[1] Wa Allah hajja leyi wa gaal :
[2] «Wa inta, ya ibn Adam, khanni nuwaah al-hizin le madiinat Suur !
[3] Hajji le Suur al-gaaʼide fi madkhal al-bahar wa titaajir maʼa tujjaar chuʼuub al-jazaayir al-katiiriin wa guul : Daahu Allah al-Rabb gaal : ‹Ya madiinat Suur, inti gulti : “Ana jamiile marra waahid.”
[4] Turaabki fi ust al-bahar wa l-banooki sawwo jamaalki kaamil.
[5] Wa be hatab al-sarwi al-jaayi min Saniir, addalo kulla nawaayitki misil safiina kabiire. Wa be hatab al-arz al-jaayi min Lubnaan khazzo amuudki al-yisabbit chiraaʼki.
[6] Wa iidaanki al-yilizzuuki beehum sawwoohum be hatab al-balluut al-jaayi min Baachaan. Wa magaaʼidki addaloohum // be hatab al-sarwi al-jaabooh min jazaayir Khubrus wa jammalooh be l-aaj.
[7] Wa chiraaʼki al-tilizzah al-riih le tuguudki sawwooh be gumaach mukallaf al-jaayi min Masir wa hu misil raayitki al-yaʼarfuuki beeha. Wa khitaaki min gumaach zahri wa garadi al-jaayi min jaziirat Aliicha.
[8] Wa sukkaan Seeda wa Arwaad bigo leeki khaddaamiin al-yilizzu iidaanki. Wa naaski al-induhum khibra, ya Suur, bigo leeki masaaʼiil al-safiina.
[9] Wa chiyyaab Gibaal al-induhum khibra yiʼaddulu chuguugki. Wa kulla l-sufun al-yuchuggu al-bahar yagiifu fi bakaanki wa rukkaabhum yachru budaaʼitki.
[10] «‹Ya madiinat Suur, rujaal buldaan Faaris wa Luud // wa Liibiya kaano muhaaribiin fi deechki. Wa tawaagiihum hana l-harib wa daraghum, allagoohum fi daraadirki wa yantuuki charaf.
[11] Wa rujaal min Arwaad wa askarki raaykhiin foog fi daraadirki. Wa askar min Gammad hurraas fi buyuutki al-tuwaal // hana l-muraakhaba. Humman allago daraghum fi tuul daraadirki wa sawwo jamaalki kaamil.›
[12] «Ya madiinat Suur, tujjaar Tarchiich taajaro maʼaaki kulli nafar hana khunaaki al-katiir. Wa fi badal budaaʼitki, antooki fudda wa hadiid wa tuuta wa hadiid azrag.
[13] Wa tujjaar al-Yuunaan wa Tuubal wa Maachak kula taajaro maʼaaki. Wa fi badal budaaʼitki, antooki abiid wa muʼiddaat hana nahaas.
[14] «Wa fi badal budaaʼitki, tujjaar Beet Tugarma antooki kheel hana harib wa kheel al-yukurru beehum wa bikhaal.
[15] Wa tujjaar Dadaan taajaro maʼaaki wa jazaayir katiiriin chaarako fi tijaaritki. Wa fi badal budaaʼitki, kaffooki sunuun al-fiil wa hatab hana chadar al-tchaw.
[16] «Wa tujjaar Araam taajaro maʼaaki kulla cheyy al-inti sanaʼtiih be katara. Wa fi badal budaaʼitki, antooki hujaar khaaliyiin wa gumaach garadi wa gumaach mukallaf wa gumaach kattaan wa marajaan wa yaakhuut ahmar.
[17] Wa tujjaar Yahuuza wa balad Israaʼiil kula taajaro maʼaaki. Wa fi badal budaaʼitki, antooki gameh min hillit Minniit wa khalla wa asal wa dihin wa lubaan.
[18] «Wa tujjaar Dimachkh taajaro maʼaaki kulla cheyy al-inti sanaʼtiih be katara. Wa be sabab khunaaki al-katiir, jaabo leeki al-khamar hana Halbuun wa suuf khanam min Sahar.
[19] Wa fi badal budaaʼitki, tujjaar Daan wa l-Yuunaan min Uzaal antooki hadiid madguug wa girfa wa ageeg al-indah riihe.
[20] «Wa tujjaar Dadaan taajaro leeki khita al-yijammulu beyah al-sarij.
[21] Wa l-Arab wa kulla chuyuukh Khidaar taajaro leeki humlaan wa kubchaan wa tuyuus.
[22] Wa tujjaar Saba wa Raʼma kula taajaro maʼaaki. Wa fi badal budaaʼitki, antooki ahsan al-riihe wa ayyi nafar hana l-hujaar al-khaaliyiin wa l-dahab.
[23] «Wa tujjaar Haaraan wa Kinna wa Adan wa Saba wa Achuur wa Kilmad, humman kula taajaro maʼaaki.
[24] Wa taajaro maʼaaki khumaam khaali. Wa fi badal budaaʼitki, antooki khulgaan loonhum zahri wa mukallafiin wa busaataat mulawwaniin wa hubaal madfuuriin gawi.»
[25] «Ya madiinat Suur, sufun kubaar // hana l-tijaara nagalo budaaʼitki. Wa inti malaane wa chaayle tagiil misil safiina fi ust al-bahar.
[26] Khaddaamiinki waddooki fi almi al-khariig wa riih al-sabaah kassaratki fi ust al-bahar.
[27] Wa kulla khunaaki wa budaaʼitki wa tijaaritki wa rukkaabki wa l-yiʼaddulu chuguugki wa l-yitaajuru budaaʼitki wa kulla l-rujaal al-muhaaribiin // fi bakaanki wa kulla l-yilimmu foogki, humman kulluhum al-bahar yaakulhum fi yoom kharagki.
[28] Wa min yasmaʼo korooraak masaaʼiilki, sukkaan khachum al-bahar yarjufu.
[29] Wa khalaas kulla khaddaamiin al-sufun al-aakhariin yanzulu wa l-rukkaab wa masaaʼiil al-sufun yagoodu baʼiid fi l-ard.
[30] Wa yabku leeki wa yasrakho be hizin. Wa yusubbu turaab fi ruuseehum wa yilmarmakho fi l-rumaad.
[31] Wa fi chaanki, yizayyunu ruuseehum wa yalbaso khulgaan al-hizin. Wa yabku leeki be hurga wa yunuuhu min al-hizin.
[32] Wa humman yachku wa yunuuhu fi chaanki. Wa fi hizinhum, yunuuhu wa yuguulu : ‹Yaatu bigi misil Suur al-awwal madiina gawiiye // fi ust al-bahar !›
[33] «Wa wakit yiwaddu budaaʼitki // be l-bahar, inti chabbaʼti chuʼuub katiiriin. Wa be katarat khunaaki wa budaaʼitki, inti khaneeti muluuk al-ard.
[34] Wa hassaʼ, alkassarti fi l-bahar fi l-almi al-khariig. Wa budaaʼitki wa kulla l-yilimmu fi lubbiki khirgo.
[35] Wa kulla sukkaan al-jazaayir anbahato fi chaanki. Wa muluukhum rajafo min al-khoof wa humman barjalo.
[36] Wa l-taajaro maʼaaki min al-chuʼuub saffaro wa alʼajjabo achaan bigiiti masal mukhiif wa waddarti ila l-abad.»