[1] Wa Allah hajja leyi wa gaal :
[2] «Ya ibn Adam, fiyah awiin itneen banaat amm.
[3] Hinna achcharmatan fi balad Masir. Aywa, min subaahin bas hinna achcharmatan. Wa hinaak, allammaso suduurhin wa liʼibo be duyuudhin wakit hinna banaat.
[4] Wa usum al-kabiire Uhuula wa hi timassil madiinat al-Saamira. Wa akhutha usumha Uhuuliiba wa hi timassil Madiinat al-Khudus. Hinna hineeyi ana wa jaaban leyi awlaad wa banaat.
[5] «Wa Uhuula hi hinti wa laakin machat achcharmatat. Hi indaha chahwa le sudgaanha rujaal Achuur jiiraanha
[6] al-laabsiin khulgaan khaaliyiin loonhum zahri. Wa humman hukkaam wa kubaaraat wa kulluhum subyaan al-yaʼajubu al-een wa siyaad kheel.
[7] Wa hi achcharmatat maʼa kulla l-kubaaraat al-muhimmiin hana balad Achuur. Wa hi taabaʼat chahwitha wa najjasat nafisha maʼa kulla asnaamhum.
[8] Wa hi ma khallat charmatatha al-badatha fi Masir wakit liʼibo be duyuudha wakit hi bineeye wa ragado maʼaaha fi subaaha wa tammamo chahwithum.
[9] Wa fi chaan da, ana sallamtaha le sudgaanha min balad Achuur al-leehum hi indaha chahwa.
[10] Humman sallabooha wa khallooha aryaane. Wa chaalo awlaadha wa banaatha. Wa hi kamaan, katalooha be l-seef wa ikhaab chadiid bigi foogha. Wa hi bigat masal le l-awiin.
[11] «Wa akhutha Uhuuliiba chaafat kulla l-cheyy da. Wa laakin be da kula, chahwitha wa charmatatha bigo ziyaada min hana akhutha.
[12] Wa hi indaha chahwa le rujaal Achuur al-humman hukkaam wa kubaaraat wa jiiraanha al-laabsiin khulgaan samhiin. Wa kulluhum siyaad kheel wa subyaan yaʼajubu al-een.
[13] Wa ana chiftaha kadar hi annajjasat wa hinna al-itneen kullihin taabaʼan nafs al-derib.
[14] «Wa battaan Uhuuliiba zaadat fi charmatatha ! Fi durdur, hi chaafat suwar hana rujaal Baabil marsuumiin be buhya hamra.
[15] Ayyi waahid sulbah marbuut be hizaam wa raasah indah kadmuul. Wa kulluhum yichaabuhu kubaaraat al-askar min Baabil, balad al-wildoohum foogha.
[16] Wa min chaafathum bas, chahwitha karabatha ! Wa hi rassalat leehum mursaal fi Baabil le yinaadiihum leeha.
[17] Wa khalaas, al-Baabiliyiin jo leeha wa ragado fi furaachha hana l-hubb wa najjasooha be charmatathum. Wa hi annajjasat maʼaahum wa baʼad da, hi baʼʼadat nafisha minhum.
[18] «Wa wassafat charmatatha wa kachafat ireeha giddaam kulla l-naas. Wa ana baʼʼadt nafsi minha misil baʼʼadt nafsi min akhutha.
[19] Wa hi kattarat charmatatha le tizzakkar ayyaam subaaha wakit achcharmatat fi balad Masir.
[20] Wa hi indaha chahwa le l-mufsidiin al-induhum dakar misil dakar al-humaar wa maniihum misil mani al-juwaad !
[21] «Ya Uhuuliiba, inti gabbalti le fiʼilki al-cheen hana subaaki wakit al-Masriyiin allammaso suduurki wa liʼibo be duyuudki wakit inti sabiiye.
[22] Wa fi chaan da, ya Uhuuliiba, daahu Allah al-Rabb gaal : ‹Akiid nigawwim sudgaanki diddiki, humman nafs al-naas al-baʼʼadti nafiski minhum. Wa ana nijiibhum diddiki min kulla bakaan.
[23] Wa nijiib kulla rujaal balad Baabil min hillaal Faguud wa Chuuʼa wa Khuuʼa. Wa maʼaahum yaju kulla rujaal balad Achuur, humman al-subyaan al-yaʼajubu al-een wa kulluhum kubaaraat wa hukkaam wa kubaaraat askar wa ajaawiid wa siyaad kheel.
[24] Wa yaju diddiki be arabaat al-harib wa kaarrooyaat wa askar katiiriin be darag kubaar wa dugaag wa tawaagi hana harib wa yihaasuruuki. Wa ana nantiihum izin le yihaakumuuki hasab chariiʼithum.
[25] Wa ana ninazzil khadab khiirti foogki wa fi chaan da, humman yiʼaakhubuuki be zaʼal chadiid. Yagtaʼo munkharki wa udneeki wa l-yifaddulu min zurriiyitki yumuutu fi l-harib. Wa humman yichiilu awlaadki wa banaatki wa l-yifaddulu min zurriiyitki, al-naar taakulhum.
