[1] Al-koochaat tilizz fi l-muʼyaar wa l-bilbil tilizz fi l-duwaas. Al-sakkaari kan yaskar daayman, yabga naadum al-ma indah raas.
[2] Khadab al-malik misil gargaraan al-duud. Kan talʼab beyah, tumuut.
[3] Al-yaaba al-machaakil yiwassif charafah wa laakin al-munaafikh le l-huraaj yifattichah.
[4] Fi wakt al-khariif, al-kaslaan ma yahrit wa fi l-darat, yifattich natiija // wa ma yalgaaha.
[5] Al-fikir fi galib al-insaan misil almi fi biir tawiile, illa l-faahim yagdar yisillah.
[6] Katiir min al-naas yistakbaro wa yuguulu induhum kheer. Wa laakin siid al-amaan, ween binlagi ?
[7] Al-saalih yiʼiich tamaam muddit hayaatah wa mabruuk le iyaalah min baʼadah.
[8] Wakit al-malik gaaʼid yisawwi al-chariiʼa, hu misil yikharbil al-khalla yaʼni yifannid al-kheer min al-charr.
[9] Yaatu yagdar yuguul : «Ana tahhart galbi wa battaan ma indi ayyi zanib ?»
[10] Allah harram al-wazin wa l-mikyaal // al-ma saabit, waahid le l-chari wa waahid le l-beeʼ.
[11] Hatta al-sabi yinʼarif be aʼmaalah kan afʼaalah saafiyiin wa adiiliin.
[12] Al-adaan al-tasmaʼ wa l-een al-tichiif, humman al-itneen Allah bas khalagaahum.
[13] Kan tihibb al-noom, tafgar. Kuun waaʼi achaan tachbaʼ.
[14] Fi l-suug, al-yachri yuguul : «Da cheen, da ma sameh !» Wa wakit yigabbil beetah, yachkur suugah.
[15] Al-dahab mawjuud wa l-marajaan katiir wa laakin al-ziina al-jamiile marra waahid, hu al-lisaan al-yanti al-ilim.
[16] Al-yadman naadum ma maʼruuf, chiil khalagah wa kan yadman ajaanib, akrub minnah damaan.
[17] Al-maal al-haraam, aklah halu le l-insaan laakin fi l-akhiir, yabga leyah misil hashas // fi khachmah.
[18] Be l-choora, al-khidme tabga gawiiye wa guud al-harib be maʼluumaat.
[19] Al-yakchif al-achiir, hu khaayin. Wa l-gawwaal, ma tiraafigah.
[20] Al-yalʼan abuuh wa ammah nuurah yumuut fi ust al-dalaam.
[21] Al-maal al-talgaah ajala fi l-akhiir ma indah baraka.
[22] Ma tilkaffa al-fasaala al-sawwooha leek, atwakkal ale Allah wa hu yinajjiik.
[23] Allah harram tisawwi mikyaal le l-beeʼ wa mikyaal le l-chari wa l-miizaan hana l-khachch kula, minnah angariʼ !
[24] Allah bas al-yuguud khatwaat al-insaan. Wa Bani Adam ma yaʼarif chunu // fi tariigah.
[25] Wakit tisawwi muʼaahada bala fikir maʼa Allah, da charak leek. Achaan baʼadeen tifakkir fi muʼaahadatak wa tandam.
[26] Al-malik al-hakiim yudugg al-aasiyiin // fi l-madagg wa baʼad da, yarhakhum.
[27] Fikir al-insaan, hu faanuus al-Allah yantiih, wa beyah al-insaan yakchif daakhal galbah.
[28] Al-kheer wa l-amaan yahmu al-malik wa be kheerah yigawwi mulkah.
[29] Al-gudra jamaal le l-chabaab wa l-cheeb charaf le l-chiyyaab.
[30] Al-farich dawa le l-fasaala wa l-daggiin chifa le l-galib.