[1] Wa fi l-yoom al-khaamis hana l-chahar al-raabiʼ fi l-sana al-talaatiin min umri, ana Hizgiyaal gaaʼid ambeen al-naas al-waddoohum fi l-khurba fi balad Baabil jamb bahar Khaabuur. Wa l-sama anfatahat wa ana chift ruʼya min al-Rabb.
[2] Wa da fi l-yoom al-khaamis hana l-chahar da fi l-sana al-khaamse min waddo Yuyakiin malik mamlakat Yahuuza fi l-khurba.
[3] Wa hinaak fi balad Baabil gariib le bahar Khaabuur, Allah hajja leyi ana Hizgiyaal wileed Buuzi raajil al-diin. Wa hinaak gudrat Allah gaaʼide foogi.
[4] Wa daahu ana chift riih amzoobaʼaane jaaye min munchaakh. Wa jaabat sahaabaay kabiire muhawwaga be deyy al-tamrug minha barraaga. Wa fi usutha fi cheyy yiraari misil nahaas saafi.
[5] Wa fi lubb al-sahaabaay, chift cheyy al-yichaabih arbaʼa makhluugiin wa chakilhum misil chakil al-insaan.
[6] Wa ayyi makhluug indah arbaʼa wijih wa arbaʼa janaahe.
[7] Wa rijleehum udul wa machchaayaathum misil dalaafe al-ijil wa yiraaru misil nahaas saafi.
[8] Wa tihit ayyi jinh, fiyah iid misil iid insaan. Ayyi naayit min nawaaytah al-arbaʼa indah iid wa wijih wa jinh.
[9] Wa ayyi makhluug, janaaheeh yilammusu maʼa janaahe al-makhluug al-aakhar. Wa wakit al-makhluugiin yamchu, ma yinlaftu wa laakin yamchu adiil giddaamhum.
[10] Wa ayyi makhluug indah arbaʼa wijih. Min giddaam, indah wijih hana insaan wa be l-zeene, indah wijih hana duud wa be l-isra, indah wijih hana toor wa min wara, indah wijih hana sagur.
[11] Wa dool wujuuhhum. Wa ayyi makhluug indah janaahe itneen mumattatiin foog wa yilammusu maʼa janaahe al-makhluug al-aakhar. Wa janaaheeh al-itneen al-aakhariin kamaan, yikhatti beehum jismah.
[12] Wa ayyi makhluug yamchi adiil giddaamah wa yamchi ale l-jiihe al-yamchi aleeha al-ruuh. Wa ma yinlafit wakit hu maachi.
[13] Wa l-makhluugiin dool yichaabuhu jamur hana naar al-tahrig wa yichaabuhu machaahiib al-naar. Wa l-naar di tamchi ambeen al-makhluugiin dool. Wa l-naar di tidawwi wa tamrug minha barraaga.
[14] Wa l-makhluugiin dool yamchu wa yaju be surʼa misil al-barraaga.
[15] Wakit ana gaaʼid nichiif fi l-makhluugiin al-induhum arbaʼa wijih dool, daahu chift jamb ayyi makhluug fiyah ajala fi l-ard.
[16] Wa l-ajalaat biraaru misil sanaʼoohum be hajar khaali wa l-ajalaat al-arbaʼa dool bichchaabaho. Wa masnuuʼiin misil ajala waahide fi lubb ajala aakhara.
[17] Wa wakit yamchu, yagdaro yamchu fi ayyi jiihe bala ma yinlaftu.
[18] Wa daayir hana ayyi ajala, tuulah foog bikhawwif. Wa ayyi daayir muhawwag be uyuun.
[19] Wa wakit al-makhluugiin yamchu, al-ajalaat kula yamchu maʼaahum. Wa wakit al-makhluugiin yinrafʼu foog min al-ard, al-ajalaat kula yinrafʼu.
[20] Wa l-makhluugiin yamchu ale l-jiihe al-yamchi aleeha al-ruuh wa l-ajalaat kula yinrafʼu maʼaahum. Achaan ruuh al-makhluugiin dool gaaʼide fi l-ajalaat.
[21] Wa wakit al-makhluugiin yamchu, al-ajalaat kula yamchu wa wakit yagiifu, al-ajalaat kula yagiifu wa wakit yinrafʼu min al-ard, al-ajalaat kula yinrafʼu maʼaahum achaan ruuh al-makhluugiin dool gaaʼide fi l-ajalaat.
[22] Wa min foog le ruuse al-makhluugiin dool, fi cheyy gawi mafruuch wa hu ajiib, yiraari misil gazzaaz wa gaaʼid min foog le ruuse al-makhluugiin.
[23] Wa tihit al-cheyy al-mafruuch da, ayyi makhluug indah janaahe itneen yilammusu maʼa janaahe al-makhluug al-aakhar. Wa janaaheeh al-itneen al-aakhariin kamaan, yikhatti beehum jismah.
[24] Wa wakit al-makhluugiin maachiin, ana gaaʼid nasmaʼ harakat janaaheehum wa da misil harakat matara tagiile wa misil hiss al-Gaadir wa misil hiss naas katiiriin wa misil harakat deech kabiir. Wa wakit yagiifu, yidallu janaaheehum.
[25] Wa hiss jaayi min foog le l-cheyy al-gawi al-mafruuch al-gaaʼid min foog le ruuse al-makhluugiin.
[26] Wa min foog le l-cheyy al-gawi al-mafruuch, fi cheyy yichaabih arch min hajar hana yaakhuut akhdar. Wa foog al-arch da, fi chakil yichaabih insaan.
[27] Wa min sulbah lahaddi foog, ana chift kadar yiraari misil nahaas saafi wa muhawwag be naar. Wa min sulbah lahaddi tihit, ana chift deyy hana naar muhawwigah min kulli jiihe.
[28] Wa l-deyy al-muhawwigah yichaabih hajjaaz al-matar al-yibiin fi l-sahaab fi yoom al-matar. Wa majd Allah hu misil ke. Wa wakit ana chiftah, wagaʼt be wijhi fi l-ard wa simiʼt hiss gaaʼid yihajji.