bake emiyoho,
[2] "Bafa-guru Musa éné hukum yokukubumahana yoho damu Farisi nahu yohosé Musa éné hukum dagenaka, damu yohona na habigiyo yeri Musa éné hukum ayoméri yokukubuméri bahana.
[3] Emohoni, gugu yoho Musa éné hukum yokukubumahana égéki dari u yohoto hamemere enané, mite yoho emesumahana égéki fani kotoféyonan deyoho, meneféyané. Yoho Musa éné hukum yokukubumahanate, yoku fani dari hamemere emahana deyoho.
[4] Damu ahu toto esumu boduyahakigi égéki ahu fe yohona berokiyo teyo kumu kufiyohona. Hamemere yoho ahu fe yoho bake Yahudi nahu yohona yahae akiya esumu agefekigi égéki emenan niye tinibiyakuni yohona. Emohote, yoho fani akiya esumu agefekigi égéki ahu fe yoho emenan niye fani hanikéri mahamu ememahana deyoho.
[5] "Ahu Musa éné hukum yokukubumahana yoho damu Farisi nahu yoho emesumahana emu-hori-daha égéki ahu yoho yohoki etori yohonaukumenan niye ememere emahana: Yoho ohoru ha féri kotak eméri esumu fikomu emahanaka, damu Ala Éné u kara uni kokunggunaka, damu yohona habang sama kumu damu yuhu aragena, damu bero gong kumu guma asuguna ememere yeri égena. Damu yoho ifita-tahano baga ékému to sanggeremu égena ékému yuhu asuri pirimu gagumu asuguna. Emohoni, ahu fe yoho yohoki etori yoho esumu Ala Éné u dari bahana ememere fimiri yohonaukumenané.
[6] Damu yoho kubu iri ohoru arenané mahanato ékému osuri abuge-kursi ahu asuféri bahasumahanato ékému esemu hanikéri bahana. Damu yoho Yahudi nahu yohona sunafahang osuri Ala bake sembayang yeri Énaukumenané mahana égéki, yoho abuge-kursi ahu asuféri bahasumahanato ékému hanikéri bahana. Emohoni, ahu fe yohote bafa-guru yohoki etori ahu asuféri bahana ememere fimiri yohonaukumenané.
[7] Damu toto tokunsumahanato ékému hohona égéki ahu fe yoho yoho bake yohonaukumenan niye habang gonggongmahana égéki etori hanikigina. Damu yoho bake bafa-guruwa ememere yohonani dagena égéki esemu hanikigina.
[8] "Emohote, gugu ahu kamisige-kamisige modinani ahu fe guguna fi iri bafa-guru ememere yohonan deyoho, meneféyané! Guguna bafa-guru kamu kamisige. Damu gugu ahu emu-hori-daha Ala Énini fimiri bahana éné matahai kiri bahanani, gugu hamu hanéri bahana.
[9] Damu gugu ahu fe soho nokumu bahana yoho bake fani éné fi iri Nabo kéré ememere yohonan deyoho, meneféyané! Gugunabo kamu kamisige kéré, damu Égé Éné busu mene kumu baha.
[10] Damu modinani ahu guguna fi iri Ahu asuféri ahu yoho hafuféri baha ememere yohonan deyoho, meneféyané! Gugunahu asuféri ahu yoho hafuféri baha Égésé Kristus, Nu séré: Ala Nuki kubumu yohoni Nute Ahuhabang kiri bere.
[11] Damu gugu égena ékému ahu menohosé asuféri ahu yoho hafuféri bohoné ememere fimongkumaki, ukuné modu esumu amiféri ahu fe yohona furubo yeri mahamu enu.
[12] Damu ahu menohosé éné modu asuféri bohongkumaki, Ala emoné égé awe amiféri bohoné. Damu ahu menohosé éné modu amiféri bohongkumaki, Ala emoné égé awe asuféri bohoné," emiyoho.
