[1] Yesus ememere emohoka, Égé Ala Éné Afahang pama kumu musuri damu kusumu hoho. Kusumu hoho égéki Éné murid nugu Yesus bake takenamu deri damu Ala Éné Afahang ékému afahang gobuméri gesi hohona égéki kukubuméri yoriya, "Ha, Ala Éné Afahang damu ékému afahang fe gogofuméri gesi hohona égéki esumu manggohokigi," emiyoriya.
[2] Damu Yesus nugu bake yori emiyoho, "Haiyangne, gugu afahang esumu manggohomu égena nogoki femu etahana. Nu katugo u yahae méré nogoki narané: Iyobégé égena nogoki iyobégé fe gogofuméri fani éyon deyoho. Awe esumu umbuwoméri abutakumenané," emiyoho.
[3] Damu Yesus Soho Haibe Siyaha Debahae-Zaitun ememere iri yohona ékému osuri baha. Égé pumise bahani, Éné murid nugu Égé bake deri nugu remu u yohowan niye deriya. Damu nugu Égé bake abamu yoriya, "Nabo, maha nugu bake nou. Gu Ala Énafahang ékému éyoné moho éné u yoho yaki égé embahae sawa makerahare awe éyone? Damu Gu fani dakamu defen de, dakasuhumu sawa akimamaga mése hawokingkumaki, ukukuwoho makerahare éyoné etohowane?" ememere yoriya.
[4] Damu Yesus utuhu haméri nugu bake yori emiyoho, "Wayamu etotoméri enané! Emohoni, ahu fe yoho fani gugu yahamu yori degemu hafuféri etori éyonan deyoho.
[5] U feki ahu aburoho yoho awe deri yobuwoméri emiyohonané, 'Kristus Égésé nu séré: U feki Ala Énamuki kubumu yohoni Ahuhabang kiri baha Égésé nu séré.' Ememere yori ahu aburoho yoho bake yahamu yo ahanané, yohote ememere fimenané, 'Égé Kristus Égé séré,' ememere fimiri bohonané.
[6] Damu ahu mése kufe kei hori soho ita égena nokumu kutumu homuuri égena éné u yofiyosumenané defengkumaka, gugu fani mokinan deyoho. Damu ahu soho fe hokumu kutumu homufunané mahana ememere éné u yofiyosumenané defengkumaka, gugu fani mokinan deyoho. U égéki de ememere esumu éyoné. Emohote, égéki sawa akimamaga soho nogoki degemu éyoné moho éné sawa deyoho.
[7] Go isige éné gogo fe kufe kei hori go isige éné gogo fe yoho kumu kutumu homufunané. Ahu gogoyahamu dukuméri soho fikoyaha kamisige ékému bahana yoho kumu ahu gogoyahamu dukuméri soho fikoyaha fe bahana yoho kumu kutumu homufunané. Soho fe soho fe kumu yei defené, damu areyakesemenané honubakenané.
[8] Emohote, u emu-hori-daha nogoki kageto féri mumangge éyoné moho kéré. Emohoni, u ememere éyoné moho égéki yang fe ofo aféné kageto age bowambumoho gahakumu égé kéré.
[9] "Sawa ukukuwoho ememere éyonané mahana égéki, guguna kufe yoho guguki yeri ahu asuféri ahu fe yoho hafuféri bahana yoho bake kurohonané, emohoni yohote gugu bake ifiyo-tifiyoméri homufunané. Damu gugu Nu kotoféyahanani, go isige go isige soho emu-hori-daha deregemu bahana yoho guguki hakeremenané.
[10] Damu ahu Nu kotoféyahana yoho bahana ékému ahu aburoho yoho awe abuméri fani Nu kotoféyonan deyoho, damu kutumu hakeremenané, damu kutumu yeri ahu asuféri hafuféri bahana yoho bake kurohonané.
[11] Damu ahu aburoho yoho awe marefenanéka, damu ahu fe yoho bake yahamu emiyohonané, 'Nu ahu-nabi, Ala Éné u dari yosuméré nahu kéré.' Emohoni, ahu aburoho yoho yohona u dari kotoféyonané.
