[1] Wa Allah hajja leyi wa gaal :
[2] «Asmaʼ, ya ibn Adam ! Daahu Allah al-Rabb hajja le sukkaan balad Israaʼiil wa gaal : ‹Di hi al-nihaaya ! Al-nihaaya taji fi l-arbaʼa jiihaat hana l-balad.
[3] Wa hassaʼ, jaat nihaayitku intu. Ana nirassil khadabi didduku wa nihaakimku hasab deribku al-chiltuuh wa nihammilku natiijat amalku al-muharram.
[4] Wa ma nichiifku be een al-rahma wa la nihinn foogku achaan nihammilku natiijat deribku al-chiltuuh wa kulla amalku al-muharram yagood fi usutku. Wa be da, taʼarfu kadar ana bas Allah.›»
[5] Wa daahu Allah al-Rabb gaal : «Masiibe, masiibe al-ma fi misilha, di hi jaaye !
[6] Al-nihaaya jaaye ! Aywa, al-nihaaya hi jaaye. Hi gammat didduku wa di hi jaaye !
[7] Wa ikhaabku jaayi, ya sukkaan al-balad ! Wakitku jaayi, al-yoom garrab wa da yoom hana barjaal wa ma hana farah fi l-jibaal.
[8] Wa hassaʼ, gariib ninazzil khadabi foogku min bidaaytah lahaddi nihaaytah. Wa nihaakimku hasab deribku al-chiltuuh wa nihammilku natiijat kulla amalku al-muharram.
[9] Wa ma nichiifku be een al-rahma wa la nihinn foogku achaan nihammilku hasab deribku al-chiltuuh wa kulla amalku al-muharram yagood fi usutku. Wa be da, taʼarfu kadar ana Allah bas darabtuku.
[10] «Wa daahu al-yoom, daahu ikhaabku jaayi ! Al-unuf zaad wa l-istikbaar kitir.
[11] Wa l-unuf gamma wa bigi asa hint fasaala. Ma fi cheyy yifaddil minhum wa harakathum kula tingatiʼ wa katarathum wa jamaalhum kula yabgo ma fiihum.
[12] Wakitku jaayi, al-yoom garrab ! Khalli al-yachri ma yafrah wa l-yibiiʼ ma yahzan achaan al-khadab al-chadiid yidammir kulla naas al-balad.
[13] Wa l-yibiiʼ ma yigabbil le budaaʼtah hatta kan hu hayy kula. Achaan ruʼyat al-muhaakama di kula ma tafchul, hi didd kulla naas al-balad. Wa ayyi naadum yiʼiich fi khataayah wa abadan ma yagdar yinajji nafsah.
[14] Kan yadurbu al-buug wa yijahhuzu silaahhum kula, naadum waahid kula ma yamchi le l-harib achaan khadabi yidammir kulla naas al-balad.
[15] «Barra fi l-kadaade, harib ! Wa daakhal fi l-madiina, waba wa juuʼ ! Ayyi naadum al-fi l-kadaade yumuut be l-harib wa ayyi naadum al-fi l-madiina yumuut be l-waba wa l-juuʼ.
[16] Wa l-faddalo minhum yiʼarrudu wa yajru yillabbado fi l-jibaal. Wa kulluhum yabku be hizin misil gimri al-waadi be sabab khataahum.
[17] Kulla iideehum yinrakhu wa kulla rikabbuhum yumuuʼu.
[18] Wa yalbaso khulgaan al-hizin wa khoof chadiid yakrubhum. Wa l-eeb binchaaf fi wujuuhhum wa kulla ruuseehum, yizayyunuuhum.
[19] Wa yazgulu fuddithum fi l-chawaariʼ wa dahabhum yabga leehum // misil najaasa. Dahabhum wa fuddithum // ma yinajjuuhum fi yoom khadabi ana Allah. Humman ma yagdaro yarwu nufuushum wa la yamlo butuunhum. Dahabhum wa fuddithum al-sawwoohum asnaam bigo sabab khataahum.
[20] Aywa, awwal humman astakbaro be sabab jamaal ziinithum. Wa be ziinithum, sawwo asnaamhum al-muharramiin al-yijiibu leehum al-karaahiiye wa fi chaan da, nisawwi ziinithum nijse.
[21] Wa nisallimha le l-ajaanib wa humman yanhabooha. Wa nantiiha khaniime le aasiyiin al-ard wa ma yajʼalooha.
[22] Wa ana ma niwajjih ale chaʼabi wakit ma yihtarumu beeti al-khaali leyi. Wa saraariig yadkhulu foogah wa ma yajʼalooh mukhaddas.
[23] Sawwi janaaziir achaan al-balad malaane be muhaakamat kattaaliin al-dimam wa l-madiina malaane be l-unuf.
[24] Wa nijiib afsal umam achaan yichiilu buyuuthum. Wa niwaggif istikbaar al-gawiyiin wa bakaanaathum hana l-ibaada yinnajjaso.
[25] Wa daahu al-khoof chadiid jaayi wa humman yifattuchu al-salaam // wa ma yalgooh.
[26] Wa taji masiibe wara masiibe wa khabar cheen wara khabar cheen. Kan yifattuchu ruʼya min nabi kula, ma yalgooha wa raajil al-diin ma yiʼallim churuut al-Tawraat wa l-chuyuukh kula ma induhum choora.
[27] Wa l-malik yahzan wa l-cheekh yibarjil wa iideen al-chaʼab yarjufu. Wa nihaakimhum hasab deribhum al-chaalooh wa nichaariʼhum hasab al-chariiʼa al-sawwooha. Wa be da, yaʼarfu kadar ana bas Allah.»