[1] Ememere Yesus Égé Éné murid bibirikuma-ketahafi-ukuma (12) nugu bake busu fe ahayané mériya égéki yokukubumohoka, damu nuguki kusumohoni nugute busu fe busu fe horiya. Damu Yesus Égé baha ékému kufiyohoka, musuri busu fikoyaha ékému hoho. Busu fikoyaha hamu Galilea soho fikoyaha takenamu égena ékému hoho. Damu Yesus hori ahu yoho bake Ala Éné u manggoho yofiyoho daha égéki yokukubuméri yo hohomusumoho.
[2] Ahu baptismusumoho nahu Yohanes égé damu bui womu kumu baha. Sawa feki égé beri u dagini Yesus Égésé Kristus Éné furubo égéki yeri emesumoho: Kristus éné u feki Ala Énamuki kubumu yohoni Ahuhabang kiri baha.
[3] Ememere dagika, Yohanes égé Yesus bake abamu yohon niye éné murid yoho bake yohoni, Yohanes éné murid yohote dagenaka, damu Yesus bake deri abamu yohona, "Nabo, Gusé anggo posuyaha Ahuhabang defené moho ememere u yahamaki Gusé rahamo daka hate ahu fe rahamohoe? Emohoni, nugu awe ahu énini kidabohowane?"
[4] Ememere abamu yohonani, Yesus yoho bake utuhu haméri yoho, "Gugu dakamu hori sawa nogoki u mése dagena damu guguna kiyomu kukuuri etahana égéki Yohanes égé bake nouwané:
[5] Ahu kiyo ketanggenani bahana yoho bake yoréni kiyo danegena, damu ahu darukiginani yoréni, méséri hohona. Damu ahu yohona haha ahayang esumu kirimu migina yohoki ahafu yaréni, gogeriméri haniyakigina. Emohoni, yoho dakamu yohonahu yoho kotoféri Ala bake sembayang yeri Énaukuni bahana. Damu ahu sunto to ketanggenani, yoréni ahu u dagena; ahu hosanggiginani, yoréni, dakumu dotohona; ahu toto kara nahu yoho bake Ala Éné u manggoho yofiyoho daha égéki yosuméré.
[6] Ahu menohosé Nuki etori Ahu Égésé Ahuhabang defené moho Égé séré ememere yori fani Nuki undomenan dekumaka, ahu énéyuhuwoho yohona modu esemu hanikinané," emiyoho.
[7] Damu Yohanes éné murid yoho dakumu hohonana, damu Yesus Yohanes éné sisi égéki ahu aburoho égena ékému yoho bake yoho. Égé yori emiyoho, "Gugu makemoho niye siyanto soho ékému hori Yohanes égéki etori gebuugunae? Gugu siyanto soho ékému hori ahu éné modu fani botokéri bahana de éné modu derahaiyokigi égéki etohonan niye hohonae? Karawoho. Yohanes éné modu fani ememere baha deyoho.
[8] Damu fani ememere etohonan dekumaka, gugu hori makerahae etohonan nere? Gugu hori ahu ifita manggoho ememere kunggu égéki etohona rahamohoe? Karawoho. Ahu fe ifita manggoho ememere kunggu égé uku ahuhabang-raja éné afahang fikoyaha ékému bahana.
[9] Emohoni, gugute makemoho niye siyanto soho ékému hohonae? Hori ahu-nabi fe égéki etori Ala Éné u areyonan niye hohonae? Yahae, haiyangne. Nu u yahae méré nogoki narané: Ala Éné u katugo yosumoho nahu Yohanes égésé esemu asuféri égéte, anggo posuyahaki ahu-nabi bakena yoho esemu amiféri bahana.
[10] Yohanes égé Kristus Nu fani dere de mése moguri deri ahu yoho yohona modu fengféyoho égé séré. Damu anggo posuyahaki Ala Kristus bake Yohanes Éné sisi ememere yaki égéki Ala Éné Buku kumu ememere kara uniyéré: " 'Maha u nogoki femu nara! Ahu fe Nané u yo ahainé moho nahu égésé Gu moguri kusumeni ahainé. Emohoni, ahuhabang-raja defen niye éné yedi fengféyahana hamemere égéte hori Gu awe defen niye ahu yohona modu fengféyoné,' emiyoho.
[11] "Nu katugo u yahae méré nogoki narané: Soho nogoki ahu yohonéni asufiyahanani bahana yoho fete fani ahu baptismusumoho nahu Yohanes hamemere bahana deyoho, mite Yohanes égéte esumu asuféri baha. Emohote, sawa Ala katugo soho nokumu Ahuhabang kiri harahaimu Énahu yohoki hafuféri etori baha égéki, ahu menohosé Ala Énahu kiri bohongkumaki, égésé asuféri bahate, ahu baptismusumoho nahu Yohanes égésé amiféri baha. Damu Ala Énahu kiri bahana ékému ahu fe esumu amiféri baha égésé asuféri bahate, Yohanes égéte amiféri baha.