[12] Damu ahu aburoho yoho Ala Éné hukum yoho égéki mumangge kamukumamu nahangkumenané, damu tafe aburohomu nahangkumenané. Yoho ememere bohonané, ahu aburoho yoho fani tafe Nu kumu ahu Nu kotoféyahana yohoki fani worumenan deyoho.
[13] Emohote, ahu isige-isige damu Nu kotoféyahanani, ememere bohonané embahae sawa ememere kugutoméri beri feyahafumonéka, damu awe umburomoné Ala kumu kotoféri bohonané embahae posu-posukiné.
[14] Damu Ala Ahuhabang kiri Énahu yoho hafuféri bohoné moho éné u manggoho nogoki ahu go isige éné gogo hamu soho emu-hori-daha égena nokumu yobuwoméri yo hori feyahafumenanéka, sawa akimamaga égéki defené," emiyoho.
[15] Yesus damu tafe ememere yoho, "Anggo posuyahaki nuguna yahae ahu-nabi Daniel égé u ememere awe éyoné moho égéki emiyaki, 'Embahae ahu esumu keiyongmu emesuméri bahana yohosé awe deri Ala kukuwoho fe esumu hakeremoho égéki yeri deri Ala Éné Afahang ékému kufiyonané, damu ékému méséri éyoné. Emohoni, Ala Éné Afahang esumu poréyahakiné. Ememere égé égéki Alasé hayokuni anggenekigi. Emohoni, ahu yoho awe Ala Éné Afahang fani hanikéri tafe defenan deyoho,'" emiyoho. (Matius, nusé katugo gugu bake fisini yahae, "Ahu menohosé u yoho yaki nogoki etohonangkumaka, femu wayamu finané," emiyoré.)
[16] Yesus tafe u yoho, "Ememere égé égéki, ahu Yudea soho kumu bahana yoho méséri bibitakéri soho haibe siyaha kumu osuri honé bohonané.
[17] Ahu afahang pama kumu tahangkutosumahanato kumu bahana yoho fani tafe afahang osuri toto afénan deyoho.
[18] Damu ahu giyong kumu égena yoho fani afahang hori ifita afénan deyoho.
[19] Sawa égéki yang ofo koku womu kumu bahana nahu yoho damu yang ofo ong migina nahu yoho esumu fani kakumu boniri ahanan deyoho. Ememere éyoné, fani wayakin de kugutoméri bohonané.
[20] Emohoni, gugu Ala bake nouwané, Ala modini gugu bibitakéri ahanané mahana égéki fani ememere a guni égé égéki fani defen deyoho, damu hate fani Sawa-Sabat, Yahudi nahu gugu gemu bahana égéki fani defen deyoho.
[21] "Sawa ememere agefekéri éyonané mahana égéki, ahu yoho mokéri awe arari ahana arari defenané. Sawa ememere bahana nogoki agefekéri haha aikiné. Ala soho nogo emoho wogoki fani ememere égéni, ahu fani etosumakena deyoho, damu embahae niyaki. Damu embahae fani awe hate ememere éyon deyoho.
[22] Emohote, sawa ememere agefekéri éyonané mahana égéki Ala kubumu yohoni Énahu kiri bahana yohoki woruméri mése bagumu éyon niye yori inggemoho. Ala fani ememere bagumu yori inggemon dekumaka, ahu fe fani kugutoméri bohonan deyoho.
[23] "Sawa ahu yoho mokéri awe arari ahana arari defenané ememere égena égéki, ahu yoho u yahamu yori emiyohonané, 'Etahané, Kristus Égésé nokumu niyaki!' Damu ahu tuhuremu awe yahamu emiyohonané, 'Etahané! Kristus Égé hokumu hoyaki.' Ememere yohonangkumaka, gugu yohona u fani haiyangne ememere fimiri areyonan deyoho.
[24] Ahu yoho awe deri yahamu emiyohonané, 'Kristus Égé nu séré,' damu ahu fe yoho hate deri yahamu emiyohonané, 'Nusé ahu-nabi, Ala Éné u dari yosuméré.' Damu yoho ememere yahamu yori awe yohona habigiyo féri ukukuwoho-mujizat éné kibi hoso-hoso ahu fani emesumahana de égéki aburohomu emesumenané, emohoni ahu aburoho yohote yohona u dari yoho kotoféyonané. Damu hate Ala Énahu kiri bahana yoho bake yahamu yori ikuhamenané, emohoni Ala Énahu yohote degemu emenan kiyoho. Ememere emahanate, wiyahakigi.