[13] Damu ahu aburoho yoho damu ékému bahana égéki, Yesus hakureyaha ahu Musa éné hukum yokukubumahana yoho damu Farisi nahu yoho bake u hanggeramu yoho, "Ha bafa-guru Musa éné hukum yokukubumahana yohoniya, damu Farisi nahu yohoniya, guguna ha kumenané! Gugu ahu yahamu manggoho gahakumu bahana. Ahu yohote Ala Énahu kiri bohonané mahanate, gugu yohoki anggenekigina. Damu guku Ala Énahu kiri bohonané mahana égéki modinani, ahu yoho Ala Énahu kiri bohonané mahana yohoki gugute esumu abusahagiyomahana. [
[14] Ha, bafa-guru Musa éné hukum yokukubumahana yohoniya damu Farisi nahu yohoniya, guguna ha kumenané! Gugu ahu yahamu manggoho gahakumu bahana. Gugu ahamo yoho bake yahamu yori yohona toto damu yohona afahang kemahana. Gugu ememere keiyongkéri bahana égéki kasumenan niye ahu dukumahana yohona sama kumu yahamu Ala bake u piyahamu yohona. Emohoni, ahu yohote guguki etori ahu manggohokigi ememere fimenané. Emohote, embahae Ala awe gugu bake esemu poréyahamu emoné, kugutomenané.]
[15] "Ha bafa-guru Musa éné hukum yokukubumahana yohoniya damu Farisi nahu yohoniya, guguna ha kumenané! Gugu ahu yahamu manggoho gahakumu bahana. Gugu ahu kamisige égé bake guguna akiya yokukubumenanéka, damu égé guguna akiya kotoféyoné moho ememere baha nahu égéki gebufunan niye hamuyahamu hori kiyohou tinggeméri onderi abuto ogusuguna. Damu ahu kamisige égéki gebuuri yokukubumahanani, guguna akiya kotoféyoho. Emohote, gugu yokukubumahanani, katugo ahu égéte esumu keiyongkéri baha. Emohoni, égé aburohomu keiyongkéri bahate, gugu yahamutomu keiyongkéri bahana. Emohoni, embahae égé ahu éno fani bunéri égé de éné busu ékému esumu awe atuné.
[16] "Ha, guku ahu kiyo ketanggini baha gahakumu beri ahu yohoki hafuféri bahana yohoniya, guguna ha kumenané. Gugu ememere yokukubumahana: Ahu menohosé u guni yahamoho égéki, Ala Éné afahang de baha ememere yori yohongkumaki, ahu égé guni yahamoho égéki fani kotoféri arari égé deyoho. Emohote, ahu menohosé u guni yahamoho égéki, Ala Éné Afahang ékému toto iyobégé-emas féri emahana égéki de égena ememere yori yohongkumaka, ahu égé u guni yahamoho égéki hamu arari égé. Ememere yokukubumahana.
[17] Ha, gugu ahu kiyo ketanggena gahakumu fani etori nafamahana deyoho. Gugu fimahanani toto iyobégé-emas féri eméri Ala Éné Afahang ékému kufiyahana égéki asuféri wayamu égé rahamo Ala Éné Afahang égé asuféri wayamu égé rahamohoe? Ala Éné Afahang égéki esumu asuféri wayamu égé kéré. Ala fimohoni Ala Éné Afahang égéki uku Ala niye degemu égé, emohoni toto iyobégé-emas féri eméri Ala Éné Afahang ékému kufiyahanani égenani, toto égena égéki hate Ala niye degemu égena.
[18] Gugu hate ememere yokukubumahana: Ahu menohosé u guni yahamoho égéki, Abuge-aguto dugamsumahanato de baha ememere yohongkumaka, ahu égé u guni yahamoho égéki fani kotoféri arari égé deyoho. Emohote, ahu menohosé u guni yahamoho égéki, kukuwoho abuge-aguto dugamusumahanato teyo kumu kufiyahana égéki de égena ememere yohongkumaki, ahu égé u guni yahamoho égéki hamu arari égé. Ememere yokukubumahana.
[19] Ha, gugu ahu kiyo ketanggena gahakumu fani etori nafamahana deyoho. Gugu fimahanani kukuwoho abuge-aguto dugamsumahanato ékému kufiyahana égéki manggohokig rahamo abuge-aguto dugamusumahanato égéki manggohokigi rahamohoe? Haiyangne, abuge égéki Ala niye degemu égé, emohoni esumu manggohokigi. Abuge uku emohoni, kukuwoho abuge ékému kufiyahana égéki Ala niye degemu égé.
[20] Emohoni, ahu menohosé u guni yahamoho égéki, ahu égé abuge-aguto dugamsumahanato égéki de baha ememere u guni yahamongkumaki, égé abuge égé kumu hate kukuwoho emu-hori-daha abuge teyo kumu kufiyori égena kotoféri de bahana ememere yori u guni yahamoho.
[21] Damu ahu menohosé u guni yahamoho égéki, ahu égé Ala Éné Afahang de baha ememere yohongkumaka, ahu égé mése Ala Éné afahang damu Ala Uku ékému baha Égé de bahana ememere kotoféri u guni yahamoho.
