[1] Wa Allah gaal leyi battaan : «Asmaʼ, ya ibn Adam, chiil diringeelaay wa khuttaha giddaamak wa arsim foogha suurat Madiinat al-Khudus.
[2] Wa fi l-diringeelaay di, wassif hisaar al-madiina wa abni diddaha khanaadig wa radmiiye wa khutt muʼaskar giddaamha wa hawwigha be maraadiis al-yuduggu beehum biibaan al-madiina.
[3] Wa chiil saaja hint hadiid wa khuttaha beenak wa been al-madiina misil durdur. Wa wajjih ale l-madiina wa chiifha. Khalaas hi tilhaasar achaan inta khatteet al-hisaar giddaamha. Wa di alaama le Bani Israaʼiil.
[4] «Wa argud be l-isra wa chiil foogak khata Bani Israaʼiil. Wa tichiil khataahum tuul al-ayyaam al-inta raagid fooghum be nussak da.
[5] Wa ana nagtaʼ leek adad al-ayyaam al-muwaafig le adad al-siniin hana khataahum. Wa be da, tichiil khata Bani Israaʼiil le muddit 390 yoom.
[6] Wa baʼad tikammil al-ayyaam dool, battaan targud be l-zeene wa tichiil foogak khata Bani Yahuuza le muddit 40 yoom. Wa be da, nagtaʼ leek yoom waahid le ayyi sana hana khataahum.
[7] Wa wajjih ale suurat Madiinat al-Khudus al-muhaasara wa midd duraaʼak makchuuf wa atnabbaʼ diddaha.
[8] Wa daahu ana nirabbitak be hubaal achaan ma tagdar tichchaglab min nussak al-waahid ale l-aakhar lahaddi tikammil ayyaam al-hisaar.
[9] «Wa chiil gameh ahmar wa gameh abyad wa lubya wa adas wa dura wa gameh hana l-kadaade wa khuttuhum fi maaʼuun waahid. Wa sawwi minhum khubza al-taakulha fi muddit al-ayyaam al-inta raagid fooghum be nussak wa da le muddit 390 yoom.
[10] Wa aklak al-taakulah da be miiz misil malyit iid itneen fi l-yoom wa da bas yabga aklak fi ayyi yoom.
[11] Wa almi charaabak kula be miiz wa da misil rubuʼ kooro fi l-yoom wa da bas yabga charaabak fi ayyi yoom.
[12] Inta tisawwi kisaar hana gameh abyad al-tisallilah giddaam kulla l-naas fi naar al-mugabbada be huraar hana naas.»
[13] Wa Allah gaal battaan : «Aywa, misil da Bani Israaʼiil yaakulu khubzithum al-munajjasa wakit ana natrudhum wa yamchu fi l-khurba fi ust al-umam.»
[14] Wa ana raddeet wa gult : «Ya Allah al-Rabb, be huraar hana naas ! Abadan ana ma najjast nafsi min ana sakhayyar. Wa lahaddi l-yoom, ana wa la akalt rimme wa la jiife hana haywaan mayyit. Wa fi khachmi, ma dakhkhalt laham fatiis.»
[15] Wa hu gaal leyi : «Kan ke da, khalaas gabbid naarak be baʼar al-bagar fi badal huraar al-naas wa inta sawwi beyah aklak.»
[16] Wa gaal leyi battaan : «Ya ibn Adam, ana nigallil al-maʼaach fi Madiinat al-Khudus. Wa humman yaakulu al-khubza be miiz wa hamm wa yacharbo almi kula be miiz wa khoof.
[17] Wa be da, al-khubza wa l-almi yabgo ma fiihum. Wa ayyi waahid yahzan wa yabtul be sabab khataahum.»