[25] Emohoni, wayamu etotoméri enané! U ememere éyoné moho nogoki Nu mése gugu bake moguri yoréké kéré.
[26] "Emohoni, ahu gugu bake yori emiyohonané, 'Etahané! Kristus Égé de siyanto soho hokumu hoyaki.' Ememere yohonangkumaka, gugu fani hori etohonan deyoho, meneféyané! Yoho hate yori emiyohonané, Égé de afahang womu abugemahanato nokumu égé ememere yohonangkumaka, fani dari haiyangne ememere fimenan deyoho. Meneféyané!
[27] U feki bang sawa musuguto ékému uwaneri kakani hori égé yaki sawa oguguto ékému ogohoni, ahu emu-hori-daha yoho etohonané. Hamemere Ahu Ala bahato ékému dere Nu awe defe méré égéki ahu soho emu-hori-daha bahana yoho awe etohonané.
[28] Ohoru paha égena ékému é surahayo awiwiméri bung hohona."
[29] Damu Yesus tafe u yoho, "Sawa ahu mokéri arari ahana arari defenané mahana égé karakinané: "'Damu sawa awe asukiné. Damu kamu fani tafe kakani ahain deyoho. Mi yoho awe hou hosumu pesanggi miyonané. Kukuwoho emu-hori-daha hou bégé asigobukéri bahana yoho kakumu gigimu ahana gigimu defena ememere kutumu kinahangkumenané.'
[30] "Ememereya, Ahu Ala bahato ékému dere Nu defe méré égéki kukuwoho fe hou hosumu kubumoné bohoné. Damu go isige hamu deregemu soho nokumu bahana éné gogo yoho awe etori mokéri efe aunané. Damu yoho awe Nu hou hayo womu kumu Nané habigiyo féri boméri uwaneri bohoné defe méré égéki etohonané.
[31] Ememere damu malaikat fe ba-trompet fikomu funéka, Nu awe malaikat yoho bake yahaeka, damu yohote soho tuhu damu soho tuhu hou tuhu damu hou tuhu hori yohonané, Ala kubumu yohoni Énahu kiri bahana yoho deri dukumenané," emiyoho.
[32] Damu Yesus u tafe aseméri emiyoho, "Gugu debahae-ara yo etori nafanané. Damu debahae-ara yo éné idekiyo butong ware kekehori sifo unggaguméri atungkumaki, gugu awe nafamenané kiya éyoné moho égéki mése takenakigi.
[33] Hamemere ukukuwoho emu-hori-daha Nu yoré yaki égéki damu éyonané mahana égéki etohonangkumaka, gugu etori nafamenané, Nu defe méré égéki mése takenakigi.
[34] Nu katugo gugu bake u yahae méré nogoki haiyangne, narané: Dakasuhumu ahu katugo damu sifing féri bahana yoho fani akumenan de ukukuwoho Nu mése yoré yaki nogoki esemu awe éyoné.
[35] Hou kumu soho awe anigiyonané. Mite, Nané u nogoki uku damu éyoné, embahae posu-posukiné," emiyoho.
[36] Damu Yesus tafe u emiyoho, "Sawa Nu awe defe méré égéki, sawa damu sawakiyo makenahare éyoné moho égéki ahu fe fani nafamoho deyoho. Malaikat Ala Éné busu mene bahana yoho hate fani nafamahana deyoho. Damu Ala Énamu Nu hate fani nafaméré deyoho. Kamu Nabo Alasé Uku nafaméri baha.
[37] Anggo posuyaha Nuh baki égéki, ahu yoho asu-sawa ukukuwoho emesuméri égena égéki emesuméri bahana embahae hakureyaha ahai fikoyaha daki. Hamemere Sawa Ahu Ala bahato ékému dere Nusé dakumu soho nokumu defe méré égéki ahu yoho ukukuwoho emesuméri égena égéki emesuméri bohonané.