[12] Sawa ahu baptismusumoho nahu Yohanes Ala Éné furubo yeri baki égéki embahae damu niyaki égé Ala soho nokumu Ahuhabang kiri Énahu yohoki hafuféri baha éné u égéki yoho. Damu ahu aburoho yoho u égéki dari hanikigina, damu Ala Égé yohona Ahuhabang kiri yohoki hafuféri bohon niye kirimu fimiri bahana. Emohote, ahu fani Ala nafamahana de yoho esemu hanggerakéri ahu fe yoho hanikéri Ala Énahu kiri bohonané mahana yohoki ansakumahana.
[13] Damu Musa éné hukum kara uwangki éné Buku égéki damu ahu-nabi yoho Ala Éné u dari kara uwangkena yohona Buku de égena. Ememere Buku égena ékému embahae Ala soho nokumu Ahuhabang kiri Énahu yoho hafuféri bohoné moho égéki kara uniyéré. Damu katugo nugu beriya nogoki, Yohanes égé hate age marari fani kebekin de Ala soho nokumu Ahuhabang kiri Énahu yoho hafuféri etori bohoné moho égéki yobuwoméri yoho.
[14] Anggo posuyahaki ahu-nabi fe Ala Éné Buku ékému ememere kara uwangki: 'Embahae ahu-nabi Elia moguri awe dakamu defené.' Damu gugu ememere kara uwangki égéki haiyangne ememere fimenangkumaka, femu nafanané: Elia awe defené moho égésé Yohanes égé séré.
[15] Damu gugu sunto de bohonangkumaka, usisi mése dagena égéki femu wayamu fimiri nafanané," ememere yoho.
[16] Katugo nogo ahu Yohanes damu Nuki undoméri bahana égéki Nusé makemere yahae? Ahu yoho Nu u aseméri yahae méré nokumu amkesiyo yoho gahakumu bahana. Amkesiyo yoho ahu dukumusumahanato ékému beri gogo ukumamu habahae yeri gogo fe gogo fe yoho bake u hanggeramu yohona:
[17] "'Nugu wikito guni uri kubu iriyate, gugu fani hanikéri gong kigina deyoho. Damu nugu berosi bahana éné kubu égéki iriyate, gugu fani habahae yeri efe uguna deyoho.'
[18] Damu u aseméri yoré égéki ememere kubumoho: Yohanes daha égéki, égé ohoru fani énggé de, damu ero-anggur noho fani migi deyoho. Ememere baha, nemohoni ahu yoho u ememere yori Yohanes égéki undomahana, 'Yohanes égé hohoi osuri bahani, ero-anggur noho fani migi deyoho,' emiyohona.
[19] Damu katugo Ahu Ala bahato ékému dere Nusé ohoru éné, damu anggur noho miri ememere eméré égéki ahu yoho etori damu yori emiyahana, 'Ahu égé aren wiyaha énggé, damu ero-anggur noho miri wambumoho. Damu énohogigiyoho ahu nuguna aneséyang keméri ahuhabang-kaisar bake kemerosumahana yoho damu ahu dosa kemesumahana yoho séré.' Ahu yoho ememere yori Nuki undomahana. Emohote, ahu Yohanes damu Nu yokukubumériya égéki kotoféyahana yoho haiyangmu bahana égéki etori Nugu yokukubumériya égéki haiyangne ememere nafamenané," emiyoho.
[20] Yesus anggo féki ememere mése emoho yaki: Égé busu fikoyaha égena ékému hori ahu yoho bake Ala Éné habigiyo féri ukukuwoho-mujizat ahu fani emesumahana de égéki esumu aburohomu emaki. Emohote, ahu nonéyuhuwoho Yesus Ala éné habigiyo féri ukukuwoho-mujizat emesumaki égéki etori fani yohona dosa yahana égéki ukuni mungguna deyoho. Emohoni, Ala awe ahu busu fikoyaha hamu beri fani yohona dosa yahana égéki ukuni mungguna de yoho bake hamu hanéri poréyahamu emoné moho égéki u hanggeramu emiyoho,
[21] "Khorazim busu fikoyaha nahu yohoniya, guguna ha kumenané! Betsaida busu nahu yohoniya, guguna ha kumenané! Nu guguna busu wokumu hori Ala Éné habigiyo féri ukukuwoho-mujizat esumu aburohomu emesuméré. Emohote, gugu fani guguna dosa yahana égéki ukuni mungguna deyoho. Nu guguna busu fikoyaha hori ukukuwoho-mujizat emesuméré égéki anggo posuyahaki Tirus damu Sidon busu fikoyaha hori hokumu emérékékumaki, ahu esemu keiyongkéri bakena yohote mése posu-posukéri yohona dosa kemahana égéki efe uri ukuni modinanéka, Ala Éné u dari bohonan kiyoho.