[22] Damu ahu menohosé u guni yahamoho égéki, ahu égé Ala Éné busu mene de baha ememere yori yohongkumaki, ahu égé mése Ala Éné busu mene damu Ala Éné abuge-kursi égé de bahana ememere yori u guni yahamahana. Damu abuge-kursi égéki Ala Uku ékému ogusuri Énahu hafuféri etori emesumoho égé kéré.
[23] "Ha bafa-guru Musa éné hukum yokukubumahana yohoniya damu Farisi nahu yohoniya, guguna ha kumenané! Gugu ahu yahamu manggoho gahakumu bahana. Gugu bumbu-selasi, bumbu-adas, damu bumbu-jintan ememere ohoru kokuméri kufiyoné houngukohoiné égéki Ala bake kurohona. Gugu guguna bumbu égena égéki giyong kumu yahanaka, damu gogo bibirikuma (10) kufiyohonaka, gogo kamisige yeri Ala bake kurohona. Ememere gugu Musa éné hukum emu-hori-daha esumu sahaekigina égéki dari bahana, mite Musa éné hukum esemu asuféri bodukéri égena égéki fani dari eméri bahana deyoho: Gugu fani Ala Éné u dari hamemere emahana deyoho; gugu fani ahu fe yoho woruméri bahana deyoho; ahu yoho gugu bake poréyahamu emahana égéki etori ahu yoho poréyahamu emahana rahamo guku fani haiyangmu emahana de rahamo ememere etori haiyangmu yori inggemahana deyoho. Gugu, Musa éné hukum esumu asuféri bodukéri égena égéki esumu enané. Damu hate Musa éné hukum sahaekéri égena égéki hate esumu fani gagabumenan deyoho.
[24] "Ha guku ahu kiyo ketanggena gahakumu ahu yohoki hafuféri bahana yohoniya, ahu yoho oho aminané mahana ékému gégéma ogori bahanani, yeri pemahana otoho. Emohote, ahu yoho oho aminané mahana ékému wi-unta esumu fikokigi égé oguri baha égéki kotoféri miri mikungguna. Hamemere gugu Musa éné hukum sahaekigi égéki femu wayamu dari bahanate, gugu Musa éné hukum esumu asuféri bodukigi égéki fani femu dari bahana deyoho.
[25] "Ha bafa-guru Musa éné hukum yokukubumahana yohoniya damu Farisi nahu yohoniya, guguna ha kumenané! Gugu ahu yahamu manggoho gahakumu bahana. Gugu ahu kamu supahang damu ume mobigi oho uroho kunggunate, yohona womu kane niniya uri damu baha gahakumu bahana. Gugu yahamu Ala Éné furubo wayamu yeri bahana gahakumu bahanate, guguna modu fimiri emoné moho égéki fani hafuféri etori bahana deyoho, damu ahu yoho bake yahamu yori aneséyang kemahana.
[26] Ha Farisi nahu yohoniya, gugu ahu kiyo ketanggena gahakumu etori fani nafamahana deyoho. Gugu ukuni moguri awe womu kane negemoho niniya uri baha tobunsunané. Ememere emahanani, hate mobigi negemoho égéki awe manggohokiné, pu karakéri éyoné.
[27] "Ha bafa-guru Musa éné hukum yokukubumahana yohoniya, damu Farisi nahu yohoniya, guguna ha kumenané! Gugu ahu yahamu manggoho gahakumu bahana. Gugu ahu soho kukumahana yohona béng teyo kukuwoho-cat hayo féri afufumahana gahakumu bahana. Ahu yoho ahu soho kukumahana yohona béng teyo kukuwoho-cat hayo féri afufumahanani, béng égéki esemu manggohomu égé. Emohote, ahu soho kukumahana yohona béng womu kumu kamu bégé remu éri niniya uri bahana.
[28] Hamemere gugu hate ahu fe yoho etohonan niye ahu Ala Éné u dari haiyangmu bahana gahakumu bahana. Emohote, guguna modu keiyongkéri damu Ala Éné u yoho égéki dogusumu kuni damu ahu yahamu manggoho gahakumu bahana.
[29] "Ha bafa-guru Musa éné hukum yokukubumahana yohoniya damu Farisi nahu yohoniya, guguna ha kumenané! Damu ahu fe yoho guguki etori gugunaukumenan niye gugu ahu yahamu manggoho gahakumu bahana: Gugu anggo posuyaha ahu-nabi soho kukumahana yohona béng ékému iyobégé féri gogofuméri sigina, damu ahu yohona modu haiyangmu bakena yohoki soho kukumakena yohona béng afi ékému kukuwoho fe iyobégé féri siri kara uni hahasemahana.