[38] Ahu yoho bahana égéki sawa ahai fikoyaha awe defené moho égéki yoho fani femu nafamahana deyoho. Damu yoho yoku homereyaha énggena hoho, damu migina hoho ememere besing yang yaha, damu hate yang hu yaha ememere bahana. Nuh égé osuri yufung-afahang fikoyaha oguguni, damu hakureyaha ahai fikoyaha deri yohoki abubahamu kunggu. Ememere Ahu Ala bahato ékému dere Nu dakamu soho nokumu defe méré égéki, ahu fani Nanini fimiri bahana de yoho hamemere emenané.
[40] Damu Nu defe méré sawa égéki ememere éyoné: Ahu besing ukuma giyong hori furubo éyahanani, Ala besing fe égéki yeri ahainé. Damu ahu besing kamisige uku damu ékému éyoné.
[41] Damu yang ukuma du-gandum éné tama pesanggi miyoné moho éné kukuwoho iyobégé égéki abubuméri éyahana égéki, yang feki ékému yeri ahanané, damu yang kamisige awe uku damu ékému éyoné.
[42] "Emoho nemohoni, sawa Gugunabo Ahuyaha Nu defe méré nogoki gugu fani nafamahana deyoho, emohoni femu wayamu etotoméri enané!
[43] Damu usisi nogoki femu nafanané! Afahang nesi égé asu nogoki ahu kei kemesumoho nesi égé awe defené moho égéki nafamongkumaki, égé uku damu etotoméri baha. Emohoni, ahu kei kemesumoho nesi égé afahang womu kumu fani atun deyoho.
[44] Hamemere Ahu Ala bahato ékému dere Nu dakamu soho nokumu defe méré éné sawa égéki wayamu fengfénané. Gugu sawa Nu defe méré égéki fani fimoho de égéki Nu awe defe," emiyoho.
[45] Yesus tafe u yoho, "Gugu ahu isige-isige Nané furubo yeri esumu Nané u dari nafaméri wayamu emesumoho égéki Nu bake kubunané! Usisi feki ememere égé: Sawa soho habang nesi kusumu musuri soho fe ahainé moho égéki, égé ahu éné furubo yeri bahana ékému ahu fe éné u dari esumu nafaméri emesumoho égéki kubuméri yoho. Emohoni, égéte asuféri bohoné, damu égé sawakiyo ohoru arenané mahana égéki hamu hanéri ohoru éné hogigiyoho furubo kotoféri yahana yoho bake kurohoné.
[46] Damu sawa feniki soho habang nesi égé dakamu fake marari damu etohoni, ahu asuféri éné hogigiyoho hafuféri baha égé wayamu furubo yeri bohongkumaki, énabo égé esemu hanikiné, emohoni énabo égé ahu furubo yaha nahu égé awe wayamu emoné.
[47] Nu katugo u yahae méré nogoki narané: Énabo égé awe ahu éné furubo yeri éné u dari esumu wayamu nafaméri emesumoho éné fi iri kubumu yohoni, égéte énabo éné kukuwoho emu-hori-daha égéki awe etori bohoné.
[48] "Emohote, ahu asuféri éné hogigiyoho hafuféri baha nahu éné modu keiyongkéri bohongkumaka, égé keiyongmu fimiri yori emiyohoné, 'Nabo ahuyaha fani kakumu defen de awe kebekiné.'
[49] Damu égé age éné hogigiyoho yohoki unggufiyoné, damu ohoru kumu oho kumu ememere ahu oho poréyahamu migamsumahana yoho kotoféri énggena-migina ememere bohoné.
[50] Emohote, énabo dakamu defené moho éné sawa damu sawakiyo fani yohoni nafamoho de égéki, énabo uku fake defené.
[51] Damu énabo marari ahu éné furubo yeri keiyongkéri baha égéki esumu ifiyori poréyahamu emoné. Damu énabo yohoni éné hohowe mumuro yohosé ahu keiyongkéri baha égéki ahu yahamu manggoho gahakumu bahana yoho bahanato ékému pemoné oguwoné. Damu égé awe efe uri damu hokumu kugutoméri bohoné," emiyoho.