[26] Wa humman yisallubuuki wa yichiilu ziinitki.
[27] Wa khalaas, ana niwaggif fiʼilki al-cheen wa l-charmata al-badeetiiha fi Masir. Wa battaan ma tiwajjihi aleehum wa la tizzakkare balad Masir battaan.›»
[28] Wa fi chaan da, daahu Allah al-Rabb gaal : «Ana nisallimki le l-naas al-inti kirihtiihum wa le l-naas al-inti baʼʼadti nafiski minhum.
[29] Wa humman yiʼaakhubuuki be karaahiiye wa yichiilu kulla khumaamki wa yisallubuuki wa yikhalluuki aryaane wa yakchufu ireeki wa fiʼilki al-cheen hana l-charmata.
[30] Wa yiʼaakhubuuki misil da achaan inti achcharmatti wakit taabaʼti al-umam wa najjasti nafiski be asnaamhum.
[31] Wa inti taabaʼti derib akhutki wa be da, inti kula tacharbe min kaas ikhaabi misilha.»
[32] Daahu Allah al-Rabb gaal : «Inti tacharbe min kaas akhutki al-hu khariig wa wasiiʼ. Wa da yijiib leeki dihik wa chamaate achaan al-kaas da malaan.
[33] Taskare wa tahzane achaan al-kaas da malaan be kharaab wa damaar wa da kaas akhutki madiinat al-Saamira.
[34] Laakin inti tacharbeeh wa tikammiliih wa tikassiriih be sunuunki. Wa be chigaffah, tijarrihi duyuudki. Wa da, ana bas gultah.» Wa da kalaam Allah al-Rabb.
[35] Wa fi chaan da, daahu Allah al-Rabb gaal : «Achaan inti nisiitiini wa anteetiini daharki, hassaʼ da alhammale natiijat fiʼilki al-cheen wa charmatatki.»
[36] Wa Allah gaal leyi : «Ya ibn Adam, maala ma tihaakim Uhuula wa Uhuuliiba ? Aywa, haakimhin wa arrifhin be muharramaathin.
[37] Achaan hinna zanan wa katalan dimme. Wa hinna sawwan zina maʼa asnaamhin wa iyaalhin al-wildanhum leyi, gaddamanhum dahiiye muharraga le l-asnaam le yaakuluuhum.
[38] Wa ziyaada min da, fi nafs al-yoom hinna najjasan beeti al-mukhaddas wa ma ahtaraman yoomi hana l-sabt.
[39] Wa wakit dabahan iyaalhin le asnaamhin, fi nafs al-yoom da, dakhalan fi beeti al-mukhaddas wa ma ahtaramannah. Wa da bas al-cheyy al-sawwannah fi lubb beeti.
[40] «Wa battaan rassalan yifattichan rujaal al-yaju min baʼiid. Wa min ligo al-mursaal, al-rujaal dool jo leehin. Wa hinna albarradan wa alkahhalan wa aljammalan leehum be ziinithin.
[41] Wa machan gaʼadan fi sariir jamiil wa giddaamah tarabeeza mujahhaza al-foogha bakhuuri wa dihni.
[42] Wa min bakaanhin, ansamaʼat haraka hint jamaaʼa al-ma induhum hamm. Wa maʼaahum rujaal katiiriin al-jaaboohum min al-sahara. Wa humman dasso suure fi iide ayyi waahide wa khatto leeha taaj jamiil fi raasha.
[43] «Wa khalaas, ana gult : ‹Kikkeef al-awiin al-ajjazan fi l-zina yichcharmatan battaan ! Aywa, hinna charaamiit !
[44] Wa rujaal macho achcharmato maʼa Uhuula wa Uhuuliiba, al-awiin al-fiʼilhin cheen.
[45] Wa laakin fiyah rujaal saalihiin al-yihaakumuuhin be hukum al-awiin al-zaaniyaat wa kattaalaat al-dimam achaan hinna zanan wa katalan dimme.›»
[46] Wa daahu Allah al-Rabb gaal : «Gawwim diddihin jamaaʼa katiiriin ! Khalli yisallumuuhin le l-ruʼub wa yabgan khaniime.
[47] Wa khalli al-jamaaʼa yarjumuuhin wa yigattuʼuuhin lahamaay lahamaay be l-seef. Wa yaktulu awlaadhin wa banaathin wa yiharrugu buyuuthin.
[48] Wa ana niwaggif al-fiʼil al-cheen fi l-balad. Wa kulla l-awiin yalgan daris wa ma yisawwan fiʼil cheen misil al-akhwaat al-itneen deel.
[49] Wa natiijat fiʼilhin al-cheen tagaʼ fi raashin wa yilhammalan al-zunuub al-sawwanhum maʼa l-asnaam. Wa be da, yaʼarfan kadar ana bas Allah al-Rabb.»