[30] Damu gugu manggohokigi ememere kubumenan niye yori emiyahana, 'Nuguna yahae bakena égéki nugu kotoféri bérékangkumaka, nuguna yahae emakena hamemere nugu fani ahu-nabi yohoki homuuri kufiyowan deyoho,' ememere yohona.
[31] Emohoni, guku mése u yohona égéki kubumohoni, gugu ahu-nabi yohoki homuuri kufiyakena yohona go kéré.
[32] Ememere égéni, nuguna yahae dosa kemesumakena égéki guku fake ememere bubuwoméri arohori feyahafunané.
[33] "Gugu usi keiyong gahakumu bahana. Guguna yahae hate usi keiyongkéri bakena! Ala fani gugu bake poréyahamu emon deyoho ememere fimahanae? Karawoho. Égé esumu awe guguki éno fani bunéri égé de éné busu ékému pemoné otohonané.
[34] U nogoki narané! Anggo posuyahaki nuguna yahae yohosé ahu Ala Éné u dari haiyangmu bahana yohoki ememere homuuwakena: Mumangge anggo posuyahaki nuguna yahae Habel égé haiyangmu manggohomu bahate, nuguna yahae Habel égéki uri kufiyakika, damu ékému ahu homuuri bahana embahae nuguna yahae Berekhya énamu Zakharia égéki uri kufiyakena. Zakharia égéki Ala Éné Afahang pama kumu abuge-aguto duri kurosumahanato womu ékému uri kufiyakena. Damu katugo gugu bahana nogoki Nu awe gugu bake ahu-nabi yoho esemu kusumeni defenané, damu ahu esumu kirimu nafaméri wayamu emahana yoho defenané, damu bafa-guru Musa éné hukum yokukubumenané mahana yoho kusumeni defenané. Emohote, ahu tuhuremu yohoki gugusé awe homuuri kufiyonané, damu hate tuhuremu yohoki gugusé awe debahae-abufiya ékému homuuri kufiyonané. Hate tuhuremu yohoki gugusé Yahudi nahu guguna sunafahang ékému kukuwoho ohoru ha féri yuhu gahakumu emoho égé féri yohoki ufuri adibimahanani, haha koru giyakinané, damu gugu yohoki busu fikoyaha ékému darafumenané, bibitakéri hori busu fikoyaha fe ékému osuri damu hate hori busu fikoyaha fe ékému ogutatunané. Emohoni, anggo posuyahaki nuguna yahae ahu haiyangmu bahana yohoki uri kufiyakenaka, damu ékému gugu damu katugo ahu-nabi yohoki homu uri bahana égé féri embahae niyaki égéki Ala awe ahu katugo bahana gugu bake poréyahamu emoné.
[36] Nu katugo u yahae méré nogoki narané: Guguna yahae ukukuwoho emu-hori-daha esumu keiyongkéri emesumakena nogoki embahae gugu ahu katugo bahana yoho awe u habang afénané, Ala awe gugu bake esumu poréyahamu emoné," emiyoho.
[37] Damu Yesus ahu aburoho yoho damu Éné murid nugu bake tafe emiyoho, "Ha Yerusalem nahu yohoniya, Yerusalem nahu yohoniya! Gugu ahu-nabi yohoki iyobégé féri homuuri kufiyakena. Damu hate Ala kubumohoni Éné u yo hohomusumahana nahu yohoki iyobégé féri homuuri kufiyakena. Ayamu énéniyaha égé énamkesiyo tefiyo féri ahukuni égé hamemere Nu mése aburohomu guguki fimiri ahukume méréte, gugu mungguna.
[38] Emohoni, narané! Ala soho nokumu Ala Éné Afahang guguna womu kumu égé ékému bahate, awe muni ahainé, fani tafe ékému bohon deyoho.
[39] Nu katugo gugu bake yahae méré nogoki femu narané! Sawa éyoré nogoki gugu Nu fani tafe etohonan deyoho, embahae sawa akimamaga hamu hanéri éyoné, Nu awe dakumu defeka, damu gugu Nuki etori yori emiyohonané: "'Ala kubumu yohoni Égé Nugunabo Ahuyaha kiri degi maraha. Ala nuguna Ahuhabang Égéki awe wayamu emoné!'"