[22] Emohote, Nu gugu bake yahae: Embahae sawa akimamaga Ala awe ahu emu-hori-daha yohona u keiyongkéri emahana égéki efefeméri yori inggeméri feyahafumoné. Sawa égéki anggo posuyaha ahu Tirus busu fikoyaha damu Sidon busu fikoyaha ékému keiyongkéri bakena yohoki Alasé awe poréyahamu emoné. Yoho bake poréyahamu emoné moho égéki sahaekiné. Emohote, katugo Khorazim busu fikoyaha damu Betsaida busu ékému bahana gugu fani guguna dosa kemahana égéki ukuni modinanéka, damu Ala Éné u dagena deyoho. Emohoni, Ala gugu bake poréyahamu emoné moho égéki esemu bodukiné.
[23] "Damu Kapernaum busu fikoyaha nahu yohoniya, gugu kokokéri ahu aburoho yoho guguna busu éné fi geiri guguna fi awe aukuni yori bosugunani, ahu aburoho yohote guguki nafaméri gugunaukumenan kiyoho ememere fimahanae? Karawoho. Emohote, Ala awe guguna busu égéki ahu hosanggigina yoho hori kidabahanato ékému pemoné otohoiné. Nu mése guguna busu hori gugu bahana womu kumu Ala Ėné habigiyo féri ukukuwoho-mujizat emesuméréte, gugu fani guguna dosa kemahana égéki fani ukuni mungguna deyoho. Guguna busu kumu emesuméré égéki anggo posuyaha Sodom busu fikoyaha hori hokumu emérékékumaki, Sodom busu nahu yohote mése yohona dosa kemahana égéki ukuni modinanéka, abuméri Ala bake deri Éné u dari bohonan kiyoho. Damu Sodom busu fikoyaha damu de bohoné embahae sawa nogoki damu ememere éyon kiyoho.
[24] Emohote, Nu gugu bake yahae: Embahae sawa akimamaga Ala awe ahu emu-hori-daha yohona u keiyongkéri emahana égéki efefeméri yori inggeméri feyahafumoné. Sawa égéki Ala ahu anggo posuyaha Sodom busu fikoyaha ékému bahana yoho bake awe poréyahamu emoné moho égéki sahaekiné. Emohote, katugo Kapernaum busu fikoyaha ékému bahana gugu fani guguna dosa kemahana égéki ukuni modinanéka, damu Ala Éné u dagena deyoho. Emohoni, Ala gugu bake poréyahamu emoné moho égéki esemu bodukiné," emiyoho.
[25] Yesus u yori feyahafumohoka, Égé Ala bake ememere yoho, "Nabo Ala, Nu katugo Ganaukuméré! Gu soho damu hou damu éné kukuwoho fenegene égena égéki hafuféri etori baha. Damu Ala Gusé Nu u yokukubuméré égéki ahu yohona modu kokokéri aburohomu nafamahana ememere fimahana yoho bake fani haharemu emoho deyoho. Emohoni, yohote Nu u yokukubuméré égéki fani nafamahana deyoho. Emohote, Ala Gusé ahu ofo unaware gahakumu yohona modu amiféri Gané u dari bahana yoho bake yobuwoméri yohoni, yohote Nu u yokukubuméré égéki nafamahana. Emohoni, Nu Gu bake degi kuroho ememere yoré.
[26] Yahae Nabo, Gusé ememere emoho égéki Gané sifingmu fimiri hanikigi égé kéré," ememere Ala bake yoho.
[27] Damu Yesus tafe ahu ékému égena yoho bake emiyoho, "Nabo Ala Nu bake Nané na kurohoni, Nané na yeri ukukuwoho kirimu nafaméri habigiyoméri emesuméré. Ahu fe Nuki fani nafamoho deyoho, kamu Nabo Alasé Énamu Nuki esumu kirimu nafamoho. Damu ahu fe fani Nabo Alaki esumu nafamoho deyoho, kamu Énamu Nusé Égéki esumu kirimu nafaméré. Damu Nusé ahu fe yoho kubumu yori Ala Éné sisi égéki yobuwoméri yokukubuméréni nafamahana yohosé hate awe Alaki nafamenané," emiyoho.
[28] Damu Yesus tafe emiyoho, "Ahu emu-hori-daha hukum emu-hori-daha dari hamemere emesumenan niye tahangkéri bahana yohoniya, Nu bake dohoné! Gugu hukum emu-hori-daha dari bohonané mahana égéki kukuwoho bodukigi kengkuni bahana gahakumu bahana. Nu awe mahamu emeni, gugu awe gemu wayamu bohonané
[29] Damu gugu Nané hukum yoré égéki dari emesunané. Nané modu amiféri kuyoméri bereni, fani modi de awe gugu hafuféri Ala Éné sifing fimiri emoné moho égéki yokukubume. Emohoni, gugu hate Nané hukum yoré égéki Ala Éné sifing fimiri emoné moho égéki hamu hanéri emenané. Emoho nemohoni, guguna modu awe gemu wayamu bohonané.
[30] Nané hukum gugu bake yoré nogoki sahaekigi, damu Nu guguki hafuféri ukukuwoho yokukubuméré égéki fani agefekigi deyoho. Emohoni, gugu esumu emenané," emiyoho.